Ero yinhîrî tak tî Xenciu komo yehtopo n̂encetken̂e 12 komo.

Xuteia pono komo marha tî n̂encetken̂e,

Kaan xîkrî komo.

Kaanî mtapotarî tak n̂ewehcatken̂e Xenciu komo,

kacho tî n̂encetken̂e.

2-3 Ero yinhîrî takî tî Petru n̂etîramekn̂e hara Xerusaren pona hara.

Iina epatakache noro takî tî n̂en̂eketken̂e iitono komo.

Xutew komo tî mîkyam xatken̂e en̂ekan̂e komo.

On wara tî ketken̂e yîwya,

Ahce kacho Xutew pîn yaka mîîtoi hara?

Meseresmekn̂e meero tî akro so kica,

ketken̂e tî Petru ya.

4 Ero wa kacho yentache Petru takî tî n̂esekatîmyakn̂e yîwya so.

Kir̂wantaw ti n̂ekatîmyakn̂e cehtoponhîrî.

5 On wara tî kekn̂e yîwya so,

Xope po ka wîxakn̂e.

Kaan yakro kîmtapowakn̂e iito.

Ero wa oyexitaw owosotono ween̂akn̂e poono porin.

Kah yai nîhcekn̂e,

puu tere.

Tawyockem mîn xakn̂e,

eknu poko so yimixapu.

Omîtkoso nîhcekn̂e.

6 Ero yaw ween̂akn̂e mîk hak makî.

Tamopo tîtosom komo,

comota pono komo,

sehrere me tîtosom komo,

tarin̂em komo,

ero yipu komo ween̂akn̂e poono yaw.

7-8 Ero yimaw tak tapota wencekn̂e.

Petru,

ero ha awot ha.

Ero ke etapakî awotî me,

kekn̂e owya.

Pîra,

Apa,

mîk hak tonon̂e pîn ow ha,

kicicitho yonon̂e pîn marha owî,

wîîkekn̂e yîwya.

9 Ero yinhîrî tapota wencekn̂e hara kah yawno rma.

On wara kekn̂e owya,

Kica,

kahra ro mak men esko Kaan nakir̂wamatho poko,

kekn̂e owya.

10 Ero yinhîrî ero wa xa marha kekn̂e hara owya.

3 ro ero wa kekn̂e owya.

Ero wa exiche poono tak n̂etanîmyakn̂e hara kah yaka hara.

Ero wa owosoto ween̂akn̂e,

kekn̂e tî Petru yîwya so.

11 Ero wa enîche rma owya oyan̂ikn̂e komo tak mokyatken̂e mîîmo yaka,

yaw wîxakn̂e ero yaka.

3 mak mokyatken̂e Sesareia poi en̂epexapu.

12 Ero yimaw rma Kaan Yekatî tak nîmtapowakn̂e xa hara oyakro.

On wara kekn̂e owya,

N̂examro yakro etoko rma Petru.

Apohana,

kahra ro mak etoko,

kekn̂e owya.

Ero yanme kîwcekn̂e.

Moxam marha cetken̂e oyakro.

Kakno komo moxam.

6 mak cetken̂e oyakro.

Ero wa amna cekn̂e.

Ewto pona amna yepatakache iitono mîn yaka tak amna n̂ewomyakn̂e.

13-14 Ero yinhîrî takî noro n̂ekatîmyakn̂e amna ya ancu yentoponho tîwya.

On wara kekn̂e amna ya,

Tan wîxakn̂e omîn yaw.

Ero yimaw tak ancu n̂esenpekn̂e owya,

cececetoso xakn̂e omîn yaw.

On wara kekn̂e owya,

Kohn̂er̂u,

amaywen komo en̂epeko Xope pona.

Simaw an̂ikpoko.

Petru rma mîk Simaw.

Noro tak n̂ekatîmyasî amn̂e Kaanî mtapotarî awya.

Awakir̂waman̂e komo yehtopo rma mîn n̂ekatîmyas awya.

Ahyawno komo ya marha n̂ekatîmyasî towtopo komo,

kekn̂e ancu owya,

kekn̂e Kohn̂er̂u owya.

15 Taa,

yîmtapotarî yentache Xesus yehtopo tak wekatîmyakn̂e yîwya so.

Wahra makî ka wekatîmyakn̂e.

Owya ekatîmyataw rma Kir̂wanî ro Yekatî mokyakn̂e pona so.

Pahxa mokyakn̂e kpona so ero wa xa marha mokyakn̂e n̂examro pona hara.

16 Ero wa exitaw so Kporin komo mtapotachonho tak wîhtînoi hara,

Tuuna kwaka makî reha emicinono n̂iir̂akn̂e Xuaw.

Amn̂e Kaanî rma tak awemicinoyaxe so Kir̂wanî ro Yekatî yaka hara,

kachonho wîhtînoi.

17 Ero ke ero wara kachonho yaw roro rma tak Kir̂wanî ro Yekatî nîmye ham yîwya so.

Pahxa nîmyakn̂e kîwya so Kporin komo Xesus Kristu pona een̂ataw kîwya so ero wa xa marha nîmye ham yîwya so hara.

Ahce wa thakwa re Kaan wanwekya owîtho kopi?

Pîra ro mak,

kekn̂e tî Petru Xutew komo ya.

18 Ero yipu yentache tak nîtîtmamyatken̂e makî tî Petru yen̂ekan̂enho komo.

Kir̂wan̂he Kaan nai ham okre,

ketken̂e tak.

Xenciu komo meero tak Kaan n̂iir̂a ham cehtoponhîrî komo poxunkan̂e me waipîn me tak ehtome so n̂examro hara,

ketken̂e makî tî.

Ero wa tî ketken̂e Xutew komo Petru ya.

19 Taa,

on wara takî tî xatken̂e Kaan xîkrî pen komo ero yimaw,

Miya so tî n̂emahciyatken̂e cemetanmekn̂e komo yai.

Kaan xîkrî pîn komo tî n̂examro pen n̂emetanmekyatken̂e thakwa okwe Estepan poyero.

Ero ke Penixa pona tî cetken̂e Kaan xîkrî komo,

Xipre pona marha tî,

Anciokia pona marha tî.

Kaanî mtapotarî tî n̂ekatîmyatken̂e roro tko ahto so na cexitaw so.

Xutew komo ya makî tî n̂ekatîmyatken̂e.

20 Ero yimaw xatken̂e anarî komo,

Xipre pono komo,

Sirene pono komo marha.

En̂exan komo tî cetken̂e Anciokia pona.

N̂examro takî tî n̂ekatîmyatken̂e Kporin komo Xesus pokono iitono komo ya hara.

Kreku yaro tîmtapotaxmu komo ya takî tî n̂ekatîmyatken̂e.

21 N̂examro tî nakronomekn̂e xa Kporin komo.

Ero ke mer̂pono pîn komo takî tî yîmtapotarî komo n̂ewehcatken̂e.

Kporin komo ponaro takî tî xatken̂e.

Ero wa tî n̂examro xatken̂e okre.

22 Ero yinhîrî tak n̂examro yehtopo takî tî n̂encetken̂e Kaan xîkrî komo,

Xerusaren pono kom ha.

Ero ke Banabe takî tî n̂en̂epetken̂e Anciokia pona enîno riso.

Ero ke iina tî noro cekn̂e.

23 Iina cepatakache tak kir̂wan̂he ehtopo komo takî tî n̂een̂akn̂e.

Moxam nakronome Kaan ham okre,

kekn̂e tî n̂examro poko.

Ero ke tawake tî xakn̂e Banabe ero wa ehtopo komo yenîrî ke.

Ero ke tî Kporin komo poko ahworeno n̂iir̂akn̂e.

Kaan ponaro xa ehcoko miya roro,

ahce na aweporîche so,

kekn̂e tî yîwya so.

Ero wa tî kekn̂e Banabe.

24 Kir̂wan tî mîk xakn̂e Banabe.

Kir̂wanî ro Yekatî ken̂e xa tî xakn̂e.

Kaan pona enîn̂e me xa marha tî.

Ero ke mer̂pono pîn komo Kporin komo n̂ewehcatken̂e.

Ero wa tî xatken̂e Anciokia pono komo.

25-26 Ero yinhîrî tak Tahsu pona takî tî cekn̂e Banabe Sawru yeposo.

Noro yenîche tak Anciokia pona takî tî n̂ekyakn̂e.

Iitono komo komo yakro takî tî n̂esenmekyatken̂e,

Kaan xîkrî komo yakro.

Mer̂pono pîn komo tî panatanmekyatken̂e.

Cewn̂e cimn̂ipu tî xatken̂e ero poko.

Ero wa tî xatken̂e Sawru,

Banabe komo.

Ero yimaw takî Kaan xîkrî komo takî tî nosohcetken̂e iitono komo Kristu Yakrono me.

Ero wa osohtono ritopo n̂ihciyatken̂e Anciokia pono komo.

27 Taa,

ero yimaw tak anarî komo takî tî mokyatken̂e hara Xerusaren poi Anciokia pona.

Weronomano rin̂e komo tî mîkyam xatken̂e.

28 Taa,

noro yipu komo yakrono tî xakn̂e Akabu.

Ero wa tî xakn̂e noro yosotî.

Noro takî tî weronomano n̂iir̂akn̂e hara Kaan Yekatî yanme.

On wara tî kekn̂e,

Ai oyakno komo,

Amn̂e takî tî tuuna mokuhra nai pahkî.

Ero ke rooma poko men naxe okwe ahnoro roowo poko hakno komo,

kekn̂e tî yîwya so.

Ero yinhîrî yîmtapotachonhîrî yaw roro rma xakn̂e kayaritomo me exitaw Krawciu.

Rooma poko tak xatken̂e roowo poko hakno komo ero yimaw.

29 Ero ke puranta tîmtopo poko takî tî n̂esehtînoyatken̂e Xesus ponarono komo,

Xuteia pono komo yaka tînarporî komo.

Kaan xîkrî komo purantan yarpo xe tî xatken̂e iitono komo yaka.

On wara tî ketken̂e,

On wara tîmpore nasî puranta,

Mer̂pono pîn yosom komo nîmyatu mer̂pora.

Asak man yosom komo wahra mak nîmyatu,

ketken̂e.

Ero wa tî ketken̂e.

30 Ero ke tî ero wa tupurantanthîrî komo n̂enkayatken̂e.

Enkapuche takî narpetken̂e takî tî Kaan mîn yenîn̂e komo yaka,

Xerusaren pono komo yaka.

Banabe komo ya tî narpetken̂e,

Sawru komo ya.

Ero wa tî narpetken̂e.