Taa,

on wara wîîkes hara awya so,

kicicitho komo wakren̂e xa Mîk Kaan ham okre.

Ero ke ahce wa cexpore nai?

Kicicme rma katî cexpore nai kwakrechome so xa tak Kaan ya?

2 Pîra ro mak kica.

Kicicme kehtoponhîrî komo yewetîn̂e pîn me kehtome so tîtwaiyatken̂e.

Ero ke ahce kacho ma re ero yipu poko tat hara?

3 On wara kehtopo katî entara mat ha?

Kristu Xesus yakrono ro me cemihcatken̂e.

Ero ke kwaihtoponhîrî me rma tak nasî Noro waihtoponho ha.

4 Ero ke Noro yakro marha roowo cheka ahruxapu wa tîxatken̂e hara.

Waihxapu wara xa taxe kemicirî ke so.

Taa,

twaipuche Kristu pakekn̂e hara.

Yîîmî rma n̂enpakekn̂e kir̂wanî ro me cexirî ke.

Ero ke enpakaxapu wa xa marha kexi xe so nasî Kaan,

kehtoponhîrî yaw rorono pîn me tak hara.

5 Ero warai kîwyam,

Xesus yakro waixapu me ciixapu kîwyam.

Ero ke Noro yakro enpakaxapu me marha wa kiir̂axe so hara.

Ero wa kiir̂axe so.

6 Ero ke waixapu me tak nasî kehtoponhîrî komo,

amowoxapu me ha.

Ero wa Kaan kiir̂atken̂e so kicicme kehtoponhîrî komo yîhcamnotome tak yîwya.

Ero tak nîhcamnoyakn̂e kicicitho yanton pîn me tak kehtome so.

7 Kicicitho yewetîra ro mak naxe waihxapu komo.

8 Kristu yakro rma tîtwaiyatken̂e.

Ero ke on wara tak tîtkexe,

Kristu yakro rma tîtpakexe hara kar̂pe roro,

tîtkexe.

9 On wara kacho ponaro taxe,

Waipîra xa hara nasî Kristu.

Waihyakn̂e rma ka,

pakekn̂e hara,

kacho ponaro.

Ero ke Noro kayaritomon warahra ro mak tak nasî kwaihtopo komo.

10 Kristu waihyakn̂e cewn̂e ro mak kicicme kehtoponhîrî komo yîhcamnotîkachome eroromero.

Kar̂pe roro tak nas hara oroto,

ero ke Kaanî yewetîtopo poko roro nas hara.

11 Ero ke ero wara xa marha kacoko amyamro hara,

Kwaihyakn̂e oyehtoponho yewetîn̂e pîn me tak oyehtome.

Kaan yewetîn̂e me xa tak kpakekn̂e hara,

kacoko roro.

Ero wa wasî Kporin komo Xesus Kristu yakrono ro me oyexirî ke mak,

kacoko roro marha.

12 Ero ke on wara kahra ro mak ehcoko,

Oyehtoponho thakwa n̂ewehcasî opuntho kica,

kahra.

Twaihsomtho mak mîn apun komo.

Ero ke kicicitho apohketaw wewehca rma ham okwe opuntho yanme thakwa,

kahra tak ehcoko.

13 On wara taxe okwe akir̂waman me ka kexitaw so,

kicicitho poko cepohkexe kica.

Ero ke ero yipu pokono me rma kupun cicir̂axe kica.

Mîpaketken̂e tko twaihso ehxapunhîrî.

Ero ke on wara tak kacoko Kaan ya,

On ha opuntho Apa.

Kir̂wan me tak ow cirko awewetîn̂e me xa tak oyehtome,

kacoko Kaan ya.

14 Apanatanmetopo komo men ewetîcoko kir̂wan me tak awentome so owya,

kahra tak nasî Kaan oroto kîwya so.

Awakretopo me mak nîmyasî kir̂wan me awehtopo komo.

Ero ke awantoman̂e komo mera tak nasî kicicme awehtoponhîrî komo.

15 Ero ke ahce wa tak matu?

Apanatanmetopo komo mak ewetîcoko,

kahra takî tî nai Kaan kîwya so.

Awakretopo komo me mak kakir̂wamexe so,

kesî tak kîwya so.

Ero ke kicicitho poko kyam wai ham,

mîîket ha katî?

Pîra ro mak kica.

Ero wa kahra ro mak cexpore nasî.

16 Tooto yanton me awetîmyataw so noro yanton me thakwa maxe etowîn me ro mak.

Ero ke ero wa xa marha kicicitho yanton me awetîmyataw so ero yipu yanton me ro mak tak maxe hara okwe.

Ero ke twaihsom me thakwa maxe okwe.

Kaan yanton me awetîmyataw so reha Noro yanton me roro tak maxe hara.

Kir̂wan me tak awir̂axe so cewetîrî ke hara awya so.

Ero wa maxe ha.

17 Taa,

pahxa ka kicicme awehtoponhîrî komo yanton me mîxatken̂e.

Amn̂e tak Kaanî mtapotarî mencetken̂e,

apanatanmetopo komo.

Mewehcatken̂e marha tahwore ro mak okre.

Ero ke,

kir̂wanhe xa Kaan nai ham,

wîîkesî tak.

18 Ero ke Kaan tak awowyatken̂e so okre kicicme awehtoponhîrî komo yanton mera tak awehtome so.

Kir̂wan me kehtopo komo yanton me makîrha tak maxe hara.

19 Awantoman̂e pokono wara tan kîmtapowasî camkî n̂he awexirî ke so.

Kantoman̂e wara rma tko nasî kicicme kehtoponhîrî komo.

Ero yipu yewetîn̂e me ka mîxatken̂e okwe.

Kpanatanmetopo yanwekn̂e me marha mîxatken̂e okwe.

Ero yipu yewetîn̂enho ewetî xe xa hara mehtîketken̂e kica.

Ero warahra tak ehcoko.

Kaan ya xa matko apun komo tîmcoko awantoman̂e komo wara tak ehtome kir̂wan me awehtopo kom hara.

20 Pahxa ka kicicme awehtoponhîrî komo yanton me awexitaw so awantoman̂e mera ro mak xakn̂e kir̂wan me awehtopo komo.

21 Taa,

pahkî awexiche so kicicitho poko ahce wa tak mîxatken̂e ha?

Kir̂wan ke cepetaxmu wara katî mîxatken̂e?

Pîra ro mak okwe.

Epetantho wara thakwa mîxatken̂e.

Twaihsom me mak mîxatken̂e okwe kicicitho poko awexirî ke so.

Mîhyapamyaxe tak oroto ero yipu poko awehtoponhîrî komo pona.

22 Kaan tak awowyatken̂e so,

ero ke tak awantoman̂e komo mera ro mak tak nasî kicicitho.

Kaan yanton me makîrha tak maxe hara okre.

Ero ke kir̂wan̂he tak meperwaxe kir̂wan̂he xa tak awehtîkachome so.

Waipîn me marha tak maxe eroromero.

23 Kantomexe so mak kica kicicme kehtoponhîrî komo.

Kantomache so tak kwaihkexe so tak okwe cewetîtoponhîrî yepetho me ha.

Kaanî reha kwakrexe so mak.

Waipîn me tak kiir̂axe so epethîmnî me ro mak.

Kporin komo Xesus Kristu yakrono me kexirî ke so mak ero wa kiir̂axe so.

Ero wa kiir̂axe so.