Taa,

on wara wîîkes hara awya so oyakno komo,

ero wa kesî Kaan kîwya so.

Ero ke cetakir̂wamapore tak nasî.

Kicicme kehtoponhîrî komo tahsîpînkatîkacerî.

Kupun komo ke kicicme taxe anarimaw so.

Anarimaw so kicicme taxe kekatî ke hara.

Asakno roro rma tahsîpînkapore nasî ero wa kehtoponhîrî kom ha.

Ero ke kir̂wan̂he mak cehcerî Noro ponaro xa kexirî ke so.

Ero wa xa cehcerî.

2 Taa,

amna xe tak ehcoko.

Emetanmekno ciin̂e pînî ro mak amna.

Anato panatanmekno ciin̂e pîn marha amna,

emîknono rin̂e pîn marha.

Kir̂wan̂he mak amna xakn̂e apoko so.

3 Awîrîyakacho pîn komo tan wîîkes awya so.

Wîîka rma awya so,

Aaxe so ro mak nas amna,

wîîka.

Ero wa xa marha wîîkes hara.

Awaiyataw so meero twaipu xe rma nas amna awakro so.

Kar̂pe rma ka awexitaw so iito re mak cexi xe nas amna awakro so kar̂pe xa marha.

Ero wa nas amna apoko so.

4 Kir̂wan̂he xa rma keen̂axe so okre.

Ero ke yîhyapamra ro mak wekatîmyasî awehtopo komo anarî komo ya.

Oyahworetopo me xa wencekn̂e kir̂wan̂he awehtopo komo.

Tahwore xa rma wasî oyesemetanmekyataw rma.

Ero wa wasî.

5 On wara tko ka xakn̂e amna Maseton̂a pona amna toche,

cekarkaxi ro amna n̂esemetanmekyakn̂e okwe.

Mehxa mehxa wara ro mak xakn̂e amna yesenmetopo okwe.

Tooto komo yeseseyutopo amna n̂encekn̂e.

Amna marha n̂eraswakn̂e okwe.

6 Kaanî tko amna nahworekn̂e hara Citu mokrî ke tak.

Noro yipu Mîk Kaan,

ahwokaxapu komo yahworen̂e ro ha.

7 Citu yenîche amna tak nahwowakn̂e ha re.

Yîmtapotarî yentache tak nahwowakn̂e xa tak amna.

Tahwore tî xakn̂e noro kir̂wan̂he awehtopo komo yenîrî ke.

Ero wa awehtopo komo n̂ekatîmyakn̂e amna ya.

On wara kekn̂e,

Awenî xe so tî natu Korintu pono komo okre.

Okwe okwe,

kexe awemetanmetoponhîrî komo yentarî ke.

Aponaro xa naxe n̂examro,

kekn̂e marha owya.

Ero wa kekn̂e Citu owya tmokuche.

Ero ke yîmtapotarî yentarî ke kahwocetîkekn̂e tak.

8 Awahwokan̂e komo me ka wîxakn̂e ham pahxa okaritan ke.

Ahce kacho yîhyakan komo ero wa mewrei hara okwe?

wîîkekn̂e cokorî kapu.

Oroto tak ero wa kahra wasî.

Kir̂wan̂he rma mewrekn̂e ham.

Eroromero awahwokamexpotopo komo pînî rma mîn xakn̂e okaritan.

Yohno mak mahwoketken̂e ham.

9 Ero ke tahwore tak was okre.

Ahwokano kr̂a wiire,

kahra ro mak was apoko so.

Kir̂wan̂he rma xakn̂e awahwokacho komo,

wîîkesî mak awya so.

Awahwokacho komo ke kicicme awehtoponhîrî komo mîpoxunketken̂e.

Kaan yanme mak ero mîpoxunketken̂e.

Ero ke kir̂wan̂he rma xakn̂e ero wa awitopo komo owya.

Amna yanme etwîrîmara rma mîxatken̂e.

10 Kaan Yekatî yanme kahwokache kicicme kehtoponhîrî komo tak tîtpoxunke.

Kakir̂wamexe so tak Kaan.

Tohnaw kahwoka ham okwe,

kahra ro mak taxe.

Ero warahra reha nahwokexe Kaan xîkrî pîn komo reha.

Miya xe ro mak nahwokexe noro yipu komo reha.

N̂examro waihkacho rma mîn ahwokacho komo okwe.

11 On wara tak esehtînocoko,

Kaan yanme mak tahwoketken̂e ham,

kacoko.

Ero wa awahwokarî ke so cerewre ro mak awetakir̂wama xe so tak mîxatken̂e ham.

Awesekatîm xe so marha mîxatken̂e ham kicicme awehtoponhîrî komo poko.

Mîrwonatken̂e marha apoko so rma.

Twerî marha tak mîxatken̂e Kaan poko.

Amna xe marha mehtîketken̂e.

Kir̂wan̂he awexi xe so marha mîxatken̂e ham.

Kaan yewetîn̂e me mak awexi xe so marha mîxatken̂e ham okre.

Yikicicintaxapu marha tak panare xe tak mîxatken̂e.

Ero wa mîxatken̂e ham okre.

Miya xe xa metakir̂wametken̂e ham okre.

Ero wa tî mîxatken̂e okre okaritan yenîrî ke awya so.

12 Ahce kacho ero yipu okaritan mewrekn̂e ahyakan komo?

Yikicicintaxapu yeitopo pîn mîn mewrekn̂e.

Yînwîrîmathîrî yahworetopo pîn marha mîn mewrekn̂e.

Kponaro so xa nat ham Pawru komo,

kachome mak awya so ow mewrekn̂e.

13 Ero ke awehtopo komo yentache tak amna n̂erepowakn̂e hara.

Citu marha xakn̂e tahwore.

Noro mahworetken̂e ham okre kir̂wan̂he awehtopo komo ke rma.

Ero ke amna marha tahwore xa tak nasî apoko so.

14 Kir̂wan̂he awehtopo komo amna n̂ekatîmyakn̂e Citu ya.

Tohnaw wîîkai kica,

kahra rma was okre.

Pahxa achew so amna exitaw yaarono mak amna n̂ekatîmyakn̂e awya so.

Yaaro marha tak xakn̂e omtapotarî Citu yakro.

Kir̂wan̂he naxe okre Korintu pono komo,

wîîkekn̂e yîwya.

Amn̂e tmokuche hara,

Yaaro mîîkekn̂e ham okre,

kekn̂e tak Citu owya.

Kir̂wan̂he rma nat ham okre Korintu pono komo,

kekn̂e.

15 Aaxe so xa takî tî nai noro.

Ero wa nasî noro amna mtapotarî yewetîn̂e me awenîrî komo ke.

On wara kekn̂e apoko so,

Amtapotarî yekatîmyataw yîwya so n̂ewehcatken̂e okre.

N̂eraswatken̂e mak omtapotarî yencetaw tpanatanmetopo komo,

tatanatken̂e mak,

kekn̂e.

Ero wa awehtopo komo n̂ekatîmyakn̂e Citu owya.

16 Ero ke kir̂wan̂he awehtopo komo yentarî ke owya tawake xa was okre.

Ahce na poko cexitaw so Kaan yanme mak naxe n̂examro ero poko okre,

wîîkesî tak apoko so.

Ero wa wîîkesî.