Taa,

on wara wîîkes hara awya so,

Abraaw pen komo poko kîmtapowas hara.

Kporin pen mîk xakn̂e Abraaw.

On wara tî Kaan kekn̂e yîwya,

Kir̂wan me keen̂as okre,

kekn̂e tî yîwya.

Ahce wa exirî ke wa ero wa kekn̂e Kaan yîwya?

2 Kir̂wan me keen̂asî kir̂wan̂he roro awexirî ke okre,

ketaw ha re Kaan yîwya,

Kir̂wan̂he was okre oyanme ro mak,

karî ha re,

yaaro rma ha re.

Kaan ya reha ero wa kahra rma n̂exirî ha.

3 Ahce wa tko nîîke Kaan Karitan noro pen poko?

On wara kesî,

Kaan pona n̂een̂akn̂e Abraaw pen.

Ero ke,

kir̂wan me keen̂as okre,

kekn̂e takî tî Kaan yîwya,

kesî.

Ero wa kesî Kaan Karitan Abraaw poko.

4 Taa,

on wara taxe kanme ro so mak ketakir̂wama xe kexitaw so,

cetapickaxmu wara rma taxe ketakir̂wamacho komo poko.

Ero ke kepethîrî komo ponaro tak taxe.

Kir̂wan me cma re ow miir̂as Apa owakretopo me mak,

kan̂e pîn me taxe Kaan ya.

Ero wa taxe kanme ro so mak ketakir̂wama xe kexitaw so.

5 Ero warahra rma naxe anarî komo,

Oyanme ro mak ketakir̂wamesî,

kahra ro mak naxe.

Xesus pona mak ween̂asî Kaan xatî pînînhîrî komo yakir̂waman̂e pona,

kexe mak.

Ero ke ero wa ehtopo komo yanme,

Kir̂wan me tak noro ween̂asî,

kesî Kaan noro yipu komo poko.

6 Ero yipu pokono rma tî mewrekn̂e Tapi pen hara.

Kir̂wan̂he awehtoponhîrî yanmera ro mak,

Kir̂wan me keen̂asî,

ketaw Kaan kîwya so tawake taxe,

kacho pokono mewrekn̂e,

on wara kacho ha,

7-8 Tawake taxe okre kehtoponhîrî yîhcamnoyataw Kaan ya,

tanwetoponhîrî yîhcamnoyataw ha.

Tîhcamnoso exirî ke tak kicicme kehtoponhîrî komo tak tawake taxe ha.

Tawake marha taxe okre,

kicicme kehtoponhîrî komo ponarora tak exitaw Kaan,

kekn̂e tî.

Ero wa tî kekn̂e Tapi pen pahxa.

9 Ero ke,

Kir̂wan me tak n̂examro ween̂asî,

nîîke Kaan kpoko so.

Taa,

onoke warai komo poko ero wa nîîke ha?

anpikaxapu komo poko mak katî nîîke?

Pîra ro mak.

Anpikan komo poko meero katî ero wa kesî?

Encoko xe ka,

Kir̂wan me takî tî Kaan n̂een̂akn̂e Abraaw pen tpona enîrî ke mak yîwya,

kesî Kaan Karitan.

10 Ahcemaw xa Kaan kekn̂e ero wa Abraaw pen poko?

Anpikaxapu me exitaw mak katî kekn̂e awya so?

Pîra ro mak.

Anpikan me rma ka exitaw tî,

Kir̂wan me keen̂asî,

kekn̂e Kaan Abraaw pen ya.

11 Amn̂e mak,

ero wa kachonho mahyaka mak tak,

Etanpikapoko,

kacho n̂encekn̂e Abraaw pen.

Kir̂wan me noro n̂een̂akn̂e Kaan tpona enîrî ke mak yîwya.

Ero warai me noro yehtopo kuknon makî tî mîn xakn̂e etanpikacho.

Ero ke etanpikan me makî ka cexitaw Kaan pona n̂een̂akn̂e noro pen.

Ero wa xakn̂e noro Kaan pona enîn̂e komo porin me rma cehtome.

Ero ke etanpikan komo yîîm me rma nasî.

Ero ke,

Kirwan me keen̂asî kesî Kaan noro yipu komo ya xa marha.

12 Etanpikaxapu komo yîîm me marha nasî,

etanpikacho komo yanmera rma tko.

Kaan pona enîn̂enhîrî mîk xakn̂e Abraaw pen etanpikanî rma.

Ero ke noro pen wara xa marha Kaan pona een̂ataw yîwya so,

noro yipu komo yîîm me xa marha naxe hara.

13 Roowo yahsîtopo poko marha nîmtapowakn̂e Kaan Abraaw pen yakro.

On wara tko tî kahra xakn̂e yîwya,

Apanatanmetopo komo ewetko roro ahsîtome awya,

kahra xakn̂e.

On wara xa matko tî kekn̂e yîwya,

Opona meen̂a ham okre.

Ero ke kir̂wan me tak keen̂asî.

Ero ke marha ahnoro roowo tak mahsîyasî amn̂e,

awepamthîrî komo yakro rma,

kekn̂e tî Kaan yîwya.

14 Apanatanmetopo komo yewehcataw mak awya so,

Kir̂wan me keen̂axe so,

kahra ro mak nasî Kaan kîwya so,

Ero wa kan̂e me exitaw ketaw ha re tohnaw ro mak Noro pona ceen̂axe okwe.

Tohnaw marha nas ha re Noro mtapotarî,

Abraaw pen ya kekn̂e,

ero wa kachonho.

15 On warai makî reha mîn kpanatanmetopo,

kicicitho komo poko Kaan yîrwonmetopo mak mîn.

Kpanatanmetopo komo exihra exitaw ketaw ha re Kaan yanwekn̂e me exihra re taxe.

16 Ero ke Kaan pona enîrî ke mak kîwya so kir̂wan me tak keen̂axe so,

kwakrexe so mak.

Kwakrexe so amn̂e,

kekn̂e tî Abraaw pen ya pahxa.

Ahnoro noro yepamtho wakrecho poko ero wa kekn̂e.

On warai komo mîkyam Abraaw pen yepamtho komo,

kpanatanmetopo ponarono komo,

Abraaw pen wara Kaan pona enîn̂e komo marha.

Kporin pen komo mîk xakn̂e Abraaw,

miyan komo porinî rma.

17 Ero yipu pokono rma tî mewrepekn̂e Kaan,

on wara kacho,

Ai,

Abraaw,

mîk hak rowon pono komo porin me tak kiire ha,

mer̂pono pîn porin me ha,

kacho tî mewrepekn̂e.

On wara tî kekn̂e Abraaw pen Kaan poko hara,

Waixapunhîrî komo yenpakan̂e xa Mîk Kaan,

exihnî yenpon̂e marha Mîkî,

kekn̂e ti.

Ero wa tî kekn̂e noro pen Kaan poko.

18 Ero wa tî xakn̂e Abraaw pen,

Kaanî mtapotarî ponaro xa tî xakn̂e,

Mer̂pora ro mak tak kepamnoyas amn̂e,

kacho ponaro ha.

Apohana,

yîmxîtanî ro thakwa mak amna okwe,

kahra ro makî tî xakn̂e noro pen yîmxîtanî ro me cexitaw rma cma ha re.

Ero ke mer̂pono pîn komo porin me takî tî xakn̂e.

19 Kaan yanwekn̂e pînî ro makî tî mîk xakn̂e Abraaw pen.

Noro pona enîn̂e me xa xakn̂e okre.

100 cimn̂ipu tak nasî oyewrutoponho okwe.

Waixapu wara thakwa wa nas opuntho okwe,

kahra tî xakn̂e.

Nocwakomotho me xa thakwa nasî opici Sara yîmxîtan me thakwa,

kahra marha tî xakn̂e.

20 Kaan pona xa matko n̂een̂akn̂e noro pen.

Yaaro ma re mîn nîîke owya?

kahra ro makî tî xakn̂e.

Kîmxîkrî rma wa nîmyasî xa Kaan ha,

kekn̂e xa matko.

Kemîknon̂e pînî ro mak Mîk Kaan ha,

kekn̂e tî.

21 Ehn̂anî ro mak Mîk Kaan tîmtapotacho poko,

kekn̂e tî Abraaw.

Ero wa ha na,

kahra ro makî tî xakn̂e.

22 Ero ke kir̂wan me takî tî noro pen n̂een̂akn̂e Kaan.

23-24 Onoke n̂enîrî me xa mîn mewrepekn̂e Kaan,

Kir̂wan me tak keen̂asî,

kacho ha?

Abraaw pen n̂enîrî me mak katî mîn mewrepekn̂e?

Pîra ro mak.

Kn̂enîrî komo me marha wa ero wa kacho mewrepekn̂e.

Kîwyam marha ero wara taxe,

kir̂wan me keen̂axe so Kaan tpona enîn̂e me kexitaw so.

Kporin komo Xesus yenpakan̂enho Mîk Kaan,

kan̂e me kexitaw so marha ero wa keen̂axe so.

25 On warai xa Mîk Xesus,

Kaan nwaihkapotho rma Mîkî kicicme kehtoponhîrî komo yepetho me.

Kaan n̂enpakatho marha Mîkî kir̂wan̂he roro kiitome so hara.

Ero warai Mîk Xesus.