Korintu Pono Komo Yakanînho, Pawru Karitan, Ponan Hara
2 Korintu
1
On okaritan an̂enîrî komo.
Pawru ow ha,
Xesus Kristu nantomatho.
Kaan yanme rma oyantomekn̂e.
Cimocu yakro on amna mewresî karita.
Kakno komo moso Cimocu,
ero ke noro yakro tan amna mewresî ahyakan komo.
Korintu pono komo amyamro.
Miyan komo rma amyamro Akaia pono komo,
Kaan xîkrî kom ha.
2 Taa,
awakronoma xe so wasî Kaan ya,
Kîîm komo ya ha.
Kporin komo Xesus Kristu ya marha awakronoma xe so wasî.
Ahwokan me marha awiri xe so wasî yîwya so.
Ero wa awiri xe so wasî yîwya so.
Kesenmetamekyataw So Kahworexe So Kaan, Kacho
3 On wara wîîkes awya so,
Kir̂wan̂he xa Kaan nai ham okre,
Kporin komo Xesus Kristu Yîîm ha,
wîîkesî.
Kîîmî rma Mîkî Kaan,
Kîpînîn yawno xa.
Miyan poko rma kahworexe so Noro okre.
4 Amna rma n̂esemetanmekyasî anarimaw so okwe.
Anarmerpa nas amna yesemetanmetopo.
Noro rma tko amna nahworesî roro anarî komo yahworen̂e me tak amna yehtome hara.
Amna yesemetanmekyataw amna nahworesî Kaan.
Ero ke ero wa xa marha tak ahworeno amna n̂iir̂as hara.
5 Amna rma emapona roro n̂esemetanmekyasî.
Kristu n̂esemetanmekyakn̂e,
ero ke Noro yakrono ro me cexirî ke amna marha n̂esemetanmekyas hara.
Emapona roro amna nahworesî Kaan Kristu yakrono me amna exirî ke.
6 On wara awehtome so amna n̂esemetanmekyasî,
Kaan nahworerî me awehtome so,
Noro nakir̂wamarî me awehtome so marha.
Ero wa awir̂axe so amna wara xa marha awesemetanmekrî ke so.
Amna nahworesî marha Kaan awahworen̂e me so amna yehtome hara,
kir̂wan̂he awitome so ha.
7 Kporin komo ya awakronomacho komo ponaro rma tko nas amna.
On wara mak amna kesî apoko so,
N̂esemetanmekyatu tî Kaan xîkrî kom okwe,
Korintu pono komo.
Ero ke n̂examro nahwores hara Kaan amn̂e,
kesî mak amna apoko so.
8 Oyakno komo,
Asia po amna yehtoponho yentara na mîxatken̂e.
Ero ke wekatîmyasî tak awya so.
Amna n̂emetanmekyatken̂e ro mak iitono komo okwe.
Miya xe ro mak amna n̂emetanmekyatken̂e okwe yînîmtopo yopo ro mak.
Kwaihtopo na tan ha,
kekn̂e mak amna okwe.
9 Twaihsom wara rma amna xakn̂e okwe.
Ero wara amna xakn̂e,
Takîhsom xa amna okre tanmero rma,
kahra amna yehtome.
Kaan pona mak ween̂asî waixapunhîrî komo yenpakan̂e pona,
kan̂e me mak amna yehtome ero wa xakn̂e amna.
10 Amna waihka xe ro mak xatken̂e okwe iitono komo Asia pono komo.
Kaan makî cma amna nukurunpekn̂e.
Ero wara rma amna nukurunpesî oroto.
Miya roro amna nukurunpesî Kaan amn̂e,
kesî mak amna.
11 Amyamro marha mîmtapowaxe Kaan yakro amna poko.
Apa kah yawno,
Pawru komo cma re mukurunpesî yiixatî pîn komo chew exitaw,
mîîkexe cma re.
Amtapotarî komo yanme rma amna nukurunpesî.
Ero ke amna yukurunpetopo yentache tak amn̂e mer̂pono pîn komo ya n̂examro tak nahwowaxe okre Kaan poko.
Kir̂wan̂he xa Kaan nai ham okre,
Pawru komo nukurunpekn̂e ham okre,
kexe tak.
Ero wa kexe.
Awemîknon̂e Pîn Komo Ow Ha, Kesî Pawru
12 Taa,
cehcoyoponkaxmu wara rma nas amna.
On wara makî tko amna n̂esekatîmyas awya so,
kir̂wan̂he mak amna xakn̂e achew so.
Cemyawno yahsîn̂e me cexi xera ro mak amna xakn̂e.
Kaan yanme mak amna n̂ekatîmyakn̂e yîmtapotarî,
yaarono mak.
Takîhso mak amna n̂ekatîmyakn̂e tanme ro mak etakîrera tko xakn̂e amna.
Kaan xa takîhso ekatîmn̂e me amna n̂iir̂akn̂e.
Takîhso marha xakn̂e amna apoko so hara,
kes amna.
Ero wa mak amna n̂esekatîmyas awya so.
13 Anarmerpa so mewrera ro mak nas amna an̂enîrî komo.
Cewn̂e yatî mak amna mewresî.
On yenîche tak awya so on wara tak mîîkexe,
Yaaro Pawru komo mewretken̂e ham cesekatîmtopo komo,
mîîkexe.
Ero wara kan̂e me awexi xe so wasî amna poko miya roro.
14 Yaarono me amna mîhtînoyaxe ha re.
Amna yehtopo rma mencexe.
Ero ke on wara mîîkexe amna poko,
Kaan yanmen komo xa mîkyam okre mîîkexe.
Ero wa xa marha amna kesî apoko so hara,
Kaan yanmen komo xa mîkyam Korintu pono komo,
kes amna.
Ero wara tîtkexe etpoko amn̂e Kporin komo Xesus yesenpotopo po kaamo po.
15 Taa,
ero wara karî ke owya omoku xe wîxakn̂e awenso so.
On wara wîîkekn̂e,
oponaro nat ham Korintu pono komo.
Ero ke enso so kîwcesî.
Pahxa owtotoponho ponanmes hara n̂examro yakîhretome xa hara,
wîîkekn̂e cma re.
16 On wara marha cma re wîîkekn̂e,
Maseton̂a pona owcetaw Korintu pono komo marha ween̂asî,
wîîkekn̂e.
Taa,
Maseton̂a poi oyetîrametaw hara Korintu pono komo ween̂asî xa hara,
wîîkekn̂e marha.
Oyakronomexe n̂examro Xuteia pona owtotome hara.
Moro na mak oyar̂axe,
wîîkekn̂e marha.
Ero wa cma re wîhtînoyakn̂e awenso so omohtopo.
17 Ahce wa katî mencetu omohtopo iina?
Wara mak yîhtînon̂e wa katî ow mîhtînoyatu?
Tanme ro yîhtînon̂e mak mîk Pawru Kaan yanmera,
mîîketu katî opoko?
Yarî kmokyasî,
kes ha re.
Ero yinhîrî,
Pîra,
kes hara okwe,
mîîketu katî opoko?
18 Pîra ro mak okwe.
Kemîknon̂e pînî ro mak Mîk Kaan.
Ero warai xa marha amna,
Yaaro,
amna mokyasî,
Pîra,
mokuhra nas amna,
kan̂e pîn amna.
19 Xesus Kristu pokono amna n̂ekatîmyakn̂e awya so.
Kaan Mumuru rma Mîk Xesus Kristu,
Noro pokono amna n̂ekatîmyakn̂e.
Siwpanu,
Cimocu,
ow,
taixa amna n̂ekatîmyakn̂e awya so.
Yaaro,
kir̂wan̂he xa kiir̂axe so Xesus,
kekn̂e mak amna.
Ero wa kan̂enho,
Pîra,
kir̂wan̂he kirihra rma nasî Xesus,
kahra ro mak amna xakn̂e.
20 Miya rma nîmtapowasî Kaan kakronomacho komo poko.
Kristu yakrono me kexirî ke so mak ero wa kesî kîwya so.
Yaaro mak ero wa kesî kîwya so.
Ero wa kacho yencetaw roro kîwya so on wara ceyukpore nasî,
Amen,
ero wa amna miir̂a ham,
kapore nasî Kaan ya.
Kir̂wan̂he mai ham okre,
kapore marha nasî yîwya amna mtapotarî yentarî ke awya so.
21 On wara kiin̂e marha Mîkî Kaan,
etowîn me ro mak Kristu yakrono ro me kiin̂e ha.
Ero wa awiir̂axe so amna yakro xa marha.
Noro marha yîhkapexapu wara kiiraxe so tîmtapotarî yekatîmn̂e me kehtome so.
22 Noro marha tukuknon n̂iir̂akn̂e kropotaka so,
Kaan xîkrî moso ha,
kacho.
Kaan Yekatî marha nîîr̂akn̂e kropotaka so.
Ehn̂ara ro mak kakir̂wamexe so tak amn̂e,
kacho me iina n̂iir̂akn̂e.
23 On wara marha wîîkes awya so,
awemîknotopo pîn komo mîn wîîkekn̂e awya so omohtopo poko.
Omoku xe rma re wîxakn̂e iina ahyaka so.
Yaaro tan wîîkesî.
Kaan xa nîhtînoyasî omoku xe oyehtopo.
Awahwoka xera so ro mak wîxakn̂e.
Ero ke mokuhra ka wîxakn̂e awenso so.
24 Amna men ewetîcoko,
kan̂e pînî ro mak amna.
Awahworen̂e komo makî reha amna Kaan poko.
Kaan pona xa encoko,
kan̂e mak amna.
Noro pona een̂ataw roro mak awya so epîrkan me tak maxe,
kes amna awya so.
Ero wa kes amna.