Taa,

on wara wîîkes hara awya so,

on wara wencesî awakro so cesenmesom yehtopo,

cipici pîn poko tî nai kica.

Kicicme xa tî nai,

tîîm pici poko rma tî nai okwe.

Ero wara tooto yehtopo yîhtînopîra ro mak naxe Xenciu komo.

2 Noro yipu ke tîchewnoyemu rma mehcoyoponkexe okwe amyamro.

Kir̂wan amna okre,

mîîkexe mak okwe.

Tîwratapore xa matko nasî.

Tporohkapore marha nasî kicicme ehxapu awakro so esenmekîra tak ehtome.

3 Pahxa rma noro wîhtînoyakn̂e owî reha tporohkaxmu me.

Iito oyexitawno wara rma ero wa wîhtînoyakn̂e.

Mooxe rma re wasî.

Achew so rma tko wasî ekatî me mak.

4 Ero ke awesenmekyataw so xa hara amn̂e Kporin komo Xesus Kristu pokono me,

iito marha was ow hara ekatî me mak.

Kporin komo Xesus Kristu marha nasî iito achew so,

akariton̂e me xa.

5 Ero wa awexirî ke so Satanas yemyaka ka noro tîmcoko yupun yemetanmechome.

Ero wa ciicoko kir̂wan̂he ehtome noro yekatî amn̂e Kporin komo Xesus mokyataw hara.

Ero wa ciicoko ha.

6 Kicicme men nasî awehcoyoponkarî komo kica.

Camkî katî matu puruma ciitopo poko?

On wara nasî,

cesmesî wahrututpamnotopo yakro.

Wahra mak cesmesî.

Ero yinhîrî tko wahrututpamtîkesî tak taisom ahnoro rma.

Ero wa xa marha maxe achew so exirî ke kicicme ehxapunhîrî hara.

7 Ero ke tak awahrututpamnotoponhîrî tak towcoko kir̂wan̂he taisom wara tak awehtome so,

wahrututpamnî ro wara.

Watono Ritoponho yimaw tohsom wa tak maxe,

wahrututpamnî ro wara.

Oper̂a xîkrî marha mon̂exe ero yimaw hara,

Kristu ponarono me.

Opera xîkrî wara rma n̂etwaikapekn̂e Watono Ritoponho yimaw tonosom wara.

8 Ero ke Kristu waihtoponho yukukmetaw awya so pahxanînhîrî kr̂a ar̂macoko awahrututpamnotoponhîrî komo.

Apoyino komo xera awehtoponhîrî komo,

emetanmeno ritopo ponaro awehtopo komo,

ero yipu kr̂a ar̂macoko.

Wahrututpamnî ro wara xa cehcerî,

on wara ha,

yaaro tîmtapotaxmu me xa cehcerî,

tohnaw tîmtapotaxmu mera ro mak.

Ero wa kexitaw so mak Xesus waihtoponho tukukmapore nasî.

Ero wa xa cexpore nasî.

9 Taa,

pahxa n̂he ka okaritan mewrekn̂e ahyakan komo.

On wara kacho mewrekn̂e,

cipici pîn pokono exitaw iito,

noro yipu yakrono me exihra ehcoko,

kacho mewrekn̂e an̂enîrî komo.

10 On wara tko wîîkes hara awya so,

noro yipu komo chewno me rma thakwa maxe tan awexirî ke so roowo po.

Cipici pîn pokono komo rma naxe tan,

puranta xatî ro komo marha naxe anarî kom hara,

kemyawnonhîrî town̂e me marha naxe anarî kom hara,

ciixaputho pokono me marha naxe anarî kom hara.

Noro yipu komo chew thakwa maxe.

Yîhyai ro xa awto xe awexitaw so roowo poi mak mîîcexe okyo.

Ero ke ero wa ehcoko,

kahra ro mak wasî.

11 On wara kacho xa tan mewresî an̂enîrî komo,

awakno komo poko makî reha tan kîmtapowasî,

Kaan xîkrî mîkro ha,

kacho komo poko mak ha.

On wara na natu noro yipu komo rma anarimaw,

cipici pîn pokono me na natu,

puranta xatî me na natu,

ciixaputho pokono me na natu,

yîrwonpontho me na natu,

twenîmsom me na natu,

kemyawnonhîrî town̂e me marha na natu.

Ero warai me na natu awakno komo rma anarimaw.

Ero wa exitaw noro yipu yakrono me exihra ehcoko,

wîîkesî awya so.

Eseresmara meero marha ehcoko noro yipu yakro.

Ero wa kacho xa yo tan mewresî an̂enîrî kom ha.

12-13 Ero wa cexpore nasî Kaan xîkrî komo poko makî reha.

Kaan xîkrî pîn komo yen̂ekan̂e pînî reha kîwyam.

Pîra ro mak.

Kaan makî reha n̂en̂ekesî tîmxîkrî pîn komo.

Noro xîkrî yen̂ekan̂e makî reha kîwyam.

Ero yipu men porohkacoko kicicme ehxapu.

Ero wa men ehcoko.