Kaan Yekatî Yewetîn̂e Me Tak Maxe
8
Taa,
on wara marha wîîkes awya so,
Twaihkaxmu amoro okwe kicicme awexirî ke,
kahra tak nasî Kaan Xesus Kristu yakrono komo ya.
On wara naxe n̂examro,
Xesus Kristu yakrono komo,
kehtoponhîrî yewetîn̂e me mak exihra naxe,
Kaan Yekatî yewetîn̂e me xa matko naxe.
2 On wara was owî,
Kir̂wanî ro Yekatî nasî oropotaw.
Karitî me noro oriye Xesus Kristu yewetîn̂e me tak oyehtome.
On̂ewetîrî pîn me tak kicicme oyehtoponho n̂iire.
Owaitopo marha n̂iire on̂ewetîrî pîn me.
Ero wa oriye okre Kir̂wanî ro Yekatî.
3 Cehn̂axmu me thakwa xakn̂e Moises pen nmewretho.
Kar̂pen wara thakwa xakn̂e kehtoponhîrî komo yanme mak.
Ero ke Tumumuru tak Kaan n̂en̂epekn̂e oona.
Noro n̂etpuncekn̂e kwarai me so,
kicicitho komo warai me rma.
Ero ke Noro xa tak kicicme kehtoponhîrî komo nar̂mekn̂e ewetîn̂e mera kiitome me so.
4 Taa,
ero wa kehtoponhîrî komo yar̂marî ke tak kir̂wan̂he tak taxe okre.
Kehtoponhîrî yewetîn̂e me mak exihra tak taxe,
Kaan yekatî yewetîn̂e me xa matko taxe.
Ero ke kpanatanmetopo yaw rorono me rma tak taxe okre.
Ero ke kir̂wan̂he taxe.
5 Ero warahra tko naxe kehtoponhîrî yewetîn̂e komo reha.
Ahce xe kyam wai ha?
kan̂e me mak naxe noro yipu komo okwe.
On wara kan̂e me reha naxe Kaan Yekatî yewetîn̂e kom hara.
Ahce wa oyexi xe nai Kaan Yekatî?
kan̂e me mak naxe.
Ero wa naxe.
6 Kupun ponaro mak kexitaw so twaihsom me thakwa mak taxe okwe.
Kaan Yekatî ponaro kexitaw so reha waipîn me tak taxe hara.
Cerepore so marha tak taxe okre.
7 Kupun ponaro mak kexitaw so Kaan xatî pîn me taxe okwe.
Kaan ya kpanatanmetopo komo marha ewetîra taxe.
Ewetîn̂e pîn me thakwa taxe okwe kupun ponaro mak kexirî ke so.
8 Ero ke on wara nasî Kaan tupun yewetîn̂e me cehsom komo poko,
tawake exihra ro mak nasî poko so okwe.
9 Ero warai pîn komo reha amyamro.
Apun komo yewetîn̂e pîn me tak maxe.
Kaan Yekatî yewetîn̂e me tak maxe okre.
Exihra katî nai Kaan Yekatî aropotaw so?
Kristu Yekatî exihra exitaw aropotaw so Noro yakrono mera ro mak maxe okwe.
10 Taa,
Kristu exirî ke aropotaw so waixapu me tak nasî apun komo kicicme awehtoponhîrî komo yanme thakwa.
Awekatî komo reha kar̂pe nasî kir̂wan me awehtopo komo yanme hara.
11 Taa,
Kaan Yekatî tak nasî aropotaw so,
Xesus Kristu yenpakan̂enho Yekat ha.
Ero ke karitî me marha apunthîrî komo n̂iir̂asî Noro Cekatî ke rma,
aropotawno komo ke ha.
Twaihsomtho rma mîn apun komo.
Ero yipu rma tko karitî me n̂iir̂asî.
12 Ero ke on wara tak men cexpore nasî oyakno komo,
kehtoponhîrî komo yewetîn̂e mera ro mak tak cexpore nasî.
13 Kehtoponhîrî komo yewetîn̂e me mak awexitaw so mîwaiyaxe mak okwe.
Ero ke apun komo yewetîtoponho nasî twaihkapore kr̂a.
Kaan Yekatî ponaro awehtopo komo ke rma waihkacoko.
Ero wa awexitaw so waipîn me tak maxe okre.
14 Ahce wa kexitaw so,
Kaan xîkrî xa ow ham,
tîtketu?
Kaan Yekatî ya kakîhrecho komo yentan̂e me kexitaw so ero wa tîtketu.
15 Cekatî rma Kaan nîmye awya so.
Ayopono komo katî awantometu so Noro cerahsom me awehtome so?
Pîra ro mak.
Kaan xîkrî amoro okre,
kesî xa matko kîwya so.
Ero ke tak,
Apa Apa,
tîtkexe Kîîm komo ya.
16 Kaan xîkrî ow ha,
tîtkexe kropotaw so.
Ero wa xa marha kesî Kaan Yekatî.
Yaaro,
Kaan xîkrî amoro ha,
kesî marha Noro kîwya so.
Cesemetanmekyaxe Rma Re Ka Kaan Xîkrî Komo Rma
17 Taa,
ero wa taxe,
Kaan xîkrî me tak ha.
Ero ke Kaan yemyawno yahsîn̂e me marha taxe.
Kristu yakro rma ahsîn̂e me taxe.
Cesemetanmekyaxe rma tko ka Kristu yakro rma.
Ero wa ka taxe kir̂wan me tak kesenpotome so hara amn̂e,
Noro yakro xa marha.
18 On wara kesehtînoyas ow,
wahra kyam mak nasî kesemetanmetopo komo tan roowo po kexitaw so ha ka.
Miya xe xa tak nasî kir̂wanî ro me kiitopo komo amn̂e okre,
wîîkesî.
19 Tînakîtothîrî tak nakir̂wamesî Kaan amn̂e ahnoro.
Ero ke expon wara mak ka nasî yînakîtothîrî komo takir̂wama xe.
Akir̂wamara rma tko ka nasî Kaan.
Amn̂e mak tîmxîkrî komo yakir̂wamatîkache mak miyan komo rma tak nakir̂wamesî.
20 Tîwîrîmaxi thakwa makî ka nasî Kaan nakîhtotho miyanî rma okwe.
Tanme ro mak etwîrîmara xakn̂e.
Kaanî rma nîwîrîmekn̂e.
Pahxaro takî kir̂wan̂he wiir̂asî onakîtotho komo ahnoro,
kekn̂e ha tko yîwîrîmetaw.
21 Etowîn me ahsîxapu wara ka nasî Kaan nakîhtotho komo ahnoro,
tîwîrîmacho nahsîtho wara.
Tîmxîkrî komo tko nakir̂wamesî Kaan amn̂e,
kir̂wan me xa kiir̂axe so eroromerono me.
Kwara so xa marha tînakîtothîrî komo ahnoro nakir̂wamesî tooto pîn meero.
22 Akir̂wamara rma ka nasî Kaan.
N̂erewaxe makî ka oko ahnoro Kaan nakîhtotho komo wooxam cewrusom wara rma.
Ero wa n̂erewaxe pahxanînhîrî rma.
23 Ahnoro Kaan nakîhtotho n̂erewasî.
Kîwyam meero cerewaxe oko Kaan xîkrî komo rma.
Kaan Yekatî rma re nasî kropotaw so.
Kakir̂wamacho yihcin̂e me makî ka nasî Noro.
Amn̂e tak kupun komo meero nakir̂wamesî Kaan tîmxîkrî me xa tak kenpotome so.
Ero wa kakir̂wamacho komo ponaro xa taxe okre.
24 On wara tîtkexe Xesus yahsîyataw kîwya so.
Oyakir̂wametîkesî tak Kaan amn̂e,
tîtkexe.
Ahce wa katî tatu,
takir̂wamatîkaxi katî tatu oroto rma?
Pîra ro mak ha ka.
Takir̂wamatîkaxi kexitaw so ketaw ha re,
Amn̂e oyakir̂metîkesî Kaan,
kahra taxe.
25 Pahkî kakir̂wamatîkacho ponaro rma taxe akir̂waman me rma.
Ahwokara rma tko taxe.
Kakir̂wamatîkacho ponaro xa taxe okre expokara rma.
26 On wara marha taxe,
cehn̂axmu me mak taxe okwe.
Kaan Yekatî rma tko kakronomexe so.
Camkî mak taxe Kaan yakro kîmtapotacho komo poko.
Ahce warai poko na kapore nai,
tîtkexe mak anarimaw so Kaan yakro kîmtapowataw so.
Ero wa kexitaw so Kaan Yekatî rma tî nîmtapowa kpoko so.
Cerewre ro makî tî nîmtapowa cemkutun̂e ro mak.
Ekatîmrî yopo ro makî tî n̂emkutuna kpoko so tîmtapowataw.
Ero wa tî nîmtapowa Kaan Yekatî kpoko so.
27 On wara nasî Kaan Noro poko,
yiixe ehtopo rma nîhtînoyasî.
Kaan nakirwamatho komo poko nîmtapowasî Noro,
Kaan yanmen poko mak.
Ero wa exirî ke wa kir̂wantawno me n̂encesî yîmtapotarî.
28 Ero ke on wara kacho ponaro taxe,
ahce wa so na kexitaw so Kaanî rma ero wa kiir̂atu so kir̂wan̂he kiitome so amn̂e.
Kaan xatî komo mak ero wa n̂iir̂a,
tînmen̂ekathîrî komo mak ha.
Pahxa rma kmen̂eketken̂e so Kaan tînakir̂wamarî me.
Ero ke kakir̂wamacho me rma n̂iir̂asî ahce na komo ahnoro mak.
Ero wa kacho ponaro xa taxe.
29 Pahxa rma tî kîhtînoyatken̂e so Kaan tînakir̂wamarî me.
Ero ke on wara kekn̂e kpoko so,
Omumuru warai me xa moxam wiir̂as amn̂e,
kekn̂e.
Mer̂pono pîn komo potutho me Xesus yexi xe xakn̂e.
Ero ke Xesus yakno me kiir̂atken̂e so okre.
30 Ero wa kiriche so kan̂ikyatken̂e so tak kir̂wan me tak kentome so.
Ero yinhîrî tak kirwanî ro me tak kiir̂atken̂e so hara.
Ero wa kiir̂atken̂e so Kaan.
Kîwîrîman̂e Komo Exihra Ro Mak Tak Nasî
31 Ero ke kakir̂waman̂e me exirî ke Kaan ahce wa tak tîtket ha?
On wara kapore nasî,
Kakir̂waman̂e me tak nasî Kaan.
Ero ke onoke ma re kîwîrîme hara awya so?
Pîra ro mak.
32 On wara xakn̂e Kaan,
Tumumuru rma waihkapekn̂e okwe kpoyero so.
Ewyomara ro mak xakn̂e.
Ero ke miyanî rma nîmyasî kîwya so ahnoro mak.
N̂ewyome katî awya so?
Pîra ro mak.
33 Kaanî nmen̂ekatho komo reha kîwyam.
Ero ke onoke ma re kicicme kehtopo komo poko ken̂eketu so?
Kaan xa Mîk kesî kpoko so,
Kir̂wan me n̂examro ween̂asî,
kesî Noro reha.
34 Onoke ma re on wara nîîke,
Kicicitho komo mîkyam kica amxîkrî komo Apa,
nîîke ha?
Enko xe,
Kristu xa waihyakn̂e kpoyero so.
Noro marha pakekn̂e hara.
Meye tak nasî Kaan panaw kaari n̂ixa.
Moxamu cma re makir̂wametîkesî Apa,
kesî marha kpoko so.
35 Onoke ma re kîîxatîmnokape Kristu ya awya so?
Kesemetanmekyataw so katî kîîxatîmnoke Kristu awya so?
Pîra ro mak.
Kahwokacho komo chew kexitaw xa katî kîîxatîmnoke?
Pîra marha.
Kesemetanmekyataw so kexitaw so tooto komo ya kîîxatîmnoke Kristu ha?
Pîra marha.
Rooma poko kexitaw so katî kîîxatîmnoke ha?
Pîra marha.
Pononpora kexitaw so katî kîîxatîmnoke ha?
Pîra marha.
Kwaparî komo chere kîwcetaw so katî kîîxatîmnoke ha?
Pîra marha.
Kparaxketaw so kacipara imo ke katî kîîxatîmnoke ha?
Pîra marha.
Ahce wa so na kexiche so kîîxatîmnokara ro mak nasî Kristu.
36 On wara kesî Kaan Karitan ero wa kehtopo komo poko rma,
Kaamo poko roro mak amna waihka xe naxe okwe.
Kaan ponaro amna yexirî ke mak amna waihka xe naxe okwe.
Oper̂atho wara ro mak amna n̂een̂axe okwe twaihkaxmutho wara,
kesî Kaan Karitan.
37 Ero wa so kexitaw so rma kicicitho yopono ro me xa kiir̂axe so Kristu,
kîîxatî ro kom ha.
38-39 Yaaro xa tan wîîkes awya so,
kîîxatîmnokan̂e pînî ro mak Mîk Kaan.
Kwaipuche so meero kîîxe so rma wa nasî.
Kar̂pe rma kexitaw so kîîxe so marha nasî.
Kîîxera so exitaw so ancu komo kîîxe so rma nasî.
Kîîxera so exitaw worokyam hara kîîxe so rma nasî Kaan.
Kîîxera so exitaw so karitî komo marha,
kîîxe so rma nasî Kristu.
Ahce wa so na kexitaw oroto,
kîîxe so rma nasî Kristu.
Amn̂e marha kîîxe so rma nasî ahce wa so na kexitaw so.
Ahto so na kexitaw so,
kaikokoro kexitaw so,
yuhnaw kexitaw so hara,
ahto so na kexitaw so kîîxe so rma nasî.
Onok na komo,
Kaan nakîhtotho komo,
kîîxera so exitaw kîîxatîmnokara so ro mak nasî Kaan.
Kporin komo Xesus Kristu yakrono me kexirî ke so kîîxe so ro mak nasî Kaan.
Ero wa nasî Noro kpoko so.