Taa,

on wara wîîkes hara awya so,

yarî tî nîîce aaci Pebe ahyaka so.

Kir̂wan mîkro,

Kaan xîkrî yakronoman̂e,

Senkreia pono komo yakronoman̂e ha.

2 Ero ke Kporin komo xîkrî me noro encoko.

Tawake taxe Kaan xîkrî komo poko ero wa xa marha tawake ehcoko noro poko.

Akronomacoko marha ahce na poko exitaw.

Mer̂pono pîn komo yakronoman̂enho mîkro.

Ow marha oyakronomekn̂e.

Ero ke akronomacoko.

3 On wara kacoko Prisira ya,

Akwira ya marha,

Pawru tî nai apînîn yaw so,

kacoko.

Oyakronoman̂enho komo marha mîkyam Akira komo.

Kristu Xesus yanme n̂ekatîmyatken̂e Kaanî mtapotarî oyakro.

4 On wara xatken̂e n̂examro,

n̂etwaikapetken̂e re opînînke.

Ero ke on wara wîîkesî yîwya so,

Ow cma mukurunpetken̂e okre,

wîîkesî.

Ero wa xa marha kexe Kaan xîkrî komo ahnoro Xenciu kom ha.

Amna panatanmekn̂e cma mukurunpetken̂e okre,

kexe.

Ero wa kexe Akwira komo ya.

5 Taa,

owî ekatîmcoko hara n̂examro mîn yaka cesenmesom komo ya.

Pawru tî nai aponaro so,

kacoko yîwya so.

Ero wa xa marha kacoko Epenetu ya hara.

Noro pînîn yaw marha was okwe.

Akaia pono komo poturme Kristu yahsîn̂enho mîk.

6 Ero wa xa marha kacoko Maria ya hara.

Noro marha n̂ekaricekn̂e ro mak amna yakronomarî poko.

7 Ero wa xa marha kacoko Antoniku ya hara,

Xun̂as ya marha.

Oyanan komo mîkyam.

Kir̂wan komo mîkyam,

kexe 12 komo rma.

Pahxa tî Kristu pona n̂een̂atken̂e n̂examro.

Mah yaka so mak tak ween̂akn̂e Kristu pona owî reha.

8 Amriatu ya marha kacoko,

Aponaro tî nai Pawru,

kacoko.

Noro pînîn yaw wasî Kporin komo ponaro xa exirî ke.

9 Ubanu ya marha kacoko,

Aponaro tî nai Pawru,

kacoko.

Amna yakronoman̂enho marha mîk noro hara.

Kristu xe cexirî ke amna nakronomekn̂e.

Ero wa xa marha kacoko Estakis ya hara.

Noro pînîn yaw marha was okwe.

10 Ow ekatîmcoko Aperes ya hara.

Kristu npanatanmekîtho xa mîk.

Ero wa xa marha kacoko Aristoburu komo ya hara.

11 Ero wa xa marha kacoko Erociaw ya xa hara.

Oyanan marha mîkro okwe.

Ero wa xa marha kacoko Nahsisu komo ya hara,

Kporin komo yakrono komo ya.

12 Ow ekatîmcoko Tîripena ya hara,

Tîriposa ya marha.

Kporin komo yanme cekaritosom komo mîkyam.

Ero wa xa marha kacoko Pehsici ya hara.

Yîpînîn yaw oyehtopo mîkro.

Noro marha n̂ekaricekn̂e xa Kporin komo yanme.

13 Ow ekatîmcoko Hupu ya hara.

Kporin komo nmen̂ekatho mîkro.

Ero wa xa marha kacoko yînocwan ya hara.

Onocwan warai rma mîk noro.

Tîmrerî wa xa oriyakn̂e.

14 Ero wa xa marha kacoko Asinkritu ya marha,

Prekonce ya marha,

Ehmesî ya marha,

Patrobas ya marha,

Ehmasî ya marha.

Noro yipu komo ya owî ekatîmcoko.

Ero wa xa marha kacoko n̂examro yakrono komo ya hara,

kakno komo ya ha.

15 Ero wa xa marha kacoko Piroroku ya marha,

Xur̂a ya marha,

Nereu ya marha,

noro yepeka ya marha,

Orimpas ya marha.

N̂examro ya ow ekatîmcoko.

Ero wa xa marha kacoko n̂examro yakrono komo ya hara,

Kaan xîkrî komo ya ha.

Noro yipu komo ya men ow ekatîmcoko.

16 On wara marha wîîkes awya so,

aweseporîche so Kaan xîkrî komo yakro esewcokacoko Kaan yanme mak ha.

Aponaro so marha tî natu mîn hak ewto pono komo Kaan xîkrî komo.

Ero wa tî natu.

17 Taa,

on wara wîîkes hara awya so,

on wara naxe anarî komo,

kicicme n̂een̂axe takrono komo,

Kaan xîkrî komo rma.

Yîhyai so tak n̂etakpayaxe.

Kicicme marha nîmtapowaxe poko so.

Tanme ro so mak ero wa n̂een̂axe takrono komo.

Apanatanmetopo komo mencetken̂e ero yanmera ro mak n̂etakpayaxe.

Ero wa cetakpaxmu me exitaw so iitono komo n̂examro yakrono mera ehcoko amyamro hara.

18 Kporin komo Xesus Kristu yanme kpanatanmekn̂e pîn mîkyam okwe.

Twethîrî komo wakre xe naxe okwe.

Kir̂wan̂he rma re nîmtapowaxe tawakem wara xa okre.

Camkîno komo tko n̂ewkukmexe okwe etîxatî wara tîmtapotarî komo ke.

19 Kir̂wan̂he tî matu amyamro reha,

Kaan yewetîn̂e me tî mat ha.

Ero wa mekaiwaxe miyan komo ya rma.

Ero wa awexirî ke so tawake wasî.

On wara tko wîîkes awya so,

takîhsom me awexi xe so wasî kir̂wan̂he kehtopo komo poko.

Camkîno me makî reha awexi xe so wasî kicicme kehtopo komo poko hara.

Ero wa awexi xe so wasî.

20 Ahwokan me kiin̂e ro Mîkî Kaan.

Noro tak Satanas n̂iir̂asî anapikri komo me.

Yohno rma ero wa n̂iir̂asî.

Napikmapesî ro mak awya so.

On wara marha wîîkesî,

awakre xe so wasî Kporin komo Xesus Kristu ya ha.

Ero wa mak wîîkes awya so oyakno komo.

21 Taa,

tan nasî Cimocu.

Oyakrono moso Kaanî mtapotarî yekatîmrî poko.

Noro marha tî nai aponaro so.

Rusiu,

Xason,

Sosipatu,

ero wa tî natu aponarono komo.

Oyanan komo marha moxam.

22 Tehxu reha ow on mewren̂e.

Pawru mtapotarî rma tan mewresî.

Ow marha wasî apînîn yaw so Kporin komo yakrono ro me awexirî ke so.

23 Kaiu mîn yaw tan wasî.

Kaan xîkrî komo yenmekn̂e moso Kaiu tîmîn yaka.

Noro marha tî nai aponaro so.

Erastu marha tî nai aponaro so.

Kayaritomo purantan yahsîn̂e moso Erastu,

on ewto pono komo purantan mak.

Kwahtu marha tî nai apînîn yaw so hara.

Kakno komo marha moso Kwahtu.

Ero warai komo moxam apînîn yawno komo.

24 Taa,

on wara wîîkesî Kporin komo Xesus Kristu ya,

N̂examro wakreko Apa,

Amen,

wîîkesî.

25 On wara mak tak wîîkes awya so,

Kir̂wanî ro mak Mîk Kaan.

Emacakan me ro mak awin̂e komo Mîkî.

On̂ekatîmrî yaw roro rma ero wa awîr̂axe so.

Xesus Kristu ya kakir̂wamacho mîn on̂ekatîmrî.

Entara tî ka xatken̂e pahxan pen komo.

Mehxa rono komo meero roowo yakîhtotoponho n̂ixa rono pen komo tî entara xatken̂e.

26 Ero wa kacho rma tak Kaan n̂ekatîmyasî ahnoro kayaritomo komo rowon pono komo ya yîn̂ewetîrî komo me.

Tkaritan me rma Kaan mewrepekn̂e kweronoman̂e komo ya.

Waipînî ro Mîk mewrepekn̂e kpanatanmetopo komo me.

27 Kaan mak Mîk takîhsom ro.

Ero ke kir̂wanî ro Amoro Apa,

kapore nasî yîwya Xesus Kristu yanme rma.

Miya roro ero wa kapore nasî,

yîtîhkan me ro mak.

Ero wa mak wîîkes awya so oyakno komo.

Amen.