Awakno Komo En̂ekapora Ehcoko Kaan Xîkrî Pîn Komo Ya
6
Taa,
on wara wîîkes hara awya so oyakno komo,
on wara marha wences awehtopo komo,
awakno komo rma tî men̂ekapetu ken̂ekan̂e komo ya okwe,
kir̂wan pîn komo ya rma okwe.
Ahce kacho ero wa matu okwe?
Ahce kacho Kaan xîkrî komo ya mak en̂ekapora matu?
2 On wara kacho yentara katî matu,
Kaan xîkrî komo kîwyam,
roowo poko hakno komo yen̂ekan̂e me cehsom amn̂e,
kacho yentara mat ha?.
Ero ke ahce kacho apehceme tîhtînosom poko camkî mat hara?
3 On wara kacho marha na entara matu,
Ancu komo yen̂ekan̂e me meero wa taxe amn̂e,
kacho yentara na matu.
Soroso xa tantono komo yehtopo poko camkîra taxe.
4 Ero ke tantono ro komo yen̂ekan̂e me Kaan xîkrî komo ciirataw awya so,
onok warai komo xa ero wa miiratu ke?
Takîhsom xa mîkyam,
kacho pîn komo ya ma re mesen̂ekapetu?
Pîra ro mak.
5 Ahyapamnotome so tan kîmtapowasî awakro so.
Exihra katî nai takîhsom awakno komo rma,
en̂ekano rin̂e me cehsom ha?
Cewn̂e n̂he exihra ma nai ke?
6 Kaan xîkrî pîn komo yaka tî mîîcetu awakno komo yen̂ekaposo okwe.
7 Kicicme men nas okwe ero wa awakno komo yen̂ekapotopo awya so.
Anarimaw awakno komo rma na awemetanmekyatu so,
awemîknoyatu so anarimaw hara.
Ero wa exitaw ahce kacho on wara kahra matu,
N̂expe,
en̂ekapora ro mak wasî,
kahra?
8 Ero wa tî kahra ro mak matu.
Kicicme rma tî matu etpoko rma okwe.
Emetanmekno rin̂e me matu,
emîknono rin̂e me marha okwe.
Ero wa tî matu awakno komo poko rma okwe.
Kaan Mîn Me Nasî Kupun Komo
9-10 On wara marha wîîkes awya so,
Kaan maywen mera ro mak men naxe okwe kicicme cehsom komo.
Ero wa kacho yentara katî mat ha?
Camkî exihra men ehcoko kicicme cehsom komo yehtopo poko.
Kaan maywen mera ro mak naxe twayamuntaxmu komo,
ciixaputho pokono komo,
wooxam wara cecisom komo kîrkomo rma kica,
etpokono komo noro re rma,
cen̂epan̂em komo,
puranta poko cepohkaxmu komo,
twenîmsom komo,
yîwîrîyakano rin̂e ro komo,
twarawan yemîknon̂e komo,
ero warai komo Kaan maywen mera ro mak naxe okwe.
11 Ero warainhîrî rma re amyamro anarî komo mak.
Ero warai pîn me tak maxe oroto.
Aropotarî komo tak korokekn̂e Kaan.
Noro marha awahsîyatken̂e so tîmxîkrî me.
Kir̂wan me tak keen̂axe so Kaan okre,
Ero warai me awir̂atken̂e so Kaan.
Kporin komo Xesus yanme ero wa awir̂atken̂e so.
Cekatî ke marha awir̂atken̂e so ero warai me.
12 Ero ke on wara wîîkes hara awya so,
miya rma nai Kaan n̂ewyomatho pîn,
Ero yipu pokohra ro mak ehcoko kica,
kacho pîn yîwya ha.
Ero yipu pokohra rma tko was anarimaw oyakîren̂e pîn me yîhtînorî ke owya.
Ahce na poko oyesenpamnotîka xera ro mak wasî oyahsîn̂e wara exihra ro mak ehtome.
Ero wa xa was ow.
13 Kwethîrî komo nasî erewsî yen me mak.
Erewsî marha nasî kwethîrî yakan me hara.
Ero warai me nakîhcekn̂e Kaan.
Pahxaro tko asakno roro rma Noro nîhcamnoyas hara,
kwethîrî komo,
erewsî marha.
Ero wa n̂iir̂asî Kaan amn̂e.
Kipici pîn pokono me exihra ro makî tko nasî kupun komo.
Kporin komo poko kahwotatopo me mak xa nasî.
Noro mîn me marha nasî.
Ero warai me xa kupun komo nakîhcekn̂e Kporin komo.
14 Pahxa Kporin komo n̂enpakekn̂e Kaan.
Amn̂e tak kîwyam marha kenpakexe so hara kar̂pe cexirî ke.
Ero wa kenpakexe so.
15-16 On wara marha wîîkesî,
Kristu pun me rma tak nasî kupun komo.
Ero yipu katî entara mat ha?
Ero wa xa nasî.
Ero ke Kristu pun ma re wiir̂a kicicitho pokono me hara?
Mîk hak pokono me nai wooxam anarimaw,
kîîrî poko.
Noro warai pokono me ma re wiira Kristu pun hara?
Pîra ro mak kica.
On wara katî yîhtînopîra matu,
kîîrî pohkan̂e ro poko awexitaw so cewn̂an me tak nas apun kom noro yakro.
Ero poko rma kesî Kaan Karitan,
Asak haknonhîrî cewn̂an me tak nasî yupun komo,
kesî.
17 Ero wa xa marha nasî kekatî kom hara,
Kporin komo yahsîche kekatî tak nasî cewn̂an me Noro yekatî yakro rma.
Ero wa nasî.
18 Ero ke apici pîn poko awepoketaw,
cemahcisom wara mak ehcoko.
Anarmerpa nasî kicicme kehtopo komo.
Kupun komo yîwîrîmara tasî kicicitho poko kexitaw so,
mîn hak warai poko ha.
Kipici pîn poko kexitaw so reha kupun tîwîrîmesî xa kica.
Ero wa xa tasî kipici pîn poko kexitaw okwe.
19 On wara marha nasî kupun komo,
Kir̂wanî ro Yekatî mîn me nasî.
Ero yipu yentara katî mat ha?
Kaan n̂iritho Mîk ha aropotaka so,
yînmîthîrî awya so.
Ero ke awyanî ro pîn komo rma amyamro.
20 Epemaxapu mak amyamro.
Ero ke kir̂wanî ro mak Kaan yehtopo enpocoko okre apun komo ke ha,
awekatî komo ke marha.
Yîwyanî ro mîn apun komo,
awekatî komo marha,
ero ke ero wa xa ehcoko.