Taa,

on wara wîîkes hara awya so,

ciixaputho pokono me naxe anarî komo.

Ero yipu notmexe amn̂e xa so.

Ero ke ero yipu poko tan kîmtapowasî awakro so.

On warai reha kîwyam,

Kaanî mtapotarî poko ehcamhokaxapu kîwyam.

Ero wa kexirî ke so ciixaputho ponarora ro mak taxe.

On wara tko na tatu anarimaw cehcamhokaxi kexirî ke so,

anarî komo yopono me cesehtînosom me na tatu kica.

On wara reha taxe etîxatî me kexitaw so,

Kaan poko ahworeno rin̂e me taxe.

Ero wa taxe etîxatî me kexitaw so.

2 Ehcamhokatîkara rma taxe miyan komo poko rma.

Ahce na poko ehcamhokaxapu me kexitaw ero yipu poko ehcamhokatîkara rma tasî.

Miya rma nasî ahce na poko camkî kehtopo komo rma.

3 Kaan xe kexitaw so tko,

Omxîkrî mîkro,

kesî Noro kpoko so.

Ero wa nasî Kaan kpoko so.

4 Taa,

ciixaputho yotî me tîmxapunhîrî poko tan kîmtapowas hara.

On wara wîîkesî,

ero pîntho makî reha mîn ciixaputho.

Kentan̂e pînî ro mak mîkî.

Cewn̂e mak nasî Kaanî ro xa.

Anarî exihra ro mak nasî ponaro kehtopo komo ro xa.

5 Ero warahra reha nîhtînoyaxe anarî komo.

Kaan xa mîn ha,

kexe mîn hak poko mer̂pono pîn poko ha.

Kah yawno poko ero wa kexe.

Roowo pono poko marha ero wa kexe.

Mer̂pora marha naxe,

Kantoman̂e ro mîkro,

kacho kom hara anarî komo ya.

6 N̂examro warahra reha tîtkexe kîwyam.

On wara xa tîtkexe,

Cewn̂e mak nasî Kaan,

Kîîm kom ha.

Yînakîtothîrî mak kîwyam.

Yînakîtothîrî marha mîn miyan komo rma ahnoro.

Noro n̂enîrî me mak taxe.

Cewn̂e marha nasî Kporin Kom hara,

Xesus Kristu mak.

Akîhtono rin̂e Mîk Tîîm yanme mak.

Kecehton̂e marha Mîk Tîîm yanme hara.

Noro yipu Mîk Kaan ha kîwya so.

7 Ero wa yîhtînopîra tko naxe anarî komo reha.

Camkî naxe okwe.

N̂eraswaxe ciixaputho pona.

Tîmrenainonhîrî rma ero wa na nat okwe.

Ero ke ero yipu ya tîmxapunhîrî ton̂etaw on wara kexe,

Kopi,

ciixaputho pokono me na tan wai kica iyotîthîrî tonorî ke owya.

Kicicme tko na tan wai kica,

kexe okwe.

8 On wara xa kapore nasî,

kir̂wan̂he kenîhra nasî Kaan kotî komo yanme mak.

Kîwîrîyakara nasî anarî yîmcetaw hara kootî pîn komo me.

Kir̂wan̂he xa mas okre,

kahra marha nasî miyan komo ton̂etaw rma ahnoro.

Ero wa kahra nasî Kaan kîwya so kotî komo yanme mak.

9 Anarî komo tko akîhtîkara ka naxe,

kar̂pera ka nasî ekatî komo.

Ero ke kicicitho me nîhtînoyaxe enporixaputho yotîtho.

Amyamro reha mîk hak puntho rma mon̂exe kir̂wan̂he rma yîhtînorî ke awya so.

Wara rma kar̂pen komo ponaro men ehcoko.

Kaan yanwekn̂e wara awesenpetaw so yîwya so nahwoket ha na okwe Kaan yewetîtopo poko.

10 Ciixaputho mîn yaw rma aweseresmetaw so awen̂atu so tak na noro yipu komo.

On wara na ketu apoko so,

Kopi,

ciixaputho yotîtho rma non̂esî kopi.

Ero ke ow meero kyam won̂esî ero yipu,

ketu tak na awenîrî ke so mak.

Twerîhra tak na natu okwe ciixaputho yotîtho yonotopo poko.

11 Ehcamhokaxapu komo amyamro.

Ehcamhokara tko na nai awakno komo.

Ahce wa na nai noro yipu apoyero so?

Ehcamhokaxapu me awehtopo komo yanme rma na nahwoke Kaan yewetîtopo poko okwe.

Twaihtopo ke Kristu n̂epematho mîkî okwe.

12 Kaan yanwekn̂e wara mesenpexe noro yipu komo ya kar̂pera exirî ke ekatî komo.

Ero ke thakwa Kaan yewetîtopo poko nahwokexe apoyero so.

Ero wa awexitaw so Kristu meero mahwokexe okwe.

13 Ero ke on wara was ow,

Kicicme men taxe Kaan ya wooto ton̂etaw,

kan̂e exitaw oyakno,

noro na wîwîrîme wooto ton̂etaw rma.

Ero ke noro yîwîrîmarî pona wooto tonohra ro mak wasî miya roro.

Ero wa wasî.