Ancu N̂esenpesî Kohner̂u Ya
10
Ero yimaw takî tî Sesareia po xakn̂e sowtatu yantoman̂e,
Kohner̂u tî mîk xakn̂e noro yosotî.
Itar̂a pono komo yantoman̂e tî mîk xakn̂e.
2 Kaan ponarono tî mîk xakn̂e.
Twerî tî xakn̂e Kaan poko.
Ero wa xa marha tî xatken̂e yîhyawno kom hara.
Cesemetanmesom komo wakren̂e ro tî mîk xakn̂e.
Mer̂pora tî nîmyakn̂e yîwya so.
Kaan yakro tîmtapotaxmu roro marha tî mîk xakn̂e.
Noro yipu tî mîk xakn̂e Kohner̂u.
3 Noro ya takî tî Kaan yancun n̂esenpekn̂e.
Wosowakn̂e makî tî.
Kir̂wantaw rma tko tî n̂een̂akn̂e.
3 to kaamo exitaw tî n̂esenpekn̂e yîwya.
Yîhyaka tî mokyakn̂e ancu.
On wara tî kekn̂e yîwya,
Ai Kohner̂u,
kekn̂e tî.
4 Ancu wece takî tî n̂entîkekn̂e Kohner̂u,
n̂eraswakn̂e.
Ahce Apa,
kekn̂e takî tî yîwya.
Ero wa kache ancu tî kekn̂e hara,
Kohner̂u,
takro amtapotacho ponaro tî nai Kaan.
Cesemetanmesom komo wakretopo ponaro marha tî nai awya.
5 Ero ke amaywen komo tak en̂epeko Xope pona Simaw yan̂ihso.
Petru rma mîk noro yosot hara.
6 Simaw yaw nasî tosoken yaw rma.
Paaka picho pokono mîk Simaw.
Tuuna imo yecihtawno mîk ha.
Noro yaw nai Petru.
Noro tak an̂ikpoko.
Noro tak apanatanmekyasî amn̂e ahyaka tmokuche,
kekn̂e tî yîwya.
Ero wa tî kekn̂e ancu Kohner̂u ya.
7 Ero wa kache takî tî ancu cekn̂e hara.
Ero ke tak tanton komo takî tî nan̂ikyakn̂e Kohner̂u,
2 mak.
Sowtatu marha tî nan̂ikyakn̂e cewn̂e,
Kaan ponarono xa marha.
8 N̂examro ya takî tî n̂ekatîmyakn̂e ancu yesenpotoponho.
Ekatîmche n̂examro takî tî n̂en̂epekn̂e Xope pona.
Ero wa tî n̂en̂epekn̂e.
Tootî Pîn N̂een̂asî Petru
9 Taa,
enmapuche hara esama yaw cetken̂e rma Kohner̂u maywen komo.
Xope pahnoke takî tî xatken̂e.
Iito rma tî xakn̂e Petru Simaw mîn yaw rma.
Kamarakataw takî tî Petru kainakn̂e mîîmo kanahtaka capahno pona.
Kaan yakro yîmtapotaxi tî cekn̂e iina.
10 Iito cexitaw tak nîromanakn̂e.
Tînahrî xe xa tî xakn̂e.
Yînahrî ciir̂ataw wosowakn̂e takî tî Petru.
11-12 On warai tî n̂een̂akn̂e,
kaapu tî n̂een̂akn̂e tahrunkaxi.
Ahrunkaxapu yaro tî nîhcekn̂e poono porin.
Tawyockem tî mîn xakn̂e poono,
eknu poko so yimixapu.
Roowo pona roro tî nîhcekn̂e yîhyaka,
puu tere.
Ero yipu yaw takî tî xakn̂e mîk ha mak,
tamopo tîtosom komo,
comota pono ro komo,
sehrere me tîtosom komo marha,
tarin̂em komo marha,
ero warai komo tî Petru n̂een̂akn̂e tawyockem yaw.
13 Ero yimaw takî tî Kaanî mtapotarî n̂encekn̂e Petru.
On wara tî kekn̂e Kaan,
Petru,
noro etapakî awot ha,
kekn̂e tî yîwya.
14 Pîra,
Apa,
kekn̂e takî tî Petru.
Mîk hak yonon̂e pînî ro mak ow,
kicicitho yonon̂e pîn marha kica,
kekn̂e tî.
15 Kaanî mtapotarî takî tî n̂encekn̂e hara.
On wara tî kekn̂e,
Kica,
kahra ro mak esko Petru Kaan nakir̂wamatho poko,
kekn̂e tî.
16 Ero wa kacho yentache tak ero wa xa marha tî kekn̂e hara yîwya.
3 ro tî ero wa kekn̂e Petru ya.
Ero yinhîrî takî tî poono n̂etanîmyakn̂e kah yaka hara.
Ero yipu tî Petru n̂een̂akn̂e.
17-18 Ero ke n̂eserepokekn̂e takî tî Petru.
Ahce kacho ero yipu n̂enpo Kaan owya?
kekn̂e tî tîropotaw.
Ero wa eserepoketaw rma tî Kohner̂u maywen komo tak xatken̂e Simaw wacan potaw.
Ewto pona cepatakache so tî ka Simaw mîn n̂epor̂atken̂e.
Enîche on wara tî ketken̂e,
Ai,
tan tî nai Simaw Petru.
Exihra katî nai?
ketken̂e tî.
Ero wa tî ketken̂e.
19-20 Ero yimaw mîîmo meretwo rma tî ka xakn̂e Petru.
Ahce pokono mîn n̂enpo owya kopi?
kekn̂e rma tî ka.
Ero yimaw takî tî Kaan Yekatî takî tî kekn̂e hara yîwya,
Ai Petru,
awan̂ikn̂e komo mohcow iina osorwaw.
Ahtoko xe ka.
Akro so tak etok ha.
Apohana,
kahra ro mak etoko akro so.
Oyanme mohxapu mîkyam,
kekn̂e tî Kaan Yekatî yîwya.
21 Ero ke Petru takî tî nîhcekn̂e.
Iito tî Kohner̂u n̂en̂epetho komo n̂een̂akn̂e.
Ai,
kekn̂e tî yîwya so,
Petru ow ha an̂eporîrî komo rma.
Ahna wa mîmohcow ha?
kekn̂e tî yîwya so.
22 Ero ke on wara tî ketken̂e Petru ya,
Sowtatu yantoman̂e amna n̂en̂epei.
Kohner̂u mîk noro yosotî.
Kir̂wan mîkî,
Kaan ponarono xa.
Xutew komo rma nîhtînoyaxe kir̂wan̂he noro yehtopo.
Noro ya tî n̂esenpekn̂e Kaan yancun.
Petru tak an̂ikpoko yîmtapotarî yentachome awya,
kekn̂e tî ancu yîwya.
Ero ke aaka amna moko,
ketken̂e Petru ya.
23 Taa,
ewomcoko ka xiya,
kekn̂e tî Petru yîwya so.
Tan ka awîncoko,
kekn̂e tî.
Ero ke enmapuche Petru takî tî cekn̂e akro so.
Anarî komo marha tî cetken̂e akro so.
Xope pono komo tî mîkyam cetken̂e,
Kaan xîkrî kom ha tî.
Ero wara tî cetken̂e.
Kaanî Mtapotarî N̂ekatîmyasî Petru
24 Taa,
enmapuche xa hara tî Sesareia pona takî tî n̂epataketken̂e Petru komo.
Kohner̂u mîn yaka tî cetken̂e.
Iito tî xakn̂e noro Petru momokrî poko.
Yaake rma tî xatken̂e iito Kohner̂u nan̂ikîtho komo.
Tîyanan komo tî nan̂ikyakn̂e,
takrono komo marha tî.
Ero ke tî mokyatken̂e Petru yentaxi.
25 Ero yinhîrî tak Kohner̂u mîn yaka takî tî n̂ewomyakn̂e Petru.
Metataw rma tî Petru n̂esepor̂akn̂e Kohner̂u yakro.
Noro tko tî n̂eremekn̂e tosokmuru po Petru yamrinaka.
Noro poko tî nahwowakn̂e.
26 Nanîmyakn̂e hara tko Petru.
On wara tî kekn̂e yîwya,
Awomko ha.
Tooto makî reha ow awarai xa marha,
kekn̂e tî yîwya.
27 Kohner̂u yakro yîmtapowataw rma mîîmo yaka tî n̂ewomyatken̂e.
Iito takî tî yaake n̂een̂akn̂e Petru,
esenmexapu komo.
Ero wa tî n̂een̂akn̂e.
28 Ero ke on wara takî tî kekn̂e Petru yîwya so,
Xutew ow ha.
Anarî rowon pono komo reha amyamro.
On wara kesî amna panatanmetopo,
Xenciu komo yakrono me exihra ehcoko.
Yîmîn yaka marha tohra ehcoko,
kesî amna panatanmetopo.
Mencexe marha wa amyamro ero wara amna panatanmetopo.
Anarî me tko opanatanmekye hara Kaan.
On wara kai owya,
Kîxawyakanî ro komo mak mîkyam,
kahra ro mak esko tooto poko.
Kicicitho me cehsom ro mîkyam kica,
kahra marha esko tooto poko,
kekn̂e owya.
29 Ero ke oyan̂ikn̂e komo yakro kmokye.
Awanwekîra ro mak kmokye.
Ero ke ahce kacho ow man̂ikpetken̂e,
kekn̂e tî Petru yîwya so.
30 On wara tî Kohner̂u n̂eyukyakn̂e,
Kokon̂oro mak wîxakn̂e tan omîn yaw.
4 ro mak n̂enmapu oroto ero wa oyehtoponho.
3 to exitaw kaamo tan wîxakn̂e,
Kaan yakro kîmtapowakn̂e.
Ero wa omtapowataw rma tooto tak n̂esenpoi owya.
Tîroromutwe xakn̂e noro ponon kopi.
Oyepatai n̂ececetoi.
31 Kohner̂u,
kekn̂e owya,
amtapotarî n̂encesî Kaan.
Cesemetanmesom komo wakrerî marha n̂een̂as awya,
kekn̂e owya.
32 On wara marha kekn̂e owya,
Amaywen komo en̂epeko Xope pona.
Simaw an̂ikpoko,
Petru kacho rma mîk noro ha.
Anarî hara Simaw nai iito paaka picho pokono.
Tuuna yecihtawno mîk ha.
Noro yaw nai Petru anan̂ikporî ha,
kekn̂e owya.
33 Ero ke ero yimaw rma awan̂ikn̂e komo wen̂epekn̂e.
Kir̂wan̂he nasî owya amokrî.
Ero ke amna moko amtapotarî yentaxi.
Yaake mohcow.
Kaan yakan me rma amna moko.
Ero ke Noro mtapotarî cma re mekatîmyasî amna ya.
Ero wa kacho men ekatîmko yîwya so,
kacho yentatîka xe nas amna,
kekn̂e tî Kohner̂u yîwya.
34-35 Taa,
on wara takî tî kekn̂e Petru,
Kaan yehtopo tak wîhtînoyasî.
Etîme re kenîn̂e Mîk ham Kaan.
Kîpînîn yawno me re nai ham.
Mîk hak rowon pono nahsîya ham tîmxîkrî me.
Tponarono komo,
kir̂wan komo marha,
ero warai komo nahsîya ham tîmxîkrî me.
36 Taa,
kokon̂oro tak Kaan nîhtînomexpekn̂e tîmtapotarî Ixaw Yana komo ya.
Tawake tak nasî Kaan kpoko so Xesus Kristu pona een̂ataw tak kîwya so,
kacho nîhtînomexpekn̂e.
Kporin komo Mîkî,
miyan komo Porinî rma.
37 Ero wa kacho rma mencetken̂e amyamro.
Miyan komo ya rma n̂ekatîmyatken̂e ekatîmn̂e komo.
Karireia pono komo ya tî ka n̂ekatîmyatken̂e.
Ero yinhîrî Xuteia pono komo ya marha tî n̂ekatîmyatken̂e.
Pahxa ka Xuaw xakn̂e ekatîmn̂e me.
Kemicitopo poko n̂ekatîmyakn̂e noro reha.
38 On wara kacho n̂ekatîmyatken̂e ekatîmn̂e komo,
Kir̂wanî ro Mîk Xesus Nasare pononho.
Kir̂wanî ro Yekatî n̂iir̂akn̂e Kaan yîropotaka.
Kar̂pe ro mak Xesus n̂iir̂akn̂e.
Noro yipu tak n̂etar̂akn̂e tanhamya akronomano rirî poko.
Ciabu nîwîrîmatho komo nakir̂wamekn̂e roro.
Ero wa ciino n̂iir̂akn̂e roro Xesus takronomarî ke Kaan ya,
kacho n̂ekatîmyatken̂e.
39-40 Amna rma wa n̂een̂akn̂e akronomano rirî yîwya.
Xutew komo chere ro cetaw n̂een̂akn̂e amna,
Xerusaren po exitaw marha n̂een̂akn̂e amna.
Noro yipu rma tko iitono komo waihketken̂e tak okwe.
Weewe pona namowetken̂e oko.
Noronhîrî rma tko Kaan n̂enpakekn̂e hara 3 ro enmapuche mak.
Enpakaxapu tak n̂enpekn̂e hara Kaan amna ya.
Kir̂wantaw amna n̂een̂akn̂e.
41 Miyan komo ya rma tko enpora xakn̂e Kaan.
Pahxa tînmen̂ekathîrî ya mak n̂enpekn̂e,
amna ya mak ha.
Noro yakro rma amna n̂eseresmekn̂e enpakaxapu yakro rma.
42 Ero yimaw tak amna nantomekn̂e Xesus cekatîmtopo poko.
On wara kacho yekatîmso etocoko,
kekn̂e amna ya,
Ken̂ekan̂e komo me nasî Xesus amn̂e.
Waipîn komo yen̂ekan̂e me nasî,
waixapu komo yen̂ekan̂e me marha nasî.
Ero warai me Kaan n̂iir̂akn̂e,
kacho yekatîmso etocoko,
kekn̂e amna ya.
43 Xesus pokono n̂ekatîmyaxe weronomano rîn̂e komo ahnoro.
On wara kexe,
Xesus yosotî pona een̂ataw awya so,
Noro pona een̂ataw xa,
Kaan tak nîhcamnoyasî kicicme awehtoponhîrî komo,
kexe marha,
kekn̂e Petru.
44 Taa,
ero poko yîntapowataw rma Petru Kir̂wanî ro Yekatî takî tî mokyakn̂e pona so,
yîmtapotarî yentan̂e komo pona.
45-46 Ero wa exirî komo takî tî n̂een̂akn̂e Petru yakro mohxapu komo.
Xutew komo tî mîkyam xatken̂e,
Xesus pona enîn̂e komo.
N̂eserepoketken̂e ro makî tî n̂examro.
On wara tî ketken̂e,
Xenciu komo ya ma Kaan nîmya Kir̂wanî ro Yekatî?
Nîmya ro mak ham yîwya so,
ketken̂e tî iitono komo poko.
Anarî ro komo mtapotarî yaro yîmtapotarî komo tî n̂encetken̂e.
Kir̂wan̂he xa Kaan nai ham okre,
kacho marha tî n̂encetken̂e yîmtapotarî komo.
Ero ke tî n̂eserepoketken̂e ro mak.
47 Ero yimaw takî tî Petru nîmtapowakn̂e hara.
On wara tî kekn̂e yîwya so,
Ahce wa tak moxam cirpore nai?
Emicinopîra tatu awya so?
Moxam ropotaka tak moko ham Kir̂wanî ro Yekatî kwara so xa marha.
Ero ke cemicinopore rma nai owya.
48 Ero ke emicinono tak ciicoko Kporin komo yakrono me ehtopo komo yenpotome,
kekn̂e tî.
Ero wa tî kekn̂e Petru Kohner̂u mîn yaka mohxapu komo poko.
Taa,
cemiciche so tak on wara tî ketken̂e n̂examro Petru ya,
Tanî rma cma re ka menmayasî amna yaw,
ketken̂e tî.
Ero ke iito rma tî ka n̂enmayakn̂e Petru asakî ro mak.
Ero wa tî xakn̂e.