Taa,

on wara wîîkes hara awya so,

puranta poko tan kîmtapowas hara,

Kaan xîkrî komo ya tîmsom poko ha.

Karasia pono komo ya wîîkekn̂e ero poko,

Kaan xîkrî komo ya.

Ero wa xa marha ehcoko amyamro hara.

2 On wara wîîkesî,

yihcirî po roro kaamo po apurantan komo poi tak enkacoko Kaan ya tîmsom me.

Mer̂pora n̂he exitaw apurantan komo,

mer̂pora n̂he enkacoko.

Wahra makî exitaw apurantan komo wahra mak enkacoko.

Ero wa apurantan komo enkacoko oyesamaka.

Iina omokuche tak,

Kaan purantan enkacoko,

ka xehra was awya so.

3 Iina omokuche tak amn̂e apoyino komo tak wen̂epesî Xerusaren pona anmîthîrî komo yaan̂e.

Amyamro rma mîmen̂ekexe aan̂e komo.

Karita marha tmewrepore nasî.

Kir̂wan komo moxam puranta yaan̂e komo,

kacho.

Ero wa an̂etacithîrî komo ya tak warpesî anmîthîrî komo Xerusaren pono komo yaka.

4 Iina marha na kîwce ow hara Xerusaren pona iinan me oyesehtînopuche.

Ero wa owcetaw n̂examro waar̂asî oyakro anmîthîrî komo yaan̂e komo.

5 Awenso so men kmokyas hara amn̂e Maseton̂a pono komo yenso owtoche mak.

Maseton̂a pore kmokyasî ahyaka so.

6 Pahkî n̂he na kenmaya achew so.

Cwotu meero na wenatke achew so.

Cwotu yenatîche tak kîwcesî anarî komo yenso hara.

Ero yimaw cma re ow makronomexe owtotopo poko hara.

7 Mokuhra ka wasî awenso so oroto.

Amn̂e mak kmokyasî.

Ero yimaw tak pahkî n̂he oyexi xe was achew so ero wa oyexi xe exitaw Kporin komo.

8 Tan ka wasî Epesu po.

Tan kenmayasî Pentekostes pona roro.

9 Metata yahrunkaxapu wara naxe tantono komo okre.

Mer̂pora naxe omtapotarî yenta xatî komo okre.

Mer̂pora marha naxe Kaanî mtapotarî xatî pîn kom hara okwe.

Ero wa naxe etîche re.

10 Cimocu marha na cee yarî awenso so.

Ero ke noro cetaw ponaro men ehcoko.

Akronomacoko marha erasîra ro mak ekatîmtome Kaanî mtapotarî awya so.

Kporin komo yanme xa noro n̂ekaricesî owara xa marha.

11 Ero ke noro yîwîrîyakara ro mak ehcoko.

Amn̂e tak xiya mokyataw hara akronomacoko hara esemetanmekîra ehtome.

Noro mohtopo ponaro wasî.

Kakno komo yakro tî mokya.

12 Aporu mohtopo ponaro marha na matu.

Noro yakro kîmtapowakn̂e ha re.

On wara wîîkekn̂e yîwya,

Kakno komo cetaw Korintu pona amoro marha na mîîce hara akro so,

wîîkekn̂e cma re yîwya.

Pîra ha tî ka,

oroto tî ka tîto xera nai awenso so.

Amn̂e makî tî yarî cee ha emyarîra n̂he cexitaw.

13 Twerî men ehcoko roro awewkukman̂e komo poko.

Kaan pona xa encoko ahwokan me ro mak.

Etîtîkaxapu wara mak ehcoko erasîn me.

Kar̂pe marha ehcoko.

14 Ahce poko so na awexitaw so apoyino komo xatî me mak ehcoko.

15-16 Taa,

Estepanas komo poko tan kîmtapowas hara oyakno komo.

Poturme Xesus yahsîn̂enho komo n̂examro okwe.

Akaia pona omokuche Xesus nahsîyatken̂e n̂examro ahsîra ka exitaw so anarî komo.

Kaan xîkrî komo yakronoman̂e n̂examro okre.

Ero ke noro yipu komo ewetîcoko.

Amna yakro cekaritosom komo marha ewetîcoko ahnoro.

17 Tawake xa wasî Estepanas komo mokrî ke oona,

Potunatu komo,

Akaiku komo.

N̂examro oyakronometken̂e awemtaka so hara.

18 Oyahworetken̂e n̂examro okre.

Ero wa xa marha awahworetken̂e so haram.

Ero ke kir̂wan̂he n̂examro yehtopo ekatîmcoko awakrono komo ya.

Kakronoman̂e komo n̂examro okre,

kacoko.

19 Aponaro so tî natu meyeno komo,

Asia pono kom ha,

Kaan xîkrî komo.

On wara kexe Akwira komo Prisira yakro,

Tahwore cesekatîm xe nas amna awya so,

Kporin komo yakrono me re kexirî ke so,

kexe.

Ero wa xa marha kexe yîmîn yaka cesenmesom kom hara,

Kaan xîkrî kom ha.

20 Amna men ekatîmko yîwya so,

kexe marha tantono komo ahnoro,

kakno kom ha.

On wara ehcoko awesenmekyataw so,

Mîmoko oyakno,

kacoko.

Esewcokacoko marha Kaan yanme mak.

21 Pawru ow ha.

Aponaro so xa was ow.

Oyamorî ke rma tan mewresî okaritan matkîtho mak.

22 Kporin komo xatî pîn komo exitaw iito achew so,

Xesus Kristu xatî pîn komo,

Kaan nîwîrîmarî me men n̂expe.

On wara wîîkesî Kporin komo ya,

Amok ha Apa okwe,

wîîkesî.

23 Awakre xe so wasî Kporin komo ya,

Xesus Kristu ya ha.

24 Aaxe so xa was ow Xesus Kristu yakrono me awexirî ke so.

Ero wa mak wîîkes awya so.