Taa,

ero wa keen̂axe so Kaan,

kir̂wan me tak keen̂axe so Xesus pona enîrî ke mak kîwya so.

Ero ke marha tak etpoko tawake tak taxe Kaan yakro.

Kporin komo Xesus Kristu yakrono me kexirî ke so mak ero wa taxe.

2 Noro pona enîrî ke mak kir̂wan me keen̂axe so Kaan.

Ero ke marha Kaan nakronomarî me marha taxe.

Tahwore marha taxe kir̂wanî ro me Kaan yehtopo yentopo ponaro kexirî ke so.

3 On wara marha taxe,

kesemetanmecho komo poko meero tahwowaxe.

Ahwokan me xa tak Kaan oriyasî okre onî yipu ke rma,

tîtkexe tak kesemetanmekyataw so rma.

4 Ahwokan me kexitaw so tak kir̂wan me tak taxe hara.

Kir̂wan me kexitaw so kakir̂wamatîkacho komo ponaro tak taxe hara.

5 Kakir̂wamatîkacho ponaro kexitaw so kemîknopîra ro mak wa nasî Kaan.

Tîîxatî me kehtome so xa matko Kir̂wanî ro Yekatî n̂iir̂asî kropotaka so.

Kropotarî yarîhton̂e wara ro mak nasî,

Ero ke miya xe xa tak cehtîkexe yiixatî me xa okre.

6 On wara tîxatken̂e pahxa ha kapu,

kar̂pen wara tîxatken̂e okwe kropotaw so.

Kaan ponarono pîn me marha tîxatken̂e.

Ero wa kexitaw so rma Kristu tak waihyakn̂e kepethîrî komo me.

7 On wara taxe tooto komo reha,

kwaipu xera ro mak taxe kpoyino yukurunpetome,

kir̂wan yukurunpetome meero.

Kwakren̂enhîrî yukurunpetome tko na cetwaikapetu rma na anarimaw so mak.

8 On wara reha nasî Kaan,

kîîxe so xa cehtopo n̂enpesî kîwya so Kristu waihîrî ke kepethîrî komo me.

Kicicme kexitaw so rma waihyakn̂e.

Ero wa xa kîîxe cehtopo n̂enpekn̂e Kaan.

9 Ero ke kir̂wan me tak keen̂axe so Kaan.

Xesus kamxukutho ke rma kakir̂wametken̂e so.

Noro yanme marha kukurunpexe so.

Yîrwomra nasî kpoko so Xesus yanme kukurunperî ke so.

10 Pahxa Kaan xera ro mak tîxatken̂e okwe.

Ero wa kexitaw so rma Tumumuru waihkapekn̂e Kaan tîîxatî me rma tak kiitome so.

Ero ke Kaan xatî me tak taxe okre yumumuru waihîrî ke.

Karpe Noro exirî ke tak hara miya xe xa tak kir̂wan̂he kiitîkexe so Noro yanme rma hara.

11 On wara marha taxe,

Kaan poko marha tahwowaxe Kporin komo Xesus Kristu yakrono me kexirî ke so mak ha.

Noro yanme marha tawake tak taxe Kaan poko.

Ero ke Noro yanme xa marha tahwowaxe Kaan poko.

12 Taa,

Ataw pen poko makîrha kîmtapowas hara.

On wara tî xakn̂e noro pen,

kicicitho me xakn̂e,

noro pen mak ha ka cewn̂e.

Noro pen poyero rma tak kicicme tak xatken̂e roowo pono komo.

Ero yimaw marha twaihsom me tak xatken̂e kicicme cehtopo komo yanme hara okwe.

Ero ke tak twaihsom me thakwa naxe ahnoro roowo pono komo kicicme ehxapu me exirî ke so.

13 On wara xatken̂e pahxan pen komo,

kicicme rma xatken̂e kpanatanmetopo yentamexpora rma ka exitaw Kaan.

Kicicme maxe kica,

kahra tko nasî Kaan kpanatanmetopo komo yentan̂e pîn komo ya.

14 Waihyatken̂e rma tî okwe kpanatanmetopo komo yentan̂enho pîn komo rma kicicme cexirî ke so.

Anarî me tko tî xakn̂e kicicme ehtoponhîrî komo Ataw pen yehtoponho warahra.

Waihyatken̂e rma tko okwe.

On wara wîîkesî Ataw pen poko hara,

Tmohsom warai me rma xakn̂e.

15 Anarme tko nasî Kaan ya kwakrecho komo,

kicicme Ataw pen yehtoponho warahra nasî.

Ataw pen poyero mer̂pono pîn komo tak waihyatken̂e,

cewn̂an poyero rma.

Miya xe xa tak mer̂pono pîn komo wakrekn̂e Kaan cewn̂an yanme xa marha.

Xesus Kristu rma Mîk waipînî ro me kehtopo nîmyakn̂e,

kwakretken̂e so mak ha.

16 Ero ke kicicme cehsomînhîrî poyero rma kicicme taxe,

cewn̂an poyero rma.

Cewn̂e ro makî tî ka kicicme xakn̂e noro.

Noro yehtoponho yanme rma tak cen̂ekaxmu me taxe okwe,

cewn̂e ro mak kicicme ehtoponhîrî poyero rma.

Ero warahra reha nasî kwakrecho komo.

Kîwyam reha emapona roro kicicme tîxatken̂e okwe.

Wara rma kwakretken̂e so Kaan kir̂wan me so kentopo komo ke hara okre.

17 Cewn̂an yehtoponho yanme rma twaihsom me ka tîxatken̂e ahnoro.

Kîkayaritomon komo wara tak xakn̂e kwaihtopo kom okwe.

Ero wa xa marha cewn̂an yanme kwakretken̂e so Kaan.

Miya xe xa tak kwakretken̂e so kir̂wan me kiitopo komo ke okre.

Ero ke kîwyam tak taxe kayaritomo wara hara cewn̂an yanme xa marha.

Xesus Kristu yanme tak kehtoponhîrî komo yopono me taxe okre.

18 Cewn̂e mak xakn̂e Kaan yanwekn̂e,

Ataw pen.

Ero wa ehtoponhîrî poyero rma tak cen̂ekaxmu me naxe tooto komo ahnoro.

Ero ke twaihkaxmu me naxe okwe.

Ero wa xa marha cewn̂e xakn̂e hara Kaan yewetîn̂e.

Ero wa Noro yehtoponho yanme tak Kaanî nwakretho me naxe ahnoro tooto kom hara.

Kir̂wan me tak kiir̂atken̂e waipînî ro me kehtome so hara.

Ero wa Kaan kiir̂atken̂e so.

19 Kaan nanwekyakn̂e Ataw pen noro pen mak ha ka cewn̂e.

Noro pen poyero tak kicicme tîxatken̂e kîwyam hara mer̂pono pîn komo okwe.

Kaan tak n̂ewehcakn̂e hara cewn̂e xa marha,

Xesus ha.

Ero ke Noro poyero tak Kaan kiir̂axe so kir̂wan me hara mer̂pono pîn komo marha.

20 On wara kehtome so kpanatanmetopo tak n̂ekatîmyakn̂e Kaan Moises pen ya.

Kaan yanwekn̂e xa ow ham kica,

kachome mak tak kîwya so n̂ekatîmyakn̂e.

Miya xe xa xakn̂e kicicme kehtoponhîrî komo okwe.

Wara rma Kaanî tko kwakretken̂e so.

Miya xe xa marha tak xakn̂e kwakretopo kom hara.

Kicicme kehtoponhîrî komo yopo ro mak xakn̂e okre.

21 Kîkayaritomon komo wara rma xakn̂e kicicme kehtoponhîrî komo kica,

kwaihkan̂e me mak xakn̂e okwe.

Oroto tak kwakrecho komo tak nasî kîkayaritomon komo wara hara.

Kir̂wan me kirirî ke ero wa nasî.

Waipîn me marha tak taxe ero wa kirirî ke so.

Ero wa kiir̂axe so Kaan ha,

Kporin komo Xesus Kristu yanme rma.