1-2 Taa,

ero yimaw Eroces xakn̂e kayaritomo me.

Noro tî Kaan xîkrî komo xera xakn̂e.

N̂examro pen tî nahsîyakn̂e,

nahruyakn̂e marha okwe.

Ciaku pen tî waihkekn̂e okwe kacipara imo ke.

Xuaw yaknonho tî mîk xakn̂e Ciaku pen.

3 Noro pen waihîrî ke tawake takî tî xatken̂e Xutew komo.

Tawake ehtopo komo tî n̂een̂akn̂e Eroces.

Ero ke Petru takî tî nahsîyakn̂e hara.

Wahrututpamnî Tohtopo yimaw tî nahsîyakn̂e.

4 Noro pen takî tî nahruyakn̂e hara.

Sowtatu komo tî nantomekn̂e enîrî poko,

16 ha.

On wara tî n̂esehtînoyakn̂e Eroces,

Watono Ritoponho yenatîche amn̂e Petru tak wîmyasî Xutew komo ya tanme ro so ciitome kr̂a,

kekn̂e tî.

Ero wa tî n̂esehtînoyakn̂e Eroces.

5 Ero ke iito thakwa tî xakn̂e Petru kahrutopo yaw.

Kaan xîkrî komo tko tî nîmtapowatken̂e Kaan yakro noro poko.

Yîtîtmamnî me ro makî tî nîmtapowatken̂e.

6 Ero yinhîrî tak tî on wara kekn̂e Eroces,

On yenmapuche tak Petru pen wîmyasî yîwya so,

kekn̂e tî.

Ero kokmamrî po rma nîwînîkyakn̂e Petru sowtatu komo yotaw,

2 komo yotaw.

Cemeknumiso thakwa tî xakn̂e.

Kuripara ke tî cemeknumiso xakn̂e ececoka.

Mehxa metata mkai xatken̂e anarî kom hara sowtatu komo epatakarî yenîn̂e kom ha tî.

7 Ero wa exitaw so Kporin komo yancun takî tî n̂esenpekn̂e.

Petru mîtwo tî n̂ecececekn̂e.

Potow,

weeyu marha tî n̂esenpekn̂e kahrutopo yaw.

Cei kekn̂e takî tî ancu Petru yawci poko enpakachome.

Yohno awomko,

kekn̂e tî Petru ya.

Ero wa kache tak emeknumitoponhîrî takî tî n̂etîmhokekn̂e Petru yemeknu poi.

8 On wara tî kekn̂e hara ancu yîwya,

Aponon amruko,

ahtarî marha yumunko,

kekn̂e tî yîwya.

Ero ke namruyakn̂e,

numunukyakn̂e marha.

On wara marha tî kekn̂e yîwya,

Apononî mkarino marha amruko.

Amruche amoko oyakro,

kekn̂e tî.

9 Ero ke ancu yakro takî tî cekn̂e Petru kahrutopo yai.

Owosoto mak na tan wai,

kekn̂e thakwa tî Petru.

Ancu warai kyam mak na tan ween̂a,

kekn̂e tî.

10 Cekn̂e rma tko tî ancu yakro.

Tîhyawnonhîrî komo ka wacetken̂e sowtatu komo.

Amn̂e mehxan komo xa hara tî wacetken̂e hara.

Metata yaka takî tî cetken̂e.

Kuripara tî mîn xakn̂e metata yahrutopo.

Ewto yesamarî yakan tî mîn xakn̂e.

Swaa,

tanme ro makî tî n̂etahrunkekn̂e.

Ero ke ero yaro takî tî n̂epataketken̂e.

Esama yaw takî tî cetken̂e moro na mak ha ka.

Ero yimaw,

poku,

cekn̂e takî tî ancu yîhyai.

11 Ancu toche tak twero ro takî tî xakn̂e Petru.

Ai ha,

yaarono xa mîk wenwo ancu.

Tancun xa n̂en̂epew ham Kporin komo ohyaka.

Oyahrunkapo ham Eroces yanme ahruxapunhîrî,

Xutew komo nwaikarî me cehsomînhîrî ha,

kekn̂e tî Petru tîhnaw.

12 Ero ke Petru takî tî cekn̂e Maria mîn yaka.

Xuaw nocwan mîk xakn̂e Maria.

Mahkus kacho rma mîk xakn̂e Xuaw.

Noro nocwan mîn yaka tî cekn̂e Petru.

Yaake tî xatken̂e Kaan xîkrî komo iito noro mîn yaw.

Kaan yakro tî nîmtapowatken̂e.

13 Ero yimaw tak knei knei knei,

kekn̂e takî tî Petru metata poko.

Ero ke metataka takî tî cekn̂e emasî.

Hoce tî mîk xakn̂e emasî yosotî.

Onoke amoro?

kekn̂e takî tî noro Petru ya.

14 Petru ow ha,

kekn̂e ha tî yîwya.

Tawake ro mak takî tî xakn̂e emasî Petru mtapotarî me xa entarî ke.

Ero ke metata yahrunkara rma tî ka xakn̂e tawake cexirî ke.

Mîîmo yaka tî n̂ewomyakn̂e hara Hoce.

Iitono komo ya takî tî n̂ekatîmyakn̂e.

Mînto nasî Petru okyo.

Metata mkai nasî,

kekn̂e tî yîwya so.

15 Okre,

ketken̂e takî tî emasî ya,

mîmtawaimamya kyam mak na,

ketken̂e tî yîwya.

Pîra ha men,

noro xa mîk ha,

kekn̂e tî.

N̂examro tî n̂eyuhtîkekn̂e.

Apohana,

ketken̂e rma tko yîwya,

Ancu mak na mîk menta ha ke,

Petru yakronoman̂e ro ha,

ketken̂e makî tî yîwya.

16 Iito rma tko tî xakn̂e Petru metata mkai rma.

Knei knei knei,

kekn̂e rma tî.

Ero yimaw takî tî metata nahrunketken̂e.

Noro me takî tî n̂een̂atken̂e.

Ero ke n̂eserepoketken̂e ro makî tî iitono komo Petru yenîche.

17 Ero yinhîrî tak poku poku,

kekn̂e Petru tamorî ke.

Ero wa tî yîtîtmamnono n̂iir̂akn̂e.

Yîtîtmamche so tak on wara tî kekn̂e yîwya so,

Oyahrunka tak Kporin komo,

kekn̂e tî.

Tahrunkachonhîrî tî n̂ekatîmyakn̂e yîwya so.

Ekatîmtîkache on wara tî kekn̂e hara yîwya so,

Oyahrunkachonho ekatîmtatko Ciaku ya,

anarî komo ya marha kakno komo ya ha,

kekn̂e tî yîwya so.

Ero yinhîrî anana takî tî cekn̂e.

Ero wa tî xakn̂e Petru.

18 Taa,

enmapuche tak n̂eserepoketken̂e takî tî sowtatu komo Petru yenîn̂enho komo.

Ahna tom hara Petru kopi?

ketken̂e tî.

N̂eserepoketken̂e ro makî tî exihra exirî ke.

19 Ero yimaw takî Petru cma tî re n̂ekpekn̂e Eroces tmaywen komo ya.

Ekîhra rma tî xatken̂e exihra exirî ke.

Ero ke enîn̂enhîrî komo takî tî n̂en̂ekekn̂e Eroces Petru yahsîpînkarî poyero.

En̂ekache tak n̂examro pen takî tî waihkapekn̂e tmaywen komo ya.

Ero wa tî Eroces n̂iir̂akn̂e sowtatu pen komo.

Ero yinhîrî Xuteia poi takî tî cekn̂e Eroces Sesareia pona.

Iito takî tî n̂enmayakn̂e pahkî n̂he.

Ero wa tî xakn̂e Eroces.

20 Taa,

ero yinhîrî on wara takî tî xakn̂e Eroces,

Nîrwonakn̂e takî tî Ciru pono komo poko,

Siton pono komo poko marha.

Ero ke ero pono komo takî tî mokyatken̂e Eroces yakro yîmtapotaxi.

Erewsî yosom me tî xakn̂e Eroces.

Ero ke erewsî pînînke tî mokyatken̂e yîhyaka.

Tmokuche so tak Brastu yakro tî ka nîmtapowatken̂e.

Eroces maywen tî mîk xakn̂e Brastu,

yîmîn yawno ro ha tî.

Tawake tî nîmtapowatken̂e noro yakro.

Ero yinhîrî tak noro yakro takî tî cetken̂e Eroces yaka hara.

Etîxatî me cehcerî hara,

ketken̂e tî Eroces ya.

Ero wa tî ketken̂e yîwya.

21 Ero yimaw tak anarî kaamo takî tî nukuknomekn̂e Eroces yîn̂entarî komo me tîmtapotacho ha.

Ero ke ero po takî tî n̂esenmekyatken̂e mer̂pono pîn komo yîmtapotarî yentachome.

Eroces tî namruyakn̂e kayaritomo me cesenpotopo ro tponon.

Kayaritomo yapon po takî tî n̂eremekn̂e.

Ceremache tak nîmtapowakn̂e takî tî Eroces mohxapu komo n̂entarî me.

22 Yîmtapowataw on wara tî xatken̂e entan̂e komo,

Kaan wara xa mîmtapowasî okre tooto warahra ro mak,

ketken̂e roro tî yîwya.

Kar̂pe tî ketken̂e.

23 Ero yinhîrî rma takî tî Eroces pen waihkekn̂e Kporin komo yancun.

Nakwakn̂e takî tî noro pen oko.

Tow,

waihyakn̂e takî tî.

Ero wa tî Eroces pen waihyakn̂e.

Kaan mak nasî kir̂wan̂he okre,

kahtorî poyero tî noro pen waihkekn̂e Kaan.

24 Miya rma tko tî Kaanî mtapotarî n̂etakpayakn̂e.

Mer̂pono pîn komo tî Kaanî mtapotarî n̂ewehcatken̂e.

25 Ero yimaw takî tî Banabe komo takî tî n̂etîrametken̂e Anciokia pona hara,

Sawru kom ha.

Puranta yan̂enho Xerusaren pona tî n̂etîrametken̂e hara.

Xuaw marha tî naar̂atken̂e iina.

Mahkus kacho rma mîk naar̂atken̂e.

Ero wa tî xatken̂e.