2
Ero ke mak anarme kesehtînoyakn̂e awahwoka xera so oyexirî ke.
Pîra,
tohra ka wasî Korintu pono komo yenso.
N̂examro yahwoka xera ro mak was okwe,
wîîkekn̂e mak.
2 Awahwokan̂e komo me oyexitaw onoke thakwa nai oyahworen̂e me hara?
wîîkekn̂e.
Onahwokatho komo mak naxe oyahworen̂e me hara,
wîîkekn̂e tak.
Ero wa wîîkekn̂e apoko so.
Ero ke mokuhra ka wîxakn̂e awenso so.
3 Ero ke okaritan makî ka mewrekn̂e apanatanmetopo kom ha.
N̂etakir̂wametu okaritan yanme mak,
wîîkekn̂e.
Oroto rma omokyataw oyahwokan̂e me mak naxe oyahworen̂e me cehsomu cma ha re okwe.
Ero warahra kehtome so karita mak mewrekn̂e ahyakan komo.
On wara marha wîîkekn̂e,
Tahwore oyexitaw yîchew so tahwore xa marha naxe n̂examro opoyero rma,
wîîkekn̂e marha.
Ero ke mokuhra ka wîxakn̂e.
4 On wara wîxakn̂e okaritan mewretaw ahyakan komo,
kahwokekn̂e ro mak okwe,
kerewakn̂e marha oropotaw.
Kîwracekn̂e ro mak okwe.
Awahwokacho komo me okaritan mewrera wîxakn̂e.
Aaxe so ro mak oyehtopo ponaro awehtome so xa matko mewrekn̂e.
Ero wa mewrekn̂e.
Aaxe Nas Amna, Kacoko Porohkaxapunhîrî Ya
5 Achewno komo rma xakn̂e oyahwokan̂e me okwe.
Amyamro meero ahwora mîîxatken̂e ha re noro poyero.
Wara rma yîpînîn yaw tak ehcoko,
ahwokatîkamexpora ehcoko panaretopo ke.
6 Yaake mîxatken̂e,
Tpanarepore nasî noro,
kan̂e komo,
ero ke mîpanaretken̂e.
N̂eexi tak noro panaretopo.
7 Tîhcamnopore tak nasî kicicme ehtoponhîrî.
Ahworecoko mak tak hara.
Noro yahworera awexitaw so nahwoketîkesî ro mak tak ha men okwe tîyopo.
Ero ke ahworecoko hara.
8 On wara kacoko yîwya,
Aaxe rma nas amna,
kacoko tak ha.
9 Ero wa kachome rma ahyakan komo mewrekn̂e okaritan.
Kukukmetken̂e so mak.
Ahce wa na ketaw yîwya so oyewecat ham,
kachome owya.
10 Awakno komo yehtoponho yîhcamnoyataw awya so ow marha wîhcamnoyas hara.
Aaxe so oyexirî ke mak wîhcamnoyasî.
Kristu yanme rma wîhcamnoyasî.
11 Kakno komo yehtoponho yîhcamnopîra ro mak kexitaw so Satanas men wa kar̂metu so okwe.
Camkîra rma tasî kar̂man̂e me noro yehtopo poko.
Miyan ke rma kar̂man̂e mîkro Satanas kica.
Noro yipu mîkî kica.
12 Taa,
on wara tak wîxakn̂e hara,
Troace pona tak kîwcekn̂e hara.
Iito oyexitaw Kristu ya kakir̂wamacho wekatîmyakn̂e iitono komo ya.
Metata yahrunkan̂e wara xakn̂e Kaan iitono komo ya ekatîmtome owya.
13 Keserepokekn̂e rma tko iito oyexitaw.
Oyakno yenîhra wîxakn̂e okwe,
Citu.
Ero ke erepora wîxakn̂e.
Ero ke kesekatîmyakn̂e iitono komo ya.
Kîwces ha,
wîîkekn̂e yîwya so.
En̂exa tak kîwcekn̂e Maseton̂a pona hara.
Ero wa kîwcekn̂e.
Kropotaw So Exirî Ke Kristu Noro N̂esenpesî Tooto Komo Ya
14 On wara marha wîîkes awya so,
Kir̂wan̂he kiin̂e Mîk ham Kaan.
Ero ke ahna so na amna cetaw amna karihcesî.
Tîîxatî pîn komo yopono me amna n̂iir̂axe Kristu yakrono ro me amna exirî ke.
Kir̂wan̂he Kristu yehtopo n̂enpesî Kaan Kristu yakrono me amna yesenporî ke rma.
Kotoporem wa nasî Kristu yakrono ro me amna yehtopo okre.
Ero ke ero wara Kristu yehtopo n̂enpesî ahna so na amna cetaw.
15 Kotoporem wara amna nasî Kaan ya Kristu wara rma.
Ero wa nas amna kotoporem me Kristu yehtopo exirî ke amna yaw.
Tooto komo chew amna exitaw ero wa nas amna,
Kaan nakir̂wamarî komo chew,
cehcamnosom komo chew marha.
16 Poxumra ro mak nasî amna kotorî anarî komo ya.
On wara kexe noro yipu komo,
Waihxaputho wara rma kotowaxe n̂examro kica.
Ero wa exirî ke thakwa twaihsom me mak naxe okwe.
Tpoxwe reha nasî anarî komo ya reha.
Karitî me kiin̂e xa Mîk ham Kristu okre,
kexe n̂examro reha.
Ero ke waipîn me naxe ero wa kan̂e komo reha.
Ero wa nas amna centan̂e komo ya.
Ero ke cehn̂axmu wara ro mak amna n̂esehtînoyasî anarimaw so waipîn me kiin̂e yekatîmtopo poko.
17 Anarî komo warahra nas amna.
Kaanî mtapotarî tî n̂ekatîmyatu epethîrî pona mak kica.
Ero warahra ro mak nas amna.
Yaarono mak n̂ekatîmyas amna,
Kaan yanme mak.
Kaan wero ro rma amna n̂ekatîmyasî,
Kristu yakrono ro me amna exirî ke.