Taa,

Ixaw Yana komo poko rma tan kîmtapowasî.

On wara wîîkes hara n̂examro poko,

ahce wa tak nai Kaan tîyanan komo poko,

Ixaw Yana komo poko ha?

Nahsîpînkekn̂e ro mak katî awya so?

Pîra ro mak.

N̂examro yahsîpînkan̂e pînî ro mak Mîkî Kaan.

Ixaw Yana xa rma ow hara.

Abraaw pen yepamtho rma ow.

Bencamin tribun poyino ow.

Noro yipu ow ha.

2 Pahxa rma tî Ixaw Yana komo nîhtînoyakn̂e Kaan tîyanan komo me ciisom me.

Ero ke tînmen̂ekathîrî komo yahsîpînkara ro mak nasî.

Enîhra katî matu Kaan Karitan Erias pen pokono?

Kaan yakro tî nîmtapowakn̂e noro pen Ixaw Yana komo poko.

Kicicme ehtoponhîrî komo tî n̂ekatîmyakn̂e yîwya.

3 On wara tî kekn̂e,

Apa,

on wara naxe Ixaw Yana komo okwe,

apoko weronomano rin̂enho pen komo n̂etapexe okwe.

Awya tîmsom yaponho marha macakexe okwe.

Ow mak wasî aponarono ha.

Oyetapacho poko meero n̂esencexe okwe,

kekn̂e tî Erias pen Ixaw Yana komo poko.

4 Ahce wa tko kekn̂e Kaan Erias pen ya hara awya so?

On wara tî kekn̂e yîmtaka rma,

Yaake rma tko naxe ha oponarono komo.

Wîmcekn̂e rma oponarono kom ha,

7.000 ha.

Ero wicakî rma naxe Baaw kuknon mamaka yutupentan komo,

tosokmuru po so yutupentan kom ha,

kekn̂e tî Kaan yîwya.

5 Ero wa xa marha naxe oroto hara Ixaw Yana komo.

Kaan nmen̂ekatho komo rma naxe asakî mak.

N̂examro men̂ekekn̂e Kaan tînwakrerî me.

6 Oyanan me kahsîyaxe so onwekrerî me ha,

kesî Kaan yîwya so.

Kir̂wan̂he roro awexitaw so mak kahsîyaxe so,

kahra ro mak nasî Kaan yîwya so.

Ero wa kan̂e me exitaw ketaw ha re kwakretopo pîn me rma nasî ahsîtopo komo,

epethîrî komo me mak nasî.

Kepemexe so tan ha,

kahra tasî wakreno riyataw.

Kwakrexe so tan ha,

kahra marha tasî epemano riyataw hara.

7 Ero wa xatken̂e Ixaw Yana komo,

Kaanî nwakrerî me cexi xe so tî re xatken̂e.

N̂ehn̂etken̂e mak okwe.

Poyino komo tko xatken̂e yînwakrethîrî me asak mak ha tko,

yînmen̂ekathîrî komo mak.

Anarî komo ropotarî ceipuru wara ro mak n̂ehtîkekn̂e okwe.

8 Noro yipu komo poko rma tko kesî Kaan Karitan.

On wara kesî,

Wînîkno ken̂arî wara Kaan n̂iir̂asî yîropotarî komo.

Enîn̂e pîn me marha n̂iir̂asî ewru komo.

Entan̂e pîn me marha n̂iir̂asî panarî kom hara.

Ero wa Ixaw Yana komo n̂iir̂asî Kaan.

Ero wara rma naxe okwe oroto,

kesî Kaan Karitan.

9 Tapi pen marha tî nîmtapowakn̂e Kaan yakro noro yipu komo poko.

On wara tî kekn̂e,

N̂examro yeseresmetaw rma ceper̂ai cirko Apa.

Emcixapu wa marha cirko n̂examro,

mîîye yawno wara.

Ero wa cirko noro yipu komo Apa kicicme ehtopo komo yepetho me rma.

10 Cewxîrîtîno wa marha n̂examro cirko.

Tkatuhkem wa marha cirko eroromero.

Ero warai ke n̂examro epemak Apa,

kekn̂e tî.

Ero wa tî kekn̂e Tapi pen Ixaw Yana komo poko.

11 Taa,

on wara tak wîîkesî,

kicicme nat ham Ixaw Yana komo.

Ero ke ahce wa tak n̂examro n̂iir̂a Kaan awya so.

Cehrokaxmu me katî n̂iir̂a epîrkachome makî tak?

Pîra ro mak.

Kicicme exirî ke so Xenciu komo makîrha tak nakir̂wamesî Kaan n̂examro poko pohnîmtome Ixaw Yana kom hara.

Ero wa n̂examro n̂iir̂asî Kaan.

12 On wara nas hara Kaan,

kicicme Ixaw Yana komo yexirî poyero Xenciu komo tak wakres hara emtaka so.

Roowo pono komo ahnoro wakresî.

Ixaw Yana komo rma tko wakresî xa hara amn̂e pahxaro hara.

Ero ke n̂examro wakretaw xa hara Xenciu komo wakresî rma ero yimaw.

Miya xe xa tak wakretîkesî Ixaw Yana komo wakrerî ke hara.

13 Kaanî mtapotarî xa tan wekatîmyas awya so,

Xenciu komo amyamro.

Awya so ekatîmn̂e ro me oriyakn̂e Kaan.

Ero ke wekatîmyas awya so.

14 Opoyino komo pohkamexpo xe wasî apoko so.

Apoko so epohketaw so tak n̂examro marha tak nakir̂wamesî Kaan okre.

15 Ixaw Yana komo yahsîpînkarî ke ka Kaan ya Xenciu komo wakres hara.

Miyan komo rma wakresî roowo poko hakno komo.

Ero ke tîyanan me Ixaw Yana komo yahsîche hara miya xe xa tak Xenciu komo wakresî ero yimaw.

Enpakaxapu wara tak n̂examro naxe amn̂e,

waixapu wa ehxapunhîrî komo rma.

Ero wa tak Xenciu komo wakresî Kaan Ixaw Yana komo poyero rma.

16 Ero wara rma nasî cuure hara.

Yihcirî me aixapu ka nasî Kaan ya tîmsom me.

Kir̂wanî ro mîn Kaan ya tîmsom.

Ero ke kwahxarî yakwenho marha kir̂wan me nas hara.

Ero wa xa marha nasî naat hara,

kir̂wan̂he exitaw yimicin,

kir̂wan̂he tak nas amn̂e eepu hara.

Ero wa nasî.

17 Taa,

tînatîrî peremtho warai komo nîhkocekn̂e Kaanî rma.

Anarî komo mak nîhkocekn̂e.

N̂examro yekenhona tak Kaan awir̂atken̂e so hara,

Xenciu kom hara.

Anarî warai mak amyamro reha naatî pîn warai.

Wara rma awir̂atken̂e so hara oripera yepu peremru me,

yîhkotoxapu yemtaka hara.

Ero ke yimicin yai tak cesî ehkuru achere so okre.

Peremru ro yakro rma tak tahwore matîkwaxe peremru ro wara rma.

18 Ero ke peremthîrî yopono me esehtînopîra men ehcoko kica.

On wara men yîhtînocoko,

yimicin yanme mak n̂eperwasî peremru.

Peremru yanmera ro mak reha n̂imicinwasî eepu.

Peremru kyam mak amyamro.

Ero ke ehcoyoponkara ro mak ehcoko.

19 On wara tko na mîîketu,

Peremthîrî rma Kaan nîhkocekn̂e kr̂a amna ciitome hara ekenhîrî komo na,

mîîketu na.

20 Yaaro rma re ero wa mîîkexe.

Tanwekrî poyero makî Ixaw Yana komo nîhkocekn̂e Kaan.

Cewetîrî ke mak awya so awir̂atken̂e so n̂examro yekenho na hara.

Ero ke ehcoyoponkara men ehcoko.

Twerî xa matko ehcoko.

21 Enko xe,

peremru ro rma yîmtora xakn̂e Kaan.

Nîhkocekn̂e rma okwe.

Soroso xa tak amyamro hara,

ahkocetu so okwe anarî ro peremtho me awexirî ke so.

22 Ero ke Kaan yehtopo ponaro ehcoko.

Kwakren̂e me nasî Noro.

Kîpînîn yawno pîn me marha tko nas hara.

Epîrkaxapu komo pînîn yawra ro mak xakn̂e okwe.

Awakrexe so reha tpona enîn̂e me awexitaw roro so mak.

Noro pona enîhra tak awexitaw so amn̂e ahkocetu so hara men okwe n̂examro pen wa xa marha.

23 Ero wa xa marha Kaan nîîr̂asî Ixaw Yana kom hara,

Kaan yanwekîra exitaw so tak eepu pîmîsîtî me n̂iir̂as hara.

Ehn̂ara ro mak wa nasî Kaan n̂examro pîmîsîtotopo poko hara.

24 Anarî nai hara oripera naatî pîn.

Ero yipu warai komo peremtho warai mak amyamro.

Naatî yepu pîmîsîtî me rma tko awîr̂atken̂e so Kaan okre,

awarai pîn pîmîsîtî me tak.

Soroso xa tak Ixaw Yana komo n̂iir̂as hara Kaan amn̂e ceeputhîrî pona xa hara.

Ero wa n̂iir̂asî.

25 Ero wa Ixaw yana komo ciitopo poko twen̂ekarî awexi xera so wasî.

Ero wara n̂examro ciitopo esehtînomexpora xakn̂e pahxan pen komo ya.

Ero wa n̂examro ciitopo wekatîmyasî tak awya so n̂examro yopono me esehtînopîra ro mak awehtome so.

Ceipuru wara ka nasî Ixaw Yana komo ropotarî Xenciu komo wakrechome hara ka.

Taa,

Xenciu komo wakrecho yenatîche tak Ixaw Yana komo n̂iir̂as hara Kaan tînwakrerî me hara.

26 Ero ke ahnoro Ixaw Yana komo tak nakir̂wamesî Kaan ero yimaw.

Ero yipu poko rma kesî Kaan Karitan on wara,

Siaw poi tak mokyas amn̂e Ixaw Yana komo kurunpen̂e ro okre.

Kaan xatî me tak Ixaw Yana komo n̂iir̂asî ero yimaw.

Ero wa n̂iir̂asî Xako pen yepamtho kom ha,

Kaan xatî pînînhîrî kom ha.

27 On wara kesî Kaan Karitan,

Omtapotachonho yaw roro rma n̂examro wukurunpes amn̂e,

kicicme ehtoponhîrî komo yîhcamnoyataw owya,

kesî.

Ero wa kesî.

28 Kakir̂waman̂e Xesus okre,

kacho yenta xatî pîn me ka naxe Ixaw Yana komo entan̂e me awehtome so hara.

Kaan men̂ekatho rma tko mîkyam,

yiixe ehtopo komo xa.

N̂examro porin pen komo xe cexirî ke yiixe so marha nas hara.

29 On wara nasî Kaan tîmtapotachonhîrî poko,

kwakretopo komo yekatîmîche kîwya so anarî me kahra ro mak tak nas amn̂e.

Ero wa xa marha nasî kmen̂ekacho komo yekatîmîche hara anarme kahra tak nas hara.

Noro yipu Mîk Kaan.

30 Pahxa ka Kaan yanwekn̂e me mîxatken̂e amyamro Xenciu komo.

Kaan yanwekn̂e me marha tko xatken̂e Ixaw Yana kom hara.

Ero wa exirî komo poyero apînîn yaw so makîrha tak xakn̂e hara Kaan.

31 Ero wa ka naxe Ixaw Yana komo,

Kaan yanwekn̂e me ka naxe okwe.

Awya so reha Kaan n̂esenpesî apînîn yawno komo me tak.

Ero ke Ixaw Yana komo pînîn yawno me marha tak n̂esenpes hara Kaan amn̂e apînîn yaw so cexirî ke rma.

32 Tanwekn̂e me ka kiir̂atken̂e so.

Etîme re kiir̂atken̂e so ero warai me kîpînîn yaw so cehtome hara,

ahnoro rma.

33 Ero wa Ixaw Yana komo n̂iir̂asî Kaan,

Xenciu komo marha.

Yuhnarino yîhtînon̂e Mîk Kaan okre.

Keserepokesî ro mak Noro poko takîhso xa exirî poko,

camkîra ro mak exirî poko marha.

Noro mak Mîk ero warai.

Yaaro xa ken̂ekan̂e Mîk Noro,

tooto komo warahra ro mak nasî.

Yîhtînorî yopo ro mak nasî ciino ritopo yîwya.

34 Yuhnarino xa mîn Kaan yesehtînotopo.

Onoke xa ma re ero wara rma nîhtînotîke hara?

Onoke xa ma re Kaan panatanmekn̂e me nai ha awya so?

Pîra ro mak.

35 Kaan nakîhtotho pîn ma re tîmyatu yîwya?

Pîra ro mak.

On ha anakîhtothîrî pîn,

Ahsîko awemyawno me tak,

kan̂e exitaw ketaw ha re yînmîthîrî Kaan n̂epemes ha re.

36 Miyan yakîhton̂e rma Mîk Kaan.

Ero wicakno yecehton̂e xa marha Mîk ha.

Poko tahwotachome ero wa nasî.

Ero ke on wara kapore nasî Noro poko,

Kir̂wan xa Mîk ham okre,

kapore nasî miya roro yîtîhkan me ro mak.