Taa,

on wara wîîkes hara awya so oyakno komo,

Pahxa kmokyakn̂e acheka so Kaanî mtapotarî yekatîmso.

On wara wîxakn̂e ekatîmyataw awya so,

yaana wara xa yîmtapotara wîîxakn̂e.

Mîn hak poko ehcamhokatîkaxapu wa yîmtapotara marha wîxakn̂e.

2 Mîn hak poko ekatîm xera marha wîxakn̂e awya so iito oyexitaw.

On wara xa kesehtînoyakn̂e,

Xesus Kristu pokono makî reha wekatîmyasî yîwya so.

Noro yamowotoponho mak wekatîmyas ha,

wîîkekn̂e iito oyexitaw.

3 Kar̂pen wa wîxakn̂e.

Keraswakn̂e marha,

kîtatanakn̂e ro mak okwe.

Ero wa wîxakn̂e achew so oyexitaw.

4 Mîn hak poko ehcamhokatîkaxapu komo mtapotarî men̂ekara ro mak wîxakn̂e awakro so omtapowataw.

Omtapotarî poko mak apohka xera so wîxakn̂e.

Kaan Yekatî xa nîmtapowakn̂e omtari.

Karitî me Kaan yehtopo marha n̂esenpekn̂e awya so omtapowataw an̂entarî komo me.

Ero wa xa Kaanî mtapotarî wekatîmyakn̂e awya so.

5 Takîhso rma re naxe tooto komo tanme ro so.

Noro yipu komo mtapotarî ponarono me mak awexi xera so wîxakn̂e.

Karitî me xa Kaan nai ham okre,

kan̂e me awexi xe so xa matko wîxakn̂e.

6 Kakîhrecho rma tko amna n̂ekatîmyasî takîhsom komo ya mak ha.

On yimawno komo yetakîrecho mak ekatîmra nas amna.

On yimawno kayaritomon komo yetakîrecho marha ekatîmra amna nasî.

Tohnaw tîmtapotaxmu me mak noro yipu komo Kaan n̂enpes amn̂e.

Ero ke n̂examro warahra mak nîmtapowas amna.

7 Kaan ya kakîhrecho komo xa n̂ekatîmyas amna.

Ero yipu rma tko Kaan nîhtînoyakn̂e pahxa ha ka roowo yexihnaw ha ka.

Ero yipu tak wekatîmyas amn̂e omxîkrî komo ya mak kir̂wan̂he ehtome so okre,

kekn̂e tî Noro pahxa kpoko so.

Ekatîmra tî ka xakn̂e.

Oroto mak tak n̂ekatîmyasî kîwya so kir̂wanî ro me kiitopo komo me okre.

8 Ero yipu poko tko camkî xatken̂e okwe on yimawno kayaritomon komo.

Ero ke kir̂wanî ro namowetken̂e okwe,

Kporin kom ha.

Camkîra exitaw so ketaw ha re Noro yamowora ro mak n̂ehcerî.

Ero wa n̂ehcerî.

9 On wara rma kesî Kaan Karitan camkî exirî komo poko,

Kir̂wan̂he ro makî tî nai kîwya so Kaan nîmrî amn̂e.

Enîhra ro makî ka taxe,

entara marha ka taxe.

Amn̂e mak ero yipu mko tak Kaan nîmyasî kîwya so,

tîtkexe rma tko.

Ero yipu mko poko camkî thakwa naxe tooto komo miyan komo rma.

Tanme ro so mak ero yipu poko ehcamhokara ro mak naxe,

kesî Kaan Karitan.

10 Ero yipu mko ponaro rma tko taxe kîwyamu reha.

Cekatî ke rma Kaan nîhtînomexpekn̂e kîwya so.

Miyan yîhtînon̂e rma Mîk Kaan Yekatî.

Kaan poko yuhnarino yîhtînon̂e rma Mîk Noro.

11 On wara taxe kîwyam tooto komo,

ahce wa so na kehtopo komo yîhtînopîra thakwa taxe kanmero so mak.

Kekatî makî reha ero yipu nîhtînoyasî,

kropotawno mak ha.

Ero wa xa marha ahce wa so na Kaan yehtopo yîhtînopîra ro mak naxe tooto kom hara.

Kaan Yekatî makî reha ero yipu nîhtînoyasî.

12 Ero ke Kaan Yekatî mokyakn̂e kropotaka so.

Anarî yekatî reha nasî Kaan xîkrî pîn komo ropotaw,

roowo pono komo ropotawno mak okwe.

Cekatî reha n̂en̂epekn̂e Kaan kropotaka so reha.

Ero ke Noro xa Kaan ya kwakrecho komo nîhtînomexpesî kîwya so.

13 Ero ke ero yipu ke kwakrecho komo xa marha amna n̂ekatîmyas awya so hara.

On wara panatanmekno n̂iir̂axe tooto komo,

On wara xa amtapotacoko yaana me xa awesentachome so,

kexe.

Ero wara tko yîmtapotara nas amna awya so ekatîmyataw.

Kir̂wanî ro Yekatî xa matko amna panatanmekyasî.

On wara mak amtapotacoko,

kesî.

Ero ke ero wa mak amna nîmtapowasî.

Ero wa mak Kaan ya kwakrecho amna n̂ekatîmyas awya so.

14 Ero yipu yentara ro mak naxe Kaan Yekatî ken̂arî pîn komo reha.

Ero pîntho wa mak n̂encexe.

Camkî thakwa naxe Kaan Yekatî exihtorî ke yîropotaw so.

Noro makî reha nîhtînomexpesî ero yipu kîwya so.

15 Kaan Yekatî ken̂arî komo reha kîwyam.

Ero ke miyan komo mtapotarî rma tîhtînoyaxe.

Kaan yanme nîmtapowasî noro,

kesî anarî ekatîmn̂e poko.

Kaan yanmera nîmtapowasî noro hara,

kesî anarî poko hara.

Camkî rma tko naxe tooto komo kîmtapotarî komo poko.

Ahce wa na ketu n̂examro kopi?

kexe mak kpoko so.

16 On wara xa nasî Kporin komo yesehtînotopo,

kan̂e exihra ro mak nasî tooto ha.

Ero ke on wara kahra thakwa taxe Kaan ya,

On wara xa matko ciino cirpore nas Apa,

kahra ro mak taxe.

On wara rma tko taxe,

Kristu wara kesehtînotopo rma tko nasî kropotaw so.

Ero wa taxe kîwyam.