6
On warai amna,
Kaan yakro cekaritosom amna.
Ero ke on wara kes amna awya so,
pohnî me mak cirihra ro makî cma re maxe Kaan ya awakir̂wamacho komo,
kes amna awya so.
2 Ero poko rma kesî Kaan Karitan.
On wara kesî,
Awahsîtopo komo me exitaw rma ka amtapotarî komo wencekn̂e.
Awakîr̂wamacho komo poko rma ka oyexitaw kakir̂wametken̂e so,
kesî.
Ero ke on wara men wîîkes awya so,
oroto xa awahsî xe so tî nai Kaan.
Oroto xa tî nai awakir̂wamacho komo yîwya,
wîîkes awya so.
Kir̂wan̂he Mak Amna N̂esenpesî Kaan Maywen Me
3 On wara nas amna,
kicicme esenpora ro mak nas amna.
Kicicme amna yesenpetaw on wara nîîketu amna yentan̂e komo,
Kir̂wan̂he kirihra so rma nai ham Kaan,
enko xe kicicme natu Pawru komo,
ketu okwe.
Ero wa kan̂e me exi xera ro mak nas amna yentan̂e komo.
4 Kaan yanton xa amna.
Ero ke kir̂wan̂he mak amna n̂esenpesî.
Ahwokan me rma nas amna ahce wa so na cexitaw.
Amna n̂esemetanmekyasî emapona.
Amna n̂esemer̂wesî marha okwe.
Ahce wa so na amna nai emapona roro,
tahwokatîkarî yaro.
5 Amna nîhyokyaxe anarî komo oco.
Amna marha nahruyaxe kahrutopo yaka.
Wara ro mak kexe anarî komo amna poko.
On wara marha nas amna,
amna n̂etapickesî cekar̂kaxi ro.
Amna n̂etwînîkpormesî marha.
Emapona marha eseresmara nas amna.
Ero wa nas amna.
Ero yipu yanme rma tko ahwokara nas amna.
6 Kicicitho pokohra ro mak nas amna,
mîn hak poko marha amna n̂ehcamohkesî,
Etîrwonmekîra marha nas amna.
Akronomano marha amna n̂iir̂asî.
Kir̂wanî ro Yekatî yanme mak ero wa nas amna.
Etîxatî me marha nas amna,
yaaro etîxatî me ha.
Ero wa nas amna Kaan yanton me amna yexirî ke.
7 Yaarono mak amna n̂ekatîmyasî tohnawno pînî ro mak.
Karitî ro me Kaan yehtopo marha amna n̂ekatîmyasî.
Tukurui nas amna.
Xehxa mehxa wara nas amna kurun.
Kir̂wan̂he amna yehtopo rma nas amna kurun me.
8 Takîhsom me amna n̂een̂axe anarî komo.
Akpîn me amna n̂eenaxe anarî kom hara.
Kicicme nîmtapowaxe anarî komo amna poko,
Kir̂wan̂he nîmtapowaxe amna poko anarî kom hara.
Yaaro mak amna n̂ekatîmyasî Kaanî mtapotarî.
Okre,
yaaro ma re wa mekatîmyatu awya so?
kexe anarî komo rma amna poko.
Ero wa naxe tooto komo amna poko.
9 N̂examro yenîhra ro mak wasî,
kexe anarî komo amna poko.
Miyan komo n̂enîrî me rma tko nas amna.
Waihyatu kr̂a na n̂examro,
kexe anarî komo amna poko.
Waipîra rma tko nas amna.
Amna rma re nîhyokyaxe.
Amna waihkara rma tko naxe ha.
10 Ahwora rma nas amna anarimaw so.
Tahwotaxmu me roro tko nas amna.
Yupurantamra mak nas amna.
Cepethîkem tîmn̂e me rma tko nas amna mer̂pono pîn komo ya.
Emyawnomnî wara ro mak nas amna.
Ahnoro makî tko nasî amna yemyawno me.
11 Oyakno komo,
Korintu pono komo amyamro.
On wara kes amna awya so,
amna n̂esekatîmyas awya so aaxe so cexirî ke mak.
Aaxe so ro mak nas amna.
12 Aaxatîmnokara so ro mak nas amna.
Amyamro xa matko amna mîîxatîmnokexe okwe.
13 Ero ke etîme re tak cehcerî.
Amna xatî me tak ehcoko amyamro hara.
Omxîkrî yan wara tan wîîkes awya so.
Ero wa wîîkes awya so.
Kaan Xîkrî Pîn Komo Yakrono Me Xa Exihra Ehcoko
14 Taa,
Kaan xîkrî pîn komo poko tan kîmtapowas hara.
On wara exihra ehcoko,
awakrono me tak wasî etowîn mero mak,
kahra ro mak ehcoko Kaan xikrî pîn komo ya.
Ero wara re tîmtapotaxmu me ma re natu kir̂wan komo kicicitho komo yakro ha?
Pîra xa thakwa okwe.
Iito re ma re nai katpan awarpan yakro?
Pîra marha okwe.
15 Ero wara re cesehtînosom me ma re natu Kristu Beriaw yakro awya so?
Pîra ro mak okwe.
Kaan xîkrî komo reha kîwyam.
Ero re ponarono ma re kîwyam Kaan xîkrî pîn komo yakro awya so?
Pîra marha thakwa.
16 Ahce wa nai Kaan mîn awya so?
Mîk hak warai me ciixaputho poko ma re tatu ero yaw?
Pîra ro mak okwe.
Anarî menî ro mak mîn ciixaputho komo kica.
Kaan mîn me rma taxe kîwyam,
waipînî ro mîn me ha.
On wara tî kekn̂e Kaan,
N̂examro yawno me xa tak was amn̂e.
N̂examro chere marha ketar̂asî.
Ponaro n̂examro yehtopo me marha wasî.
Oyanan me marha naxe n̂examro.
Ero wa men was amn̂e n̂examro poko.
Ero wa xa marha naxe opoko hara,
kekn̂e tî Kaan pahxa.
17 Ero ke on wara kes hara Kporin komo kîwya so,
Omxîkrî pîn komo yakrono me exihra tak men ehcoko.
N̂examro warahra ro mak ehcoko.
Kicicitho pokono pîn me ro mak ehcoko.
Ero poko exihnî me ro mak awexitaw so oyakrono ro me tak kahsîyaxe so.
18 Aamo komo me marha wasî.
Omumuru me maxe amyamro hara,
oyemsîrî me marha maxe,
kesî Kporin komo kîwya so.
Karitî ro xa Mîk ero wa kesî.
Ero wa kesî kîwya so.