Anarmerpan Pokono Me Kiir̂axe So Kaan Yekatî
12
Taa,
on wara wîîkes hara awya so oyakno komo,
anarmerpan pokono ro me kiir̂axe so Kaan Yekatî.
Camkî awexi xera so wasî ero wa kiitopo komo poko.
2 On wara tko mîxatken̂e pahxa ha ka,
Xenciu me makî ka mîxatken̂e.
Ero yimaw awan̂e komo wara xatken̂e apoyino komo ciixaputho komo poko awehtome so kica.
Yîmtapotanî ro thakwa mîn enporixaputho.
Ero yipu komo ponarono me mîxatken̂e kica.
3 Ero ke on wara wîîkes awya so,
Kaan Yekatî yanme kîmtapowataw so,
Kicicitho Mîk Xesus kica,
kahra ro mak taxe.
Taa,
Kaan Yekatî yanmera kîmtapowataw so hara,
Oporin Mîk Xesus,
kahra marha taxe okwe.
Kaan Yekatî yanme mak ero wa tîtkexe.
4 Taa,
anarmerpa so ahworeno rin̂e me kiir̂axe so Kaan.
Cewn̂e makî tko nas ero wa kiin̂e,
Kaan Yekatî mak ha.
5 Anarmerpa so akronomano rin̂e me taxe.
Cewn̂e makî tko nasî ero wa kiin̂e,
Kporin komo mak ha.
6 Anarmerpan poko marha kantomaxe so Kaan.
Cewn̂e makî tko nasî Kaan ahce warai poko na kantoman̂e.
7 Kaan Yekatî rma Mîk anarmerpan pokono me kiin̂e.
Kakno komo yakîhretîkachome n̂he ero wa kiir̂axe so.
8 On warai pokono me kiir̂axe so Kaan Yekatî,
anarî komo n̂iir̂asî kakîhretopo komo yekatîmn̂e me.
Anarî komo n̂iir̂as hara ahce na poko kîhcamhokan̂e me hara.
Noro makî tko ero wa kiin̂e me nasî,
Kaan Yekatî mak ha.
9 Anarî komo n̂iir̂asî Kaan pona enîn̂e ro me hara.
Noro rma Mîkî ero wa ciino n̂iir̂asî,
Kaan Yekat ha.
Anarî komo n̂iir̂asî tamotosom komo karihton̂e me hara.
Kaan Yekatî marha ero warai me ciino n̂iir̂asî.
10 Anarî komo n̂iir̂asî cirihnî ciin̂e me hara.
Anarî komo n̂iir̂asî Kaanî mtapotarî yekatîmn̂e me hara.
Anarî komo n̂iir̂asî ekatî komo yîhtînon̂e me hara.
Anarî komo n̂iir̂as hara anarî ro mtapotarî yaro tîmtapotaxmu me hara.
Anarî komo n̂iir̂asî ero wa tîmtapotaxmu komo mtapotarî yentamexpon̂e me hara.
11 Ero wa so kiir̂axe so Noro mak cewn̂e,
Kaan Yekatî mak.
Tanme ro mak Noro nîhtînoyasî poko kehtopo ro komo.
Kupun Wara Rma Naxe Kaan Xîkrî Komo
12 On wara naxe Kaan xîkrî komo,
kupun komo wara rma naxe.
Cewn̂e mak nasî kupun komo.
Yaake rma tko nasî kupun pokono.
Nasî kewnarî,
kewru marha,
kîmtarî marha,
kamorî marha.
Miya rma nasî kupun pokono mko.
Ero wa xa marha naxe Kaan xîkrî kom hara,
mer̂pono pîn me rma.
Cewn̂an me rma tko taxe.
Ero wa xa marha nasî Kristu.
13 Anarmerpa so marha wa taxe Kaan xîkrî komo.
Naxe Xutew komo,
Kreku komo marha.
Naxe tooto yanton me cehsom komo.
Naxe marha tanme ro so cehsom kom hara.
Ero wa taxe Kaan xîkrî komo.
Cewn̂an me rma tko taxe anarmerpa so cehsom komo rma ha re.
Tuuna warai me nasî Kaan Yekatî.
Noro kwaka cemihcatken̂e ahnoro.
Ero ke cewn̂an me tak taxe.
Kropotaka so marha mokyakn̂e Kaan Yekatî.
Tuuna ceerasî ero wara rma mokyakn̂e Kaan Yekatî kropotaka so.
14 Etîme re mak exihra nasî kupun me cehsomu mko.
Kamorî me re mak exihra nasî kupun ha.
Kewru me re mak exihra marha nasî.
Pîra ro mak,
anarmerpa so nasî kupun me cehsomu mko.
15 Ahce wa kyam kîhtarî ceyukyatu on wara ketaw,
Awamorî pîn me thakwa was okwe.
Ero ke apun pîn me thakwa was okwe,
ketaw ahce wara ceyukya?
Opunu rma thakwa amoro,
tîtkesî kîhtarî ya.
16 Ero wa xa marha kpanarî ceyukyas hara.
Awewru pîn me thakwa was okwe.
Ero ke apun pîn me thakwa was okwe,
ketaw ero wa xa marha ceyukyas hara,
Opunu rma thakwa amoro,
tîtkesî kpanarî ya hara.
17 Kewru me re mak exitaw ketaw ha re kupun ahce ke thakwa re cencet hara okwe.
Kpanarî me re mak exitaw kupun ahce ke thakwa re cesunukyat hara okwe?
18 Ero wara re xa tko cirihra xakn̂e Kaan kupun kom ha.
Anarmerpa xa n̂iir̂akn̂e.
Tanme ro mak nîhtînoyakn̂e ero wa kupun komo ciitopo.
19 Ero re me mak exitaw ketaw ha re kupun pokono,
kupun mera thakwa nas okwe.
20 Yaake nasî kupun pokono mko.
Cewn̂e makî tko nasî kupun ha.
21 Ahce wa kyam nîîke kewru kamorî ya,
Oyakronoman̂e pîn mak amoro,
nîîke katî?
Pîra,
ero wa kahra ro mak nas kewru kamorî ya.
Ero wa kahra marha nasî kîhtîpîrî kîhtarî ya hara.
Oyakronoman̂e pîn amoro,
kahra ro mak nasî yîwya.
22 On wara marha nasî kupun me cehsomu mko,
anarî nasî kar̂pen ciki.
Ero yipu xe rma thakwa tas okwe esemer̂wera kehtome so.
23 Anarî reha nasî kîhyapamtopo me hara.
Ero yipu tahruyasî poono ke.
Ero ke cenpore tak nasî kupun kîhyapamtopo mera.
24 Anarî reha nasî cenporem me hara,
kîhpoci komo,
keepatarî kom ha.
Ero yipu ahrura ro makî reha tasî.
Ero wa Kaan n̂iir̂akn̂e kupun me cehsomu mko.
Cenporem me n̂iir̂akn̂e ero pîntho warai rma.
25 Ero wa n̂iir̂akn̂e kupun etwîrîyakan me ehtome,
etponarono wara xa matko ehtome so ahnoro.
26 On wara marha nasî kupun komo,
kîhtîpîrî yerewataw ahnoro rma kupun nasî kar̂pera ero yanme mak.
Ero wa xa marha nasî kwethîrî yerewataw hara,
ahnoro rma nasî kar̂pera kupun ero yanme hara.
Taa,
takîhso exitaw kamorî tawake tak nasî kupun ahnoro kamorî yanme rma.
Kar̂pe xa exitaw kîhtarî tawake tak nasî kupun ahnoro kîhtarî yanme hara.
Ero wa nasî kupun kom ha.
27 Taa,
ero warai xa marha amyamro kupun komo warai.
Kristu punu rma amyamro hara.
Noro yamorî warai anarî,
yîhtarî warai anarî hara,
ewru warai anarî hara,
miyan warai rma amyamro Kristu pun pokono warai ha.
28 Enko xe,
anarmerpan pokono me tîmxîkrî komo n̂iir̂akn̂e Kaan.
Poturme ka Xesus nantomatho me amna n̂iir̂akn̂e.
Amna mahyaka tak anarî komo n̂iir̂akn̂e weronomano rin̂e me hara.
N̂examro mahyaka tak anarî komo n̂iir̂akn̂e yîhcamhokano rin̂e me hara.
N̂examro mahyaka Kaan n̂iir̂akn̂e anarî komo cirihnî ciin̂e me hara.
Anarî komo n̂iir̂akn̂e tamotosom karihton̂e me hara.
Anarî komo n̂iir̂akn̂e akronomano rin̂e me hara.
Anarî komo n̂iir̂akn̂e antomano rin̂e me hara.
Anarî komo n̂iir̂akn̂e anarî ro mtapotarî yaro tîmtapotaxmu me hara.
Ero wa tîmxîkrî komo n̂iir̂akn̂e Kaan anarmerpan pokono me.
29 Ahnoro rma katî tatu mîk hakî cheka cen̂epesom me?
Ahnoro rma katî tatu kweronoman̂e me hara?
Ahnoro rma katî tatu yîhcamhokano rin̂e me hara?
Ahnoro rma katî tatu cirihnî ciin̂e me hara?
30 Ahnoro rma katî tatu tamotosom komo karihton̂e me hara?
Ahnoro rma katî tatu anarî yaana mtapotarî yaro tîmtapotaxmu me hara?
Ahnoro rma katî tatu ero wa tîmtapotaxmu mtapotarî yentamexpon̂e me hara?
Pîra ro mak.
31 Anarmerpa so nasî poko kehtopo komo Kaan xîkrî komo yakîhretopo.
Ahce warai xa nai miya xe n̂he akîhretopo komo me?
Ero yipu xa yîhtînocoko poko awehtopo komo me.
Ero poko oyexi xe xa wasî cerewre ro mak,
kacoko.
Wara rma anarî tak wekatîmyas awya so,
kir̂wan̂he xa kehtopo kom hara.