On wara wîîkes hara awya so,

etîxatî pîn me oyexitaw kir̂wan̂he exihra ro mak was okwe.

Anarî komo mtapotarî yaro tîmtapotaxmu me na wai,

ancu mtapotarî yaro tîmtapotaxmu me meero ha na.

Kir̂wan̂he exihra rma tko wasî etîxatî pîn me oyexitaw.

Tohnaw kyam mak kîmtapowasî yîmtapotarî komo yaro.

Tîyorîrem wa kyam mak kîmtapowasî maraka wara kyam mak okwe.

2 On wara tko na wai anarimaw,

weronomano rin̂e me xa na wai.

Entanînhîrî yentan̂e me marha na wai.

Mîn hak poko cehcamhokatîkaxi marha na wai.

Kaan pona enîn̂e ro me na wai anarimaw îh pen yen̂epetome tak owya.

Ero warai rma etîxatî pîn me oyexitaw noro pîntho me mak was okwe.

3 Oyemyawnonho meero na wîmtîke puranta pona yupurantamnî nahrî yepetho me tak.

Yînahrî komo yahsîche wekamya na rooma pokono komo ya.

Opuntho meero na wakn̂ipe Xesus xatî pîn komo ya.

Ero yipu yepetho tîmîhra rma nasî Kaan owya etîxatî pîn me rma oyexitaw kica.

Ero wa taxe etîxatî pîn me kexitaw so ha.

4 On wara xa taxe etîxatî me kexitaw so,

kemetanmekn̂e komo poko yîrwomra taxe pahkî.

Tîtwakrexe xa matko.

Anarî komo xatî pîn me exihra taxe kyopono me exirî ke so.

Ehcoyoponkan me marha taxe.

Kropotaw so meero ehcoyoponkara taxe.

Ero wa exihra taxe etîxatî me kexitaw so ha.

5-7 On wara marha taxe etîxatî me kexitaw so,

yîwîrîyakano rin̂e wara exihra ro mak taxe.

Owyanî ro mak tan okwe,

kan̂e pîn me marha taxe kemyawno komo poko rma.

Apehceme yîrwomra marha taxe.

Kemetanmetoponhîrî komo tîhcamnoyaxe marha.

Tawake exihra taxe kicicme tooto komo yehtoponho yentache.

Kir̂wan̂he ehtoponhîrî komo yentache tawake taxe.

Anarî komo ya keiyataw so tîtîtmamyaxe kyam mak.

Kir̂wan̂he tko na nai noro amn̂e,

tîtkexe marha kicicme ehxapu komo poko.

Yîropotarî na nakname Kaan amn̂e tîtkexe marha.

Kesemetanmetopo komo yînîmn̂e me marha taxe.

Ero wa taxe etîxatî me kexitaw so ha.

8 On wara marha taxe etîxatî me kexitaw so,

miya roro taxe etîxatî me,

etîxatîmnokan me mak ha.

Amn̂e ero wa maxe,

kan̂e komo reha nîtîtmamyaxe.

Pahxaro kehtopo komo yekatîmra tak naxe.

Anarî ro komo mtapotarî yaro tîmtapotaxmu komo marha tak nîtîtmamyaxe.

Entanînhîrî tak esentara marha tak nasî.

Ero wara kehtoponhîrî komo reha tak n̂ehcamnoyas amn̂e.

9 On warai Mîkî Kaan,

kacho rma re cencexe,

Entatîkara ro makî tko ka taxe.

Kaanî mtapotarî yekatîmtîkara marha ka taxe.

Ero wa ka taxe.

10 Kaanî mtapotarî yentatîkache tak amn̂e kîwya so etpoyino yentacho tak tahsîpînkexe.

11 On wara ka wîxakn̂e pahxa rikomo me oyexitaw ha ka,

rikomo wa kyam mak kîmtapowakn̂e.

Camkî marha wencekn̂e poritomo komo mtapotarî.

Rikomo wa marha ka kesehtînoyakn̂e.

Opor̂mamtîkache tak rikomo warahra tak wîxakn̂e.

Rikomo wara oyehtoponho tak wahsîpînkekn̂e.

12 Ero wa xa marha taxe Kaan poko hara.

Kanapa yakan wara makî ka ceen̂axe.

Pahxaro tak Noro yeepatarî xa tak ceen̂axe okre.

On wara nasî Kaan,

kacho rma re wencesî,

entatîkara rma tko.

Pahxaro tak wencetîkes okre.

Kîhtînoyaxe so Kaan ero wa xa marha tak Noro wîhtînoyas ow hara ero yimaw.

Ero wa was amn̂e.

13 On wara kehtopo komo nasî ehcamnopîn me ro mak,

Kaan pona enîn̂e me kehtopo komo,

Kir̂wan̂he xa oriyasî Kaan amn̂e,

kacho,

etîxatî me kehtopo komo marha,

miya rorono me nasî ero wa kehtopo komo yîtîhkan me.

Kirwan̂he rma re taxe Kaan pona eenataw kîwya so.

Kir̂wan̂he marha taxe ha re,

Kir̂wan̂he xa oriyasî Kaan amn̂e,

kan̂e me kexitaw so.

Etîxatî me kexitaw so reha kir̂wan̂he xa tak taxe okre.

Ero wa taxe okre.