Kristu Wara Rma Ehcoko
15
1-2 Taa,
ero wa cexpore nasî tîkrîro Kaan pona enîn̂e komo poko.
Ero wara ehtopo komo tînîmpore mak nasî.
Karitî me na tatu kropotaw so kîwyam reha.
Wara rma keserepotanmecho ro ponaro mak exihra ro mak cexpore nasî.
Kpoyino komo marha cerepotanmekpore nasî kir̂wan ke mak.
Kaan poko marha tahworepore nasî.
3 Enko xe,
Kristu na rma eserepotanmekîra xakn̂e.
Ero yipu poko rma kesî Kaan Karitan.
On wara kesî,
Apa,
tîwîrîyakaxmu me wîxakn̂e okwe.
Aaxatî pîn komo awîrîyaketken̂e Amoro mak ha ka.
Ero yinhîrî owîrîyaketken̂e tak Ow pen hara okwe,
kesî Kaan Karitan.
4 Ero wara kesî Kaan Karitan.
Kpanatanmetopo komo rma mîn pahxa mewrexapunhîrî rma.
Ero ke Kaan Karitan yeen̂ataw roro kîwya so ahwokan me tak taxe,
tahwore roro mak taxe.
Kaan ya kakronomacho komo ponaro marha taxe okre.
Ero wa taxe Kaan Karitan yeen̂ataw kîwya so.
5 Taa,
on wara awiri xe so wasî Kaan ya,
iito re cesehtînosom me awiri xe so wasî yîwya.
Xesus Kristu wara rma cesehtînosom me awiri xe so wasî.
Ahwokan me kiin̂e Mîkî Kaan.
Kerepotanmekn̂e xa matko Mîk ha.
Noro yipu ya ero wa awiri xe so wasî.
6 Etîme re cesehtînosom me awexiche so tak etîme re marha tak mîmtapowaxe kir̂wan̂he Kaan yehtopo poko.
Kir̂wan̂he Kaan nai ham okre,
Kporin komo Xesus Kristu Yîîm ha,
mîîkexe tak.
7 Enko,
Oyakrono me ehcoko,
kekn̂e Kristu kîwya so.
Kir̂wan̂he Kaan nai ham okre,
tîtkexe takrono me kirirî ke so.
Ero ke ero wa xa marha ehcoko Kaan xîkrî komo poko,
Amna yakrono me ehcoko yiixe awexitaw so,
kacoko yîwya so.
8 Taa,
on wara marha xakn̂e Xesus Kristu,
Xutew komo ya mak n̂ekatîmyakn̂e Kaanî mtapotarî Kaanî mtapotachonho yaw roro rma cehtome.
On wara tî Kaan kekn̂e pahxa kporin pen komo ya,
Kakronomexe so men amn̂e,
kekn̂e tî.
Ero ke Xutew komo ya mak n̂ekatîmyakn̂e Kristu.
9 Xenciu komo pînîn yaw rma tko nasî Kaan.
Ero wa Kaan yehtopo poko nahwowaxe Xenciu komo.
Ero yipu poko marha kesî Kaan Karitan.
On wara kesî,
Kir̂wan̂he xa mai ham Apa okre,
wîîkesî tak amn̂e Xenciu komo n̂entarî me.
Awosotî poko marha kewanomesî yîn̂entarî me so,
kesî.
10 On wara marha kesî Kaan Karitan,
Xenciu komo,
awya so tan wîîkesî,
ahwotacoko amyamro Kaan yanan komo yakro rma,
kesî.
11 On wara kesî xa hara Kaan Karitan,
Kir̂wan̂he nai ham Kporin kom okre,
kacoko amyamro Xenciu komo.
Noro poko ahwotacoko amyamro anarî yana komo ahnoro,
kesî.
12 On wara kacho marha tî mewrekn̂e Isaias pen hara,
Xese yepamtho me tak n̂ewruyasî Noro amn̂e.
Noro tak por̂mamyas amn̂e Xenciu komo kayaritomon me cehtome tak.
Noro pona xa tak n̂een̂axe Xenciu komo ero yimaw,
kacho tî mewrekn̂e Isaias pen.
Ero wa kesî Kaan Karitan Xenciu komo poko ha.
Ero ke,
Xenciu komo pînîn yaw nai ham Kaan,
tîtkexe.
13 On wara kiin̂e Mîk Kaan,
Kakronomexe so rma Kaan amn̂e,
kan̂e me kiin̂e Mîk ha.
Noro yipu ya awahwore xe so wasî.
Noro yipu ya marha ahwokan me awiri xe so wasî.
Noro pona enîn̂e me awexitaw so ero wa awir̂axe so.
Miya xe xa tak awitîkexe so ero wara.
Kir̂wanî ro Yekatî ke akaricexe so awakrecho komo ponaro xa tak awehtome so.
Ero wa awexi xe so wasî.
Entan̂e Pîn Komo Ya Ekatîmn̂e Ow, Kesî Pawru
14 Taa,
on wara kîhtînoyaxe so,
kir̂wan komo me rma re kîhtînoyaxe so.
Kaanî mtapotarî poko ehcamhokaxapu me marha kîhtînoyaxe so.
Awakrono komo panatanmekn̂e me marha maxe,
wîîkesî apoko so.
Ero warai me wa kîhtînoyaxe so.
15 Kaanî mtapotarî poko apanatanmekî xe so rma tko wasî awehcamhokatîkachome so n̂he takî.
Kaan makî cma tîmtapotarî yekatîmn̂e me oriyakn̂e owakretopo me mak.
Ero ke kpanatanmekyaxe so.
16 Xesus Kristu mtapotarî yekatîmn̂e me oriyakn̂e Kaan,
Xenciu komo ya ekatîmn̂e me.
Ero ke Kaan ya kakir̂wamacho komo wekatîmyasî awya so.
Pahxa okno puntho nakn̂iyatken̂e tîmsom pokono komo.
Ero wa xa marha tak Xenciu komo wîmyas amn̂e ow hara Kaan ya.
Tawake tak nasî Kaan ero yimaw onîmrî poko,
apoko so ha.
Kir̂wanî ro Yekatî nakir̂wamatho me awexirî ke so mak tawake nasî apoko so.
17 Ero ke yaaro rma Kristu Xesus poko kahwowasî.
Mer̂pora naxe Noro nahsîtho komo omtapotarî yanme.
Kaan poko wekatîmyasî yîwya so.
18 Xenciu komo ya Xesus yewetîtoponho wekatîmyas awya so.
Opoyero ewetîn̂e komo yehtoponho makî tko tan wekatîmyasî.
Anarî komo poyero rma Xesus nahsîyaxe on̂enîtho pîn komo.
Noro yipu komo yehtopo yekatîmra tan wasî awya so.
Mer̂pora naxe Xesus yewetîn̂e komo omtapotarî yanme,
oyehtopo yenîrî ke marha.
Kristu xa tko ero wa n̂examro n̂iir̂akn̂e.
19 Cirihnî ro mak Noro n̂irpekn̂e owya,
eserepokacho kom ha.
Kaan yanme xa Pawru n̂ekatîmya ham,
kachome tak tooto komo ero yipu n̂iir̂akn̂e.
Kaan Yekatî rma okaricekn̂e ero yipu ciitome owya.
Ero ke Xesus ya kakirwamacho wekatîmyakn̂e miya so rma.
Xerusaren pono komo ya ka wekatîmyakn̂e.
Amn̂e anarî pono komo ya marha wekatîmyakn̂e.
Ewto watohra ro mak wîxakn̂e.
Iririku pona roro tak kîwcekn̂e cekatîmro.
Iitono komo ya meero marha wekatîmyakn̂e Xesus ya kakir̂wamacho komo.
20 Ero yipu yentan̂enho komo cheka tko owto xera wîxakn̂e owî reha.
Entan̂e pîn komo cheka makî reha owto xe wîxakn̂e.
Noro yipu komo ya kakir̂wamacho komo wekatîmyakn̂e.
Anarî komo npanatanmekîtho panatanmekî xera xa hara wîxakn̂e owî reha.
21 Noro yipu komo poko rma kesî Kaan Karitan.
On wara kesî,
Noro xa kakir̂waman̂e,
kacho yentan̂e pînînhîrî komo rma tak Noro pona n̂een̂axe amn̂e.
Noro yîhtînon̂e me tak naxe ero yimaw.
22 Noro yipu komo ya wekatîmyakn̂e Kristu ya kakir̂wamacho.
Cemyarke xa wîxakn̂e ero poko ahyaka so omokrî yarohra ha ka.
23 Wekatîmyakn̂e tantono komo ya ahnoro.
Ero ke entan̂e pîn komo exihra tak nasî.
Ero ke kmokyasî xa tak ahyaka so ha.
Pahxa rma omoku xe cma re ka wîxakn̂e.
Omoku xe ro mak wîxakn̂e yaake cimn̂ipu.
Orotono wa xa tak kmokyasî iina.
24 Ero ke takî Espan̂a pona owcetaw amn̂e ahyari so tak kmokyasî.
Awenî xe so wasî owtorî me.
Iito tak tîmtapowaxe tahwore xa okre.
En̂exa tak kîwcesî Espan̂a pona.
Owcetaw tak owî cma re maar̂axe moro na mak.
25 Xerusaren pona tko ka kîwcesî Kaan xîkrî komo wakretopo yaaso.
26 Iitono komo tî natu yupurantamra okwe anarî komo Kaan xîkrî komo.
Noro yipu komo wakretopo tîmî xe xatken̂e Maseton̂a pono komo,
Akaia pono komo marha.
Ero ke Xerusaren pona kîwcesî yînmîthîrî komo yaaso.
27 Ero wa puranta tîmî xe so tî xatken̂e iitono komo wakretopo.
Xutew komo mîkyam Xerusaren pono komo.
Xenciu komo wakretopo nîmyatken̂e.
Yaaro rma tîmpore xakn̂e.
N̂examro wakren̂enho komo rma mîkyam Xutew komo,
ekatî wakren̂enho.
Ero ke cesepanpore xakn̂e cemyawno komo tîmtopo ke hara.
28 Ero ke puranta yaaso cokorî ka kîwcesî.
Xerusaren pono komo ya wîmyasî.
Meyeno komo yeperîrî warai rma mîn wîmyasî yîwya so.
Ero yinhîrî tak Espan̂a pona kîwces hara.
Ero yimaw ahyari so tak kmokyasî iina owtorî me.
29 Ahyaw so oyexitaw tak Kristu ya kakir̂wamacho komo wekatîmtîkes awya so.
Ero yipu yekatîmyataw Noro rma tak kwakrexe so xa hara kahworetopo komo ke hara.
Ero wa kwakretopo komo ponaro xa wasî.
30 Taa,
Xerusaren pona owtotopo poko kîmtapowasî Kaan yakro.
Ahyaka so omohtopo poko marha.
Ero ke amyamro marha cma re mîmtapowaxe ero yipu poko xa marha oyakno komo.
Cerewre cma re mîmtapowaxe,
Kporin komo Xesus Kristu yanme mak.
Etîxatî me marha mat ham Kaan Yekatî yanme rma.
Ero ke cma re mîmtapowaxe opoko.
31 On wara kacoko Kaan ya,
Iito naxe Xesus pona enîn̂e pîn komo Apa,
Xuteia po.
Ero ke Pawru cma re mukurunpesî.
Tawake marha cirko iitono komo Kaan nakir̂wamatho komo Pawru narîrî poko,
mîîkexe cma re.
32 Ero wa cma re mîmtapowaxe opoko ahyaka so omohtome amn̂e.
Iina oyarî xe exitaw Kaan kmokyasî.
Tahwore xa kmokyas ahyaka so.
Kerepowasî xa tak awenîche so.
33 Ero wa mak wîîkes awya so.
Taa,
awakro so xa Kaan yexi xe wasî.
Ahwokan me kiin̂e ro Mîk awakro so exi xe wasî.
Ero wa exi xe wasî.