Pawru Totoponho Kah Yaka
12
Taa,
kesekatîmyasî rma.
Awakîretopo komo pînî rma tko tan on oyesekatîmtopo.
Kesekatîmyasî rma tko.
Enîhnî ro yentoponho owya wekatîmyas hara awya so.
Ero warai n̂enpekn̂e Kporin komo owya,
enîhnî ro n̂enpekn̂e.
2 Pahxa Kristu yakrono xakn̂e on̂enîtho rma.
On wara xakn̂e noro,
anarî kaamo po tak noro naar̂akn̂e Kaan miya kah yaka roro.
Xehxan ka wacekn̂e kaapu.
Rakatawno marha wacekn̂e hara.
Mehxan yaka naar̂akn̂e yohno rma.
Tuhn̂e rma na naar̂akn̂e.
Ekatî me katî naar̂akn̂e?
Apohana,
Kaan mak ero yipu nîhtînoyasî.
Pahxa ero wa xakn̂e,
14 cimn̂ipu tak nasî ero wa aatoponhîrî.
3-4 On̂enîtho rma mîkro Kaan narîtho.
Ceken pona roro Kaan naar̂akn̂e.
Iito exitaw iitono mtapotarî tak n̂encekn̂e,
ekatîmnî ro xa.
Ekatîmra ro mak esko an̂entathîrî,
kekn̂e Kaan yîwya.
Ahce wa na noro cekn̂e.
Tuhn̂e na cekn̂e.
Ekatî me katî cekn̂e?
Apohana,
Kaan mak ero yipu nîhtînoyasî.
5 Noro xa mîk keserepokacho yenîn̂e,
wîîkesî ero wa ehxapunhîrî poko.
Opoko rma oyesekatîm xera ro mak wasî ero yipu poko.
Kar̂pera oyehtoponho poko mak oyesekatîm xe xa was awya so.
6 Anarimaw oyesekatîm xe rma na wai anarî komo yopono me oyehtopo poko.
Ero poko oyesekatîmyataw camkîno pîn me rma kîmtapowasî.
Yaaro mak kesekatîmyasî.
Ero warai me tko oyesekatîm xera wasî.
Kaanî mtapotarî yekatîmn̂e me mak ow mencexe,
kir̂wan̂he oyehtopo marha meen̂axe.
Ero warai me mak oyenî xe wasî awya so.
7 Ero wa wîxakn̂e,
kah yawno rma Kaan n̂enpekn̂e owya miyanî rma.
Oyehcoyoponka xera ro makî tko xakn̂e Kaan.
Ero ke opun tak n̂eper̂antorekn̂e Satanas ya.
Oyahwokacho mîn xakn̂e ero wa oyerepetopo.
Ero wa Kaan oripekn̂e yîwya ehcoyoponkara oyehtome.
8 Ero yipu poko rma re kîmtapowakn̂e Kporin komo yakro.
Apa,
wîîkekn̂e,
Apa,
owî cma re makir̂wamesî,
wîîkekn̂e yîwya.
3 ro ero wa wîîkekn̂e.
9 Pîra,
kekn̂e hara Kporin komo owya,
pîra.
Awakir̂wamara wasî.
Kwakresî rma tko akaritotopo ke.
Kar̂pe oyehtopo xa n̂ehtîkesî akaritotîkacho me okre kar̂pera awexitaw rma,
kekn̂e owya.
Ero wa Kporin komo kekn̂e owya.
Ero ke kar̂pera oyehtopo poko rma tak kahwowasî.
Ero yipu poko kahwowasî kar̂pe xa tak Kristu yehtopo ehtome oropotaw.
10 Ero ke tahwore rma wasî kar̂pera oyexitaw,
owîrîyaketaw marha tooto komo ya,
owîrîmetaw marha tooto komo ya,
oyesemetanmekyataw marha.
Ero wa so oyexitaw kerepowasî rma Kristu yenpon̂e me oyehtome.
Kar̂pera oyexitaw ero yimaw xa tak kar̂pe wasî.
Ero wa wasî.
Aponaro So Xa Wasî, Kesî Pawru Yîwya So
11 Taa,
kesekatîmyasî rma.
Akpîn wara rma kesekatîmyasî.
Awanme so rma tko kesekatîmyasî.
On wara cma re kapore xakn̂e opoko,
Yaarono mîk Pawru,
Kristu nantomatho xa mîk ham,
kapore cma re xakn̂e opoko.
Kristu nantomatho komo xawyakan me exihra ro mak was ow,
enîno rin̂e ro komo xawyakan me exihra.
Camkînotho me rma tko was oyanme ro mak oyexitaw ketaw ha re.
12 Kristu nantomatho me oyehtopo cma re meen̂atken̂e iito oyexitaw.
Cirihnî meen̂atken̂e achew so oyexitaw.
Kar̂pe xa cehtopo Kaan n̂enpekn̂e,
aweserepokacho komo xa meen̂atken̂e iito oyexitaw.
Ero yipu poko wîxakn̂e ahwokan me ro mak.
Ero ke,
Kristu nantomatho xa mîk ham Pawru,
kapore cma re nasî opoko.
13 Ahce wa katî mîîketu owya?
Anarî komo xawyakan me amna menpekn̂e Kaan xîkrî komo xawyakan me kica,
mîîketu katî?
On wara mak wîxakn̂e iito oyexitaw,
awerepokara so wîxakn̂e ahce na xe oyehtopo poko.
Kicicme na ero wa oyehtoponho meen̂atken̂e?
Mîhcamnoyaxe cma re ero wa oyehtoponho.
Ero wa cma re maxe ha.
Aaxe So Xa Wasî, Kesî Pawru
14 Taa,
kmokyasî xa hara men ahyaka so yohno rma.
3 me tak nasî omohtopo ahyaka so ero yimaw.
Ero wara rma tko was hara achew so oyexitaw hara.
Awerepokara so xa hara wasî yiixe oyehtopo poko.
Apurantan komo xera ro mak wasî.
Aaxe so xa matko wasî.
Omxîkrî warai xa amyamro.
Ahce wa nai rikomo awya so?
Tîîm komo ya tîmsom yepamnopîra nasî rikomo.
Tîmxîkrî ya tîmsom xa matko n̂epamnoyasî yîîm.
Ero wa nasî.
15 Ero wa was ow apoko so hara,
opurantantho wirihtîkesî awakîretopo komo yepethome.
Ketapickesî marha cekar̂kaxi ro awakîretopo komo poko.
Tawake wasî ero wara awakîretopo komo poko oyexitaw.
On wara tko keen̂axe so,
aaxe so oyehtîketaw ooxera n̂he tak mehtîkexe amyamro hara okwe.
Ero wa keen̂axe so okwe.
16 Amyamro ha tko,
ero wa mat ham opoko.
Awewrucpera so rma tko wîxakn̂e ahce na xe oyehtopo poko iito oyexitaw.
Ooxatî pîn me rma kîhtînoyatken̂e so iito oyexitaw.
On wara kesehtînoyakn̂e,
ahce na poko yaana pîn me mak kesenpesî,
Kica,
kachome yîwya so opoko.
Ero ke ero wa karî ke tak awya so ooxatî pîn me awehtopo komo rma tak n̂esenpekn̂e.
17 Apanatanmekn̂e komo rma re wen̂epekn̂e ahyaka so.
Ahce wa katî wîîkekn̂e yîwya so?
Korintu pono komo purantantho ehtatko opurantan me,
wîîkekn̂e katî yîwya so?
Pîra ro mak.
18 On wara mak wîîkekn̂e Citu ya,
Mîîcesî cma re Korintu pono komo yenso,
wîîkekn̂e.
Noro yakro marha wen̂epekn̂e anarî hara kakno komo.
Ahce wa xakn̂e Citu komo achew so cexitaw?
Apurantanthîrî komo katî nahsîyatken̂e?
Pîra ro mak.
Owara xa marha n̂examro xatken̂e.
Owara xa marha n̂examro nîhtînoyatken̂e ahce na poko cehtopo komo.
Ero wa n̂examro xatken̂e.
19 Ahce wa katî amna mtapotarî mencet ha?
Tîhyapamsom wa katî amna mencet ha?
Pîra ro mak,
yîhyapamra ro mak nas amna.
Kaan n̂entarî me xa tan amna n̂esekatîmyasî.
Kristu yakrono me amna exirî ke marha amna n̂esekatîmyasî.
Ahce na poko amna exitaw ero poko amna nasî awakîretome so mak.
Ero wa mak nas amna oyakno komo.
20 Iina omokuche xa hara amn̂e kicicme na keen̂atu so.
Kicicme awehtopo komo yenî xera tko wasî.
Oyahwokan̂e me awen̂ataw so owya ero wa xa marha na ow meen̂at hara awahwokan̂e komo me xa marha okwe.
On wara xa na keen̂atu so amn̂e,
ceseseyusom me na keen̂atu so,
awakno komo poko tponîmsom me marha,
cetîrwonmesom me marha,
poturme awexi xe so cehsom me marha,
etîmtaka tîmtapotaxmu me marha,
etpoko tîmtapotaxmu me marha,
cehcoyoponkaxmu me marha,
wara hakî kan̂e me marha,
ero warai me na keen̂atu so okwe amn̂e iina omokuche.
21 Yikicicintaxapu komo marha na ween̂a amn̂e iina omokuche.
Noro yipu yenîche owya ahwokaxapu wa Kaan oriya hara kica an̂enîrî komo me.
Kîwracesî ro mak noro yipu komo yeen̂ataw owya ero yimaw.
Kicicitho pokononhîrî komo kica mîkyam,
wîîkesî,
wooxam poko ehxapunhîrî komo mîkyam anarî komo,
wara ro mak kan̂enhîrî komo marha mîkyam anarî kom hara kica,
wîîkesî marha.
Esekatîmra rma na nat okwe.
Kicicme wehxe kica,
kahra natu,
wîîkesî marha awya so.
Ero warai komo na ween̂a amn̂e iina omokuche.
Ero ke ahwora na ow meen̂atu okwe.
Ero wa na ow meen̂atu amn̂e iina omokuche.