Wooxam Yîhtîpîrî Me Nasî Kîîrî
11
Ero ke owarai me rma ehcoko.
Ow wasî Kristu warai me hara.
Ero warai mak ow ha.
2 Kir̂wan̂he rma wences awehtopo komo.
Oponaro rma tî mat okre.
Kaan ya apanatanmetopo komo marha tî mewehcat okre on̂ekatîmtho rma.
Etîmton me ro makî tî mewehcatu.
Ero wa tî mat okre.
3 Taa,
anarî poko wîîkes hara awya so,
Kristu nasî kîîrî tîpîrî me.
Kîîrî nasî wooxam tîpîrî me hara.
Kaan xa nasî Kristu tîpîrî me hara.
Ero wa taxe.
4 Ero ke Kaan yakro yîmtapowataw kîîrî yîhtîwomra cexpore nasî.
Tîhtîwomke tîmtapowataw tîhtîpîrî me cehsom ponarono pîn wara n̂esenpesî okwe.
Ero warai me marha n̂esenpesî okwe tîhtîwomke ekatîmyataw hara Kaanî mtapotarî.
Ero wa nasî kîîrî reha.
5 Ero warahra reha nasî wooxam.
Kaan yakro yîmtapowataw wooxam tîhtîwomke cexpore nasî.
Ero wa xa marha cexpore nasî Kaanî mtapotarî yekatîmyataw hara.
Yîhtîwomra tîmtapowataw tîhtîpîrî me cehsom ponarono pîn wa n̂esenpesî okwe.
Ero wa marha n̂esenpesî yîhtîmwomra ekatîmyataw hara.
Yîhtîwomra exitaw kanahmure yawno wara rma nasî kica.
Ero wa nasî wooxam.
6 Ero ke yîhtîwomra tîmtapota xe cexitaw wooxam kanahmure yaw mak n̂expe.
Cenporera exitaw kanahmure yawno tîhtîwomke rma cexpore nasî.
Ero wa cexpore nasî wooxam Kaan yakro tîmtapowataw,
Kaanî mtapotarî yekatîmyataw marha.
7 Kîîrî reha yîhtîwomra tîmtapotapore nasî Kaan yakro Kaan warai me xa exirî ke,
kir̂wanî ro me Kaan yehtopo yenpon̂e me exirî ke marha.
Kir̂wan me kîîrî yenpon̂e me reha nasî wooxam hara.
Ero wa taxe.
8 Pahxa tooto yakîhcetaw yihcirî me kîîrî nakîhcekn̂e Kaan.
Wooxam pun poyinonho yakîhtora xakn̂e kîîrî ha.
Pîra,
kîîrî pun poyinonho xa matko nakîhcekn̂e wooxam.
9 On warai me marha kakîhcetken̂e so,
wooxam yakronoman̂e me akîhtora tî xakn̂e Kaan kîîrî.
Pîra,
kîîrî yakronoman̂e me xa matko tî wooxam nakîhcekn̂e.
Ero warai me kakîhcetken̂e so.
10 Ero ke tîhtîwomke mak nîmtapotacowpe wooxam komo Kaan yakro.
Oyopono yewetîn̂e ow ha,
kacho rma mîn yîhtîwom.
Ancu komo n̂enîrî me rma ero wa cexpore nasî.
11 Etponarono me rma tko taxe Kporin komo yakrono me kexirî ke so.
Wooxam ken̂ehra ro mak exihra thakwa nasî kîîrî.
Kîîrî ken̂ehra exihra thakwa nasî wooxam hara.
12 Kîîrî pun poyinonho me rma re Kaan nakîhcekn̂e wooxam pahxa.
Wooxam ropotai rma tko n̂ewruyasî kîîrî hara.
Kaan mak xa yo kakîhton̂enhîrî komo ahnoro.
13 Amyamro rma ero wa kacho poko esehtînocoko.
Ahce wa kyam meen̂atu wooxam yîhtîwomra yîmtapowataw Kaan yakro?
Cenpore katî meen̂atu?
Pîra tko na,
cenporera na meen̂atu.
14 Kîîrî hara,
ahce wa meen̂atu kîîrî kaw exitaw yîhpoci?
Cenporera marha meen̂axe.
Ero wa xa meen̂axe.
15 Ero warahra reha ceen̂axe wooxam.
Kaw exitaw wooxam poci cenpore ceen̂axe okre.
Yîhtîpîrî wom me rma Kaan nakîhcekn̂e yîhpoci.
Ero wa xa nasî.
16 Ero wa mak wîîkes awya so ero poko.
Ahce wa na mencet ha?
Anarî me kan̂e me exitaw iitono yîmtaka tak weyukyasî on wara,
Ero wa mak nas amna.
Ero wa marha naxe Kaan xîkrî komo miyan komo rma,
wîîkesî.
Ero wa wîîkesî oyanwekn̂e komo ya.
Apoyino Komo Ponarora Ro Mak Meseresmexe Okwe
17 On wara wîîkes hara awya so oyakno komo,
anarî poko tan kîmtapowas hara.
Kir̂wan̂he maxe okre,
kacho pîn tan wekatîmyas awya so.
On wara tî matu,
akpîra makî tî mesenmekyatu.
Kaan poko awetakîretome so cma re cesenmekpore nasî.
Ero wara tî esenmekîra maxe okwe.
18 Ero ke on wara yihcirî me wîîkes awya so,
Kaan xîkrî komo re awesenmekyataw so awakno komo yanwekn̂e me mak tî mesenmekyatu okwe.
Cewyaro tî n̂esenmekyatu anarî komo,
cewyaro xa marha n̂esenmekyatu anarî komo hara,
anarme kan̂e kom hara.
Ero wa wencesî awehtopo komo.
Yaarono wara wencesî.
19 Naxe rma thakwa okwe anarme so yîhtînon̂e komo achew so,
ceseseyusom kom ha.
Noro yipu komo naxe achew so takîhsom komo yesenpotome.
Ero ke ero wa mat ham.
20 Kicicme marha wencesî Kaan mîn yaw aweseresmacho komo.
Anarî me tî meseresmetu Kaan mîn yaw okwe.
Xesus waihtoponho kukmacho mera tî meseresmetu.
21 Anarî komo tî mîyoponketu kica ero wa aweseresmetaw so.
Anahrî ro komo mak manîmyatu yohno ro mak.
Iito rma tko tî natu yînapuci men komo.
Nîromanaxe mak n̂examro okwe.
Iito marha naxe wokpen̂an kom hara.
N̂examro tî wenatu kica.
Ero wa tî matu kica.
22 Ero wa awehtopo komo poko keserepokesî ro mak.
Amînî ro komo exihra katî nai aweseresmacho ro komo,
awokru komo yeetopo hara?
Nasî rma wa.
Ero pîntho wa kyam mak katî meen̂atu Kaan mîn?
Emyarîn komo mîhyapamnoyaxe kica.
Ahce wa xa katî wîîke awya so ero wa awehtopo komo poko?
Kir̂wan̂he mat ham okre,
wîîke katî?
Pîra ro mak.
Ero wa kahra ro mak was awya so.
Xesus Waihtoponho Me Keseresmacho Pokono
23 On wara marha wîîkesî awya so,
pahxa wekatîmyakn̂e awya so Xesus waihtoponho kukmacho pokono.
Ero xa marha tan wekatîmyas hara awya so.
On wara tî xakn̂e Xesus twaihtopo pahnoke exitaw,
Noro pen tî n̂ekanîyakn̂e okwe yiixatî pîn kayaritomo komo ya.
Ero kaamo po rma tî on wara xakn̂e Xesus kosope,
cuure tî nanîmyakn̂e.
24 Cemyaka anmîche tî Kaan yakro nîmtapowakn̂e.
Kir̂wan̂he xa amna n̂een̂as on anmîthîrî Apa,
kekn̂e tî.
Ero wa kache takî tî poikekn̂e,
n̂ekamyakn̂e marha tî.
Ehe,
kekn̂e tî,
opuntho tan ha awanme so tîmxapu.
Ero ke oponaro xa tohcoko ha,
kekn̂e tî.
25 Ero yinhîrî cuure tokuche yîwya so takî tî wooku nanîmyakn̂e hara.
On hara awokru komo,
kekn̂e tî yîwya so.
Okamxukutho tan hara.
Kir̂wan̂he xa tak awiir̂axe so Kaan amn̂e,
awehtoponhîrî komo yaw rorono mera tak awehtome so,
kacho rma tan ha.
Ero ke on warai yeer̂ataw roro awya amn̂e so oponaro xa eecoko,
kekn̂e marha tî.
Ero wa tî kekn̂e Xesus.
26 Ero ke on wara roro maxe,
cuure mokyaxe,
wok meer̂axe marha,
ero wa meseresmexe roro.
Ero wa aweseresmetaw roro so Kporin komo waihtoponho yenpon̂e me roro maxe.
Miya roro ero wa maxe Kporin komo mohtopo pona roro ha.
27 Ero ke ero pîntho wa kyam mak Xesusu waihtoponho yukukmara ro mak men ehcoko.
Ero wa yukukmetaw awya so,
Kporin komo pun yamowon̂e wara rma maxe xa hara okwe.
Noro kamxukutho yen̂epen̂e wa marha maxe okwe.
Ero wa men maxe okwe wara kyam mak aweseresmetaw so Xesus waihtoponho yukukmacho me ha.
28 On wara xa ka kapore nasî Xesus waihtoponho yukukmacho me aweseresmetaw so,
Kir̂wan̂he na wai Kaan ya?
Kicicme katî wai yîwya?
kapore nasî.
Kir̂wan̂he awehtopo komo yîhtînopuche mak tak awya so cuure tohcoko,
wok marha eecoko.
Ero wa ehcoko.
29 Anarimaw cuure na mokyatu ero pîntho wara mak,
wooku marha na meer̂atu ero pîntho wara okwe.
Ero wara Xesus waihtoponho yukukmetaw ero pîntho wara mak meen̂at ham okwe Kporin komo pun.
Kicicme xa nasî ero wa awehtoponhîrî komo.
Ero ke awanmero so rma Kaanî npanarerî me so maxe.
30 Ero wa aweseresmarî komo poyero tamotosom me tak naxe awakno komo yaake.
Nîwînîkyaxe marha thakwa okwe anarî komo yaake marha.
Ero wa naxe okwe.
31 Ero ke cesen̂ekapore nasî kîwyamu rma.
Ero wa kesen̂eketaw so ken̂ekara tak nasî Kaan.
32 Ken̂eketaw so rma tko Kporin komo ya kpanarexe so tak okwe.
Ero wara kpanarexe so kîwîrîmara ro mak cehtome tak amn̂e roowo pono ro komo yîwîrîmetaw.
33 Ero ke ero wa mak wîîkesî awya so oyakno komo ero poko.
Kaan mîn yaw aweseresmetaw so awakno komo yoponkara ro mak tak ehcoko.
34 Aromanataw so amîn komo yaw rma so eseresmacoko.
Wara kyam mak Xesus waihtoponho yukukmetaw awya so apanarexe so men Kaan okwe.
Ero wa mak wîîkes awya so ero poko.
Anarî poko tak kpanatanmekyaxe so hara amn̂e iina omokuche.
Ero wa makî ka wîîkes awya so.