Anarî Nas Hara Kupun Komo, Kah Yawno Ha
5
Taa,
kupun komo poko tan kîmtapowas hara awakro so.
Kîmîn komo warai rma on kupun komo,
roona warai ha.
Roowo po kexitaw so kîmîn me nasî.
Amn̂e onînhîrî yehcamnopuche anarî tak nas hara kah yaw kupun kom hara.
Tooto yamorî ke cirihnî ro mak mîn,
ehcamnopînî ro.
2-3 Ontho yaw rma ka kexitaw so cerewaxe.
Aka aka,
tîtkexe.
Kah yawno yaw kexi xe tak taxe hara okre kîmîn yaw so.
Ero yamru xe marha taxe poono yamrutopo wara hara.
Expora ro mak taxe amru xe.
Amruche tak ponomnî me mak exihra taxe.
4 Roona warai yaw rma ka kexitaw so cerewaxe oko.
Okwe,
okwe,
tîtkexe.
Tawsîn̂em yaan̂e wa makî ka taxe.
Wara rma ponomnî me mak kexi xera rma taxe.
Anarî yamru xe xa taxe kupun kom hara.
Ero yipu yamruche tak waipîn me ro mak tak taxe okre twaihsomînhîrî rma.
Ero wa taxe amn̂e.
5 Kaanî rma n̂ekatîmyasî kîwya so ero wa kiitopo.
Kir̂wanî ro me tak apun wakîhcesî amn̂e,
kesî.
Cekatî marha nîmyasî Noro kîwya so,
Yaaro ham,
ero wa kiir̂atu so ham amn̂e,
kachome kîwya so.
6 Ero ke cerepore rma taxe kupun yaw rma ka kexitaw so.
On wara mak tîtkexe,
On opuntho yaw rma ka wasî.
Ero ke Kporin komo yawhra ka wasî,
tîtkexe mak.
7 Ero wa tîtkexe enîhnî ponaro mak kexirî ke so.
Kaan pona mak ceen̂axe ahce wa so na kehtome so.
Censom ponaro mak exihra taxe.
8 On wara tîtkexe,
amn̂e opuntho yawhra oyexitaw Kporin komo yaw tak was okre,
tîtkexe.
Ero wa kehtopo komo ponaro xa taxe.
9 Ero ke kir̂wan̂he Noro n̂enîrî me roro kexi xe so taxe.
Ero wara kexi xe taxe Kporin komo yaw kexitaw so,
Noro yawhra ka kexitaw so marha.
10 Amn̂e tak Kristu ya kehtoponhîrî komo yetacitopo ro me nasî.
Ero yimaw tapon pona n̂eremesî,
kîwyam tak cecececexe Noro yepatai kehtoponhîrî komo yetacitopo yentachome.
On wara kesî kîwya so ero yimaw,
Ero wa mîxakn̂e apunthîrî yaw awexitaw,
kesî.
Kehtoponhîrî komo yepetho tak nîmyasî kîwya so.
Kir̂wan̂he kehtoponhîrî komo yepetho nîmyasî,
kicicme kehtoponhîrî komo yepetho marha.
Ero yipu nîmyasî kîwya so amn̂e.
Ero ke kir̂wan̂he Noro n̂enîrî me roro kexi xe taxe.
Ero wa taxe.
Kaan Xe Tak Ehcoko Yiixatî Pînînhîrî Komo
11 Yukurumîkno ro mak Mîkî Kporin komo.
Ero wara Noro yehtopo ponaro xa nas amna.
Ero ke amna nîmtapowasî tooto komo yakro cewetîso ro.
Ahce wa na amna yehtoponho n̂een̂asî Kaan kir̂wantawno wara.
Amyamro marha ahce wa na amna yehtopo meen̂axe kir̂wantawno wa xa marha.
12 Amna ponaro mak awehtome so esekatîmra ro mak nas amna.
On wara tko naxe anarî komo,
poreno ponaro mak naxe,
tupun yenporitopo ponaro mak ha.
Kir̂wan̂he kropotawno yehtopo ponarora mak naxe.
Ero ke amna yîwîrîyakan̂e me naxe.
Noro yipu komo yeyuhtopo yîhtînotome mak awya so amna n̂esekatîmyas awya so.
13 Ero ke camkîno me amna yîmtapowataw Kaan ha tko.
Takîhso tîmtapotaxmu me amna exitaw rma,
awakîretome so mak amna nîmtapowasî.
14 Kîîxe so xa nasî Kristu.
Ero ke Noro yewetî xe ro mak nas amna.
On wara amna nîhtînoyasî Noro waihtoponho,
cewn̂e Noro pen waihyakn̂e kir̂wan̂he kehtome so kîwyam ahnoro.
Ero ke ahnoro rma tîtwaiyatken̂e Noro yakro rma.
Ero wa amna nîhtînoyasî Kristu waihtoponho.
15 Ero wa waihyakn̂e Noro waipîn me kehtome so ahnoro.
Ero ke waipîn me taxe.
On wara waipîn komo exi xe nasî Kaan,
tanme rono pîn me mak exi xe xakn̂e.
Takirwaman̂enhîrî komo yewetîn̂e me mak exi xe so nasî.
Waihyakn̂e akir̂waman̂e me,
pakekn̂e hara.
Noro yipu yewetîn̂e me exi xe so nasî.
16 Ero ke on wara tak nas amna,
Kir̂wan mîkro,
kahra tak nas amna tooto komo pun yenîrî ke mak.
Kristu rma amna n̂een̂akn̂e pahxa tan exitaw tuhn̂e.
Tuhn̂em me tak Noro yenîhra nas amna.
17 Ero ke Kristu yakrono me kexitaw so tak anarî ro me tak taxe.
Pahxa kehtoponhîrî komo yaw roro exihra tak taxe.
Anarî ro me tak kakîhcetu so Kaan okre.
Kir̂wan̂he tak cesehtînoyaxe,
ero wa xa marha tîmtapowaxe,
ero wa xa marha taxe ahce na poko kexitaw so.
18 Kaan mak kiir̂atken̂e so ero wara.
Tîîxatî me marha tak kiir̂atken̂e so Xesus Kristu yakrono me kexirî ke so.
On wara kan̂e me marha kiir̂atken̂e so,
Aaxe so tî nai Kaan.
Ero ke yiixe tak ehcoko amyamro hara yiixatî pînînhîrî komo,
kan̂e me kiir̂atken̂e so tooto komo ya.
19 Ero ke on wara tîtkexe,
Tîîxatî me ahnoro roowo poko hakno komo ciri xe tî nai Kaan.
Tanwetoponhîrî komo poyero yîrwomra takî tî nai Kristu waihîrî ke.
Ero wa kacho yekatîmn̂e me tak kiir̂atken̂e so Kaan.
20 Ero ke kayaritomo mtapotarî yekatîmn̂e me mak nas amna,
Kristu rma Mîk amna kayaritomon,
Noro mtapotarî yekatîmn̂e me nas amna.
Amna mtari rma nîmtapowasî Kaan.
On wara kesî,
Ooxatî pîn me exihra ro mak tak ehcoko,
kes amna mtari rma.
Ero wa xa marha kes amna awya so Kristu yanme rma,
Kaan xatî me tak ehcoko,
kes amna awya so.
21 Kicicme kehtoponhîrî komo yukukman̂enho pînî ro mak Mîk Kristu.
Noro yipu rma tko kicicitho warai me Kaan n̂iir̂akn̂e hara kemtakan komo me.
Ero wa Noro n̂iir̂akn̂e kir̂wanî ro me tak kiitome so hara,
twarai me so xa marha.
Kristu yakrono ro me kexitaw so mak ero wa kiir̂axe so.
Ero wa Kaan kiir̂axe so.