Opurantan Tîmcoko, Kahra Wîxakn̂e Awya So Iito Oyexitaw, Kesî Pawru
9
Ahce warai me ow meen̂at ha?
Kristu nantomatho pîn ow awya so?
Oyanme ro tîtosom me katî exihra wai awya so?
Kporin komo Xesus Kristu yenîhra ma wîxakn̂e awya so?
Omtapotarî poyero Xesus yahsîra katî mîxatken̂e?
Ahce warai me katî ow meen̂at ha?
2 Anarî komo cheka oyen̂epera rma xakn̂e Kristu.
Acheka so rma tko oyen̂epekn̂e ham.
Enko xe,
Xesus mewehcatken̂e opoyero.
Kporin komo yakrono me tak maxe okre.
3-4 On wara wîîkes hara owîrîyakan̂e komo ya,
pahxa iito amna exitaw achew so,
Onahrî xe wasî,
kahra rma xakn̂e amna awya so.
Kirwanhe rma n̂exirî ero wa kacho.
Ahce wa katî awya so?
Yînahmara katî cexpore nai acheka so Kaan yanme mohxapu komo,
wokru komo marha tîmîhra cexpore katî nai awya so?
5 On wara marha wîkes awya so,
anarî komo Xesus nantomatho komo,
cipici rma naaraxe takro so,
Xesus pona enîn̂e rma.
Kporin komo yakno komo marha ero wa naar̂axe cipici komo.
Sepas marha naar̂asî cipici hara.
Ero wara rma cexpore nasî yiixe exitaw so,
kahra katî matu amna poko hara?
6 Etapicakara marha naxe n̂examro.
Amna reha n̂etapickesî rma.
Ahce wa katî mîîketu ero wa amna yehtopo poko?
Etapickara rma cexpore nasî yiixe exitaw so,
mîîketu n̂examro poko mak,
amna poko kahra?
7 On wara naxe sowtatu komo,
kayaritomo yanme tîcetaw so tanme ro so mak epemara naxe tînahrî komo.
Ero wa xa marha naxe tînatîrî ciin̂e kom hara uupa ciin̂e komo.
Ciin̂enhîrî komo xa nahyaxe amn̂e tînatîrî yeperîrî.
Ero wa xa marha naxe kabra yenîn̂e kom hara.
Tok mownu rma thakwa n̂eer̂axe noro yipu komo.
8-9 Tooto mtapotarî mak katî mîn ero wa kacho?
Pîra ro mak.
Kpanatanmetopo marha ero wa kesî,
Moises pen nmewretho.
On wara kacho mewrekn̂e noro pen,
Paaka ewnamira ehcoko puruma yeperîrî yîpîpîtîketaw.
Paaka ponaro cexirî ke mak katî ero wa kacho Kaan mewrepekn̂e yîwya?
10 Pîra,
amna pokono rma mîn yînmewrethîrî.
On wara kacho marha tmewreso nasî amna pokono rma hara,
mararî ciirataw awya so,
On yeperîrî wahyas amn̂e okre,
kapore nasî.
Ero wa xa marha puruma yîpîpîtîketaw awya so,
Onahrî me nas on amn̂e okre,
kapore nasî.
11 Ero wara rma xakn̂e amna,
Kaanî mtapotarî amna n̂iir̂akn̂e aropotaka so naatî wara.
Ero ke eserepokara cexpore nasî anmîthîrî komo yahsîyataw hara amna ya ahce na mko ha.
12 Anarî komo mînahmexe epethîrî me.
Soroso xa amna nasî tînahmapore epethîrî me.
Ero yipu poko kahra tko xakn̂e amna awya so.
Amna thakwa yînahmacoko amna yepetho me,
kahra.
Cesemetanmetopo mak amna nînîmyakn̂e Kristu ya awakir̂wamacho komo yekatîmtopo poxunkarî pona awya so.
13 Ahce wa natu Kaan mîn pokono komo awya so?
Yîhyaka so tmararîn komo yeperîrî tooto komo n̂ekyaxe Kaan ya tîmsom me.
Ero poi rma tînahrî komo nahsîyaxe Kaan mîn pokono komo.
Anarî komo tokuthîrî komo n̂ekyaxe akn̂ipotome Kaan ya tîmsom me.
Ero poi marha totî komo nahsîyaxe tîmsom pokono kom hara.
Ero wa naxe.
14 Ero wa xa marha kesî Kporin komo kîwya so hara,
Kakir̂waman̂e xa Kristu,
kacho yekatîmn̂e komo yepetho rma tîmpore nasî,
kesî.
15 Wara rma ero wa kacho yekatîmtoponho yepetho yahsîra rma wîxakn̂e owî reha.
Ero wa kacho pîn marha tan mewresî an̂enîrî komo.
Ohyaka ekpocoko puranta,
kacho pîn tan.
Opoko na nîmtapowatu anarî komo on wara,
Kir̂wan Mîk Kristu,
kesî cma re Pawru.
Tupurantan yahsîtome mak ero wa kesî kica,
ketu na anarimaw.
Ero wa ketaw ha re opoko owaipu xe mak wasî re.
16 Ehcoyoponkara tan wasî.
Kakir̂waman̂e Mîkî Kristu,
kacho rma tan wekatîmyasî.
On wara tko kahra wasî,
Owî xa yo ero wa kacho yekatîmn̂e ro okre,
kahra.
Wekatîmyasî thakwa,
wîîkesî mak tan.
Ekatîmra oyexitaw oyahwokesî ro mak Kaan okwe.
17 Tahwore ekatîmyataw owya Kaan tak oyepemesî.
Oyanmenkera reha ekatîmyataw owya,
yîtîtmamra rma wasî.
Kaan xa kekn̂e owya etanwekîn me ro mak,
Ekatîmko roro men,
kekn̂e.
Ero ke ero poko wasî.
18 Taa,
ahce kyam wahsîya amn̂e owya ekatîmtoponho yepetho ha?
Kakir̂wamacho yekatîmtopo rma nasî oyepetho me.
Ero ke,
epethîrî tîmcoko owya,
kahra ro mak was awya so.
Kaanî mtapotarî yekatîmn̂e ow ha,
ero ke opurantan tîmpore nasî,
kan̂e me oyexi xera ro mak wasî.
Ero wara wasî.
Mîk Hak Yanton Me Kecir̂asî
19 On warai marha ow,
tooto yanton pînî ro mak ow ha.
Tooto komo yanton me rma tko kecir̂asî mîk hak yanton me.
Ero wa kecir̂asî Xesus yahsîtome oyentan̂e komo ya yaake n̂he.
Ero wa ehtome so kecir̂asî mîk hak yanton me.
20 On wara wîxakn̂e roro,
Xutew komo chew oyexitaw Xutew komo me rma kecir̂akn̂e Xesus yahsîtome yîwya so.
Moises pen nmewretho ponarono komo chew oyexitaw ero yewetîn̂e me xa marha wîxakn̂e hara Xesus yahsîpotome noro yipu komo ya.
21 Moises pen nmewretho yentan̂e pîn komo chew oyexitaw hara ero ponarono pîn wara xa marha wîxakn̂e ow hara.
Ewetîn̂e pîn me exihra tko wasî.
Kristu ya kpanatanmetopo wewehcas ha.
Moises pen nmewretho ponarono pîn wara makî ka wîxakn̂e ero yentan̂e pîn komo chew oyexitaw Xesus yahsîpotome n̂he tak noro yipu komo ya hara.
22 On wara kan̂e komo chew wîxakn̂e anarimaw hara,
Kopi,
kîwîrîmacho mîn ero yipu,
kan̂e komo chew.
Tohnaw mak ero wa ketken̂e.
Wara rma n̂examro warai me xa marha kesenpekn̂e hara Xesus yahsîpotome n̂he noro yipu kom ya hara.
Ahce warai komo chew na oyexitaw noro yipu komo warai me rma kesenpekn̂e.
Ero wa kesenpekn̂e opoyero rma Xesus pona entome yîwya so.
23 Ero wara roro kesenpesî kakir̂wamacho yentachome n̂he miyan komo ya rma.
Xesus pona enîche yîwya so n̂examro yakro rma tahwore wasî.
Ero wa wasî.
Kekaricesî Xa Kaan Yewetîtopo Poko
24 Taa,
on wara wîîkes hara awya so,
kar̂pe cemahcitopo yukukman̂e wara xa ekaritocoko.
Ahce wa natu ero wa cemahcisom komo?
Yaake rma re n̂emahciyaxe.
Cewn̂e mak nahsîyasî kar̂pe xa cemahcitoponhîrî yepetho.
Ero wa xa marha ehcoko amyamro hara.
Kaan yewetîtopo poko rma ehcoko kar̂pe cemahcisom wara xa.
Ero wa emahcicoko kar̂pe awemacitoponhîrî komo yepetho yahsîtome awya so amn̂e.
25 On wara marha naxe ero wa cemahcisom komo,
anarî komo yopo xa cekarito xe so naxe.
Ero ke kir̂wan̂he mak n̂iir̂axe tupun komo kar̂pe xa cemahcitome so.
Tîyopo so eseresmara naxe.
Wok marha erîhra naxe tîyopo so,
ero pîntho poko enmakara naxe.
Kir̂wan̂he mak nîwînîkyaxe kar̂pe xa tak cemahcitome so amn̂e.
Ero wa kir̂wan̂he tupun komo n̂iir̂axe aroko yahsîtome mak,
tatîhsomtho yahsîtome mak.
Kîwyam reha cekaricexe atpînî ro yahsîtome okre.
26 Ero ke cemahcisom wara rma was ow.
Pataw roro cemahcisom wara wasî esewyarira ro mak.
Knuwknuw me cetar̂maxmu wa marha wasî.
Eepokn̂e me kyam mak exihra wasî.
Knuwknuw kan̂e wara wasî kicicitho poko.
Ero wa wasî kicicitho poko cetar̂maxmu wara.
27 Oyanton me xa wiir̂asî opun.
Ero wa cirihra oyexitaw kicicme na wai amn̂e ow hara okwe,
panatanmekno rin̂enho rma.
Panatanmekno rin̂e pîn me tak na wehtîke okwe.
Ero wa oyexirî pona oyanton me mak wiir̂asî opun.
Ero wa wasî.