Taa,

ero wa kacho yekatîmn̂e me mak nas amna.

Kaan mak ero warai me amna n̂iir̂akn̂e amna pînîn yaw cexirî ke.

Ero ke ahwokara rma nas amna.

2 En̂epa me mak naxe anarî komo ahce na poko.

Kîhyapamtopo mak mîn ero yipu poko ehtopo komo.

Ero yipu pokohra ro mak nas amna.

Cesemîknoso yîmtapotara ro mak nas amna.

Cemaro mera ro mak amna n̂ekatîmyasî Kaanî mtapotarî.

Yaaro mak amna n̂ekatîmyasî.

Miyan komo ya rma ero wara amna n̂esenpekn̂e.

Kaan marha ero wara amna yehtopo n̂een̂as hara.

3 Ceewopoyem wara rma tko naxe anarî komo okwe amna mtapotarî yencetaw.

Camkî mak n̂encexe okwe Xesus ya kakir̂wamacho komo.

Cehcamnosom komo mak mîkyam ero wa entan̂e komo.

4 On wara naxe on yimawno komo,

Satanasî rma nasî ponaro n̂examro yehtopo me.

Noro nasî ewkanon̂e komo me okwe.

Kaan yewetîn̂e pîn komo mîkyam ewkanoxapu komo.

Kakir̂wamacho pokono yenta xera ro mak nasî Satanas yîwya so.

Kir̂wanî ro mak Mîk Kristu,

kweipon̂e me xa nas okre.

Kaan warai rma xa Mîk Noro.

Noro yipu me Kristu yehtopo yenpo xera ro mak nasî Satanas yîwya so okwe.

5 On wara nas amna,

kir̂wan̂he cehtopo yekatîmra ro mak nas amna awya so.

Kristu Xesus pokono mak amna n̂ekatîmyas awya so.

Kporin komo Mîk noro,

kesî xa amna.

On wara mak kes amna tpoko rma,

awanton komo me mak nas amna Xesus xe cexirî ke mak,

kesî mak amna.

Ero wa kes amna.

6 Pahxa tî katpan nantomekn̂e Kaan.

On wara tî kekn̂e,

Enmakî tak awarpananînhîrî,

kekn̂e tî.

Ero ke n̂enmayakn̂e takî tî.

Ero wa xa marha tak kropotarî komo katparekn̂e hara Noro rma.

Kir̂wanî ro me cehtopo nîhtînomexpekn̂e kîwya so Xesus Kristu yenporî ke kîwya so.

Noro yewru yenîrî ke rma ero warai me Kaan tîhtînoyaxe.

Enmayatawno wara rma taxe Noro yewru yenîrî ke?

kîwya so.

Ero wa taxe okre.

7 Taa,

ero wa amna ropotarî kataparekn̂e Kaan.

Kir̂wanî ro Mîkî Kaan,

kacho ke rma kataparekn̂e.

Ero ke amna ropotaw nas okre ero wa kacho.

Ooru warai rma mîn ero wa kacho,

cepethîkem warai xa.

Tahrem wara makî tko nas amna,

er̂mo kahxapu wara mak.

Ero yipu wara mak nas amna Kaan weyuru yeen me.

Ero wara mak nas amna,

Kaan mak akir̂wamano ritopo poko n̂ekaricesî,

kan̂e me mak amna yehtome.

Amna mak akir̂wamano n̂iir̂asî,

kan̂e me amna exi xera ro mak nasî Noro.

8 On wara marha nas amna,

cemyarke xa nas amna tîyopo ro mak.

Okwe xa thakwa,

kahra rma tko nas amna.

N̂esemer̂wesî marha amna anarimaw so hara.

Ahwokatîkara rma tko nas amna.

9 Tooto komo marha amna n̂emetanmekyaxe.

Amna nomuhra rma tko nasî Kaan.

Amna n̂etapexe marha anarimaw so.

Waipîra rma tko nas amna.

10 Xesus pen waihtoponho rma nas amna pun poko enmar̂atîxera.

Ero wara roro nas amna waipîn me Xesus yehtopo yesenpotome hara amna pun ke.

11 Waipîra rma nas amna.

Emapona roro tko nas amna twaparî chew.

Amna xera naxe Xesus ponaro amna yexirî ke.

Ero warai komo chew amna n̂iir̂asî Kaan kar̂pe Xesus yehtopo yenpotome tak amna pun ke,

twaihsomtho ke rma.

12 Ero ke amna natîhyasî.

Yamoro twaihsom me nas amna.

Kar̂pe mehtîkexe amyamro reha.

13 Kaan pona enîn̂e me mak amna nîîr̂asî Noro Yekatî.

Ero ke Kaan Karitan mewrexapu yaw roro rma nas amna.

On wara kesî Kaan Karitan,

Kaan pona ka ween̂akn̂e.

Ero ke mak kir̂wanhe Kaan yehtopo wekatîmyakn̂e,

kesî.

Ero wa xa marha nas amna hara.

Kaan pona mak n̂een̂as amna.

Ero ke tak yîmtapotarî n̂ekatîmyas amna.

14 Kenpakacho komo ponaro marha nas amna.

Kporin komo Xesus ka n̂enpakekn̂e Kaan.

Ero ke amna marha n̂enpakes hara amn̂e.

Xesus yakrono me amna yexirî ke amna n̂enpakesî.

Amna yenpakache tak Kaan yaka tak amna naar̂as hara awakro so rma.

Ero wa kîwtotopo komo ponaro nas amna.

Ero ke ahwokatîkara rma amna nînîmyasî cemetanmetopo.

15 Aaxe so cexirî ke ero yipu amna nînîmyasî.

Kaanî rma tko amna nakronomesî.

Kakronoman̂e ro Mîk Noro,

ero ke ero wa xa marha awakronomexe so hara.

Anarî komo marha nakronomesî.

Ero ke,

Kir̂wan̂he xa Kaan nai ham okre,

kexe tak mer̂pono pîn komo.

16 Ero wa nas amna cemetanmesom me okwe.

Ahwokara rma tko nas amna.

Amna punu rma re natîhyasî.

Amna yekatî rma tko Kaan karihces hara enmar̂atîxera.

17 On wara taxe,

Cesemetanmekyaxe,

wara nhe ha tko.

Yohno kyam mak cesemetanmesom me taxe.

Ero wa kexirî ke so rma kir̂wan̂he ro mak tak kiir̂axe so hara Kaan amn̂e.

Kesemetanmetoponhîrî komo yopono me mak nasî ero wa kiitopo komo.

Kakir̂wametîkexe so ro mak okre ero yimaw.

Eroromerono tak mîn kakir̂wamacho komo okre.

18 Ero ke censom poko eserepokara nas amna.

Enîhnî ro poko xa amna n̂eserepokesî.

Yohno rma cehcamnosom mak mîn censomu mko.

Eroromerono reha mîn enîhnî ro mko.

Ero ke ero yipu poko n̂eserepokes amna.

Ero wa nas amna.