Kipitacho Pokono
7
Taa,
akaritan komo ween̂e mîn hak pokono.
Omtapotarî yenta xe mehce.
Ero ke weyukyasî tan.
On wara wîîkesî,
Kir̂wanhe naxe kîrkomo wooxam pokohra ro mak cexitaw so.
2 Naxe rma tko tweeno pîn komo apohkan̂e komo.
Ero ke cipitapore nasî apici poko mak awehtome so.
Wooxam komo ya marha wîîkesî,
Aan̂o komo rma ahsîcoko,
aan̂o komo poko mak awehtome so,
wîîkesî.
3 Apici yahsîche wakremecoko apici me exirî ke.
Ero wa xa marha wooxam kom hara,
aan̂o komo marha wakremecoko aan̂o me exirî ke.
4 Aaci komo,
awyanî ro me mak yîhtînopîra ehcoko apun komo.
Aan̂o pun me rma wa nasî apun komo.
Ero wa xa marha wîîkes awya so hara,
oyakno komo,
awyanî ro me mak yîhtînopîra marha ehcoko apun kom hara.
Apici pun me rma wa nas apun komo.
Ero wa yîhtînocoko apun komo.
5 Esewyomara cexpore nasî.
Etpokohra rma tko na matu awesentache so mak ero yipu poko.
On wara na mîîketu,
Kaan yakro ka omtapota xe cma re wasî pahkî n̂he,
eseresmara marha ka wasî ero poko mak oyehtome.
Ero ke etpokohra cma re ka tasî,
mîîketu na apici komo ya.
Taa,
ero wa ham,
ketu marha na apici komo awya so hara.
Ero wa awesentache so kir̂wan̂he rma maxe etpokohra ka.
Pahkî n̂he xa ero wa awehtopo yînmîra na matu.
Apici pîn poko apohke na Satanas pahkî xa awexitaw so.
Ero ke etpokohra rma na matu yohno nhe makî.
Ero wa ehcoko apohkara ehtome noro.
Ero wa ehcoko.
6 Taa,
apitacoko xa ha men,
kahra tko tan was awya so.
Apitacoko yiixe awexitaw so,
wîîkesî mak tan awya so.
7 On wara tko awexi xe so cma re wasî,
owarai me xa marha awexi xe so wasî amyamro kîrkomo ahnoro.
Anarmerpa so tko kiir̂atken̂e so Kaan.
Etîme re xa kirihra xakn̂e.
8 Ero ke yipihra awexitaw so kir̂wan̂he rma maxe ero wara rma.
Aaci komo,
iin̂omra awexitaw so amyamro hara kir̂wan̂he marha maxe ero wara rma.
Ero wa xa marha wîîkesî iin̂o waixapu komo ya hara.
Kir̂wan̂he rma wa maxe owara rma awexitaw so miya roro,
wîîkesî.
9 Expora awexitaw so tko apici xe,
ahsîcoko rma.
Kir̂wan̂he exihra taxe okwe expora ro mak kexitaw kipici xe.
Wara n̂he naxe noro yipu komo cihye cexitaw so takî.
10 Wooxam komo,
ciin̂oi awexitaw so etowra ro mak men ehcoko.
Ow mak pîn ero wa wîîkesî.
Kporin komo marha ero wa kesî.
11 Awetowyataw so rma tko ero wa mak tak ehcoko miya roro,
iin̂omra ro mak.
Anarimaw metîrwoxinket hara na aan̂o poko hara.
Yîhyaka na mîîce hara.
Oyakno komo,
cihyem komo,
amyamro marha etowra ro mak ehcoko hara.
Ero wa men ehcoko.
12 Taa,
on wara tak wîîkes hara,
ow mak,
Kporin komo pîn,
Kaan xîkrî pîn me exitaw awakno,
ahyawno kom ha.
Cerepore rma tko na nai yipici yîhyaw.
Ero wa exitaw,
Cetowpore nasî,
kahra cexpore nasî yîwya.
Yîhyaw rma n̂expe.
13 Ero wa xa marha wîîkesî wooxam komo ya hara,
Kaan xîkrî pîn me na nai aan̂o hara anarimaw.
Cerepore rma na nai ahyaw.
Ero wa exitaw,
Cetowpore nasî,
kahra rma cexpore nasî yîwya.
Ahyaw rma n̂expe,
Ero wa wîîkes ow ha.
14 On wara nasî Kaan xîkrî yin̂o,
Xesus pona enîn̂e pîn,
Kaan nasî noro yipu ponaro xa yipici yanme.
Ero wa xa marha nasî kîîrî hara Xesus pona enîn̂e pîn me exitaw cipici.
Kaan nasî yipici ponaro xa ciin̂o yanme.
Ero warahra exitaw ketaw ha re kicicme thakwa re naxe yîmxîkrî komo.
Ponaro xa Kaan yehtopo me rma tko ka naxe yîmxîkrî komo.
15 Cetow xe rma tko na nai Xesus pona enîn̂e pîn anarimaw.
Ero wa exitaw n̂etowpe rma.
Etowra ro mak men cexpore nasî,
kahra nasî Kaan kakno komo ya,
kepeka komo ya marha.
Ceseisom me kexi xera ro mak nasî Kaan,
16 ero ke ero wa ehcoko aaci komo.
Xesus xa wa nahsîyas on̂iyo amn̂e ohyaw rma exitaw,
kahra thakwa maxe yîhtînopîra awexirî ke so.
Ero ke n̂etowpe rma yiixe cexitaw.
Oyakno kom hara,
Xesus xa wa nahsîyasî opici ohyaw rma exitaw,
kahra marha thakwa maxe yîhtînopîra awexirî ke so.
Ero ke n̂etowpe apici yiixe exitaw.
17 Taa,
ahce warai me na awîr̂atken̂e so Kaan,
ero wara rma ehcoko.
Ahce warai pokono me na mîxatken̂e tîmxîkrî me awahsîyataw Kporin komo ya,
ero pokono me rma ehcoko.
Ero wa cesenmesom komo owî panatanmekyasî miyan komo rma.
18 Ahce warai me na mîxatken̂e Kporin komo ya awan̂ikyataw so.
Ero wara rma cexpore nasî.
Etanpikaxapu me na mîxatken̂e ero yimaw.
Ero wa awexitaw so,
etanpikaxapu me rma ehcoko.
Anarî komo etanpikan me na mîxatken̂e tîmxîkrî me awan̂ikyataw so Xesus ha.
Ero wa awexitaw so etanpikapora rma ehcoko.
19 Ero pîntho kyam makî reha mîn ketanpikacho komo.
Ero pîntho marha mîn etanpikara awehtopo komo marha.
Kaanî ya kpanatanmetopo komo yewetîn̂e me kexitaw so xa yo tawake nasî Kaan kpoko so.
20 Ahce pokono me na mîxatken̂e awan̂ikyataw so Kaan.
Ero pokono me rma ehcoko etowra.
21 Tooto yanton me mak na mîxatken̂e awan̂ikyataw so Kaan.
Ero wa awexitaw so yîhyapamra ehcoko ero wa awehtopo komo pona.
Awahsîpînka xe so exitaw so tko awosom komo etowcoko rma.
22 On wara maxe tooto yanton me awexitaw so Kaan ya awan̂ikyataw so,
Kaan nowtho me rma tak maxe okre.
Tooto yanton pîn me awexitaw so reha Kristu yanton me rma taxe.
Ero wa kiir̂axe so Kaan.
23 Epethîrî pona xa Kaan awahsîyatken̂e so.
Ero ke tooto yantonî ro me mak exihra ehcoko.
24 Ero ke on wara wîîkes awya so oyakno komo,
ahce warai me na mîxatken̂e pahxa awan̂ikyataw so Kaan ero warai me rma ehcoko.
Kaan yanme xa wasî on warai me,
kacoko mak.
Ero wa xa kacoko.
Yipihnî Komo Pokono, Iin̂o Waixapu komo Pokono Marha
25 Taa,
on wara marha wîîkes awya so,
in̂ontan komo poko tan kîmtapowas hara.
Kporin komo mtapotachonho yentara wasî noro yipu komo poko.
Ow mak wîhtînoyasî kir̂wan̂he ehtopo komo.
Kporin komo rma oriyakn̂e panatanmekno rin̂e me.
Opînîn yaw xa xakn̂e ham.
Ero ke cewetîn̂e me oriyakn̂e.
Ero ke omtapotarî ka entacoko.
26 On wara wîhtînoyasî,
kemetanmecho komo chew wa taxe oroto okwe.
Ero ke ahce warai me na matu oyakno komo,
oroto.
Ero warai me rma cexpore nasî.
Kir̂wan̂he rma maxe ero warai me rma.
27 Cihye na matu?
Ketowya tak ha na,
kahra ehcoko.
Yipihra na matu anarî kom hara?
Opici kyam ween̂asî,
kahra marha cexpore nasî.
28 Apici yahsîyataw rma tko,
Kicicme masî kica,
kahra nasî Kaan apoko so.
Wooxam kom hara,
iin̂ontan komo ka,
awya so wîîkes hara,
aan̂o yahsîyataw,
Kicicme masî kica,
kahra marha nasî Kaan apoko so hara.
Mesewrucpexe tko awetahsîche so.
Ero wa awexi xera so wasî.
29 On wara xa wîîkes awya so oyakno komo,
yohno mak tan taxe roowo po.
Ero ke cihye awexitaw so yipihnî wara rma cexpore nasî.
30 Awracetaw so hara,
yîwratan wara marha cexpore nasî.
Awahwowataw so hara ahwotan wara marha cexpore nasî.
Awemyawno poko twarawantaxmu me awexitaw so hara emyawnomnî wa marha cexpore nasî.
31 Roowo pono mko poko rma re wa maxe,
ero ponarono me mak ehtîkara ehcoko.
Cehcamnosom kyam mak mîn roowo pono ro mko.
32 Ero ke esewrucpen me awexi xe so mak wasî.
Yipihra awexitaw so Kporin komo ya mak metantomapexe.
Ahce wa na wai Kporin komo yanton mexan me xa oyehtome,
mîîkexe cewn̂e yatî mak.
33 Cihye awexitaw so reha awemyawno komo ponaro maxe,
roowo pono ponaro.
Ahce poko na wai tawake ehtome opici,
mîîkexe reha.
34 Ero wa xa marha naxe wooxam kom hara,
cin̂oyem warahra nasî iin̂omnî.
Iin̂omra awexitaw so,
aaci komo,
Kporin komo ya mak metantomapexe.
Kir̂wan̂he miir̂axe apun komo,
awekatî komo marha.
Ero wa maxe Kaan ponaro xa awehtome so.
Ero wa maxe iin̂omnî komo reha.
Ciin̂oi awexitaw so reha roowo pono mko ponaro maxe.
Ahce wa na wai tawake ehtome oyin̂o,
mîîkexe reha.
Ero wa maxe ciin̂oi awexitaw so.
35 Ero wa wîîkes awya so esewrucpen me n̂he awehtome so.
Awahwokan̂e me oyexi xera ro mak wasî.
Kir̂wan̂he awexi xe so mak wasî.
Kporin komo ya mak awetantomapo xe so wasî esewrucpen me.
36 On wara marha wîîkes awya so,
kar̂pamxan komo,
wooxam na mîpokonometu apici men.
Amn̂e mak cetahsîyaxe,
mîîketu na.
Wara rma pahkî xa na mîhtînoyatu.
Pahxa thakwa n̂emasîntai okwe,
mîîket ha na.
Mepohketu marha na etpoko akicicintarî yaro.
Ero wa awexitaw so apici me rma ahsîcoko.
Kicicme masî kica,
kahra nasî Kaan awya so ero poko.
37 Ero warahra tko na matu anarimaw.
Opici men yahsîra ro mak wasî,
mîîketu na.
Epohkara ro mak na matu noro poko.
Ero wa awexitaw so kir̂wan̂he marha maxe.
38 Ero ke on wara wîîkesî emasî yîîm komo ya,
awemsîrî tîmyataw iin̂o ya kir̂wan̂he rma re maxe.
Tîmîhra awexitaw so reha wara n̂he maxe.
Ero wa maxe.
39 On wara marha wîîkes awya so wooxam komo,
ciin̂oi awexitaw so etowra ro mak ehcoko.
Kpanatanmetopo yanme rma ero wa ehcoko.
Aan̂o komo waipuche tko,
awanme ro so mak tak encoko aan̂o kom hara.
Kporin komo yakrono makî tko ahsîcoko.
40 On wara tko wîîkes ow iin̂o waixapu komo ya,
cerepore xa maxe anarî yahsîra awexitaw so aan̂o kom hara,
wîîkesî.
Ero wa xa marha cma re kesî Kaan Yekatî owya.
Ero wa wîîkesî kipitacho komo poko,
wooxam komo yin̂ontacho poko marha.