Taa,

on wara wîîkes hara awya so oyakno komo.

Ixaw Yana komo poko rma tan kîmtapowasî.

N̂examro pînîn yaw ro mak was okwe.

Kir̂wan me ciri xe so wasî Kaan ya.

Cerewre ro mak ero wa ciri xe so wasî yîwya.

Kir̂wan me n̂examro cirko Apa,

wîîkesî roro Kaan ya.

2 On wara ween̂asî n̂examro,

Kaan xatî wara cma re ween̂asî.

Camkî ro makî tko naxe okwe Kaan poko.

3 Kir̂wanî ro me Kaan yehtopo poko camkî naxe okwe.

Kir̂wan̂he was ow oyanme ro mak,

kexe mak kica.

Kir̂wanî ro Amoro Apa,

ero ke ero wa xa marha ow cirko,

kahra ro mak naxe okwe Kaan ya.

4 Kristu pona enîche kîwya so Noro rma tak kir̂wan me kiir̂axe so okre.

Ero ke,

N̂eexi tak Moises pen nmewretho pona entopo owya kir̂wan me oritome,

kapore nasî.

5 On wara kacho tî mewrekn̂e Moises pen,

kpanatanmetopo yanme kir̂wan̂he kiitopo komo poko rma mewrekn̂e,

On apanatanmetopo komo yewehcataw awya so waipîn me tak maxe okre,

kekn̂e tî noro pen.

6 On wara reha kesî Kaan Karitan kir̂wan me kiitopo komo poko.

On wara kahra ro mak ehcoko aropotaw so,

Onoke thakwa re cee ha kah yaka?

kahra ehcoko.

Kristu yenîhton̂e xe nas amna,

kan̂e wara maxe okwe ero wa ketaw awya so.

7 On wara kahra ehcoko,

kesî marha,

Onoke thakwa re yuhnaka cee ha okwe?

kahra ehcoko.

On wara kan̂e wara maxe ero wa ketaw awya so,

Iito nasî Kristu waixa pen komo chew.

Iina tîtosom exihra ro mak nas okwe,

enpakan̂e,

kan̂e wara maxe okwe,

kesî Kaan Karitan.

8 Taa,

on wara xa hara kesî Kaan Karitan,

Meyehra rma nasî Kaanî mtapotacho kir̂wan me awitopo komo pokono.

Amtaw so rma nasî,

aropotaw so marha nasî,

kesî Kaan Karitan.

Yîmtapotarî amna n̂ekatîmyasî,

ero poko rma wa kesî ero wara.

Xesus pona encoko,

kesî roro amna.

Ero wa kacho pokono rma mîn Kaan Karitan ha.

9 On wara kacho mîn amna n̂ekatîmyasî,

Oporin me xa Xesus wîhtînoyasî,

kacoko tooto komo n̂entarî me.

Xesus n̂enpakekn̂e Kaan waixapu pen komo chewnonho,

kacoko marha aropotaw so.

Ero wa kache tak awya so Kaan nakir̂wamarî me tak maxe,

kes amna.

Ero warai poko panatanmekno n̂iir̂as amna.

10 Kropotaw so xa Xesus pona cenpore nasî kir̂wan me tak kiitome so Kaan ya.

Tooto komo ya marha cesekatîmpore nasî.

Xesus pona enîn̂e ow ha,

kapore nasî.

Ero wa kache kîwya so Kaan nakir̂wamarî me taxe.

11 Ero warai poko rma kesî Kaan Karitan.

On wara kesî,

Ahnoro Kaan pona enîn̂e komo nakir̂wamesî Kaan,

ehn̂ara ro mak,

kesî.

12 Etîme re rma kakir̂wamexe so Kaan.

Xutew komo nakir̂wamesî.

Xenciu komo marha nakir̂wamesî etîme re rma.

Noro mak Kporin komo me nasî miyan komo Porin me rma.

Noro marha kakir̂wamexe so ahnoro.

Owî cma re makir̂wames Apa,

kan̂e komo nakir̂wamesî.

Noro yipu Mîk Kporin kom ha.

13 Ero ke ero wa kapore nasî yîwya.

Apa,

kir̂wan̂he wencesî amna yakirwaman̂e me awehtopo.

Ero ke,

Ow cma re makirwamesî,

kapore nasî.

Ahnoro ero wa kan̂e komo tak nakir̂wamesî Kporin kom okre.

14 Taa,

on wara wîîkes hara awya so,

Ahce wa thakwa re Kporin komo pona enîn̂e pîn komo n̂ehsametu Noro poko?

Pîra ro thakwa mak okwe.

Ahce wa nat hara Kaanî mtapotarî yentan̂e pîn komo?

Noro pona ma re n̂een̂atu noro yipu komo?

Noro pona enîhra thakwa naxe okwe.

Taa,

ahce wa Kaanî mtapotarî n̂encetu ekatîmn̂e exihra exitaw okwe?

Entara thakwa naxe hara okwe.

15 Ahce wa ha re cetu ekatîmn̂e komo en̂epen̂e komo exihra exitaw so?

Tohra thakwa naxe okwe.

Ekatîmn̂e komo poko rma nîmtapowasî Kaan Karitan.

On wara kesî ekatîmn̂e komo tarî poko,

Tîhtaporem xa mîkyam okre.

On wara kaxi tîtosom komo mîkyam,

Tawake tak nasî Kaan kpoko so okre Xesus pona enîche tak kîwya so.

Kakir̂waman̂e komo Mîk Kaan okre,

kexe.

Awahworetopo komo mîn n̂ekatîmyaxe okre,

kesî Kaan Karitan.

16 Kaanî mtapotarî tko tî ewetîra rma xatken̂e anarî komo,

kakir̂waman̂e Mîk Xesus okre,

kacho.

Noro yipu komo poko rma tî kekn̂e Isaias pen.

Exihnî wara ro mak nas amna mtapotarî yewetîn̂e okwe,

kekn̂e tî.

17 Ero ke Xesus pona tak ceen̂axe kakir̂wamacho komo yentarî ke mak,

sara wara entarî ke ha.

Sara wara entan̂e me xa taxe Kaanî mtapotarî yentarî ke mak kîwya so.

Ero wa taxe.

18 Taa,

ahce wa natu tooto komo,

Kaanî mtapotarî yentara katî xatken̂e?

N̂encetken̂e rma cma ha re.

On wara kesî Kaan Karitan,

Omtapotarî rma n̂encetken̂e miyan komo rma.

Roowo mapitawno komo meero n̂encetken̂e,

kesî.

19 Taa,

ahce wa xatken̂e Ixaw Yana kom hara?

Entara katî xatken̂e n̂examro hara?

N̂encetken̂e rma ha re.

On wara kacho tî mewrekn̂e Moises pen n̂examro n̂enîrî me,

Anarî yana komo poko tpohnîmsom me kiir̂axe so amn̂e.

Warai makno komo poyero rma tak kîrwonmekyaxe so amn̂e,

kacho ti mewrekn̂e Ixaw Yana komo poko.

20 Noro xa marha tî Kaanî mtapotarî n̂ekatîmyakn̂e noro yipu komo poko rma.

On wara tî kekn̂e camra ro mak,

Ahto nai Kaan okwe?

kan̂e pîn komo rma oyencetken̂e tak.

Ahce wa xa nai Kaan ha?

kan̂e pîn komo ya marha tak kesenpekn̂e,

kesî Kaan,

kekn̂e tî Isaias pen.

Ero wa tî kekn̂e Ixaw Yana pîn komo poko.

21 Ixaw Yana komo poko reha on wara kes hara,

Kaamo poko cma re pokupoku wîîkesî n̂examro wece,

Amok ha,

amok ha,

kacho ha.

Oyanwekn̂e komo wece thakwa ero wa wîîke ham okwe,

kekn̂e tî Isaias pen,

Kaanî mtapotarî tî n̂ekatîmyakn̂e.

Ero wa tî kekn̂e.