Kaan Mak Nasî Kehtopo Komo Yetacin̂e Me
4
Ero ke on warai me mak amna encoko,
Kristu yanton me mak ha.
Kaanî mtapotarî yekatîmn̂e me marha amna encoko,
ekatîmnînhîrî yekatîmn̂e me tak ha.
Ero warai me mak amna yîhtînocoko.
2 Kanton xe kexitaw so ahce warai xe xa tatu kanton komo?
Kewetîn̂e ro xe mak taxe kanton komo.
3 Ahce warai me kyam ow meen̂atu amyamro,
Kaan yanme xa ekatîmn̂e me ow meen̂at ha?
Oyanme ro kyam mak katî ekatîmn̂e me ow meen̂at ha?
Amyamro ha tko.
Amtapotarî komo ponaro xa exihra wasî opoko amtapowataw so.
Anarî komo mtapotarî ponaro exihra marha wasî opoko yîmtapowataw so hara.
On warai ow ham,
kahra rma wasî ow meero.
4 Exihnî me rma re wîhtînoyasî kicicme oyehtopo.
Kir̂wan mîkro ham,
kacho mera rma tko wasî ero wa oyesehtînorî ke mak.
Kporin komo mak ero wa kan̂e me nasî.
5 Ero ke on warai moso,
ero warai mîkro hara,
kahra ka ehcoko.
Amn̂e mak Kporin komo mohtopo me tak nasî.
Ero yimaw tak ahce wa so na kehtoponhîrî n̂ekatîmtîkesî Noro.
On wara kesî kîwya so,
Ero wa mîxakn̂e meye roowo po awexitaw so,
kesî.
Awarpanaw kehtoponhîrî komo meero n̂ekatîmyasî ero yimaw.
Kesehtînotoponhîrî komo meero n̂ekatîmyasî kropotarî yenîn̂e me cexirî ke.
Ero yimaw mak,
Kir̂wan̂he mîxakn̂e okre,
kesî tak Kaan kîwya so kir̂wan̂he kehtopo komo exitaw.
Ero wa Kaan kesî kîwya so amn̂e Xesus mokuche.
6 Taa,
opokono rma mîn wîîka oyakno komo,
Aporu pokono marha.
Mîîmo ciin̂e wa nas amna,
naatî ciin̂e wa marha nas amna,
wîîka.
Apanatanmetopo komo mîn wîîka.
Kaan Karitan yaw roro mak amna yehtopo yîhtînon̂e me awexi xe so wasî.
Takîhso kpanatanmekn̂e mîkro okre.
Camkîno mak mîkro hara okwe,
kan̂e me awexi xera so wasî.
7 Anarmerpan pokono me marha maxe amyamro hara.
Onoke katî ero wara awin̂e komo?
Kaan mak Mîkî ero wa awin̂e komo.
Ero ke ahce kacho awanme ro so etakîrexapu wa mak mesehtînoyatu?
Ow xa takîhsom,
mîîkexe kica,
Kaan mak Mîkî takîhso kiin̂e kom ha,
kahra maxe okwe.
8 On wara kan̂e wa mat ham okwe,
Ehcamhokatîkaxapu mak amna,
kan̂e wara matu.
Cemyawnoyem wara marha maxe,
kayaritomo wara marha maxe.
Pawru komo ken̂ehra rma on wara tas okre,
mîîket ham okwe.
Kayaritomo me awexi xe so rma re wasî.
Kayaritomo me awexitaw so ketaw ha re amna marha takî re nasî kayaritomo me hara awakro ro so rma okre.
Tooto Komo Nîwîrîyakarî Mak Amna, Kesî Pawru
9 On wara tko nas amna,
Kristu nantomatho rma re amna.
Tooto komo nîwîrîyakarî me makî tko nas amna twaihkaxmu komo wara.
Camkînotho wara cenposom me amna n̂iir̂asî Kaan.
Ero wa amna n̂een̂axe ancu komo tooto komo marha.
10 Kristu yanmen me mak amna exirî ke camkîno wara mak amna nasî tooto komo ya okwe.
Takîhsom amyamro ham awya so Kristu yakrono ro me awexirî ke so.
Kar̂pen me amna nai ham awya so.
Karitî me mat ham amyamro hara awya so.
Ehcamhokaxapu komo amyamro ham awya so.
Camkînotho mak mîkyam Pawru komo,
kacho me nai ham amna awya so hara.
11 On wara marha nas amna mehxa ro rma,
amna nîromanasî emapona.
Wokumra marha nas amna okwe.
Pononpora marha nas amna okwe.
Amna nîhyokyaxe tooto komo oco.
Amna yeken exihra marha nas okwe.
12 Amna marha n̂etapickesî.
Ahce na amna n̂iir̂a tamorî ke rma.
Amna nîwîrîyakexe tooto komo okwe.
On wara tko kes amna tîwîrîyakan̂e komo ya,
Awakrexe so mak wasî Kaan ya,
kesî mak amna yîwya so.
Amna yemetanmekyataw yîwya so amna mak nînîmyasî.
13 Kicicme yîmtapowataw so amna poko,
Ahwokan me awexi xe so nas amna,
kesi mak amna.
Tusmunthîrî wara ro mak amna n̂iir̂axe tooto komo.
Yukpurupuruntho wara mak amna n̂iir̂axe kica.
Ero wa mak amna n̂iir̂axe mehxa ro rma okwe.
14 Awîrîyakacho komo pîn tan mewresî an̂enîrî komo.
Atwermacho komo makî reha on.
Omxîkrî wara ciki maxe okwe.
Ero ke kîtwermexe so.
15-16 Mer̂pora ro mak exitaw apanatanmekn̂e komo mer̂pora exihra rma naxe aamo komo reha.
Ow makî reha aamo kom ha,
awekatî komo yîîm ha.
Ow xa kiir̂atken̂e so Xesus Kristu yakrono me.
Noro ya kakir̂wamacho komo wekatîmyakn̂e awya so Kaan xîkrî me awehtome so.
Ero ke aamo komo me wasî.
Ero ke owara xa marha awexi xe so wasî.
17 Ero warai poko apanatanmetome so marha Cimocu wen̂epei ahyaka so.
Omumuru warai rma mîk noro okwe.
Kporin komo yewetîn̂e roro marha mîk.
Noro tak kir̂wan̂he oyehtopo n̂ekatîmyasî awya so.
Ero wa nasî Pawru,
Kristu yawno me cexirî ke,
kesî.
On wara kesî Pawru Kaan xîkrî komo panatanmetopo,
miyan komo panatanmetopo rma,
kesî marha.
Ero wa oyehtopo n̂ekatîmyasî Cimocu amn̂e awya so.
Awehtopo Komo Yenso Kmokyasî Rma, Kesî Pawru
18 On wara tko naxe anarî komo achewno komo,
Takîhsom me cesehtînosom me naxe okwe.
Mokuhra mexe nasî Pawru,
kexe noro yipu komo okwe.
19 Kmokyasî rma tko ahyaka so iina oyarî xe exitaw Kporin komo.
Yohno rma kmokyasî.
Iito oyexitaw tak takîhsom me cesehtînosom komo tak ween̂asî.
Yaaro ham,
takîhsom mîkyam ham,
kahra wasî yîmtapotarî komo yentarî ke kyam mak owya.
Takîhso ehtopo komo yeenataw mak owya,
yaaro ham,
wîîkesî tak ha.
20 On wara nasî Kaan maywen me xa kehtopo komo,
kîmtapotarî yanme kyam mak Noro maywen me exihra taxe.
Kar̂pe Kaan yehtopo ken̂arî komo xa matko naxe Kaan maywen me.
21 Ahce wa omoku xe mat ha ahyaka so?
Cerewre atwerman̂e me katî omoku xe matu,
amaxkatapan̂e komo wa ha?
Aaxatî me omoku xe katî matu tawakem me ha?
Ero wa wîîkes awya so.