Taa,

ero yimaw on wara takî tî xakn̂e Sawru,

Kporin komo ponarono komo waihkacho poko tî nîmtapocetîkekn̂e okwe.

Xesus ponarono komo kr̂a tahsîpore nasî waihkachome,

kekn̂e roro tî mîk hak ya.

Ero yimaw marha Tamasku pona tîto xe takî tî xakn̂e hara.

Ero ke Kaan yaka cewomsom yaka tî cekn̂e.

2 Apa,

kekn̂e tî yîwya,

Tamasku pona owto xe was amn̂e.

Ero ke cma re akaritan mîmewresî enmekno rin̂e komo n̂enîrî,

iitono komo n̂enîrî.

On wara kacho cma re mîmewresî,

Yarî cesî Sawru anarme tpanatnmetopo komo pona etowxapu komo yahsîso.

Noro yipu komo yenîche noro n̂ekpe tak xiya Xerusaren pona.

Cemeknumiso n̂ekpe kîrkomo,

wooxam komo marha,

kacho cma re mîmewresî.

Tamasku pono komo ya on̂enporî mîn mîmewresî,

kekn̂e tî Sawru.

Ero wa tî kekn̂e Kaan yaka cewomsom ya.

3 Ero yinhîrî tak Tamasku yesamarî yaw takî tî cekn̂e Sawru.

Esama yaw rma exitaw ewto pahnoke weeyu imo takî tî n̂esenpekn̂e yîwya oco.

Kah yawno tî mîn n̂esenpekn̂e.

Roowo tî weipekn̂e noro mamhoko.

Ero warai tî n̂esenpekn̂e kopi.

4 Ero ke takî tî Sawru n̂epîrkekn̂e roowo pona.

Tooto mtapotarî warai tî n̂encekn̂e.

On wara tî kekn̂e yîwya,

Ai Sawru,

Sawru,

ahce kacho Ow memetanmekya ha?

kekn̂e tî yîwya.

5 Yîmtapotarî yentache tak on wara tî n̂eyukyakn̂e Sawru,

Onoke Amoro Apa kopi?

kekn̂e tî.

Xesus Ow ha an̂emetanmekrî rma,

kekn̂e esenpoxapu.

6 N̂esekatkekn̂e ro makî tî Sawru,

tatanakn̂e mak.

On wara tî kekn̂e,

Apa,

ahce poko oyexi xe mai ha?

kekn̂e tî.

On wara tî n̂eyukyakn̂e Xesus,

On wara wîîkes awya,

awomko tak ha.

Tamasku pona rma etok ha.

Iito awexitaw tak tooto mokyasî ahyaka.

Poko awehtopo tak n̂ekatîmyasî noro awya,

kekn̂e tî yîwya.

Ero wa tî kekn̂e Kporin komo Sawru ya.

7 Iito rma tî xatken̂e Sawru yakrono komo,

n̂ecececetken̂e makî tî.

Tîtken̂e makî tî xatken̂e.

Tapota rma tî re n̂encetken̂e.

Tîmtapotaxmu yenîhra rma tî xatken̂e.

Ero wa tî xatken̂e.

8 Ero yinhîrî takî tî piiri nawomyakn̂e Sawru.

Cewke cma re xakn̂e.

Enîhra thakwa rma tko tî xakn̂e okwe.

Ero ke aporî poko takî tî noro naar̂atken̂e akrono komo Tamasku pona.

9 Ero ke iito tî xakn̂e Sawru.

Osorwaw ro tî kokmamyakn̂e ewuhra rma thakwa.

Ero wicakî xa marha tî eseresmara xakn̂e,

wooku yerîhra marha tî xakn̂e.

Ero wa tî xakn̂e Sawru.

10 Taa,

Tamasku po rma tî xakn̂e Xesus ponarono.

Ananiasî tî mîk xakn̂e noro yosotî.

Noro ya takî tî n̂esenpekn̂e hara Kporin komo.

Ananias,

kekn̂e tî yîwya,

Ananias.

Ai,

kekn̂e takî tî noro,

ahce wa ka xe mai owya Apa?

kekn̂e tî.

11 On wara tî kekn̂e Kporin komo yîwya,

Ananias,

esama yaw tak etok ha,

Patawno,

kacho yaw.

Iito nasî mîîmo,

Xutas mîn.

Noro yaka etok ha.

Noro ya tak kasko on wara,

Ahto tî nai Sawru Tahsu pono?

kasko yîwya.

Oyakro tîmtapotaxmu me tak nai noro.

12 Tooto n̂enwo noro twosoto,

Ananias,

mîkro,

kacho marha n̂enta.

Tmeretîyahsîrî marha tî n̂enwo awya cewke tak cehtome hara.

Ero wa awenwo twosoto Sawru.

Ero ke etok ha yîhyaka,

kekn̂e tî Kporin komo Ananias ya.

13 Kopi,

kekn̂e takî tî Ananias,

kopi.

On wara tko kexe tooto komo noro poko,

Apa.

Kaan xîkrî komo yemetanmekn̂e ro mak mîk kopi,

Xerusaren pono pen komo yemetanmekn̂e ha,

kexe mer̂pono pîn komo noro poko kopi.

14 Ero wa ciino riso xa hara tî mokye oona amna cheka hara.

Apona enîn̂e komo yahsîso noro mohtopo wencesî.

Tîmsom pokono yenîn̂e komo karitan marha tî nai yîhyaw,

Ahnoro Xesus ponarono komo n̂emeknumipe moso,

kacho ha.

Ero wece mohxapu tî mîk kopi,

kekn̂e takî tî Ananias Kaan ya.

15 Yîmtaka tko tî n̂eyukyakn̂e Kporin komo on wara,

Etoko rma,

onmen̂ekatho rma mîk ha.

Oyekatîmn̂e me tak nasî noro amn̂e.

Xenciu komo ya oyehtopo n̂ekatîmyasî,

kayaritomo komo ya marha,

Ixaw Yana komo ya marha,

ero warai komo ya n̂ekatîmyas amn̂e oyehtopo.

16 Emapona roro awahwokacho chew mas amn̂e,

oyehtopo yekatîmrî poyero masî ero yipu chew,

kacho marha yîhtînomexpo xe wasî yîwya,

kekn̂e tî Kporin komo Ananias ya.

17 Ero ke n̂ewehcakn̂e takî tî Ananias.

Xutas mîn yaka tî cekn̂e.

On wara tî kekn̂e Sawru ya,

Oyakno Sawru,

awenso kmoko.

Kporin komo Xesus yanme tan kmoko.

Esama yaw n̂esenpekn̂e awya Noro yanme rma tan kmoko awenso.

Awewtanîretome hara oyen̂epew,

Kaan Yekatî ken̂e awitome marha,

kekn̂e tî Anan̂ias yîwya.

18 Ero wa kache rma takî tî Ananias ya Sawru yewru yahrutoponho tak n̂epîrkekn̂e yîpîpîthîrî warai.

Ero ke n̂een̂akn̂e hara,

n̂etar̂akn̂e marha.

Ero yimaw rma takî tî n̂emihcakn̂e.

19 Ero yinhîrî takî tî n̂eseresmekn̂e kar̂pe cehtome hara.

Iito rma tî ka xakn̂e yaake kaamo Tamasku po rma ha ka.

Xesus ponarono komo yaw rma tî n̂enmayakn̂e.

Ero wa tî xakn̂e Sawru.

20 Ero yinhîrî on wara takî tî xakn̂e Sawru,

Xutew yesenmetopo yaka so tî cekn̂e yohno rma Kaanî mtapotarî yekatîmso.

Kristu poko takî tî n̂ekatîmyakn̂e esenmexapu komo ya.

Kaan Mumuru xa Mîk ha Xesus,

kekn̂e roro tî yîwya so.

21 Yîmtapotarî yentache tak n̂eserepoketken̂e ro makî tî entan̂e komo.

Onoke moso n̂ekatîmya Xesus poko hara?

ketken̂e tî.

Xesus yosotî ponarono komo waihkan̂enho mexe re moso ha ta,

Xerusaren pono pen kom ha.

Noro yipu komo wece mohxapu cma re moso oona hara.

Tîmsom pokono yenîn̂e komo yaka kr̂a waar̂asî Xesus ponarono komo.

Cemeknumiso kr̂a waar̂asî,

kan̂enho cma ha re mîkro,

ketken̂e tî Sawru poko yîmtapotarî yentan̂e komo.

22 Kaanî mtapotarî yekatîmn̂e me xa takî tî n̂ehtîkekn̂e Sawru.

Miya xe xa tî n̂ekatîmyakn̂e.

Xutew komo yopono me tî nîmtapowakn̂e Xesus poko,

Tamasku pono komo yopono me.

Kristu xa Mîk Xesus,

kekn̂e tî noro emtayar̂mapon me ro mak.

23 Pahkî exiche tak on wara takî tî xatken̂e Xutew komo Sawru poko,

noro waihkacho poko takî tî n̂esencetken̂e okwe.

24 Cesentache so tak ewto metatan mîtkoso takî tî Sawru momokyatken̂e etapachome tak ha tî re.

Katpanaw tî momokyatken̂e,

kosope marha tî.

N̂encekn̂e rma tko tî Sawru tmomohtopo yîwya so.

25 Ero ke Sawru takî tî n̂enîhcetken̂e Xesus ponarono komo.

Waaca mkai tî n̂enîhcetken̂e.

Kosope rma tî n̂enîhcetken̂e kahxapu yaw,

tawyockem yaw.

Ero wa tî Sawru n̂enîhcetken̂e totohme tak.

26 Ero ke Xerusaren pona takî tî cekn̂e hara Sawru.

Iito tak Xesus ponarono komo yakro cesenmekî xe tî xakn̂e.

N̂eraswatken̂e tko tî noro pona.

Xesus ponarono pîn me tî nîhtînoyatken̂e.

27 Iito tko tî xakn̂e Banabe.

Noro takî tî Sawru naar̂akn̂e 12 komo yaka.

Sawru yehtopo tî n̂ekatîmyakn̂e yîwya so.

On wara tî kekn̂e yîwya so,

Tamasku pona moso cetaw Kporin komo rma tî n̂esenpekn̂e yîwya.

Nîmtapowakn̂e marha tî akro.

Ero yinhîrî takî tî Tamasku po rma ka cexitaw moso n̂ekatîmyakn̂e Xesus pokono.

Erasîra ro makî tî n̂ekatîmyakn̂e,

kekn̂e tî.

Ero wa tî Sawru yehtoponho n̂ekatîmyakn̂e Banabe yîwya so.

28 Ero ke 12 komo yakrono me takî tî xakn̂e Sawru.

Tanhamya takî tî n̂etar̂akn̂e n̂examro yakro.

Xerusaren po tî n̂enmayakn̂e.

29 N̂ekatîmyakn̂e xa hara tî iitono komo ya hara.

Kporin komo Xesus yehtopo tî n̂ekatîmyakn̂e.

Erasîn me ro makî tî kekn̂e.

Kreku yaro tîmtapotaxmu komo ya tî n̂ekatîmyakn̂e.

Nîrwonatken̂e tko tî n̂examro noro poko.

Waihka xe takî tî xatken̂e okwe.

Ero wa tî xatken̂e okwe.

30 Sawru waihka xe ehtopo komo tko tî n̂encetken̂e Kaan xîkrî komo.

Ero ke noro naar̂atken̂e Sesareia pona.

En̂exa takî tî n̂en̂epetken̂e hara Tahsu pona hara.

Ero wa tî Sawru n̂en̂epetken̂e.

31 Ero yimaw tak Kaan xîkrî komo yemetanmekn̂e exihra takî tî xakn̂e okre.

Cepanatanmetopo komo poko makî takî tî xatken̂e.

N̂epamyatken̂e takî tî Kaan xîkrî komo.

Kaan ponaro xa tî xatken̂e.

Kir̂wanî ro Yekatî marha tî ahworeno n̂iir̂akn̂e.

Ero wa tî xatken̂e Kaan xîkrî komo ahnoro Xuteia pono kom ha.

Karireia pono komo marha tî ero wa xatken̂e,

Samaria pono komo marha tî.

Ero wara tî xatken̂e.

32 Taa,

ero yimaw on wara takî tî xakn̂e Petru hara,

mîk hak chere tî cekn̂e.

Ero wa tîcetaw anarî pona takî tî cekn̂e hara,

Rita pona tak.

Kaan xîkrî komo yenso tî cekn̂e iina.

33 Iito cexitaw tak pokumnî ro takî tî n̂een̂akn̂e.

Eneias tî mîk xakn̂e noro yosotî.

Kama po makî tî xakn̂e okwe.

Pahkî tî xakn̂e ero wa,

8 cimn̂ipu tî.

34 Noro yenîche on wara tî kekn̂e Petru yîwya.

Ai Eneias,

Xesus Kristu tak akarices hara oroto.

Ero ke awomko tak ha.

Awamthîrî marha amomiko,

kekn̂e tî yîwya.

Ero ke sai,

nawomyakn̂e takî tî yohno rma.

Kar̂pe takî tî xakn̂e hara ero yimaw rma okre.

35 Ero yinhîrî noro takî tî n̂een̂atken̂e iitono komo Rita pono komo,

Sarona pono komo marha.

Ero ke Kporin komo pona takî tî n̂een̂atken̂e.

Ero wa tî xatken̂e iitono komo.

36 Taa,

meyehra tî xakn̂e anarî hara ewto,

Xope tî mîn xakn̂e ero yosotî.

Ero po tî xakn̂e wooxam,

Xesus ponarono.

Tamita tî mîk xakn̂e noro yosotî.

Tohkasî,

kacho tî moro,

Tamita,

kacho.

Wakreno rin̂e ro tî mîk xakn̂e okre,

akronomano rin̂e ro marha.

Ero warai tî mîk xakn̂e Tohkasî.

37 Noro takî tî namotoyakn̂e okwe.

Waihyakn̂e thakwa takî tî okwe.

Ero ke noro pen yokoputho koroketken̂e.

Korokache tak mîîmo yaka takî tî naar̂atken̂e epoyino yaka.

38 Ero yimaw takî tî Petru yekaci n̂encetken̂e iitono komo Xesus ponarono komo.

Mînto tî nai Petru Rita po ha,

kacho tî n̂encetken̂e.

Meyehra nai Rita Xope poi.

Ero ke Petru yan̂ikn̂e komo takî tî n̂en̂epetken̂e asakî.

Ero ke n̂examro tî cetken̂e.

Rita pona cepatakache so Petru ya takî tî ketken̂e,

Ai Petru,

Xope pona cma re ka mîmokyasî ecmamra ro makî,

ketken̂e tî yîwya.

39 Ero ke takî tî cekn̂e Petru.

Ewto pona epatakache takî tî noro naar̂atken̂e iitono komo mîîmo yaka,

epoyino yaka.

Iito tî xatken̂e wooxam komo.

Iin̂o waixapu komo re tî mîkyam xatken̂e.

Nîwracetken̂e thakwa tî.

Poono tî n̂enpetken̂e Petru ya,

Tohkasî pen natpotho ha.

Enko xe yînatpothîrî.

Kar̂pe ka cexitaw onî mko natpekn̂e,

ketken̂e tî yîwya.

Ero wa tî ketken̂e Petru ya.

40 N̂examro tko tî n̂en̂epekn̂e Petru amtakpo yai.

Ero yinhîrî tosokmuru po takî tî n̂eremekn̂e.

Kaan yakro tî nîmtapowakn̂e.

Okopu wece takî tî n̂etaknamekn̂e.

Tamita,

awomko tak ha,

kekn̂e tî yîwya.

Ero wa kache tak n̂eewakn̂e takî tî wooxam.

Petru tî n̂een̂akn̂e,

tîhkaw marha tî nawomyakn̂e.

Ero wa tî xakn̂e.

41 Amorî poko tî Petru nahsîyakn̂e,

nanîmyakn̂e tak.

Ero yinhîrî Kaan xîkrî komo takî tî nan̂ikyakn̂e Petru,

iin̂o waixapu komo marha tî.

Mokuche so on wara tî kekn̂e Petru yîwya so,

Moso tak hara Tohkasî,

paka hara,

kekn̂e tî.

42 Ero yinhîrî noro yenpakachonho takî tî n̂encetken̂e Xope pono komo ahnoro.

Ero ke Kporin komo pona takî tî n̂een̂atken̂e mer̂pono pîn komo.

Ero wa tî xatken̂e.

43 Ero yinhîrî iito rma tî ka n̂enmayakn̂e Petru Xope po.

Simaw yaw tî n̂enmayakn̂e yaake kaamo.

Paaka picho pokono tî mîk xakn̂e Simaw.

Noro yaw tî n̂enmayakn̂e Petru.

Ero wa tî xakn̂e.