Awanme Ro So Mak Cesehtînosom Amyamro Okwe
3
Taa,
on wara marha wîîkes awya so,
oyakno komo,
awehtopo komo poko kîmtapowas hara.
On wara mîxatken̂e iito oyexitaw achew so Kaan Yekatî ponarono pîn me mak mîxatken̂e okwe.
Awanme ro so mak cesehtînosom me mîxatken̂e okwe.
Ero ke rikomo panatanmekn̂e wa mak wekatîmyakn̂e awya so.
Kristu yakrono ro me rma re mîxatken̂e ewruxan wara mak ha tko.
2 Ero ke Kaanî mtapotarî yekatîmyataw awya so moomo ke awokpan̂e komo wara mak wîîxakn̂e okwe.
Awotî komo yetakan̂e warahra ro mak wîxakn̂e.
Camkî entan̂e me mak mîxatken̂e okwe.
Ero wara rma maxe oroto hara.
Camkî rma thakwa mencexe okwe Kaanî mtapotarî.
3 Awanme ro so cesehtînosom me rma maxe okwe.
Enko xe,
apoyino komo poko tî mîpohnatu kica.
Meseiyatu marha tî,
metanwekyatu marha tî.
Ero wa tî matu kica.
Ero ke thakwa wîîkes awya so,
Awanme ro so cesehtînosom me rma wa mat ham.
Tooto komo wara mak mesehtînoyat ham okwe,
wîîkes awya so.
4 On wara tî mîîketu anarî komo,
Pawru mtapotarî ponarono makî reha amna,
mîîketu tî.
Aporu mtapotarî ponarono makî reha amna,
ketu tî anarî kom hara.
Ero wa tî mîîketu kica.
Ero wa karî poyero wa wîîkes awya so,
awanme ro so cesehtînosom me mat ham kica,
wîîkesî.
Amna Pona Enihra Ehcoko, Kesî Pawru.
5 Onoke warai me reha katî ow meen̂atu awya so?
Aporu hara,
onoke warai me marha noro meen̂at hara awya so?
Kaanî mtapotarî yekatîmn̂e makî reha amna.
Amna poyero rma re Xesus pona meen̂atken̂e.
Kaan yanton makî tko amna.
Kaan xa amna nantomesî tanme ro mak.
6 Naatî ciin̂e wa wîxakn̂e ow,
aropotaka so ciin̂e wa ha.
Ero yinhîrî Aporu tak xakn̂e hara on̂iritho tîhn̂e wara.
Kaan makî tko aropotaka so ciixapu n̂epetanmekyakn̂e.
7 Ayopono komo pîn kyam mak ow,
naatî ciin̂enho mak ha.
Ayopono komo pîn kyam marha mîk tîhn̂enhîrî hara.
Kaan mak xa yo aropotaka so ciixapu n̂epetanmekyasî.
8 Ero re pokono mak amna,
ciin̂enhîrî,
tîhn̂enhîrî kom ha.
Cepethîrî ro tko nahsîyasî amna amn̂e cetapickachonhîrî yecenarîno.
9 Kaan yakro cetapickaxmu amna.
Kaan natîrî warai amyamro hara.
Kaan mîn warai marha amyamro.
Ero warai amyamro.
10 Kaan makî cma ohtînoyakn̂e tîmîn ciin̂e me.
Ero ke oyakîrekn̂e tîmîn ciitopo poko.
Ero ke mapata yar̂man̂e wa makî ka wîxakn̂e ow.
Ero yinhîrî tak anarî komo tak mîîmo n̂iitîketken̂e mapata pona.
Ero ke amyamro meero maxe mapata pona ciitîkan̂e wara hara.
Ero ke takîhso men ciitîkacerî Kaan mîn.
Kaan Mîn Ciin̂e Kîwyam
11 Ciiso rma nasî Kaan mîn mapatan.
Ecirpora thakwa nasî anarî xa hara.
Xesus Kristu rma Mîk Kaan mîn mapatan me cehsom ha.
12 Anarmerpa kehtopo komo rma nasî mapata pona ciisom me tak.
Ero ke on warai komo ciir̂axe mapata pona.
Ooru anarimaw,
prata anarimaw hara,
toopuci enporixapu anarimaw hara.
Sahsamaxapu mak na ciir̂atu anarimaw hara,
cuupu warai kyam mak na anarimaw hara,
puruma yeputho mak na anarimaw hara.
Ero warai komo kyam na ciir̂atu mapata pona ha.
13 Amn̂e eromanhîrî kaamo po tak kn̂irithîrî komo n̂esenpesî.
Ero yimaw wehto ke Kaan nukukmesî,
n̂ecakya na kachome.
Ecakîn mîn xakn̂e okre on̂iritho,
tîtkexe tak ero yimaw kir̂wan̂he kehtoponhîrî komo poko.
Cecahsom mîn xakn̂e hara kica on̂iritho,
tîtkexe anarme kehtoponhîrî komo poko hara.
14 Ecakîra exitaw mapata pona kn̂irithîrî komo ero yepetho tak tahsîyaxe okre,
ecakînî ro yepetho ha.
15 Ecakîche reha kn̂irithîrî emyarîn wa thakwa mak taxe okwe.
Waipîn me rma kiir̂axe so Kaan.
Kn̂irithîrî komo makî reha n̂ecakyasî.
Ero wa kexitaw so kîmîn,
ecahxapu wara mak taxe emyarîn me mak okwe.
Ero wa taxe okwe.
16 Taa,
on wara wîîkes hara awya so,
Kaan mîn amyamro,
Noro Yekatî nasî aropotaw so.
Ero wa awehtopo komo katî yîhtînopîra mat ha?
Ero wa xa tîhtînopore nasî.
17 On wara nasî Kaan,
tîmîn yewyoman̂e me nasî.
Ero ke yîmîn yîwîrîman̂e me awexitaw so awaikexe so men Kaan okwe.
Ero wa nasî Kaan tîmîn poko,
ewyoman̂e me nasî.
Noro mînî rma amyamro.
Ero warai xa amyamro.
18 Esewkukmara ro mak men ehcoko awehtopo komo poko rma.
Takîhsom mîkro okre,
kacho me awexitaw so roowo pono komo ya,
camkîno me cesenpopore nasî yîwya so takîhsom me xa tak awehtome so okre.
19 On wara naxe roowo pono komo,
n̂etakîrexe rma re tanme ro so mak okwe.
On wara tko Kaan kesî noro yipu komo poko,
Camkîno komo mak mîkyam,
kesî.
Ero wara rma kesî Kaan Karitan noro yipu komo poko.
On wara kesî,
n̂etakîrexe rma re tooto komo ahce na poko yaana me cehtome so ero poko.
Ero wa etakîretopo komo rma tak Kaan naknamesî emcinotopo komo me hara,
kesî.
20 On wara marha kesî Kaan Karitan noro yipu komo poko rma,
Tohnaw ro mak n̂esehtînoyaxe takîhsom komo okwe,
kesî Kaan,
kesî Kaan Karitan.
21 Ero ke,
Takîhsom xa mîkro okre anarî komo yopo,
kahra ro mak tak ehcoko tooto poko mak.
Takîhso kehtopo rma nas awyan me so hara.
Ahnoro mak nas awyan komo me.
22 Awyan me so mak nas amna,
Pawru,
Aporu marha,
Sepas marha,
awyan me so re nas amna ahnoro.
Awyan me so marha nasî roowo pono kom hara,
awyan me so marha nasî waipîn me ka awehtopo komo.
Awyan me so marha nasî awaitopo kom hara amn̂e.
Orotono mko nasî awyan me so hara.
Ahce wa so na awexitaw so amn̂e,
ero wa awehtopo komo marha tak nasî awyan me so hara.
Ahnoro mak nasî awyan me so.
23 Kristu yanan me xa maxe,
Taa,
Kristu tak nasî Kaan mumuru ro me hara.
Ero wa nasî.