Taa,

on wara tak wîîkes awya so oyakno komo,

Moises pen nmewretho ponarono komo rma amyamro.

On wara kacho katî enîhra matu,

Kn̂ewetîrî komo me nasî Moises pen nmewretho waipîra ka kexitaw so mak,

kacho yenîhra matu?

2 On wara marha kesî Moises pen nmewretho wooxam komo ya hara,

ciin̂oyem komo ya.

Ciin̂oi ka awexitaw so aan̂o komo poko mak ehcoko waipîra ka exitaw,

kesî.

Iin̂o pen waipuche,

towso tak nasî wooxam.

Yîn̂ewetîrî pîn me tak nasî,

Noro poko mak esko,

kacho.

3 On wara naxe anarî komo,

ciin̂onhîrî nahsîpînkexe waipînaw rma ka.

Anarî tak nahsîyaxe ciin̂o xa hara.

Ciin̂o pîn pokono mîkro kica,

kacho me tak nasî noro yipu.

Iin̂onhîrî pen waipuche tko,

yîn̂ewetîrî pîn me tak nasî,

Aan̂o poko mak esko,

kacho.

Ero ke anarî yahsîyataw tak ciin̂o xa hara,

Ciin̂o pîn pokono mîkro kica,

kacho mera rma tak nasî.

4 Ero wa xa marha maxe amyamro hara oyakno komo.

Mîwaiyatken̂e rma amyamro Kristu pun me rma awexirî ke so.

Ero ke an̂ewetîrî pîn me tak nasî Moises pen nmewretho.

Anarî pici me tak maxe hara,

Kristu pici me tak ha.

Kaan n̂enpakatho mîk Kristu waixapu komo chewnonho,

Noro pici me tak maxe hara.

Ero ke cewrusom wara tak maxe hara kir̂wan̂he awehtopo komo yenpotome tak Kaan ya kîmxîkrî wara.

5 On wara tîxatken̂e pahxa,

kehtoponhîrî komo yewetîn̂e me mak tîxatken̂e.

Kicicme mak kexi xe tîxatken̂e.

Moises pen nmewretho yentarî ke rma kicicme kexi xe so tîxatken̂e.

Ero wa kicicme kehtopo komo cenpetken̂e kîmxîkrî wara rma.

Kwaihkacho komo rma tko mîn kicicme kehtopo komo.

6 Towso takî tko taxe okre Moises nmewretho npanatanmekrî mera.

Pahxa ka cewehcatken̂e thakwa.

Kwaihîrî ke so wa knewetîrî pîn me tak nasî.

Ero ke,

Twaihkapore maxe okwe,

kahra tak nasî Moises pen nmewretho kîwya so.

Ero ke marha mewrexapu ponaro mak exihra tak taxe.

Pahxantho mak mîn mewrexapunhîrî.

Anarî me tak taxe kehtoponhîrî yaw rorohra tak.

Kaan Yekatî mtapotarî tak cencexe roro.

7 Ero ke ahce wa nai Moises pen nmewretho awya so?

Kicicme katî nai awya so ha?

Pîra ro mak.

Kir̂wan̂he rma nasî.

Exihra exitaw ketaw ha re kicicme oyehtopo yîhtînopîra thakwa re was ha.

Emyawnano poko epohkara ehcoko,

kacho exihra exitaw ketaw ha re,

Kicicme wai ham kica,

emyawnano poko kepohkesî kica,

kahra thakwa was ha.

8 Moises pen ya kpanatanmechonho yentache tak owya on wara tak wîxakn̂e,

mîn hak poko kepohketîkekn̂e kica.

Kicicme oyehtopo rma tko ero wa oriyakn̂e.

Pahxa ka Moises pen nmewretho yentara ka oyexitaw kar̂pera xakn̂e kicicme oyehtopo.

9 Waipîra marha ka wîxakn̂e Moises pen nmewretho yentara ka oyexirî ke.

Opanatanmetopo me tak xakn̂e entache owya.

Ero ke,

Kicicitho ow kica,

wîîkekn̂e tak.

Twaihkaxmu kr̂a ow ham,

wîîkekn̂e marha takî.

10 Kpanatanmetopo mîn xakn̂e Moises pen nmewretho.

Kaanî rma ero yipu n̂ekatîmyakn̂e waipîn me kehtome so cma ha re.

Twaihkaxmu me xa matko wîxakn̂e ow pen entache owya.

11 Oyewkukmekn̂e mak okwe kicicme oyehtopo.

Kpanatanmetopo ke rma n̂ekaricekn̂e owaikachome tak okwe.

12 Kir̂wanî rma re mîn Moises pen nmewretho.

Kir̂wan me kehtopo yekatîmn̂e mîn okre.

Yaarono mîn,

Ero wa exihra ehcoko,

kacho.

Kaan yanme kehtopo yekatîmn̂e mîn ha.

13 Ahce wa katî wîîke Moises pen nmewretho poko?

Kir̂wanî rma mîn.

Owaikan̂e me tko xakn̂e okwe,

wîîke katî?

Pîra rma.

Kicicme oyehtopo xa matko xakn̂e owaikan̂e me.

Kir̂wan ke rma owaikekn̂e,

Ero wa exihra ehcoko,

kacho ke.

Ero wa kacho n̂ekatîmyakn̂e Kaan kîwya so,

Kicicitho ro mak ow ham kica,

kachome kîwya so.

14 Kir̂wanî ro Yekatî ya kakîhretopo komo mîn Moises pen nmewretho.

Ero yipu yewetîra rma tko was okwe opun yewetîrî ke mak owya kica.

Kicicme oyehtopo yanton me thakwa was okwe.

15 Ahce kacho on wara wai kica,

wîîkesî kicicme oyehtopo poko rma.

Kir̂wan̂he oyexi xe cma re wasî.

Kir̂wan̂he exihra rma wasî kica.

Kicicme oyexi xera ro mak wasî.

Kicicme rma tko wasî kica.

16 Oyanmenkera ro mak wasî kicicitho poko.

Ero ke ero wa oyexirî ke,

Kir̂wan mîn Moises pen nmewretho,

kan̂e me rma wai ham.

17 Ero warai ow ham kica kicicitho pokono thakwa okwe.

Ow pînî rma ha tko wasî ero warai me.

Kicicme oyehtopo rma thakwa nasî oropotaw,

kicicitho pokono me or̂mexpon̂e.

18 Kir̂wan pînî ro mak ow ham,

wîîkesî.

Ero wa nasî oyehtoponho,

kir̂wan̂he exihra thakwa nasî.

Kir̂wan̂he oyexi xe rma re wasî.

Ahce wa thakwa re kir̂wan̂he wai okwe,

wîîkes ha tko.

Cehn̂axmu me thakwa wasî ero poko.

19 Kir̂wan̂he oyexi xe was okre,

wîîkesî cma re.

Ero warahra rma thakwa was okwe.

Kicicme oyexi xera ro mak wasî,

wîîkesî marha cma re.

Kicicme rma tko was okwe.

20 Ero wa mak wasî kica,

kicicme oyexi xera oyexitaw rma kicicme wasî.

Ero ke ow pînî rma wasî kicicme.

Kicicme oyehtopo xa nasî oropotaw.

Ero xa mîn kicicme thakwa or̂mexpesî thakwa.

21 Ero wara roro wasî kica.

Kir̂wan poko tak men wasî oroto ha,

wîîkesî cma re.

Pîra rma tko was okwe.

Kicicme oyehtopo rma nasî kica oropotaw.

22 Tpoxwe cma re wencesî Kaan ya kpanatanmetopo okre.

Ewetî xe was okre,

wîîkesî oropotaw.

Ero wa wasî.

23 Asak hakno wara mak wasî kica.

On wara kesehtînoyasî,

kir̂wan poko oyexi xe cma re wasî,

wîîkesî.

Kicicme oyehtoponho tko nas hara kica oropotaw.

Ero wa oyesehtînotopo yar̂man̂e me nas hara kicicitho yewetîn̂e me oyehtome,

opun chewno yewetîn̂e me rma.

Ero wa roro nasî kica.

24 Ero ke ahwora ro mak was okwe.

Twaihsomtho yanton me mak was okwe,

opuntho yanton me mak ha.

Onoke xa re nai oyown̂e me ha?

Oyown̂e xe ro mak wasî.

25 Nasî rma tko oyown̂e okre.

Ero ke kir̂wan̂he Kaan nai ham,

wîîkesî.

Kporin komo xa Mîk oyown̂e okre,

Xesus Kristu xa ha.

Kaan yanme makî cma oyowyasî.

Ero wa nasî.

Ero ke noro yipu makî reha ow ha.

Tpoxwe wences okre Kaan ya kpanatanmetopo.

Ewetî xe cma re was ha.

Kicicitho pokono me oyehtopo tko nasî rma opun chew.

Ero oriyasî kicicitho yewetîn̂e me okwe.