Ixaw Yana Pen Komo Warahra Ehcoko
10
Taa,
on wara wîîkes hara awya so oyakno komo,
kporin pen komo yehtoponho poko kîmtapowas hara.
Twen̂ekarî awexi xera so wasî kporin pen komo yehtoponho poko.
On wara tî xatken̂e n̂examro pen,
Exitu poi cetaw so Kaan tî n̂iir̂akn̂e kaweresî awarparen̂e komo me.
Ahnoro ro makî tî xatken̂e ero yawarpan chew.
Ahnoro xa marha tî cetken̂e tuuna yotari hara,
ehkotoxapu yotari ha.
Ero wa tî xatken̂e kporin pen komo.
2 Emicixapu wara rma tî xatken̂e,
kawaresî makatari tîtorî ke so.
N̂ikitho imo kwaka emicixapu wa marha tî xatken̂e,
tuuna yotari torî ke so hara.
Ero ke Moises pen ponarono me thakwa tî xatken̂e ero wa cemicirî ke so.
3 Ahnoro xa marha tî uuwi warai nahyatken̂e Kaan Yekatî nîmîtho.
4 Ahnoro xa marha tî tuuna n̂eer̂atken̂e,
Kaan Yekatî nîmîtho hara.
Toopu yatumnai tî mokyakn̂e.
Poko ro so tîtosomu rma tî mîn xakn̂e toopu.
Kaan Yekatî yanme rma ero wa xakn̂e.
Kristu rma Mîk xakn̂e toopu me.
Ero wa tî xatken̂e kporin pen komo ahnoro ro mak.
5 Kicicme tko tî anarî komo yehtopo n̂een̂akn̂e Kaan okwe.
Mer̂pono pîn tî kicicme xatken̂e.
Ero ke n̂examro pen waihyatken̂e iito rma pohnîntaw okwe.
Miya ro mak tî xakn̂e okoputhîrî komo axawa imo pore.
6 Ero wa tî Kaan n̂iir̂akn̂e n̂examro pen kweronomachome so.
N̂examro pen yehtoponho Kaan mewrepekn̂e kn̂enîrî komo me ero warahra ro mak tak kehtome so,
kicicitho komo poko pohnîmra kehtome so ha.
7 Ciixaputho pokono me marha tî xatken̂e n̂examro pen kica.
Ero wa exihra ehcoko amyamro hara.
Tmewreso rma nasî n̂examro pen yehtoponho,
on wara kacho,
Ixaw Yana komo n̂eremetken̂e ceseresmachome so,
twokru komo yeetome marha.
Ero yinhîrî nawomyatken̂e ceseman̂itome so hara,
kacho nasî tmewreso.
8 Kipici pîn pokono pîn me marha cehcerî.
Ero wa tî xatken̂e Ixaw Yana pen komo,
anarî komo mak.
Ero ke ero kaamo po rma tî waihyatken̂e n̂examro pen 23.000 okwe.
9 Kristu yukukmara marha cexpore nasî yîrwonmetopo poko okwe.
Ero wa tî Noro nukukmetken̂e n̂examro pen okwe.
Ero ke okoyi yotho ke tî waihyatken̂e anarî komo xa hara okwe.
10 Ahce na poko cetwîrîyakaxmu me exihra marha ehcoko.
Emapona tî n̂etwîrîyaketken̂e kica n̂examro pen.
Ero ke waihkano rin̂e ro tî mokyakn̂e ancu cetwîrîyakaxmu komo waihkaxi.
11 Ero wa Kaan n̂iir̂akn̂e kporin pen komo.
Kweronomachome so wa ero wa n̂examro pen waihkekn̂e.
Kîwyam hara men kopi ero wa kwaihketu so hara ero wa kexitaw so,
kan̂e me kehtome so.
Ero wa n̂examro pen yehtoponho mewrepekn̂e n̂examro pen warahra kehtome so kîwyam hara.
Roowo po kehtoponhîrî komo yenatîtopo pahnoke tak taxe kîwyam hara.
12 Ero ke on wara wîîkes awya so,
Owî reha kecececesî epîrkan me ro mak,
ketaw awya so,
twerî men ehcoko.
Amyamro pen meero mepîrkexe hara okwe ero wa ketaw awya so.
13 Anarimaw na kicicitho apohketu so,
anarimaw na mesemetanmekyat hara.
Ero wa awexitaw so on wara na mîîketu,
Ow thakwa mak on wara was okwe,
mîîketu na.
Pîra rma.
Tooto komo kukmacho ro mak mîn ero wa awehtopo komo.
On wara tko nasî Kaan,
apoko so eponarononkara ro mak nasî.
Ero ke ayopono komo mera ro mak n̂iir̂asî akukmacho komo.
Yînîmn̂e me marha awir̂axe so ahwokatîkara awehtome so.
Ero wa nasî Kaan.
14 Taa,
oyakno komo,
apînîn yaw so wasî.
Ero ke on wara marha wîîkes awya so,
ciixaputho nasî ponaro anarî komo yehtopo me kica.
Ero warahra ro mak ehcoko amyamro.
Ero yiputho yai cemahcisom wara men ehcoko amyamro pokohra ro mak awehtome so,
wîîkesî.
15 Takîhsom komo rma amyamro.
Ero ke takîhso men esehtînocoko omtapotarî poko.
Kristu Waihtoponho Kuknon Me Keseresmataw So Noro Re Me Taxe Xesus Yakro
16 Taa,
Kristu waihtoponho kuknon me keseresmacho poko tan kîmtapowas hara awakro so.
Noro ya kwakrechonhîrî komo ponarono me ceer̂axe kwokru komo.
Ero ke kir̂wan̂he xa mai ham Apa,
akamxukuthîrî rma mîmyakn̂e amna yepetho me,
tîtkexe yîwya.
Ero ponarono me re taxe wok yeer̂ataw.
Ero wa xa marha taxe kuru komo tokyataw hara,
yupun yerewîmtoponho ponarono me taxe.
17 Ero re poi rma tîtokyaxe.
Ero ke Kristu pun me re taxe mer̂pono pînî rma.
Ero re me nasî cuure,
ero wa xa marha taxe kîwyam,
noro pun me re hara.
Ero re tokrî ke yupun me re taxe.
18 Ero wa xa marha naxe Ixaw Yana kom hara.
Kaan ya tîmsom poyinonho rma non̂exe.
Ero ke Kaan yakro ceseresmaxmu me naxe Kaan ya tîmsom tonorî ke tîwya so.
Ero wa naxe.
19 Taa,
ciixaputho poko ka wîîka.
Ero poko tan kîmtapowas hara.
Ero pîntho kyam mak mîn ciixaputho.
Ero pîntho marha mîn wooto,
yîwya tîmxapunhîrî.
20 On wara tko naxe Xenciu komo,
enporixaputho ya tîmyataw wooto,
worokyam ya rma nîmyaxe kica.
Kaan ya tîmîhra ro mak naxe.
Ero re poko tahwore awexi xera ro mak wasî worokyam yakro.
21 Ahce wa thakwa re Kporin komo kamxukutho kuknon meer̂atu worokyam ya tîmxapu yeen̂e me rma awexitaw so.
Pîra ro thakwa mak okwe.
Ahce wa thakwa re Kporin komo pun kuknon mokyat hara worokyam ya tîmxapu yokn̂e me marha awexitaw so?
Pîra ro thakwa mak maxe okwe.
22 Kewyoman̂e Mîk Kporin komo.
Ero ke worokyam pokono me kexitaw so Noro yîrwonmekn̂e me taxe.
Kaan yopono ma re kîwyam kar̂pe xa?
Etponaro Men Ehcoko
23 Taa,
on wara wîîkes hara awya so,
Ahnoro rma tîton̂esî wooto yiixe kexitaw so.
Kicicme masî kica,
kahra ro mak nasî Kaan kootî poyero mak.
Anarî tko tîhtînoyaxe kotî pîn me kîkariton̂e mera exirî ke.
Anarî marha tîhtînoyaxe kotî pîn me Kaan poko kahworen̂e pîn me exirî ke.
24 Ow xa kesewakresî,
kan̂e pîn me cehcerî.
Apoyino komo yahworetopo ponaro xa matko ehcoko.
25 Kwarawantacho yawnonho rma tonocoko awotî komo.
Yîkrîpîra ro mak tonocoko.
Ahce warai on wooto,
kicicitho pîn tan ha?
kan̂e pîn me tonocoko.
26 Kporin komo rowon me nasî on roowo miyanî rma ahnoro.
Yîwyan marha mîn roowo pono komo ahnoro marha.
27 Ero ke,
On hare he,
ketaw Xesus pona enîn̂e pîn komo awya so yîhyaka tîtopore rma nasî eseresmaxi awto xe awexitaw so.
Iito awexitaw so tak yîn̂etakathîrî komo tonocoko rma wooto,
Kicicitho pîn tan ha wooto?
kahra ro mak ehcoko.
28 On wara tko na nîîke iitono awya so,
Kica,
ciixaputho ya tîmxapunhîrî on wooto kica,
nîîke awya so.
Ero wa kan̂e exitaw noro yanme mak ero yipu yîmtocoko wooto.
Tonohra ehcoko noro yahwokamexpora ro mak awehtome so Kaan poko.
Kicicme wai ham on ton̂etaw,
karî pona marha tonohra ehcoko.
29 Kir̂wan̂he rma na mîhtînoyatu amyamro.
Anarî yanme makî tko tonohra ehcoko kicicme yîwya yîhtînorî ke.
On wara tko na mîîketu anarimaw,
Moso yahwokamexporî pona mak oyotî tonohra wai kica.
Ahce kacho oyanme ro mak men̂ekara wai oyotî?
mîîketu na.
30 On wara marha na mîîketu,
Kir̂wan tan anmîthîrî Apa,
amna yotî,
wîîkesî Kaan ya yîn̂etakathîrî komo poko rma.
Ahce kacho owîrîyake moso,
Kaan nîmîtho tan okre,
kacho tonorî poyero mak owya okwe?,
mîîketu marha na.
31 On wara xa keyukyaxe so ero wa kan̂enho,
Ahce poko na awexitaw so kir̂wanî ro me xa Kaan yehtopo yenpon̂e me ehcoko.
Ero wa xa ehcoko awotî komo ton̂etaw,
awokru komo yeer̂ataw marha,
ahce na poko awexitaw so kirwanî ro me Kaan yehtopo yenpon̂e me ehcoko.
32 Kaan poko ahwokamexpono cirihra ro mak men ehcoko.
Xutew komo,
Xenciu komo marha,
Kaan xîkrî komo marha,
ero warai komo ahwokamexpora ro mak ehcoko Kaan poko.
33 Ero wara rma was ow.
Ahce poko na oyexitaw kir̂wan̂he mak kesenpesî tooto komo n̂enîrî mexan me oyehtome.
Oyesewakretopo ponarora ro mak wasî.
Mer̂pono pîn komo yahworetopo ponaro mak wasî Xesus nakir̂wamarî me ehtome so.
Ero wa wasî.