Taa,

on wara wîîkesî xa hara awya so,

Xutew komo amyamro.

Ahce wara xa tatu Xutew komo reha?

Kaanî nakronomarî pînî rma katî kîwyam?

Kir̂wan̂he kirihra rma nai Kaan etanpikaxapu me kexirî ke,

mîîketu na?

2 Pîra,

Kaan nakronomarî rma mîkyam Xutew komo.

Enko xe,

tîmtapotarî rma Kaan n̂entamexpekn̂e yîwya so pahxa.

Yîhyawno komo ro me xakn̂e yîmtapotarî okre.

3 Ewetîra rma tko xatken̂e okwe anarî komo Xutew komo.

Ero ke ahce wa tak nai Kaanî tîmtapotachonhîrî poko,

Xutew komo wakir̂wames amn̂e,

kachonho poko?

N̂ehn̂e makî katî Kaan tîmtapotachonhîrî poko?

Cewetîn̂enhîrî pîn komo yanme katî n̂ehn̂e awya so?

4 Pîra ro mak.

Kemîknon̂e pînî ro mak Mîk Kaan.

Cemarontaxmu me reha exitaw so tooto komo miyan komo rma,

pîra reha nasî Kaan.

Ero poko rma kesî Kaan Karitan,

Yaaro tîmtapotaxmu xa Amoro Apa,

Amtapotachonhîrî yaw roro rma wa ciino miir̂a ham.

Awanwekn̂e komo mîmtayar̂mesî ro mak,

kesî Kaan Karitan.

Ero wa kesî.

5 Taa,

on wara kexe anarî komo,

Kicicitho kîwyam okwe.

Wara rma kir̂wan me n̂esenpesî Kaan kakronomarî ke so rma.

Ero ke ahce kacho nîrwona Kaan kpoko so,

kir̂wan̂he cehtopo yenpon̂e komo poko ha?

kexe.

Tooto komo mtapotarî wara kyam mak tan kîmtapowasî.

6 Ero wa kahra ro mak cexpore nasî.

Tohnaw mak en̂ekano rin̂e me exitaw ketaw ha re Kaan ahce wara roowo poko hakno komo n̂en̂eke ha re amn̂e?

7 Taa,

on wara marha kexe anarî kom hara,

Yaarono me marha n̂esenpesî Kaan kîcemarontarî ke rma.

Ero ke ahce kacho Noro keiya hara kîcemarontarî poyero?

kexe marha kica.

8 Anarî komo tî tohnaw nîmtapowatu amna poko.

On wara tî ketu,

Kicicme kr̂a cehcerî kir̂wan̂he kehtome so ha,

kapore rma nasî,

kexe Pawru komo,

ketu tî kica.

Tohnaw mak ero wa kexe amna poko kica.

Ero ke ero wa kan̂e komo Kaan n̂emetanmekyasî amn̂e.

Yaaro xa n̂emetanmekyasî.

Ero wa nasî Kaan.

9 Ero ke ahce wa xa katî tatu kîwyam Xutew komo?

Kir̂wan̂he taxe kîwyam,

Xenciu komo reha pîra n̂he naxe,

mîîketu katî?

Pîra ro mak.

On wara rma wîîka hara awya so,

Etîme re wa taxe Xutew komo,

Xenciu komo.

Kicicitho yanton me re wa taxe okwe,

wîîka rma awya so.

10 Ero wara rma kesî Kaan Karitan.

On wara kesî,

Kir̂wan exihra ro mak nas okwe,

cewn̂e n̂hema exihra.

11 Yuhnari yentan̂e exihra marha nasî.

Kaan yîhtînopu xatî exihra marha nas okwe.

12 Esama yai etowxapu wa mak naxe okwe tooto komo ahnoro.

Akpîntho me ro mak tak naxe kica etîme re.

Kir̂wan exihra ro mak nas okwe,

cewn̂e n̂hema exihnî me ro mak nas okwe,

kesî Kaan Karitan.

13 On wara marha kesî Kaan Karitan,

Okopu yewtatho wa mak nasî kica n̂examro yexe,

ahrunkaxapu wara.

Cesemîknosom me marha nasî yun̂uru komo kica.

Okoyi yokumuru ken̂arî wa mak nasî yîmtarî komo oko.

14 Mîk hak mak n̂eremkexe tîmtapotarî ke rma okwe.

Kîîxatî pîn me ro mak nîmtapowaxe kica.

15 Kar̂pe marha cexe waapa me okwe.

16 Yîwîrîmano mak n̂iir̂axe,

ahwokano marha n̂iir̂axe okwe.

17 Cereporem me kehtopo poko camkî ro mak naxe okwe.

18 Kaan poko twerîhra ro mak naxe okwe.

Ero wa mak naxe tooto komo miyan komo rma okwe,

kesî marha.

Ero wa kesî Kaan Karitan.

19 Taa,

on wara nasî kpanatanmetopo,

Moises nmewretho ha,

entan̂e komo panatanmetopo me nasî.

Ero ke,

kicicme exihra n̂he was ha re,

kan̂e komo nîtîtmamyaxe mak ero yipu yentache.

Kaan yanwekn̂e me naxe ahnoro roowo poko hakno komo.

20 Ero ke on wara kahra ro mak cexpore nasî,

Kir̂wan̂he wasî Kaan ya kpanatanmetopo yewetîrî ke mak owya,

kahra cexpore nasî.

Kicicme kehtopo komo yenpon̂e makî reha mîn kpanatanmetopo.

Ero yipu mak mîn ha.

21 Taa,

on wara tak wîîkesî kir̂wan me kiitopo poko.

Kpanatanmetopo ken̂ehra makî reha tak kirwan me kiir̂axe so Kaan oroto.

Ero wa kiitopo rma wa n̂ekatîmyasî kpanatanmetopo rma.

Kweronoman̂e pen komo marha ero yipu n̂ekatîmyatken̂e.

22 Xesus Kristu pona enîn̂e komo tak kir̂wan me Kaan n̂iir̂asî.

Ahnoro Noro pona enîn̂e komo ero warai me n̂iir̂asî.

Ero ke Noro pona enîn̂e me kexitaw so,

Kir̂wan mîkyam ha,

kesî tak Kaan kpoko so.

23 Etîme re wa taxe kicicme ehxapu me re.

Kaan warahra ro mak taxe okwe,

kir̂wanî ro warahra.

24 Kwakrexe so makî tko Kaan kir̂wan me kentopo ke rma,

Ow epemakî,

kahra ro mak tak nasî kîwya so.

Xesus Kristu waihîrî ke mak ero wa keen̂axe so.

25 Xesus n̂en̂epekn̂e Kaan oona kepeman̂e komo me.

Ero ke Noro tak tkamxukuthîrî nîmyakn̂e kepethîrî komo me.

Noro pona een̂ataw kîwya so,

cepemaxi tak taxe.

Pahxan pen komo yepeman̂e me meero wa Xesus n̂en̂epekn̂e Kaan oona.

Kicicme n̂examro yehtopo ponarono pîn wara ka xakn̂e,

nînîmyakn̂e makî ka.

Xesusu tak xakn̂e epeman̂e komo me.

Ero ke yaaro rma n̂examro waihkara ka xakn̂e Kaan yohno so.

26 Ero ke on wara tak kapore nasî,

Yaaro rma kir̂wan me kiir̂axe so Kaan kicicitho komo rma.

Cepemaxi wa taxe Xesus pona enîrî ke mak kîwya so,

kapore nasî.

27 Ero ke ahce wa tîtketu kakir̂wamacho komo poko?

Oyanme ro mak kir̂wan̂he was okre,

tîtketu katî?

Pîra ro mak okwe.

Kir̂wan̂he roro oyexirî ke kir̂wan me oyen̂a Kaan,

tîtketu katî?

Pîra ro makî.

Xesus pona enîrî ke mak kîwya so kir̂wan me kiir̂atken̂e so Kaan.

28 Ero ke on wara tîtkexe,

kpanatanmetopo yanmera ro mak kir̂wan̂he keen̂atu so ham Kaan.

Xesus pona enîrî ke mak ero wa keen̂atu so ham,

tîtkexe.

29 Onoke warai komo porin Mîkî Kaan awya so?

Xutew komo porin makî katî Mîk ha?

Pîra ro makî.

Xenciu komo porin marha Mîk.

Ero warai Mîk Kaan ha.

30 Cewn̂an mak Mîk Kaan.

Ero ke tpona enîrî ke mak kir̂wan me n̂een̂asî anpikaxapu komo.

Ero wa xa marha anpikan komo n̂een̂as hara,

tpona enîrî ke xa marha yîwya so.

31 Ero ke ahce wa xa tîtketu kpanatanmetopo poko ha?

N̂expe kr̂a mak tak,

enta xera tak wasî Xesus pona enîn̂e me oyexirî ke tak,

tîtketu katî?

Pîra ro mak.

Kir̂wan̂he rma nasî kpanatanmetopo,

tîtkexe xa matko Xesus pona enîrî ke kîwya so.

Ero wa tîtkexe kpanatanmetopo poko.