Kaan Yanmera Ekatîmn̂e Komo Pokono
11
Owî cma re ka mencexe.
Rikomo wara kyam mak na ow mencetu.
Wara rma owî mencet ham.
2 Awewyoman̂e komo me was ow.
Kaan yanme mak awewyoma xe so wasî.
Kristu nasî aan̂o komo me.
Ero ke Noro ya xa amî xe so was amn̂e.
Emasî nîmyasî yîîm iin̂o ya ero wa xa marha amî xe so wasî yîwya.
Anarî pokono pîn me ro mak awexi xe so wasî,
Noro ya kir̂wan̂he amtome so yîwya.
3 On wara wîîkes apoko so,
Epa pen wara rma na mat okwe,
Noro pen n̂ewkukmekn̂e okoyi cemarontaxmu me cexiri ke.
Ero wa xa marha na awewkukmetu so hara kica.
Kristu mak nasi kakir̂waman̂e me,
kacho mencetken̂e.
Anarmen ponaro mak na awir̂atu so,
wîîkesî.
4 Anarî na mokya acheka so Xesus poko apanatanmekn̂e kom ha tî re.
Anarî Xesus poko makî tko nîmtapowaxe kica.
Noro yipu poko apanatanmekyatu so,
amna n̂ekatîmîtho pîn poko okwe.
Noro yipu mokuche apamatanmekn̂e komo porohkara rma na mat okwe,
wîîkesî.
Anarî yekatî tak na mokya hara aropotaka so,
pahxa mokyakn̂e Noro pîn.
Noro yipu rma na mewehcatu kica,
wîîkesî marha.
Anarme awakir̂wamacho komo pokono yekatîmn̂e marha na mîk acheka tmohsom.
Pahxa mencetken̂e ero warai pîn yekatîmn̂e na mîk ha.
N̂ex ha ero wa kacho,
kahra na matu,
wîîkesî.
5 Naxe anarî komo Kristu nantomatho komo,
enîno rin̂e me cehsom komo xa.
Noro yipu komo xawyakan me exihra rma was ow hara.
6 Ehcamhokanî rma re ow yaana me omtapotacho poko.
Ehcamhokaxapu me rma tko wasî Kaan ya kakir̂wamacho komo poko.
Ero warai me rma wa amna meen̂axe ahce na poko exitaw amna.
7 Iito oyexitaw pahxa on wara wîxakn̂e,
Kaan ya kakir̂wamacho yekatîmîche awya so,
Epethîrî xe wasî,
kahra ro mak wîxakn̂e awya so.
Ayopono komo mera ro mak oyesenpotome ero wara kahra wîxakn̂e.
Oyopono me xa matko awesenpotome so ero wa wîxakn̂e.
Ero ke camkînotho wara rma na ow meen̂atken̂e ero wa kahra oyexirî poyero.
8 Meyeno komo purantankan̂e wa wîxakn̂e okwe.
Yînmîthîrî komo rma wahsîyakn̂e puranta oyepetho me.
Kaan xîkrî komo purantantho rma ero wa wahsîyakn̂e apanatanmekn̂e me oyehtome hara.
9 Iito oyexitaw achew so ahce na xe rma wîxakn̂e.
Wara rma,
Opurantanî cma re,
kahra rma wîxakn̂e awya so.
Oyakro mohxapu komo mak nîmyatken̂e owya ahce na xe oyehtopo.
Kakno komo mîkyam,
Maseton̂a pono kom ha.
Apona so enîhra wîxakn̂e oyecetotopo.
Ero wara rma was amn̂e ahyaka so omokuche xa hara.
10 Yaaro xa tan wîîkes awya so,
Kristu mtapotarî xa nasî oropotaw.
Iina omokuche xa hara amn̂e Akaia pona awerepokara so rma wasî ahce na xe oyehtopo poko.
Epethîmra ro mak wekatîmyasî Kaanî mtapotarî,
wîîkesî roro yîtîtmamra ro mak tooto yanme.
11 Ahce kacho,
Opurantan,
kahra wai awya so?
Aaxera so katî wai awya so?
Ero warai pîn me oyenyasî Kaan.
12 Ero ke,
Opurantan,
kahra rma wasî awya so anato apanatanmekn̂e komo warahra oyesenpotome.
Amna wara xa marha cesenpo xe naxe kica.
Kaanî mtapotarî yekatîmn̂e xa marha amna,
kexe mak kica.
Ero ke tohnaw tîmtapotaxmu me tak n̂examro yehtopo yenpo xe was awya so.
13 On wara kan̂e kom ham mîkyam,
Kristu nantomatho xa amna,
kan̂e.
Kristu nantomatho warai me mak n̂esenpexe tohnaw ro mak kica.
14 Eserepokara rma wasî awedwkukman̂e komo poko.
Satanas wara rma naxe kica.
Ancu wara rma n̂esenpesî Satanas,
kweipon̂e wara kica.
15 Ero ke noro wa xa marha thakwa naxe noro yanton kom hara.
Kir̂wan̂he kehtopo komo yekatîmn̂e wara rma n̂esenpexe tohnaw mak kica.
Amn̂e tak kicicme cehtoponhîrî komo yepetho tak nahsîyaxe cehtoponhîrî komo yecenarîno rma okwe.
Ero wa naxe amn̂e.
Oyahwokacho Yînîmn̂enho Ow Ha, Kesî Pawru
16 Taa,
kesekatîmyasî xa hara tan.
Camkî tîmtapotaxmu mîk Pawru kica,
kahra ehcoko opoko.
Ero wa ketaw rma awya so ow entacoko rma camkî tîmtapotaxmu rma.
Takîhso oyehtopo wekatîmyasî rma ha re.
17 Poxumnî me rma kesekatîmyasî wara mak cesehtînosom wara mak.
Kporin komo warahra tan kesekatîmyasî.
Yîhyapamra rma tko kesekatîmyasî awya so takîhso oyehtopo poko.
18 Kesekatîmyasî rma anarî komo wa xa marha.
Mer̂pora naxe on wara kan̂e komo,
Mîn hak poko ehcamhokaxapu ow ha anarî komo yopo,
kan̂e komo.
Ero ke oyehtopo marha wekatîmyasî cehcoyoponkaxmu wara xa marha.
19 Takîhsom amna okre,
mîîket ham.
Ero ke akpîn komo mtapotarî rma mencet ham anwekîra rma.
Ero wa mat ham okwe.
20 On wara naxe n̂examro apoko so,
tanton komo me mak awir̂axe so kica.
Awemyawnonkexe so marha kica.
Awemîknoyaxe so marha kica.
Cehcoyoponkaxmu me marha naxe kica.
Awewkatapexe so marha oko.
Ero wa awir̂axe so n̂examro.
Noro yipu komo rma mewehcaxe okwe.
21 Ero wara cemetanmetopo yînmîra nas amna reha.
Taa,
n̂examro n̂ehcoyoponkexe.
Ow xa kehcoyoponkes hara.
Wara mak cesehtînosom wa mak tan kîmtapowasî kopi.
22 Ebrew mtapotarî kukman̂e amna okre,
ket ha na re n̂examro.
Ero warai xa marha ow hara.
Ixaw Yana ro xa amna okre,
ketu marha na re.
Ero warai xa marha ow hara.
Abraaw pen yepamtho xa amna okre,
ketu marha na re.
Ero warai xa marha ow hara.
23 Kristu yanton amna okre,
ketu marha na re.
Owî xa matko wasî Kristu yanton me n̂examro yopo.
Akpîn wara tan kîmtapowasî kopi.
Cetapickaxmu xa ow n̂examro yopo.
Yîhyoxapu marha ow cerewre xa.
Kahrutopo yawnonho marha ow emapona roro.
Owaitopo pahnoke xa re wîxakn̂e emapona roro.
24 Cmaicmai ketken̂e omkarî pore oco Xutew komo.
39 ro ohyokyatken̂e oco.
5 ro ero wicakî so ohyokyatken̂e oco.
25 Amoyi ke marha oyetapetken̂e oko,
tmowtmow ketken̂e.
Osorwaw ro oyetapetken̂e oko.
Toh ke oyetapetken̂e anarî kom hara.
Cewn̂e ro mak oyetapetken̂e toh ke mer̂pono pîn ke.
Osorwaw ro enorixapunhîrî thakwa ow tuuna imo kwaka.
Oyenoriche yukwaw rma kenmayakn̂e kokmamrî me enorixapunhîrî.
Kîkokmamyakn̂e xa hara iito rma.
Ero wara wîxakn̂e.
26 On warainhîrî marha ow,
mîk hak chere tîtosom mak ow ha.
Enor̂porononhîrî marha ow tuuna imo kwaw so.
Cen̂epan̂em komo chere tîtosomînhîrî marha ow.
Opoyino komo rma owaika xe xatken̂e hara okwe.
Anarimaw so hara Xenciu komo marha owaika xe xatken̂e hara okwe.
Ewto imo po oyexitaw kwaihyakn̂e ha re okwe.
Pohnîntaw oyexitaw hara kwaihyakn̂e xa marha re okwe.
Tuuna imo kwaw kwaihyakn̂e xa marha re okwe.
Kakno komo wara cesenposom komo marha owaikamexpo xe xatken̂e okwe.
Yaarono pîn komo mak mîkyam ero wa xatken̂e opoko.
27 Emapona ketapickekn̂e cekar̂kaxi ro.
Emapona ketwînîkpormekn̂e marha okwe.
Rooma yukurunkan̂enho marha ow.
Owokru xatînho marha thakwa ow okwe.
Emapona roro marha eseresmara wîxakn̂e pahkî.
Komsî yukurunkan̂enho marha ow pononpora oyexirî ke thakwa okwe.
28 Ero yipu yukurunkan̂enho ow.
Kaan xîkrî komo ponarono marha ow enmar̂atîxera.
Miyan komo ponaro rma wasî ahce wa so na ehtopo komo ponaro xa.
29 Kaan xîkrî komo yekatî kar̂pera exitaw ero wa xa marha was ow hara kar̂pen wara n̂examro poyero rma.
Kicicitho cheka epîrketaw so anarî komo n̂erewasî oropotarî yîpînîn yaw so oyehtopo.
Ero warai ow.
30 Ero wa kesekatîmyasî,
cehcoyoponkaxmu wara kesekatîmyasî oyanwekîra awehtome so.
Kar̂pera oyehtoponho poko makî tko kesekatîmyas awya so.
31 Cemaro pîn me tan kesekatîmyasî.
Kaanî rma ero warai me ohtînoyasî,
Kporin komo Xesus Kristu Yîîm Mîk Noro.
Yaaro cesekatîmsom me ohtînoyasî.
Noro yipu ow.
32 On marha wekatîmyas awya so,
Pahxa meye wîxakn̂e Tamasku po.
Iitono komo kopenaton tî oyahru xe xakn̂e hara okwe.
Aretas maywen tî mîk xakn̂e oyahru xe.
Ero ke sowtatu komo nantomekn̂e oyahsîtopo poko.
33 Ero ke oyakrono komo oyen̂emhataketken̂e waaca yewkanapan yaro mak.
Tawyockem yaw mak oyenîcetken̂e kahxapu yaw.
Ero wa oyen̂emhataketken̂e.
Ero ke oyahsîra xakn̂e kayaritomo.
Ero wa wîxakn̂e.