Apun Komo Tîmcoko Kaan Ya
12
Ero ke on wara wîîkes hara awya so oyakno komo,
apînîn yaw so xa Kaan nai ham okre.
Ero ke tîmcoko apun komo yîwya.
Pahxan pen komo wara rma ehcoko ha.
N̂examro pen paraxketken̂e tokuthîrî komo Kaan ya tîmsom me.
Ero wa xa marha tîmcoko apun kom hara Kaan ya,
waipîn me mak ha tko.
Ow tak ahsîko awantonî ro me,
kacoko yîwya.
Awanton mexan me xa oyexi xe wasî,
kacoko marha yîwya.
Ero wa awehtopo ke rma epancoko awakrechonhîrî komo yîwya.
2 Roowo pono komo poko pohnîmra ro mak men ehcoko.
Kir̂wan me tak ehcoko awehtoponhîrî komo yaw rorohra.
Ero wa ehcoko kir̂wan ponaro mak awexirî komo ke.
Ahce na ponaro mîxatken̂e ero ponarora tak ehcoko.
Ero wa awexitaw so tak,
On wara oyexi xe nai ham Kaan,
mîîkexe yaaro rma.
Kir̂wan xa mîn Kaan yanme kehtopo,
Kicicme cik nasî ha re,
kacho mera ro mak.
Ero yipu yewetîn̂e me kexitaw so tawake tak nasî Kaan kpoko so.
Ero ke ero wa ehcoko.
Anarmerpan Pokono Me Taxe Kaan Xîkrî Komo
3 Kaan xa owakrekn̂e apanatanmekn̂e komo me oyehtopo ke.
Ero ke on wara wîîkes awya so,
achewno komo ya marha,
anarî komo yopono me esehtînopîra ro mak ehcoko.
Tohnaw ro mak esehtînopîra ehcoko kir̂wan̂he awehtopo komo poko.
Takîhso xa yîhtînocoko poko awehtopo ro komo.
Tpona enîn̂e me awir̂atken̂e so Kaan ero poko awesehtînotome so.
Ero ke ero warai me mak esehtînocoko.
4 Kupun komo wara rma taxe Kaan xîkrî komo.
Enko,
cewn̂an me nasî kupun komo.
Ero yipu rma tko nasî anarmerpan me,
cewn̂anî rma.
Kentopo me nasî kewru.
Kentacho me nasî kpanarî hara.
Ketaritopo me tak nasî kîhtarî hara.
Ero wa nasî kupun,
anarmerpa so nasî.
5 Ero wa xa marha wa taxe kîwyam hara Kristu yakrono ro kom ha.
Cewn̂an me rma wa taxe mer̂pono pîn komo rma.
Ero ke,
Opunu rma mîkyam,
kapore nasî Kaan xîkrî komo poko.
6 Anarmerpan pokono me tko kiir̂atken̂e so Kaan.
Kwakretken̂e so mak ero yipu pokono me kehtome so.
Ero ke Kaanî mtapotarî yekatîmn̂e me awexitaw so ekatîmrî poko ehcoko.
Kaan pona makî tko encoko takîhso ekatîmtome awya so.
7 Akronomano rin̂e me awexitaw so reha akronomano rirî poko xa ehcoko.
Panatanmekno rin̂e me awexitaw so reha panatanmekno rirî poko xa ehcoko.
8 Ero poko n̂he cehcerî,
kan̂e me awexitaw so reha ero wa kan̂e me roro xa ehcoko.
Wakreno rin̂e me awexitaw so reha amemra ro mak wakreno ciicoko.
Enîno rin̂e me awexitaw so reha enîno rirî ponaro xa ehcoko.
Kar̂pen komo yakronoman̂e me awexitaw so reha tawake mak akronomano ciicoko.
Ero wa ehcoko.
Mîn Hak Poko Kpanatanmetopo
9 On wara marha ehcoko,
etîxatî wara cesenposom me exihra ehcoko.
Yaaro xa etîxatî me ehcoko.
Kicicme exitaw anarî komo,
poxumra ro mak encoko kicicme ehtopo komo.
Kir̂wan komo yehtopo poko makî reha apohnîmcoko.
10 Noro re rma kîwyam Kaan xîkrî komo.
Ero ke awakno komo xe maxe ero wa xa marha Kaan xîkrî komo xe ehcoko hara.
Kir̂wan amoro ham okre,
ketaw apoko so,
Mîkro xa kir̂wan,
kacoko mak anarî poko.
11 Awemyawno komo poko ehcoko yuwun̂ura ro mak.
Kaan xa oyantomesî on poko,
kacoko roro awemyawno komo poko.
Ero ke tahwore xa ehcoko awemyawno komo poko awexitaw so.
12 Xesus xa tak ween̂as amn̂e okre,
kacoko roro.
Awemetanmekyataw so tooto komo ya ahwokan me mak ehcoko.
Kaan yakro amtapotacoko miya roro ahwokan me ro mak.
13 Kaan xîkrî komo yesemetanmekyataw so yiixe xa ehtopo komo tîmcoko yîwya so.
Pawana komo wakretopo ponaro marha ehcoko.
14 On wara mak kacoko awemetanmekn̂e komo ya,
Awakronoma xe mak wasî Kaan ya,
kacoko mak yîwya so.
Awemetanmekî xe kr̂a wasî Kaan ya,
kahra ro mak ehcoko yîwya so.
15 Taa,
tahwotaxmu komo yeen̂ataw awya so ahwotacoko xa marha akro so.
Tîwrataxmu komo yeen̂ataw reha awya so awratacoko xa marha akro so hara.
16 On wara marha ehcoko,
etîme re mak esencoko,
anarî komo yopono me esenîra.
Kyopono xa mîkro,
kacho komo ponaro mak exihra ehcoko.
Kîxawyakan me cehsom komo ponaro marha ehcoko.
Takîhsom ow ha,
kahra marha ehcoko.
17 Awemetanmekyataw so tooto komo ya esepanpîra ro mak ehcoko.
On wara marha ehcoko,
yaaro xa tîmtapotaxmu me mak ehcoko kir̂wan̂he mak awentome tooto komo ya miyan komo ya rma.
18 Tawake ehcoko tooto komo poko miyan komo poko rma.
Cesei xe exitaw so,
eseira ro mak ehcoko amyamro hara.
Ero wa ehcoko.
19 Oyakno komo cik amyamro okwe.
On wara wîîkes hara awya so,
awemetanmetoponhîrî komo epanpîra ro mak ehcoko.
Kaanî xa tko n̂epanîyasî amn̂e,
kacoko mak.
Ero poko rma wa kesî Kaan Karitan,
Ow xa Ow ha awepanîn̂e komo.
Awemetanmekîche so aaxatî pîn komo ya wepanîyasî amn̂e,
kesî Kporin komo,
kesî Kaan Karitan.
20 Ero ke aaxatî pîn komo yîromanataw so yînahmacoko.
Twokru xe exitaw so wokpacoko marha.
Ero wa twakrepore nas aaxatî pîn komo rma.
Ero wara aaxatî pîn komo wakretaw awya so,
wehto roron tîmn̂e wara maxe,
wehtorî yiritopo.
Wehto roron yen yaka enmekn̂e wara maxe okre,
tkanahtaw aatome amîtwono ya.
21 Kicicme tooto komo yehtopo yanme emacakara ehcoko n̂examro wa xa marha awehtome so.
Ero wa ehtopo komo yopono me xa matko ehcoko kir̂wan̂he awehtopo ke hara okre.