Taa,

on wara wîîkes hara awya so,

Kristu wa xa marha oyexi xe wasî.

Yukurumîkîra xakn̂e Kristu,

yamoro tîmtapotaxmu me xakn̂e.

Ero ke ero wa xa marha oyexi xe was ow hara.

Achew so oyexitaw yamoro tîmtapotaxmu me mak wasî.

Anato oyexitaw hara achewno pîn me,

camra tak kîmtapowas hara awakro so.

2 On wara tko wîîkes awya so,

kir̂wan̂he awexi xe so wasî camra tîmtapotaxmu me exihra rma oyehtome achew so oyexitaw tak amn̂e.

Yamoro tîmtapotaxmu me roro mak oyexi xe wasî.

On wara tko tî ketu anarî komo amna poko,

Tanmero so mak naxe n̂examro kica,

kexe anarî kom okwe amna poko.

Camra rma men kîmtapowasî amn̂e ero wara kan̂e komo yakro.

3 Tupun yawno me rma thakwa nas amna ahce na poko cexitaw.

Tupun yanmera makî tko amna n̂etarmesî kicicitho yar̂macho poko.

4 Nasî rma amna yuhre tooto yuhre warai pîn ha tko.

Ahce na macakan̂e ro mîn amna yuhre Kaan nîmîtho me exirî ke.

Satanas wacantho warai macakan̂e ro mak mîn,

yahcono rma macakesî.

5 Kaanî mtapotarî yanwetopo yar̂matopo mîn amna yuhre.

Cehcoyopokaxmu me mak naxe anarî komo.

Ero ke kir̂wan̂he xa Kaan yehtopo yîhcamnopu xe mak naxe okwe.

Ero wa tooto komo yesehtînotopo yar̂man̂e me marha nas amna yuhre.

Kesehtînotopo komo poko meero amna n̂etar̂mesî Kristu yewetîn̂e me ciitome ahnoro ero yipu.

6 Ero ke Kristu yewetîn̂e me awehtîkache so tak Noro yanwekn̂e komo rma tak amna panaresî ahnoro rma.

7 On wara marha wîîkes awya so,

poreno yenîrî ke mak awya so ow mîwîrîyaket ha na?

On wara kes amna,

Kristu yanme xa panatanmekno rin̂e ow ha,

ket ha na anarî komo.

Ero ke ero wa kan̂e exitaw on wara wîîkesî yîwya,

Kristu yanme xa panatanmekno rin̂e ow ha,

kan̂e me awexitaw on wara marha kasko,

Pawru komo marha naxe Kristu yanme panatanmekno rin̂e me hara,

kasko.

Ero wa wîîkesî yîwya.

8 Cehcoyoponkaxmu wara rma re tan kîmtapowasî awakro so.

Yaaro tko tan wîîkesî.

Kporin komo nantomatho xa owî.

On wara Noro kekn̂e owya,

Korintu pono komo yakîhren̂e me esko,

ahworen̂e me marha.

Yîwîrîman̂e pîn me ro mak esko,

kekn̂e Kaan owya.

Ero ke yîhyapamra ro mak kpanatanmekyaxe so.

9 Tohnaw kyam mak aweraspetopo komo mewre xera wasî okaritan.

Pîra ro mak.

10 On wara kexe owîrîyakan̂e komo opoko,

Takîhsom wara nîmtapowasî Pawru karita yaka kyam mak,

yukurumîkno me marha nîmtapowasî.

Kesî ro kyam mak kica.

Enko xe,

tan ceen̂atken̂e hara yukurumîkîra.

Poxumnî me marha nîmtapowakn̂e kica.

Noro yipu mîk Pawru kica anarmerpa tîmtapotaxmu kica,

kexe opoko.

11 On wara wîîkesî ero wa kan̂e komo ya,

yukurumîkno me mencexe amna karitan.

Ero wa xa marha men amna meen̂axe hara amn̂e achew so amna exitaw,

yukurumîkno me rma,

wîîkesî.

12 Anarî komo reha tpoyino komo yopono me mak n̂esenpexe kica.

N̂examro warahra ro mak cexi xe nas amna.

On wara kexe,

Owî reha n̂e ro kir̂wan.

Pîra n̂he reha mîkro.

Owî reha n̂e ro takîhsom anarî komo yopo,

kexe.

Akpîra ro mak n̂esehtînoyaxe ero wa kica.

13 Miyan komo panatanmekn̂e rma amna,

kahra ro mak nas amna.

N̂examro panatanmekn̂e me ehcoko,

kesî Kaan amna ya.

Ero ke Noro yanme mak ero wa nas amna.

Noro yanme rma acheka so amna mokyakn̂e.

14 Ahce wa katî mîîketu amna ya?

Ahce kacho amna panatanmekn̂e wara mîmtapowatu kica?

Xiya mokuhra mexe mîxatken̂e,

mîîketu katî amna ya?

Ero wa kahra ro mak maxe.

Acheka so rma wa amna mokyakn̂e Kristu ya kakir̂wamacho komo yekatîmso.

Ero ke apanatanmekn̂e komo me rma nas amna.

15-16 Amna npanatanmekrî mîkyam,

kahra ro mak nas amna anarî komo npanatanmekrî poko.

Pîra ro mak.

Wara rma Kaan pona enîn̂e me awehtîkache so n̂he amna yakronoman̂e me cma re maxe amn̂e meyeno komo cheka amna totohme hara.

Ero wa tîto xe nas amna meyeno komo cheka tîn̂enthîrî pîn komo cheka hara.

Anarî komo npanatanmekîtho pîn cheka tîto xe mak nas amna Kristu ya kakir̂wamacho yekatîmso.

17 On wara xa kapore nasî,

Takîhsom poko kîmtapowataw so,

takîhsom xa Mîk Kporin kom ha,

kapore mak nasî.

18 Takîhsom ow ha,

kan̂e me kexitaw so akpîn me rma na tatu.

Takîhsom mîkro,

kacho me kexitaw so Kaan ya reha takîhsom me xa taxe okre.

Ero wa taxe.