Taa,

anarî poko tan kîmtapowas hara.

On wara naxe anarî komo,

Kaan xîkrî komo rma,

Kristu pona rma re n̂een̂axe cerahso mak ha tko.

Noro yipu komo porohkara ehcoko erahtopo komo poyero mak.

Noro yipu komo yakro tko eseseikura ehcoko,

Camkî maxe ero poko,

kacho poko.

2 On wara kexe anarî komo,

Tonopore nasî wooto ahnoro,

kexe.

Pîra,

kexe anarî komo reha.

Wooto men tonohra ro mak cexpore nasî kica.

Erewsî makî reha tahpore nasî,

kexe noro yipu komo karpera cexirî ke tîropotaw so.

3 Wooto yonon̂e komo,

awya so tan wîîkesî,

wooto yonon̂e pîn komo yîwîrîyakara ro mak ehcoko.

Amyamro hara wooto yonon̂e pîn kom hara,

awya so wîîkes hara,

wooto yonon̂e komo yen̂ekara marha ehcoko ero poyero.

Kaan nahsîtho mîkyam tanton me.

Ero ke n̂ehcowpe mak.

4 Anarî komo yanton yen̂ekan̂e katî amyamro reha?

Pîra ro mak.

Osom komo makî reha n̂en̂ekesî tanton komo.

Amoro reha Ow manwek ham kica,

kesî anarî ya.

Amoro reha Ow mewet ham okre,

kesî anarî ya hara.

Kaanî rma noro yipu komo n̂ecehcesî epîrkara ehtome so.

5 Anarî komo reha naxe kaamo ponaro hara.

Etapickara ro mak men cexpore nasî ero po,

kexe.

Ero warahra kexe anarî komo reha.

On wara kexe n̂examro reha,

Apohana,

etîme re mak ween̂asî kaamo ahnoro,

kexe reha.

Ero ke awanme ro so mak yîhtînocoko ero yipu.

6 Kaan kamon tan okre,

kexe ero ponarono komo reha.

Pîra tko owya,

Kaan kamon me nas ahnoro mak,

kexe reha anarî kom hara.

Ero wa xa marha kexe wooto ponarono kom hara.

Kaan nîmîtho xa tan okre wooto,

kexe.

Pîra,

kicicme Kaan keen̂axe so wooto ton̂etaw kîwya so kica,

kexe reha anarî kom hara.

Kaan nîmîtho xa tan okre,

kexe n̂examro hara tahsom poko makî reha.

Ero wa naxe Kaan xîkrî komo,

anarmerpa so n̂esehtînoyaxe Kaan yanme rma tîwya so.

7 Ahce kacho tan tatu roowo po?

Kerepotachome mak katî tan tatu awya so?

Pîra ro mak okwe.

Ahce kacho reha wa tîtwaiyat hara amn̂e.

Kanme ro so mak katî wa tîtwaiyat hara?

Pîra marha.

8 Kporin komo yanme mak taxe kar̂pe,

waipîra rma ha ka.

Kporin komo yanme marha tîtwaiyaxe hara amn̂e.

Ero ke Kaan yanmen me mak taxe waipîra ka kexitaw so,

kwaipuche so marha.

Ero wa taxe.

9 Kporin komo xa Mîk Kristu.

Ero wa cehtome Noro waihyakn̂e,

waixapu komo Porin me cehtome ha.

Ero wa cehtome marha pakekn̂e hara waipîn komo Porin me cehtome hara.

10 Ero ke ahce kacho awakno komo mîwîrîyaket okwe?

Ahce kacho kicicitho wa n̂examro meen̂at hara?

Kristu xa nasî ken̂ekan̂e komo me.

Noro yaka xa wa tîhcexe amn̂e ahnoro.

Noro mtapotarî tak cencexe,

Kicicme mas okwe,

kacho.

Kir̂wan̂he mai ham okre,

kacho marha cencexe.

11 Ero yipu poko rma wa kesî Kaan Karitan.

Yaaro tan wîîkesî,

kesî Aporin komo,

waipîn me cehsom xa Ow ha,

kacho wara rma nasî omtapotarî yaaro xa.

Awosokmuru komo po men mutupenwaxe ahnoro amn̂e omamaka.

Amna Porin xa ham Amoro,

mîîkexe marha ahnoro Kaan ya,

kesî Kporin komo,

kesî Kaan Karitan.

12 Ero ke tak Kaan ya cesekatîmyaxe amn̂e ahnoro.

Kehtoponhîrî komo cekatîmyaxe yîwya.

13 Ero ke n̂eexi tak awakno komo yîwîrîyakacho awya so.

Kicicme exi xera ro mak wasî oyakno opoyero okwe,

kacoko mak.

Kaan poko oyakno komo yahwokamexpo xera was okwe kacoko marha.

Ero wa xa kakno komo ponaro cehcerî.

14 Taa,

kicicitho me exihra ro mak nasî wooto,

wîîkes ow.

Kicicitho me exihra marha nasî kaamo hara,

wîîkesî marha.

Ero wa xa marha kesî Kporin kom hara Xesus ha.

Ero warahra reha tî n̂een̂atu anarî kom hara.

Kicicitho me n̂een̂axe wooto,

kaamo marha.

Ero ke kicicitho me een̂ataw yîwya so kicicitho me nasî yîwya so reha.

Ero wa nasî yîwya so.

15 Taa,

kicicitho me yîn̂enîrî ton̂etaw rma awya so awakno wero,

ero yipu tonon̂e pîn wero,

noro tak n̂eserepokesî apoko so.

Kicicitho non̂exe n̂examro kica,

kesî tak apoko so.

Ow marha woon̂e ham n̂examro wa xa marha,

nîîke tak na awenîrî ke so.

Ero ke Kaan yanwekn̂e wa nasî apoyero so rma okwe.

Kristu n̂epematho mîkro okwe awakno ha.

Kristu waihyakn̂e noro yepetho me.

Ero ke noro yîwîrîmara ro mak ehcoko awotî komo poyero mak okwe.

Awakno xatî pîn wara maxe okwe ero wa awexitaw so.

16 Kir̂wan ow,

mîîketu na amyamro.

Anarî me tko na ketu awakno komo apoko so wooto ton̂etaw awya so.

Kicicme ro mak naxe n̂examro kica.

Enko xe,

kicicitho non̂exe kica,

ketu na apoko so.

Ero ke ero wa karî pona tonohra ro mak men ehcoko yînwîrîyakathîrî kom ha.

17 Ahce wa kexirî ke so Kaan maywen me tat ha awya so?

Wooto tonorî ke mak kîwya so Kaan maywen me exihra ro mak taxe.

Wok yerîrî ke mak kîwya so Kaan maywen me exihra marha taxe.

On wara xa matko kesî Kaan tmaywen komo ya,

Kir̂wan̂he mak ehcoko etpoko,

ahwokan me marha ehcoko,

tahwore marha ehcoko.

Ero wa ehcoko Kir̂wanî ro Yekatî yanme mak.

Ero wa awexitaw so omaywen me xa tak maxe okre,

kesî tak Kaan kîwya so.

18 Ero wa cexpore nasî Kristu yanme mak.

Ero wa awexitaw so tawake tak nasî Kaan apoko so okre.

Apoyino komo marha naxe tawake apoko so okre.

19 Ero ke kakno komo poko tawake awehtopo komo ponaro xa cehcerî.

Ahworen̂e me marha cehcerî Kaan poko.

20 Kaan nakir̂wamatho men mîkyam awakno komo.

Ero ke n̂examro ahwokamexpora ro mak ehcoko Kaan poko.

Awotî komo poyero mak ahwokamexpora ehcoko.

Kir̂wan̂he rma re nasî wooto ahnoro.

Kicicme rma tko tî n̂een̂atu anarî komo.

Ero ke ero yipu ton̂etaw rma yîwya so Kaan yanwekn̂e wa tak naxe okwe.

21 Ero ke wooto tonohra ro mak cexpore nasî kicicme exitaw awakno komo ya.

Ton̂etaw rma awya so Kaan yanwekn̂e wara tak na nat awakno komo awotî komo poyero mak okwe.

Wok yerîhra marha cexpore nasî kicicme een̂ataw awakno komo ya.

Ahce na pokohra ro mak cexpore nas awakno komo yahwokan̂e me exitaw,

Kaan pona enîhkamexpon̂e me exitaw marha.

22 On wara na mîîketu amyamro,

Kotî komo me Kaan nîmyasî wooto ahnoro okre,

mîîketu na.

Taa,

ero wa ketaw awya so aropotaw so mak kacoko,

Kaan ya mak ha.

Kaan yanme yîhtînocoko ahce na poko awehtopo komo.

Kaan yanme xa wasî on poko,

mîîketu na ahce na poko awexitaw so.

Ero wa kan̂e me awexitaw so tawake maxe okre.

23 Apohana,

kicicme kiin̂e na moso kica Kaan ya,

mîîketu na anarî poko wooto poko.

Ero yipu ton̂etaw rma awya so kir̂wan̂he awenîra so nasî Kaan okwe.

Kaan nîmîtho on oyotî,

kahra awexirî ke so kicicme awen̂axe so okwe.

Ahce na poko awexitaw so,

Kaan yanme xa wasî on poko,

kahra awexitaw so kicicme maxe okwe.

Ero wa maxe.