Taa,

anarî poko kîmtapowas hara awakro so,

Ixaw Yana komo poko tan kîmtapowasî.

Yaaro xa tan wîîkesî,

Kristu yakrono me oyexirî ke mak wîîkesî.

Cemarontara ro mak tan wasî.

Yaarono xa tan omtapotarî,

wîîkesî oropotaw rma.

Kir̂wanî ro Yekatî marha nîmtapowasî owara xa marha.

2 Ixaw Yana komo pînîn yaw oyehtopo poko ero wa wîîkes ha.

Okwe okwe,

wîîkesî ro mak n̂examro poko.

Ahwora ro mak wasî poko so.

3 N̂examro naxe twahkotoso Kristu yaka tohnî me ro mak okwe.

Ow xa matko wahkotoko Apa oyakno komo yekenhona,

ka xe cma re wasî n̂examro poko.

Opoyino komo cik mîkyam,

opunken komo rma okwe.

Ero ke yîpînîn yaw so xa wasî.

4 On warai mîkyam Ixaw Yana komo,

Kaan yanan komo xa mîkyam.

Tweyuru n̂enpekn̂e yîwya so okre.

Kakronomexe so tak amn̂e,

kekn̂e marha tî yîwya so.

Kpanatanmetopo komo marha tî n̂ekatîmyakn̂e yîwya so.

Tîmîn yenîn̂e me marha tî n̂iir̂akn̂e.

Awakir̂waman̂e komo men wen̂epes amn̂e ahyaka so,

kekn̂e marha tî yîwya so.

5 Abraaw pen yepamtho komo mîkyam,

Isake pen yepamtho komo marha mîkyam,

Xako pen yepamtho komo marha mîkyam.

Kristu marha n̂ewruyakn̂e n̂examro yepamtho me.

Kyopono ro mak Mîk Kristu.

Kaanî rma Mîk Noro,

Kirwanî ro mak Amoro okre,

kacho ha.

Noro yipu Mîk n̂ewruyakn̂e Ixaw Yana komo yepamtho me.

6 Taa,

Ahce wa nai hara Kaanî mtapotachonho,

Kakronomexe so amn̂e kachonho?

Ero wa cma re kekn̂e Ixaw Yana komo ya.

N̂ehn̂ekn̂e katî Kaan tîmtapotachonhîrî yaw roro n̂examro yakronomacho poko?

Pîra ro mak.

On wara xa matko naxe,

Ixaw Yana mera rma naxe anarî komo Ixaw yana me ewruxapu komo rma.

7 Abraaw pen yepamtho komo rma re mîkyam.

Ero wa ehtopo komo yanme mak,

Kaan yanan komo mîkyam,

kahra cexpore nasî.

Noro yanan me exihra rma naxe anarî komo,

Abraaw yepamtho komo rma.

Enko xe,

yaake tî xatken̂e Abraaw pen mumutho komo.

On wara tko kekn̂e Kaan Abraaw pen ya,

Isake yepamtho komo mak naxe amn̂e awepamthîrî me,

kekn̂e Abraaw ya.

8 Ero ke Kaan yanan me exihra rma naxe anarî komo Abraaw pen yepamtho komo rma.

Isake mak xakn̂e Kaanî mtapotachonho yaw roro ewruxapunhîrî me xa.

Ero ke noro pen yepamtho komo poko mak,

Abraaw yepamtho mîkyam,

kesî Kaan.

9 On wara Kaan kekn̂e Abraaw pen ya,

Kmokyas hara amn̂e ahyaka so.

Cewn̂e ro yicimn̂ipuntache mak kmokyasî.

Ero yimaw tak Sara mrerî cik n̂ewruyasî,

kekn̂e tî Kaan yîwya.

10 Amn̂e takî tî nîmtapowakn̂e xa hara Kaan Hebeka pen yakro tak hara.

Tarke tî xakn̂e noro pen kporin pen xîkrî ke,

Isake pen xîkrî ke ha.

Ero wa exitaw tî Kaan nîmtapowakn̂e.

11 Asakno yon me tî xakn̂e Hebeka pen.

Noro yakro tî nîmtapowakn̂e Kaan ewrunaw rma ha ka.

Kir̂wan̂he exihra ka xatken̂e yîmxîkrî ewrura cexirî ke so thakwa ha ka.

Kicicme exihra marha ka xatken̂e.

Ero yimaw tak Kaan nîmtapowakn̂e yîmxîkrî men̂ekacho poko.

Tanme ro mak tîyanan me ciisom men̂ekekn̂e.

Ero ke,

Kir̂wan̂he cehsom mak men̂ekesî,

kahra xakn̂e.

12 Ero ke ewrunaw rma ka ero poko nîmtapowakn̂e Hebeka pen yakro.

Tpotuthîrî yantoman̂e me nas amn̂e mahtîkîthîrî rma,

kekn̂e tî yîwya.

13 Ero yipu poko marha kesî Kaan Karitan xa hara.

Xako xe reha wîxakn̂e.

Esau xera reha wîxakn̂e,

kesî.

Ero wa tî kekn̂e Kaan.

14 Ahce wa katî Kaan meen̂atu,

akpîra katî meen̂atu ero wa ciino ritopo yîwya?

Pîra ro mak.

Akpîra exihra ro mak nasî Kaan.

15 Ero yipu poko rma tî Kaan kekn̂e Moises pen ya hara.

On wara tî kekn̂e,

Oyanme ro mak cino ritopo wîhtînoyasî.

Anarî komo pînîn yaw wasî oyanme ro mak.

Onkurunperî komo marha wîhtînoyasî oyanme ro,

kekn̂e tî yîwya.

16 Ero ke on wara kahra ro mak cexpore nasî,

Ketakir̂wamesî oyanme ro mak.

Kekaricesî xa oyetakir̂wamacho poko.

Ero ke kir̂wan̂he wasî,

kahra ro mak cexpore nasî.

Kaan mak xa yo kakir̂wamexe so tanme ro mak,

kîpînîn yaw so cexirî ke mak ha.

17 Ero yipu poko xa marha kesî Kaan Karitan hara.

Paraw pen ya tî kekn̂e Kaan on wara,

Kayaritomo me kiir̂akn̂e kar̂pe xa oyehtopo yenpotome.

Ero wa oyehtopo yenpotome kîwîrîmesî xa tak ha.

Ero ke roowo poko hakno komo rma tak n̂encexe ero wa awitopo owya.

Kar̂pe xa nai Kaan ham okyo,

kexe tak ero yipu yentarî ke,

kekn̂e tî Kaan Paraw poko,

kesî Kaan Karitan.

18 Ero wa xa nasî Kaan,

tanme ro mak ciino rin̂e Mîk ha.

Anarî komo reha wakresî,

tîmtapotarî yentan̂e me n̂iir̂asî.

Anarî komo reha n̂iir̂asî tîmtapotarî yenta xatî pîn me hara.

Ero wa nasî Kaan ha.

19 Ahce wa katî mîîketu ero wa Kaan yehtopo poko?

Ahce kacho kicicme oyen̂a hara Kaan ha?

Noro thakwa mak oriyakn̂e tîmtapotarî yenta xatî pîn me,

mîîketu katî?

20 Ero wa kahra ro mak cexpore nasî Kaan poko.

Noro pîntho kyam mak mexe amyamro ero wa kan̂e komo.

Kaan xa Mîk manwekyaxe kopi.

Ahce wa nîîke tahrem hara tkahn̂enhîrî ya awya so?

Ahce kacho on wara ow mîkapu kica?

nîîke katî yîwya awya so?

Pîra ro mak.

Ero wa kahra thakwa nasî.

21 Tanme ro mak tînkahrî nîhtînoyasî er̂mo kahn̂e.

Kir̂wan yen me on kahyasî,

kesî anarî poko.

Kicicitho yen me reha kahyas on hara,

kesî marha anarî poko hara.

Anarmerpan yen me tkahsom nîraconkesî er̂mo,

ero re poyinonhîrî rma.

Ero wa xa marha kiir̂axe so Kaan hara.

Tanme ro mak nîhtînoyasî kiitopo kom ha.

22 Ero wara rma xakn̂e Kaan Paraw pen poko hara,

tahrem kahn̂e wara rma xakn̂e.

Tîwîrîmaxmu me tî noro pen nîhtînoyakn̂e Kaan,

poko tîrwonîmtopo me xa.

Noro yipu rma tko nînîmyakn̂e pahkî kar̂pe xa cehtopo yenpotome.

23 Anarî komo reha Kaan nîhtînoyakn̂e yîpînîn yaw cehtopo me hara.

N̂examro nîhtînoyakn̂e kir̂wanî ro me tîn̂irirî me okre.

Ero wa cirirî ke kir̂wanî ro me cehtopo marha n̂enpesî Kaan.

24 Kîwyam xa Kaan nan̂ikîtho komo tînakir̂wamarî me.

Xutew komo mak pîn nan̂ikyasî.

Xenciu komo meero wa nan̂ikyasî ero wara ciisom me.

25 Ero yipu poko rma tko Kaan mewrepekn̂e Oseias pen ya.

On wara kacho tî mewrepekn̂e yîwya,

Oyanan me tak maxe amyamro,

wîîkesî yîwya so oyananînho pîn komo ya rma.

Aaxe so tak wasî wîîkesî marha yîwya so yiixe oyehtoponho pîn komo ya rma.

26 Mînto wîîkekn̂e yîwya so,

Oyanan pîn amyamro,

wîîkekn̂e.

Ero ke iito xa marha tak wîîkes hara amn̂e yîwya so,

Kaan xîkrî xa amyamro waipînî ro xîkrî ha,

wîîkesî,

kacho mewrepekn̂e Oseias pen ya.

Ero wa kacho mewrepekn̂e Kaan yîwya.

27 Taa,

on wara kacho tî mewrekn̂e Isaias pen hara,

Ixaw Yana komo pokono ha,

Mer̂pono pînî ro makî mîkyam Ixaw Yana komo.

Axawa warai mak mîkyam tuuna yecihtawno warai.

Waihyaxe rma tko amn̂e okwe.

Asak mak n̂etîmcexe waipîn komo.

28 Yohno ro mak tak roowo pono komo n̂emetanmekyasî Kaan amn̂e,

ecmamra nasî.

Yaaro rma roowo pono komo n̂emetanmekyasî ehtoponhîrî komo yepetho me,

kacho tî mewrekn̂e Isaias pen.

29 On wara kacho marha tî mewrekn̂e Isaias pen,

Kantoman̂e ro Mîkî Kaan.

Noro yipu kîmtora so exitaw ketaw ha re tîtwaitîkacerî ha re okwe.

Sotoma pono pen komo wara xa marha re cehcerî okwe,

Komoha pono pen komo wara xa marha,

kacho marha tî mewrekn̂e Isaias pen.

30 Ero ke ahce wa tîtketu Xenciu komo yehtopo poko?

On warainhîrî mîkyam Xenciu komo,

Kir̂wan me cehcerî,

kan̂e pînînhîrî mîkyam.

Noro yipu rma kir̂wan me tak xatken̂e hara.

Kaanî rma tî kir̂wan me n̂examro n̂iir̂akn̂e tpona enîrî ke mak yîwya so.

Ero wa xatken̂e Xenciu komo.

31 Pîra reha xatken̂e Ixaw Yana komo okwe,

Kaan ya tpanatanmetopo komo ponaro tî xatken̂e.

Kakîhren̂e cma re mîn kpanatanmetopo.

Kir̂wan me exihra rma tko xatken̂e n̂examro okwe.

32 Ahce poyero kir̂wan me exihra xatken̂e?

Kaan pona enîhra cexirî komo poyero ero wa xatken̂e okwe.

On wara mak ketken̂e okwe,

Kir̂wan me was okre Moises penî mtapotachonho yewetîrî ke mak owya,

ketken̂e okwe.

Ero ke kir̂wan me exihra rma xatken̂e.

Toh pona cehrokaxmu wa mak xatken̂e okwe Ixaw Yana komo.

33 Ero yipu poko rma kesî Kaan Karitan on wara,

Siaw pona men wiir̂as amn̂e toopu warai,

yîhrokano ritopo.

Yîwîrîmano ritopo xa mîn wiir̂asî iina.

On wara tko naxe Noro pona enîn̂e komo,

Ehn̂ara tak naxe kir̂wan me cehtopo komo poko,

kesî Kaan Karitan.

Ero wa kesî.