Taa,

iito tî xakn̂e Sawru Estepan pen waihketaw okwe.

Twaihkapore ween̂asî,

kekn̂e marha tî noro okwe.

Ero wa tî kekn̂e Sawru Estepan pen poko.

Ero yinhîrî on wara takî tî xatken̂e Xesus xatî pîn komo,

Kaan xîkrî komo n̂emetanmekyatken̂e ro mak okwe Xerusaren pono pen komo.

Ero ke takî tî n̂etakpayatken̂e iitononhîrî komo.

Miya so tî n̂etakpayatken̂e Xuteia poko hakî.

Samaria pona marha tî cetken̂e.

Ero wa tî n̂etakpayatken̂e Kaan xîkrî komo.

12 komo makî tî etakpara xatken̂e.

Ero wa tî xatken̂e.

2 Ero yimaw takî tî Kaan ponarono komo mokyatken̂e Estepan pen yokoputho yaaso.

Ahruso tî naar̂atken̂e.

Nîwracetken̂e marha tî noro pen pînîn yaw.

Cerewre ro makî tî nîwracetken̂e.

3 Sawru reha tî n̂ehtîkekn̂e Kaan xîkrî komo yemetanmekn̂e me xa tak okwe.

Yîmîn yaka so tî n̂ewomyakn̂e ahsîtome.

Kîrkomo tî nahsîyakn̂e,

wooxam komo marha tî.

Ahsîxapu komo tak tî n̂ihxikyakn̂e kahrutopo yaka okwe.

Ero wa tî Kaan xîkrî pen komo n̂iir̂akn̂e Sawru okwe.

4 On wara tko tî xatken̂e miya so etakpaxapu komo,

ahto so na cexitaw so Kaanî mtapotarî n̂ekatîmyatken̂e iitono komo ya.

Ero wa tî xatken̂e.

5 Ero yimaw tak on wara takî tî xakn̂e Piripe hara,

anarî ewto pona marha tî cekn̂e noro hara,

Samaria pona tî.

Kristu pokono tî n̂ekatîmyakn̂e yîwya so iitono komo ya.

6 Piripe mtapotarî ponaro xa tî xatken̂e iitono komo mer̂pono pîn.

Yîmtapotarî tî n̂encetken̂e.

Yin̂irithîrî marha tî n̂een̂atken̂e cirihnî ciitopo yîwya.

Ero wa tî xatken̂e Piripe poko.

7-8 Piripe mtapotarî yanme worokyam n̂etowyakn̂e yîken̂arînhîrî komo ropotai,

mer̂pono pîn ropotai.

Aaaa,

ketken̂e takî tî kar̂pe yîhyai so cetowyataw so.

Yîhrepun komo marha tî xatken̂e iito mer̂pora.

N̂etar̂atken̂e tak noro yipu komo yîmtapotarî yanme.

Wara mak cetarisom komo marha tî kar̂pe n̂etar̂atken̂e hara okre.

Ero ke tawake xa tî xatken̂e iitono komo,

Samaria pono komo.

9 Taa,

iito tî xakn̂e yaskomo hara,

Simaw tî mîk xakn̂e noro yosotî.

Pepesmano rin̂e xa tî mîk xakn̂e,

eremkano rin̂e marha tî.

Noro poko tî n̂eserepoketken̂e ro mak Samaria pono komo.

Yaskomo xa ow ha anarî komo yopono,

kan̂e me tî noro xakn̂e.

10 Ero ke noro ponaro xa tî xatken̂e iitono komo ahnoro,

emyawnomnî komo,

cemyawnoyem komo marha.

Kaan yanme xa nai ham noro kar̂pe xa okre,

ketken̂e tî Simaw poko.

11 Pahxanînhîrî rma tî pepesmano rin̂e me tî xakn̂e.

Ero ke yîmtapotarî ponaro tî xatken̂e iitono komo.

Ero wa tî xatken̂e Samaria pono komo.

12 Taa,

Piripe mokuche tak yîmtapotarî makîrha takî tî n̂ewehcatken̂e hara iitono komo.

Panatanmekno tî n̂iir̂akn̂e Piripe Kaan maywen me kehtopo komo poko.

Xesus Kristu pokono marha tî n̂ekatîmyakn̂e yîwya so.

Kaanî mtapotarî yewetîche tak yîwya so emicinono takî tî n̂iir̂akn̂e.

Kîrkomo tî n̂emicinoyakn̂e,

wooxam komo marha.

Ero wa tî xakn̂e Piripe.

13 Ero ke Simaw meero tî n̂ewehcakn̂e Piripe mtapotarî.

N̂emihcakn̂e marha tî.

Cemiciche takî tî Piripe wenari cekn̂e.

N̂eserepokekn̂e tî cirihnî ciitopo yeen̂ataw.

Kar̂pe Kaan yehtopo yeen̂ataw marha.

Ero ke Piripe wenari cekn̂e.

Ero wa tî xakn̂e.

14 Taa,

meye rma tî xatken̂e 12 komo Xerusaren po rma.

N̂examro takî tî n̂encetken̂e Samaria pono komo yehtopo hara.

Kaanî mtapotarî tî n̂ewehcatu Samaria pono komo,

kacho tî n̂encetken̂e.

Ero ke tî Petru komo n̂en̂epetken̂e Xuaw yakro Samaria pona.

15 Ero ke iito cexitaw so tak Kaan yakro takî tî nîmtapowatken̂e Petru komo Xesus yahsîn̂enho komo poko.

Apa kah yawno,

ketken̂e tî,

moxam ropotaka cma re miir̂asî Kir̂wanî ro Yekatî,

ketken̂e tî.

16 Emicixapu komo rma tî re mîkyam xatken̂e.

Kporin komo Xesus yakrono xa tak ow,

kachome makî tko tî n̂emihcatken̂e.

Mokuhra tko ka xakn̂e Kir̂wanî ro yekatî iitono komo pona.

Ero ke tî ero wa nîmtapowatken̂e poko so.

17 Ero wa ketaw tî yîhtîpîrî komo nahsîyatken̂e Petru komo Kir̂wanî ro Yekatî mohtome tak yîropotaka so okre.

Ero wa tî xatken̂e.

18-19 Taa,

ero wa exirî komo takî tî n̂een̂akn̂e Simaw.

Okre,

kekn̂e tî noro,

yîhtîpîrî komo mak nahsîyaxe Petru komo.

Ero yanme mak Kir̂wanî ro Yekatî mokyasî yîropotaka so,

kekn̂e tî tîhnaw.

Ero ke on wara tî kekn̂e Petru komo ya,

Ai oyakno komo,

awara so xa marha ciino rin̂e me oyexi xe wasî.

Tooto tîpîrî yahsîche owya marha Kir̂wanî ro Yekatî moku xe wasî yîropotaka so ha.

Ero wa ciino rin̂e me cma re ow miir̂asî.

Ero ke on wîmyasî awya puranta ero wa oritopo yepetho awya so,

kekn̂e tî Simaw Petru komo ya.

20 Yîmtaka tko tî n̂eyukyakn̂e Petru on wara,

Pîra,

cehcamnosomu rma amoro ham okwe.

Ero ke apurantanthîrî n̂ehcamnope awakro ro rma.

Puranta pona kyam wahsîyasî Kaan nîmrî ha,

karî ke cehcamnosom me mesenpesî.

21 Kaan xîkrî pînî rma amoro ham okwe.

Kir̂wan̂he exihra rma nai ham aropotarî Kaan ya.

22 Ero ke kicicme awesehtînotoponhîrî tak poxunkakî.

Kaan yakro marha amtapotakî.

Apa kah yawno,

kasko,

opoko cma re metîrwoxinkesî.

Kicicme weexi kica,

kasko.

Ero wa kasko Kaan ya kicicme awehtoponhîrî yîhcamnotome tak na yîwya.

23 Cîmîkno warai chewno me mak mai ham okwe.

Kicicitho yanton me thakwa mai ham okwe etowîn me,

kekn̂e tî.

Ero wa tî kekn̂e Petru Simaw ya.

24 Okwe,

kekn̂e tî Simaw.

Owîrîmacho mekatîmyas okwe.

Ero ke opoko cma re mîmtapowaxe Kporin komo yakro ero yipu oyeporîra ro mak ehtome,

kekn̂e tî.

Ero wara tî kekn̂e Simaw Petru ya.

25 Ero yinhîrî iito rma ka xatken̂e Petru Xuaw yakro,

Samaria po rma ka.

Kporin komo mtapotarî tî n̂ekatîmyatken̂e rma ka iitono komo ya.

N̂esekatîmyatken̂e marha tî yîwya so.

Ero yinhîrî takî tî n̂etîrametken̂e hara Xerusaren pona hara.

Cekatîmro tko tî cetken̂e.

Samaritanu komo yewton pono komo ya tî n̂ekatîmyatken̂e Xesus ya kakir̂wamacho,

mer̂pono pîn komo ya,

mîn hak pono komo ya.

Ero wa tî cetken̂e hara.

26 Ero yinhîrî on wara takî tî xakn̂e hara Piripe,

Kporin komo yancun tî nîmtapowakn̂e noro yakro.

On wara tî kekn̂e,

Ai Piripe,

etoko tak miya suu yaw roro.

Kasa yesamarî yaw etoko,

Xerusaren yesamarî rma mîn axawa imo poreno ha,

kekn̂e tî ancu yîwya.

27 Ero ke takî tî iina cekn̂e Piripe.

Iito takî tî Eciopia pono xakn̂e esama rakataw.

Ewnuku tî mîk xakn̂e.

Kayaritomo maywen tî mîk xakn̂e yukurumîkno ha tî.

Kantasi maywen tî mîk xakn̂e emyawno yenîn̂e,

cepethîkem yenîn̂e ha tî.

Wooxam tî mîk xakn̂e Kantasi,

Eciopia pono komo kayaritomon xa.

Noro maywen tî mîk n̂een̂akn̂e Piripe esama yaw.

Xerusaren pona toxapunhîrî tî mîk xakn̂e,

Kaan poko ahwotaxi toxapunhîrî ha.

28 En̂exanînhîrî tî n̂etîramekn̂e hara.

Tarara yaw tî cekn̂e ceremaxi.

Tîcetaw rma Kaan Karitan tî n̂een̂akn̂e Isaias pen nmewretho tî.

Ero yipu yeen̂ataw tî noro n̂een̂akn̂e Piripe.

29 Ero yimaw Kaan Yekatî takî tî kekn̂e,

Piripe,

Mîkro tooto,

tarara yaw nasî.

Yîhyaka etoko,

kekn̂e tî yîwya.

30 Ero ke noro yaka takî tî cekn̂e Piripe kar̂pe.

Meyehra cexitaw yîmtapotarî takî tî n̂encekn̂e.

Isaias pen nmewretho yîmtapotarerî tî n̂encekn̂e,

weronomano rin̂enho penî nmewretho ha.

Ero ke yîwya takî tî kekn̂e Piripe,

Ai apa,

ahce pokono mîn meen̂a karita?

Mence rma ha re yîmtapotarî ha?

kekn̂e tî yîwya.

31 Pîra okwe,

kekn̂e tî Eciopia pono.

Ohcamhokan̂e exihra thakwa nas okwe.

Tohnaw mak on ween̂as okwe.

Mokuhra mai amoro oona eremaxi?

kekn̂e tî Piripe ya.

Ero ke takî tî n̂esenkayakn̂e Piripe tarara yaka.

Yîmtapotarerî tî ka n̂encekn̂e.

32-33 On wara kacho tî nîmtapotarekn̂e,

Tookuthîrî naar̂asî oper̂a ke tokyem,

waihkaxi naar̂asî,

ero wa xa marha Noro pen naar̂axe amn̂e waihkax hara.

Oper̂a xîkrî nasî tîtken̂e yîhpoci pahyataw,

ero wa xa marha nasî Noro hara amn̂e,

tîtken̂e mak nasî.

Noro pîntho me mak Noro n̂een̂axe poyino komo.

Epanîn̂e exihra ro mak nas ero yimaw okwe.

Noro porin pen komo yekatîmn̂e exihra marha nas okwe.

Noro pen tak waihkexe okwe.

Roowo po exihra tak nasî Noro ero yimaw,

kacho tî mîn nîmtapotarekn̂e Kaan karitan.

34 Taa,

ero wicakî yîmtapotareche on wara tî kekn̂e Eciopia pono,

Onoke poko wa ero wa kekn̂e weronomano rin̂e pen ha?

kekn̂e tî.

Tpoko rma katî mîn kekn̂e,

anarî poko xa katî kekn̂e?

kekn̂e hara tî.

Ero wa tî kekn̂e Piripe ya.

35 On wara takî tî Piripe n̂eyukyakn̂e,

Xesus pokono xa mîn Kporin komo mtapotarî,

kekn̂e tî.

Ero yinhîrî Xesus yehtopo takî tî n̂ekatîmyakn̂e yîwya.

Yaake tî nukukmekn̂e Kaan Karitan tukukmaxmu.

Xesus pokono mko nukukmekn̂e.

Ero wa Xesus yehtopo n̂ekatîmyakn̂e Piripe yîwya.

36 Ero wa tî nîmtapowatken̂e tîcetaw so.

Ero yinhîrî tak tuuna yecihtaka takî tî mokyatken̂e.

Ero ke on wara tî kekn̂e Eciopia pono Piripe ya,

On tuuna,

oyemicinopîra mai on kwaka?

kekn̂e tî yîwya.

37 Taa,

yaaro xa Xesus pona een̂ataw awya kemicinoyasî rma,

kekn̂e tî Piripe yîwya.

Ai ha,

kekn̂e takî tî Eciopia pono,

Kaan Mumuru xa Mîk ha Xesus Kristu,

wîîkesî,

kekn̂e tî.

Ero wara tî kekn̂e.

38 Ero ke tarara yaan̂e ya takî tî kekn̂e hara Eciopia pono,

Tan ka cececetorî,

kekn̂e tî.

Ero ke n̂ecececetken̂e.

Yukwaka takî tî cetken̂e Piripe,

Eciopia pono yakro.

Ero yimaw rma takî tî noro n̂emicinoyakn̂e Piripe.

39 Ero yinhîrî tuuna kwai takî tî nawomyatken̂e hara.

Tawomche so takî tî,

poku,

n̂ehcamnoyakn̂e takî tî Piripe pen.

Kporin komo Yekatî tî naar̂akn̂e ero yimaw rma.

Ero ke Piripe yenîhra takî tî xakn̂e Eciopia pono.

Noronhîrî takî tî cekn̂e hara ceken pona.

Tahwore tî cekn̂e.

Ero wa tî xakn̂e Eciopia pono.

40 Ero yimaw takî tî Piripe n̂esenpekn̂e hara Asotu po.

Ponan̂e makî tî n̂esenpekn̂e.

En̂exa takî tî cekn̂e hara Sesareia pona hara.

Yamoro tî cekn̂e.

Kaanî mtapotarî tî n̂ekatîmyakn̂e roro tîcetaw.

Ewto pono komo ya tî n̂ekatîmyakn̂e etpoyino pîn pono komo ya.

Ero wa tî xakn̂e Piripe.