Kayaritomo Komo Ewetîcoko
13
Taa,
anarî poko kîmtapowas hara,
kayaritomo komo yewetîtopo poko ha.
Kayaritomo komo men ewetîcoko.
Kaan xa Mîk kayaritomo me ciino rin̂e.
Tanme ro mak kayaritomo me exihra ro mak naxe tooto komo.
Ero ke kayaritomo komo cewetpore nasî Kaan n̂iritho me exirî ke so.
2 Kayaritomo komo yanwekyataw awya so Kaan yanwetopo rma mîn okwe.
Ero yepetho me tooto komo n̂emetanmekyasî Kaan kopi.
3 Kir̂wan komo yeraspen̂e pîn mîkyam,
kayaritomo komo.
Kicicitho komo yeraspen̂e makî reha mîkyam.
Ero ke erasîra awexi xe awexitaw so kayaritomo pona kir̂wan̂he mak ehcoko.
Kir̂wan̂he awexitaw so,
Kir̂wan̂he mat ham okre,
kesî tak kayaritomo apoko so.
4 Awakronoman̂e komo mîkyam kayaritomo komo esemetanmekîra awehtome so.
Kaan yanme ero poko naxe.
Kicicme awexitaw so tko erahtîmcoko tak men okwe.
Kacipara imo ke cemyarkem mîkyam kopi.
Tohnaw mak ero yipu arîhra naxe.
Kaanî rma nîrwonasî kicicme cehsom komo poko.
Ero ke Noro yanme xa kicicitho komo waihkan̂e me naxe n̂examro.
5 Ero ke,
Oyahsîya men kayaritomo okwe ewetîra oyexitaw,
tîtkexe rma re.
Yaaro rma ero wa tîtkexe.
On wara xa yo kacoko,
Kaan xe wasî.
Ero ke kayaritomo wewehcasî Kaan yanme mak,
kacoko xa matko.
6 Ero ke marha puranta tîmcoko hara kayaritomo komo ya.
Kaan yanme mak naxe n̂examro kenîn̂e komo me.
Ero ke tîmcoko yîwya so.
7 Ero ke akayaritomon komo epemacoko ahnoro,
Oyepetho tîmcoko,
kan̂e komo ya.
Yukurumîkno me xa encoko yukurumîkno komo.
Ayopono komo me xa encoko yîtîhkathîrî kom hara.
Ero wa xa encoko kayaritomo komo.
Etîxe Kexitaw So Ahnoro Kpanatanmetopo Yewetîn̂e Me Taxe
8 Taa,
on wara marha wîîkes awya so,
ahce na yaponkuche awya so ecmamra ro mak men ehcoko epethîrî tîmtopo poko.
Etîxe mak ehcoko.
Epethîrî komo wara rma yîhtînocoko etîxe awehtopo komo.
Moises pen nmewretho cewetîtîkexe ahnoro etîxatî me kexitaw so.
9 Ahce poko kpanatanmekyatu so Moises pen nmewretho?
Anarmerpan poko rma kpanatanmekyaxe so.
On wara kesî,
Apici pîn pokohra ro mak ehcoko,
Aan̂o pîn pokohra ro mak ehcoko amyamro wooxam kom hara,
tooto waihkara ro mak ehcoko,
en̂epamra ehcoko,
emyawnano poko epohkara ro mak ehcoko,
Miya rma nasî Moises pen nmewretho kpanatanmetopo kom ha.
Anarî xa nas hara ahnorono xa tak.
On wara kacho mîn,
Awakrono komo xe ehcoko aaxe so rma maxe ero wa xa marha yiixe so ehcoko,
kacho nasî.
Miya rma kehtopo pokono rma mîn Moises pen nmewretho.
10 Kîmîtwono komo xe kexitaw so emetanmekîra taxe.
Ero ke kîmîtwono komo xe kexitaw so Moises pen nmewretho yewetîn̂e me rma taxe.
Awarpanawno Komo Warahra Tak Ehcoko
11 On wara marha wîîkes awya so,
Pahxa rma Xesus pona ceen̂atken̂e.
Ero ke pahnoke n̂he tak nasî kakir̂wamatîkacho komo.
Ero ke tpakapore n̂he tak nasî.
Yîwînxapu wara exihra cexpore tak nas ha.
12 Awarpanawno wara ka xatken̂e kporin pen komo pahkî okwe.
Kîwyamu reha taxe enmaporono wa tak okre.
Ero ke ahce na poko tîxatken̂e awarpanaw,
ero yipu tak tahsîpînkacerî.
Katpan yamrun̂e wara xa yo cehcerî poono yamrun̂e wara.
Kukurun wara nasî katpan okre.
13 Katpanawno wa xa cehcerî kîhyapamtopo ken̂arî pîn me ro mak.
Wara ro mak kan̂e me exihra marha cehcerî.
Wenmîra marha cehcerî.
Mîk hak wooxam pokohra marha cehcerî.
Mîk hak kîîrî pokohra marha ehcoko wooxam kom hara.
Tîmtayanwesom me exihra marha cehcerî.
Kyopono me cehsom komo xatî pîn me exihra marha cehcerî.
Ero warai mera ro mak tak cehcerî ha.
14 Kehtoponhîrî komo yewetîra ro mak ehcoko.
Oyehtoponho cik wewehcasî kicicitho pîn poko n̂he mak,
kahra ro mak ehcoko kicicitho xatî wara awexitaw so okwe.
Kporin komo Xesus Kristu yamrun̂e wara xa ehcoko poono yamrun̂e wara.
Ero wara xa ehcoko.