Taa,

kicicitho komo yîwîrîyakan̂e komo amyamro,

awakro so makîrha tan kîmtapowasî hara.

On wara wîîkes awya so,

Ahce kacho anarî komo mîwîrîyaketu kica?

Ero wa xa marha maxe amyamro hara okwe anwîrîyakathîrî komo wara rma hara kica.

Ero ke,

On̂emetanmekrî pîn komo reha mîkyam.

Kicicme xa exihra naxe n̂examro,

kahra ro mak nasî Kaan apoko so okwe.

2 Kaan xa n̂emetanmekyasî kicicitho pen komo wekatmo awya so noro yipu pen kom ha.

Yaaro rma wa n̂emetanmekyasî.

3 N̂examro wa xa marha tko maxe amyamro hara kica.

Ero ke ahce wa katî awen̂atu so Kaan?

Amyamro makî katî awemetanmekîra so nai awya so?

4 Oroto cokorî ka awemetanmekîra so rma na nai.

Awakronoman̂e komo me rma ka nasî.

Miyan ke rma ka awakrexe so.

Pahkî ka yîrwomra marha nasî apoko so,

apînîn yaw so marha nasî.

Poxumnîtho wa mak katî Kaan ya awakronomacho komo meen̂atu okwe?

On wara kesî Kaan apoko so,

Ahri kapu,

kicicme cehtoponhîrî komo na poxunketu anarimaw,

takronomarî komo ke owya,

kesî mak cokorî ha ka.

Ero wa Noro yehtopo ponarora ma mat ham okwe?

5 Panahnî komo ro mak amyamro ham kica.

Poxunkan me rma meen̂atu ham awehtopo komo.

Ero ke miya xe xa Kaan mîrwonmekyaxe.

Yîrwonîmtopo yepamnon̂e wara maxe okwe.

Awehtopo komo men nukuknomesî Kaan ahnoro ero wicakî xa marha awemetanmetome so tak amn̂e ha.

Kaanî rwonîmtopo po tak awemetanmekyaxe so men okwe,

kicicitho komo yepemacho po xa.

Yaaro xa wa awemetanmekyaxe so ero yimaw.

6 Ero yimaw epemano n̂iir̂asî Kaan.

Kwaton̂e pîn me ro mak kepemexe so kehtoponhîrî komo yecenarî xa marha.

7 Waipînî ro me reha n̂iir̂asî anarî komo,

on wara naxe n̂examro,

kir̂wan̂he roro mak naxe okre ahwokan me ro mak.

Kir̂wan̂he mîxakn̂e ham okre,

kacho yenta xe naxe amn̂e Kaanî mtapotarî,

Takîhsom me kenpesî,

kacho marha.

Waipîn me kiir̂asî,

kacho marha.

Ero ke kir̂wan̂he roro naxe.

Ero yipu ponaro exirî ke so waipîn me rma tak Kaan n̂iir̂as amn̂e.

8 Ero warahra reha naxe anarî komo.

Tanme ro mak cexi xe so naxe.

Yaarono yewetîra naxe kica.

Kicicitho mak n̂ewehcaxe kica.

On wara reha nasî Kaan noro yipu komo poko.

Kicicitho ro mak mîkyam kica,

kesî poko so,

nîrwonîmtîkesî ro mak tak poko so.

9 Cesemetanmesom me tak n̂iir̂asî,

tahwokatîkaxmu me marha.

Ero wa ka n̂iir̂asî Xutew komo cokorî ka,

amn̂e tak Kreku komo makîrha.

Ero wa kicicme cehsom komo n̂emetanmekyasî Kaan.

10 Kir̂wan̂he cehsom komo reha nakronomesî Kaan.

Kir̂wan̂he mai ham okre,

kesî marha yîwya so.

Takîhsom me tak kenpesî,

ahwokan me marha kiir̂asî,

kesî marha yîwya so.

Xutew komo ya cokorî ka ero wa kesî.

Amn̂e tak Kreku komo ya makîrha kesî.

Ero wa kesî Kaan kir̂wan̂he cehsom komo ya.

11 Kicicme ehxapu komo yemetanmekn̂e ro Mîkî Kaan.

Anarî komo waton̂e pînî ro mak Mîkî.

12 Kaan ya kpanatanmetopo yentara naxe anarî komo.

Noro yipu komo kicicme exitaw so twaihsom me rma naxe,

kpanatanmetopo yentan̂e pînî rma.

Anarî komo reha naxe kicicme kpanatanmetopo yentan̂e komo reha.

Noro yipu komo marha naxe cen̂ekaxmu me kpanatanmetopo yaw roro rma takî.

13 Kir̂wan me kenîhra rma nasî Kaan kpanatanmetopo yentan̂e me mak kexitaw so.

Kpanatanmetopo yewetîn̂e me kexitaw so makî reha kir̂wan me tak keen̂atu so.

14 On wara natu Xenciu komo,

anarî komo mak,

Moises pen nmewretho yentara thakwa naxe okwe.

Noro yipu komo rma tko n̂epanatanmekyaxe tanme ro so rma.

Kir̂wan̂he rma naxe ha re anarimaw so kpanatanmetopo yaw roro rma ha.

15 Yîropotaw so rma wa nasî kpanatanmetopo mewrexapu wara rma.

Kicicme wex ham kica,

kexe anarimaw ahce wa na cexiche so.

Kir̂wan̂he wex ham okre,

kexe marha anarimaw ahce wa na cexiche so hara.

Ero wa so naxe mewrexapu ken̂ehra rma.

16 Ero ke en̂ekano n̂iir̂asî Kaan amn̂e ken̂ekatopo ro po.

Ekatîmnînhîrî poko rma tak ken̂ekexe so ero yimaw.

Xesus Kristu mak ken̂ekexe so Kaan yanme ha.

Kaanî mtapotarî wekatîmyakn̂e awya so,

Xesus ya kakir̂wamacho.

Ero ke tak on̂ekatîmtho yaw roro rma en̂ekano n̂iir̂as amn̂e.

17 Taa,

Xutew komo amyamro hara.

Awya so makîrha tan wîîkes hara.

Xutew ro komo xa tî mîkyam,

kacho xa amyamro.

Kpanatanmetopo yosomu reha n̂e ro amna okre,

kan̂e xa amyamro.

Kaan yananî reha amna okre,

kan̂e marha amyamro.

18 Kaan yanme kehtopo yentan̂e reha amna okre,

kan̂e amyamro.

Kir̂wan̂he kehtopo komo men̂ekan̂e marha amna.

Ero wa nas amna kpanatanmetopo poko amna yehcamhokarî ke.

19 Ewuhnî yaan̂e mak amna,

awarpanawno komo yesamarî weipon̂e marha amna,

kan̂e marha amyamro.

20 Wara mak cesehtînosom komo panatanmekn̂e marha amna okre,

ewruxan warai komo panatanmekn̂e xa,

kan̂e marha amyamro.

Ero wa mîîkexe ha re kpanatanmetopo exirî ke ahyaw so.

Yaarono rma mîn kpanatanmetopo,

mîn hak poko kîhcamhokacho ha.

21 Ahce wa tko na matu amyamro?

Panatanmekno rin̂e rma cma re amyamro.

Ero warai rma epanatanmekîra rma matu amyamro hara?

En̂epamra ro mak ehcoko kica,

kan̂e cma re amyamro.

Men̂epenatu rma na amyamro hara?

22 Apici yai ro exihra ehcoko,

aan̂o yai ro marha exihra ehcoko amyamro wooxam kom hara,

kan̂e cma re amyamro.

Ero wa kan̂e rma apici yai ro na matu amyamro hara?

Ciixaputho pokono pînî ro mak amna,

kan̂e komo na amyamro.

Ero wa kan̂e rma ciixaputho komo mîn yawno poko na men̂epanatu amyamro rma kica?

23 Kpanatanmetopo yosom xa amna,

kan̂e marha cma re amyamro.

Kpanatanmetopo yewetîra rma tko na mat ha?

Ewetîra awexirî ke so na Kaan nîwîrîyaketu tooto kom okwe?

24 Ero poko rma wa kesî Kaan Karitan.

Kicicme ro mak nîmtapowaxe Xenciu komo Kaan poko kicicme awexirî ke so okwe,

kesî.

25 Kir̂wan̂he rma re nasî ketanpikacho komo kpanatanmetopo yewehcataw roro mak kîwya so.

Ewetîra awexitaw so anpikan wara rma maxe okwe.

26 On wara marha na natu Xenciu kom hara anarimaw so,

Moises pen nmewretho yewehcataw roro yîwya so.

Etanpikaxapu me rma tak naxe n̂examro hara Xenciu komo rma.

27 On wara marha na natu anarimaw etanpikan komo rma,

kpanatanmetopo yaw roro rma na natu anarimaw.

Ero wa cehsom komo rma awen̂ekapon̂e me naxe amn̂e.

Xutew ro xa amyamro.

Ero ke mewrexapu nasî ahyaw so,

kpanatanmetopo rma.

Ewetîn̂e pîn me ro mak maxe kica.

28 Xutew pîn me rma wa tasî Xutew me exitaw kupun mak.

Xutew me xa kiitopo pîn mîn ketanpikacho mak ha.

29 Kir̂wan̂he exitaw kropotarî komo Xutew me xa tak taxe.

Ero wa kexitaw so etanpikaxapu wara tak taxe kropotaw so rma hara.

Kaanî mtapotarî cewetpore nasî.

Mewrexapu yaw roro cik makî tko exihra cexpore nasî,

Kaan Yekatî xa cewetpore nasî kpanatanmetopo poko kîhcamhoketaw.

Ero wa kpanatanmetopo komo yewehcataw kir̂wan me keen̂axe so Kaan okre.

Tooto komo mtapotarî ponarora taxe noro yipu komo.

Kir̂wan̂he keen̂axe so,

kacho ponarora.

Ero wara taxe.