On wara wîîkes hara awya so,

kir̂wan̂he cehtopo yekatîm xera rma nas amna.

Kaan mîn yenîn̂e komo karitan yekîhra marha nas amna an̂enîrî komo,

Kir̂wan komo moxam,

kacho ha.

Akaritan komo yarîhra marha nas amna anarî komo cheka tîcetaw hara,

Kir̂wan komo moxam,

kacho yarîhra.

2 Amyamro rma maxe amna karitan wara,

Kaan yanmen komo moxam,

kacho ha.

Mewrexapu wara nas awehtopo komo amna ropotaw.

Mîk hak n̂enîrî me nasî awehtopo komo mewrexapu wara.

3 Kristu karitan wara rma maxe.

Noro mtapotarî mewren̂e wa xakn̂e amna aropotaka so.

Karita mewretopo ke tko mewrera xakn̂e amna.

Kaan Yekatî ke mak amna mewrekn̂e,

Waipînî ro Yekatî ke ha.

Pahxa toh poko Kaan mewrekn̂e tîmtapotarî,

enporixapu poko ha.

Ero warahra reha xakn̂e amna.

Apun komo poko makî reha amna mewrekn̂e Kristu pokono aropotaka so xa.

4 Yîhyapamnî me ro mak Kaanî mtapotarî n̂ekatîmyas amna.

Kaan pona amna n̂een̂asî Kristu yakrono ro me amna exirî ke.

5 Tanme ro mak akir̂wamano rin̂e pînî ro mak amna.

Amna mak n̂ehn̂es okwe ero wa cexitaw.

Kaan mak amna n̂iir̂asî ehn̂an me.

6 Tîwya kakir̂wamacho pokono yekatîmn̂e me amna n̂iir̂asî Kaan,

kokonoro mak entamexpoxapu yekatîmn̂e me ha.

Ehn̂an me amna n̂iir̂asî ekatîmtopo poko.

Mewrexapu yewetîn̂e me mak ehcoko,

kahra tko nas amna.

Kaan Yekatî yewetîn̂e me xa ehcoko,

kesî xa amna.

Mewrexapu ponaro mak awexitaw so ero rma awaikexe so okwe.

Kaan Yekatî ponaro awexitaw so reha waipîn me awir̂axe so Noro okre.

7-8 On wara kekn̂e Moises pen,

On yewetîra awexitaw so mîwaiyaxe okwe,

kekn̂e.

Ero wa kacho Kaan mewrekn̂e toh poko.

Ero wa kacho mewretaw Kaan ya ceepataroroi takî tî xakn̂e Moises pen oco.

Ero ke noro yeepatarî yentîkara thakwa xatken̂e Ixaw Yana komo ceepataroroi ro mak exirî ke.

N̂eseikekn̂e hara tko okwe ceepataroroi ehxapunhîrî.

Ero wa xakn̂e Moises pen kpanatanmetopo komo yentache,

mewrexapu yentache ha.

Taa,

Kaan Yekatî mtapotarî cencexe kîwyam reha.

Ero ke kir̂wan̂he xa tak nasî kewru komo Moises pen yewru yopo Kaan Yekatî mtapotarî yentarî ke kîwya so.

9 Kir̂wanî rma re mîn xakn̂e toh poko mewrexapu Kaanî mtapotarî.

Kicicme maxe kica,

kachonho rma xakn̂e kir̂wan̂he ha re.

Enko,

ceepataroroi xakn̂e Moises pen ero wa kacho yentarî ke.

Miya xe xa tak kir̂wan̂he cesenpexe kîwyam hara,

Kir̂wan me tak kiir̂axe so,

kan̂e komo.

10 Kir̂wan̂he rma re xakn̂e Mosese penî mtapotachonho,

kpanatanmetopo kom ha.

Miya xe xa tak kir̂wan̂he nasî Kaanî mtapotarî kokon̂oro ekatîmxapu.

Ero ke kir̂wan pîn wara rma nasî pahxa entamexpoxapu rma.

11 Kir̂wan̂he rma re xakn̂e Moises penî mtapotarî ceseikaxmu me mak ha tko okwe.

Eseikanî ro me reha nasî kir̂wan̂he kehtopo komo tak okre.

12 Ero ke,

Eroromero tak kakir̂wamexe so,

kacho yentarî ke amna ya yîhyapamra ro mak tak amna n̂ekatîmyasî.

13 Moises pen warahra reha nas amna.

N̂etîroronkekn̂e hara okwe Moises pen yeepatarî.

Ero ke noro ka n̂esewoponcekn̂e ceepataroron yenpora cehtome Ixaw Yana komo ya,

etîroronkacho yenîhra ehtome so.

14 Ceewopoyem wara rma tko xatken̂e Ixaw Yana kom hara okwe.

Yîropotarî komo xakn̂e eewopontoxapu wara.

Camkî mak n̂encetken̂e Kaanî mtapotarî okwe.

Ero wara rma naxe oroto Kaan Karitan yencetaw,

pahxa mewrexapu yencetaw ha.

Camkî mak n̂encexe okwe.

Kristu ponaro kexitaw so mak eewoponkaxapu wara tak taxe okre.

15 Pahxan pen komo wara rma naxe Ixaw Yana komo oroto okwe.

Moisese mtapotachonho yencetaw roro ceewopoyem wara rma nasî yîropotarî komo.

16 Kporin komo pona een̂ataw tko yîwya so eewoponkaxapu wa tak naxe okre.

17 Kporin komo me rma tko nasî Kaan Yekatî.

Ero ke kropotaw so Noro exitaw yîmhokaxapu wara tak taxe okre.

18 On wara taxe ahnoro Kaan xîkrî komo,

eewoponkaxapu wara tak taxe okre.

Kir̂wanî ro me Kporin komo yehtopo ceen̂axe.

Kanapa yakan wara rma tko ceen̂axe.

Kporin komo wara rma tak cehtîkexe Noro yenîrî ke roro mak kîwya so.

Kir̂wanhe ehxapunhîrî kir̂wan̂he xa tak taxe hara.

Ero wa kiir̂axe so Kporin komo Yekat ha.