1-2 Taa,

on poko wîîkes hara awya so,

oyakno komo,

on wara xakn̂e Kaan tîmxîkrî komo poko,

Maseton̂a pono komo poko ha,

n̂examro wakrekn̂e kir̂wan̂he ehtopo komo ke.

N̂esemetanmekyatken̂e rma re n̂examro okwe.

Yupurantamra thakwa xatken̂e okwe.

Wara rma cetîmsom me xa xatken̂e,

ero ke tahwore ro makî tî xatken̂e okre.

Ero wa cetîmsom me Kaan n̂iir̂akn̂e Maseton̂a pono komo,

Kaan xîkrî komo.

3 On wara xatken̂e n̂examro,

tînahrî komo yepetho na nîmcetken̂e ha ka,

ero yakwenho tîmtome tak anarî komo ya.

Ero yinhîrî akwenhîrî yopo xa tak tîmî xe xatken̂e hara,

tînahrî komo yepetho meero tîmî xe xatken̂e.

Tanme ro so mak tîmî xe xatken̂e.

4 Ehe,

ketken̂e amna ya,

on arpo xe xa nas amna awya so puranta.

Kaan xîkrî komo ya tîmsom tan ha.

N̂examro yakronoma xe nas amna.

Ero ke cma re maar̂axe,

ketîketken̂e amna ya.

5 Yupurantan komo tîmtopo ponaro mak amna xakn̂e.

Ero pînî rma tko nîmyatken̂e.

N̂etîmyatken̂e cokorî ka Kaan ya n̂examro rma.

Amna ya meero n̂etîmyatken̂e amna yewetîn̂e me.

Kaan yanme mak ero wa n̂etîmyatken̂e.

Ero wa xatken̂e n̂examro okre Maseton̂a pono komo.

6 Ero ke on wara amna kekn̂e Citu ya,

Pahxa Korintu pono komo mîpanatanmekyakn̂e puranta tîmtopo poko.

Ero ke n̂examro cma re mîpanatanmekyasî xa hara ero poko xa marha,

wakreno rin̂e me ehtopo komo poko,

kekn̂e amna yîwya.

7 Anarmerpa nasî kir̂wan̂he awehtopo komo.

Kaan pona enîn̂e me maxe.

Kaanî mtapotarî yekatîmn̂e me marha maxe.

Cehcamhokaxi marha maxe mîn hak poko.

Cemyaporem me marha maxe okre ahce na poko.

Amna xatî me marha maxe.

Ero wa maxe kir̂wan̂he okre.

Ero ke wakreno rîn̂e me marha ehcoko hara.

8 Puranta men tîmcoko,

kahra tan wasî awya so.

On wara mak wasî,

wakreno rin̂e me anarî komo yehtopo wekatîmyas awya so etîxatî me awehtopo komo yukukmachome mak.

9 Kporin komo Xesus Kristu yehtoponho rma mencexe,

yîwya awakretoponhîrî komo mencexe.

On wara xakn̂e Noro,

cemyawnoi xa ka xakn̂e.

Awanme so tko emyawnomnî me tak xakn̂e hara okwe.

Ero wa xakn̂e cemyawnoi tak awehtome so hara.

Ero wa xakn̂e Xesus Kristu.

10 Ero ke on wara cma re kakîhrexe so,

pahxa rma anarî cimn̂ipu po puranta tîmî xe mîxatken̂e meyeno komo ya.

Kir̂wan̂he mîxatken̂e ero ponaro.

Tîmtopo mihciyatken̂e rma okre.

11 Kir̂wan̂he mîxatken̂e tîmtopo ponaro.

Ero ke tîmpore tak nasî.

Apurantan komo tak yîraconkacoko tîmsom me.

12 Apurantan komo pînîn yawra awexitaw so kir̂wan̂he Kaan n̂een̂asî anîmrî komo.

On wara nasî Kaan kupurantan tîmtopo poko,

Asak makno tîmîche kir̂wan̂he rma n̂een̂asî asak mak exitaw hara kupurantan komo.

Mer̂pora men tîmcoko,

kahra nasî Kaan kîwya so mer̂pora exihra exitaw kupurantan komo.

13-14 On wara kahra wasî,

epurantantîkacoko ro mak tupurantai tak ehtome so anarî komo,

kahra tan wasî.

Pîra ro mak.

Etîme re mak cexpore nasî,

wîîkesî mak tan.

Oroto apurantan komo mîmyaxe anarî komo ya yupurantamra exirî ke so.

Amn̂e tupurantai na natu n̂examro hara,

amyamro tak na matu yupurantamra hara okwe.

Ero ke n̂examro tak n̂esepanîyaxe hara.

Puranta tak nîmyaxe awya so hara.

Ero ke etîme re tak maxe okre.

15 Ero poko rma kesî Kaan Karitan pahxan pen komo poko.

On wara kesî,

Anarî komo mer̂pora namekyatken̂e tînahrî komo.

Etîmtora rma tko xakn̂e yînaputhîrî komo.

Anarî komo wahra mak namekyatken̂e hara tînahrî komo.

Cecenarî so rma tko xakn̂e yînahrî komo,

kesî Kaan Karitan.

16 Taa,

Citu poko kîmtapowas hara.

On wara wîîkesî Kaan ya noro poko,

Kir̂wan̂he mai ham Apa okre.

Owara xa marha Citu miir̂e ham okre,

Korintu pono komo ponaro,

wîîkesî noro poko.

17 Kir̂wan̂he noro n̂encekn̂e amna mtapotarî,

Korintu pono komo yenso cma re mîîcesî,

kacho.

Ero ke n̂ewehcakn̂e.

Tîto xe tko tî xakn̂e tanme ro rma aponaro so cexirî ke.

18 Anarî marha amna n̂en̂epesî Citu yakro,

kakno komo rma.

Kakir̂wamacho komo yekatîmn̂e ro mîk okre,

kexe Kaan xîkrî komo noro poko.

Miyan komo rma ero wa kexe.

19 Kaan xîkrî komo nmen̂ekatho rma mîk puranta yaan̂e me amna yakro.

Ero wa nas amna puranta yaan̂e.

Taa,

anîmrî komo yenîche ahsîn̂e komo ya amn̂e on wara kexe,

Kir̂wan̂he Kporin komo nai ham okre,

kexe.

Kponaro so xa nat ham Korintu pono komo,

kexe marha.

20 Takîhso mak amna naar̂asî puranta mer̂pora exirî ke.

Ero ke takronoi amna cesî.

Cewn̂e aar̂ataw owya opoko men nîmtapowatu anarî komo.

Tînarîrî poko tko na n̂en̂epana Pawru kica,

ket ha na.

Ero ke ero wa karî pona takronoi amna cesî.

21 En̂epamnî me cesenpo xe nas amna Kporin komo ya,

tooto komo ya marha.

Ero ke takronoi amna naar̂asî puranta.

22 Ahyaka so Citu cetaw anarî marha amna n̂en̂epesî noro yakro.

Cemyaporem xa marha mîkî.

Ero warai me roro amna n̂een̂asî noro.

Cemyapore xa tak n̂ehtîkesî kir̂wan̂he awehtopo komo yentarî ke.

Ero ke noro yipu mîk cesî ahyaka so Citu yakro.

23 Taa,

Citu yehtopo marha wekatîmyas awya so.

Kir̂wan moso Citu.

Oyakrono moso,

Kaanî mtapotarî yekatîmn̂e marha awya so oyakro ha.

Noro yipu moso Citu.

Taa,

noro yakrono komo yehtopo wekatîmyasî xa hara awya so.

Kaan xîkrî komo yanme tîtosom komo moxam.

Kir̂wan̂he Kristu yehtopo yenpon̂e me marha naxe.

24 Ero ke etîxatî me xa esenpocoko yîwya so,

Citu komo ya,

Kaan xîkrî komo ya marha miyan komo ya rma.

Kir̂wan̂he awehtopo komo n̂encexe.

Amna n̂ekatîmyasî yîwya so.

Ero ke yaaro kan̂e me rma amna enpocoko,

etîxatî me esenpocoko yîwya so.

Ero warai me esenpocoko.