1-2 Taa,

puranta tîmtopo poko rma kîmtapowasî awakro so.

Kaan xîkrî komo wakrecoko,

kacho poko xa tpanatanmekpore nasî,

kahra wasî apoko so.

Tîmtopo ponaro rma wa maxe okre.

Tîmî xatî me rma kîhtînoyaxe so.

Tantono komo ya rma wekatîmyasî awehtopo komo Maseton̂a pono komo ya.

On wara wîîkesî yîwya so,

Pahxa anarî cimn̂ipu po rma Akaia pono komo xatken̂e puranta tîmtopo ponaro okre,

wîîkes yîwya so.

Ero ke puranta tîmî xe tak naxe moxam hara awara so xa marha.

Ero wa naxe mer̂pono pîn komo.

3 Wen̂epesî rma tko kakno komo ahyaka so.

Anîmrî komo enkacoko tak ha,

kan̂e kom ha.

Mer̂pora ceen̂axe amn̂e yînmîthîrî komo,

wîîkekn̂e apoko so.

Enkatîkara rma awexitaw so tko tohnaw ekatîmn̂e wa mak amna n̂een̂axe okwe.

4 Maseton̂a pono komo marha na mokyatu oyakro iina.

Ero ke wahra mak exitaw anmîthîrî komo n̂examro mokyataw amna nîhyapamyasî.

Tohnaw mak awehtopo komo yekatîmn̂e wa amna nîhtînoyaxe okwe.

Amyamro meero mîhyapamyaxe okwe.

5 Ero ke oywapu ka wen̂epesî kakno komo ahyaka so.

On wara wîîkesî yîwya so,

Korintu pono komo ya katatko,

Puranta nîmyas amna mer̂pora,

kachonho awya so enkacoko tak ha.

Pawru komo yesamaka enkacoko n̂he kapu,

katatko,

wîîkesî yîwya so.

Awanme ro so mak tîmn̂e me awexi xe so wasî.

Opurantan thakwa wîmyas okwe,

kahra ro mak awexi xe so wasî.

Ero wa awexi xe so wasî.

6 On wara tasî puranta tîmyataw,

knatîrî ciin̂e wara rma tasî.

Wahra mak knatîrî ciriche kîwya so wahra mak tahyaxe amn̂e ero yeperîrî okwe.

Mer̂pora ciriche knatîrî mer̂pora tahyaxe okre amn̂e epetache.

Ero wa nasî knatîrî ciitopo.

7 Ero ke atî wicakî tîmpore nai kupurantanthîrî kom ha?

Amyamro ha tko.

Awanme ro so mak yîhtînocoko anîmrî komo.

Awanmenkera so tîmn̂e me awexi xera so mak wasî.

Opurantan raconho wîmyasî thakwa,

kan̂e me awexi xera so wasî.

Tawake tî nai Kaan tahwore cetîmsom poko.

8 Awakren̂e komo me Kaan yehtopo ponaro cexpore nasî.

Ehn̂ara ro mak nasî awakretopo komo poko.

Miyan ke rma awakren̂e komo me nasî Noro okre.

Esemetanmekîra awir̂axe so wakreno rin̂e me rma awehtome so hara.

Ero wa awakrexe so Kaan okre.

9 On wara kesî Kaan Karitan kwakren̂e komo poko,

Cesemetanmesom komo wakren̂e me xatken̂e n̂examro mîk hak wakren̂e me okre.

Ero ke kir̂wan̂he n̂examro yehtopo yîhcamnopîra ro mak nasî Kaan okre,

kesî.

10 Taa,

kwakren̂e komo marha Mîk hara Kaan.

Naatî yatho tîmn̂e Mîk naatî ciin̂e komo ya.

Kurman̂e marha Mîk.

Ero ke Noro exi xe wasî anatîrî komo yepamnon̂e me.

Anatîrî komo yepetanmekî xe marha wasî yîwya ehyatkaw so.

Cepetaxmu me marha awiri xe so wasî yîwya.

Kir̂wan̂he awehtopo komo rma nasî aweperîrî komo wara hara.

11 Mîn hak tîmn̂e me mak exi xe wasî Noro awya so.

Ero ke amyamro marha tak maxe mîn hak tîmn̂e ro me xa tak anari komo ya hara.

Ero yinhîrî awya so tîmtoponhîrî tak amna n̂ekatîmyasî centan̂e komo ya.

Kir̂wan̂he Kaan nai ham okre.

Kwakren̂e me xa n̂iir̂akn̂e ham Korintu pono komo,

kexe tak amn̂e awehtopo komo yentan̂e komo.

12 Kir̂wan̂he xa maxe apurantanthîrî komo tîmrî ke Kaan xîkrî komo ya.

Esemetanmekîra tak naxe anmîthîrî komo yahsîrî ke.

Kir̂wan̂he Kaan yehtopo poko marha nîmtapowaxe emapona Kaan xîkrî komo,

twakrerî komo ke awya so.

13 Kaan xîkrî me xa mesenpexe okre apurantanthîrî komo tîmrî ke.

Ero ke on wara kexe amn̂e anwakrethîrî komo apoko so,

Kristu ya kakir̂wamacho yentan̂enho tî mîkyam Korintu pono komo.

Yaaro ham,

Noro rma n̂ewehcat ham okre.

Kir̂wan̂he Kaan nai ham okre,

n̂examro nakir̂wame ham,

kwakren̂e me marha n̂iir̂a ham okre.

Enko xe,

on ke kwakrecow so,

anarî komo marha wakrexe,

kexe.

Ero wa kexe apoko so.

14 Apînîn yaw so marha naxe.

Awakronomacho komo poko marha nîmtapowaxe Kaan yakro.

Ero wa naxe apoko so Kaan nakir̂wamatho me xa awenîrî ke so.

15 Kaan xa kwakretken̂e so kir̂wan ke xa tak,

ekatîmrî yopono ke mak okre.

Ero ke,

Kir̂wan̂he xa Kaan nai ham okre kapore nasî.

Ero wa kapore nasî Kaan ya.