Centaxmu Me Cekatîmpore Nasî Kaanî Mtapotarî
14
Ero ke on wara wîîkes awya so,
etîxatî me awexi xe xa ehcoko.
Ahce na pokono ro me Kaan Yekatî ori xe wasî,
kacoko marha Kaan ya.
On warai me xa oyexi xe wasî,
amtapotarî yekatîmn̂e me xa oyexi xe wasî,
kacoko marha yîwya.
Ero warai me awexi xe xa ehcoko.
2 Anarî ro komo mtapotarî yaro amtapowataw so tooto yakro yîmtapotara thakwa maxe.
Awentara thakwa naxe tooto komo.
Kaan yakro mak mîmtapowaxe.
Noro Yekatî yanme rma re mîmtapowatu tooto n̂entatorî me mak.
Ero wa maxe anarî komo mtapotarî yaro amtapowataw so.
3 Centaxmu me ekatîmyataw reha awya so akîhreno tak miir̂axe,
panatanmekno marha miir̂axe,
ahworeno marha miir̂axe.
Ero wa ciino miir̂axe centaxmu me ekatîmyataw awya so.
4 Anarî ro komo mtapotarî yaro amtapowataw so reha amyamro rma kyam mak metakîrexe.
Centaxmu me reha Kaanî mtapotarî yekatîmyataw awya so Kaan xîkrî komo tak makîhrexe okre.
5 Anarî ro komo mtapotarî yaro amtapota xe so rma re wasî.
Centaxmu me Kaanî mtapotarî yekatîmn̂e me awexi xe so xa tko was okre.
Kir̂wan̂he xa tak nasî Kaanî mtapotarî yekatîmtopo kîwya so,
centaxmu me ekatîmtopo ha.
Pîra n̂he nas okwe anarî ro komo mtapotarî yaro kîmtapotacho.
Kir̂wan̂he rma re nas anarî ro komo mtpotarî yaro amtapowataw so,
mahyaka rma entamexpetaw mak ha tko awya so.
Kaan xîkrî komo panatanmekî xe mak taxe.
Ero ke Kaanî mtapotarî cekatîmpore nas awentan̂e komo mtapotarî yaro rma.
6 Ahyaka so omokyataw Kaan Karitan yekatîmso,
ahce wa thakwa re kpanatanmekyatu so entan me mak omtapowataw awakro so oyakno komo?
On warai xa wekatîmyas awya so,
Kaanî mtapotarî xa wekatîmyasî.
Anarimaw Kaanî mtapotarî pokono wekatîmyas hara.
Anarimaw pahxarono wekatîmyas hara.
Anarimaw yîhcamhokano wiir̂as hara.
Ero wa so owya ekatîmyataw awya so kakîhrexe so tak okre.
7 Ero wa xa marha nasî raat hara.
Karitî pîn mak mîn raatî.
Kuripara mak mîn,
weewe mak anarimaw.
On wara nasî raatî mko,
Cecesom me nas anarî,
tîyorkaxmu me nas anarî hara.
Ero yipu komo cencesî raatî kom ha.
Ariknopîn me ro kyam mak waano yaar̂ataw raatî yaka tohnaw thakwa cencesî waano.
Ahce warai kyam na mîn naar̂a waano?
tîtkesî mak.
Yîhtînopîra ro mak tas okwe.
8 Ero wa xa marha nasî tuu kacho hara cetar̂maxmu komo yan̂ikn̂e.
Wara kyam mak eceyataw raatî,
mokuhra thakwa naxe okwe cetar̂maxmu komo.
9 Ero wa xa marha maxe amyamro hara,
apehceme centaxmu yekatîmra awexitaw so ahce wa thakwa re awencetu so?
Pîra ro mak okwe.
Tohnaw ro kyam mak mekatîmyaxe okwe.
10 On wara nasî tooto komo mtapotarî roowo poko hakno komo mtapotarî,
anarmerpa nasî yîmtapotarî komo.
Tîmtapotarî ro yarono tko n̂encexe tooto komo,
roowo poko hakno kom ha.
11 Ero ke camkî oyexitaw anarî komo mtapotarî poko anarî yana wara mak oyen̂asî ero wa tîmtpotaxmu.
Anarî yana wara marha noro ween̂asî ow hara.
12 Ero wa xa marha maxe amyamro hara.
Taa,
ahce na pokono me awexi xe so mat ham.
Anarmerpan pokono me amna cirko Apa Awekatî ke,
kan̂e me kîhtînoyaxe so.
Ero ke on wara xa kacoko Kaan ya,
amxîkrî komo yakîhren̂e me xa ow cirko Apa,
kacoko xa Kaan ya.
13 Anarî ro komo mtapotarî yaro tîmtapotaxmu me rma awexitaw so on wara kacoko Kaan ya,
Apa kah yawno,
tantono komo mtapotarî yaro ekatîmn̂e me cma re ow miir̂asî,
kacoko Kaan ya.
14 Ahce wa kyam wai Kaan yakro omtapowataw hara anarî komo mtapotarî yaro?
Oyekatî ke rma re kîmtapowasî oyesehtînotopo tko nasî camkî mak okwe.
15 Ero ke ahce wa cexpore nai?
On wara was ow,
oyekatî ke rma omtapota xe wasî Kaan yakro.
Oyesehtînotopo ke marha omtapota xe wasî.
Ero wa xa marha oyexi xe wasî waano yaar̂ataw hara.
Tahwore arî xe wasî.
Oyesehtînotopo ke marha arî xe wasî.
Ero wa oyexi xe wasî.
16 Ero ke Kaan yakro na mîmtapowatu anarî ro komo mtapotarî yaro.
Kir̂wan̂he xa mai ham Apa,
mîîketu na.
Iito marha na nai Kaan Karitan poko ehcamhokan.
Ahce wa thakwa re amtapotarî komo n̂eyukya noro hara?
Yaaro,
kir̂wan̂he xa mai ham Apa,
wîîkesî moxam yakro,
kahra nai camkî cexirî ke amtapotarî komo poko.
17 Yaaro rma re mîmtapowaxe kir̂wan̂he Kaan yehtopo poko.
N̂examro yakîhrera tko maxe okwe entan me karî ke awya so.
18 Ow xa tko kîmtapowasî anarî komo mtapotarî yaro.
Pîra n̂he re maxe amyamro.
Ero ke Kaan ya on wara wîîkesî,
ponaro oyehtopo ro ya,
Tawake wasî Apa ero wa orirî ke awya,
wîîkesî.
19 Wara rma ero wa omtapota xera n̂he wasî Kaan mîn yaw.
On wara xa omtapota xe wasî Kaan mîn yaw,
kawra ciki mak ekatîm xe wasî centaxmu me,
5 cik mak na nai omtapotacho anarimaw.
Ero yipu ke rma esenmexapu komo wakîhres okre.
Anarî ro mtapotarî yaro ekatîmyataw,
10.000 na nai anarimaw hara,
omtapotacho rma.
Poxumra rma wîhtînoyasî ero wa ekatîmtopo owya.
Centaxmu me xa ekatîm xe xa wasî.
Ero wa wasî Kaan mîn yaw ekatîmtopo poko.
20 Rikomo warahra ro mak ehcoko oyakno komo yuhnari yîhtînotopo poko.
Rikomo warai me rma tko cexpore nasî emetanmekno ritopo poko.
Takîhso reha ehcoko yuhnari yîhtînotopo poko.
21 Taa,
anarî ro komo mtapotarî yaro kîmtapotacho poko rma nîmtapowasî Kaan Karitan.
On wara kesî,
Meyeno komo tak men wekyasî amn̂e moxam panatanmekn̂e.
Anarî ro komo mtapotarî yaro mak n̂ekatîmyaxe omtapotarî moxam ya.
Ero yipu ponarora rma naxe okwe moxam,
kesî Kporin komo,
kesî Kaan Karitan.
22 Ero ke on wara mak nas anarî ro mtapotarî yaro kîmtapotacho,
Kaan yewetîn̂e komo n̂entarî me ekatîmnî mîn ha.
Kaan yewetîn̂e pîn komo n̂entarî mak mîn,
Kaan yanme n̂ekatîmya ham,
kachome yîwya so.
Panatanmekno cir̂ihra cexpore nai Kaan yewetîn̂e pîn komo ya.
Kaan yewetîn̂e komo ya mak ero yipu cekatîmpore nasî.
23 Taa,
on wara na mat amn̂e,
ahnoro rma na matu cesenmeso iito re Kaan mîn yaw.
Ero yimaw na anarî ro mtapotarî yaro mîmtapowatu amyamro ahnoro rma.
Ero yimaw na mokyatu Kaan Karitan poko ehcamhokan komo,
Kaan yewetîn̂e pîn komo marha na mokyatu.
Kopi,
kexe tak men apoko so.
Ahce wa ketu moxam kopi?
Nîmtawaimamyaxe ro mak kopi,
kexe.
Ero wa men kexe apoko so.
24 Ero warahra tak kexe centaxmu me Kaanî mtapotarî yekatîmyataw awya so.
Kir̂wan̂he tak n̂encexe amtapotarî komo.
Kicicme cehtopo komo tak nîhtînoyaxe.
On wara kexe,
Kicicme oyehtopo n̂ekatîmyaxe moxam okwe,
ketu.
Ero wa kexe Kaan Karitan poko ehcamhokan komo tmokuche so Kaan mîn yaka.
Kaan yewetîn̂e pîn komo marha ero wa kexe.
25 Ero yimaw,
oropotawno rma mîn n̂ekatîmyaxe,
ekatîmnînhîrî rma,
kexe.
Ero ke tak n̂esewnapexe.
Kaan poko tak nahwowaxe.
Moxam chew Kaan nai ham okre,
kexe marha apoko so.
Ero wa kexe yîn̂entarî me so xa ekatîmyataw awya so.
Takîhso Men Ehcoko Kaan Mîn Yaw
26 Ero ke ahce wa matu amyamro oyakno komo awesenmekîche so?
On wara tî matu waano yarî xe tî mat ha anarî komo.
Yîhcamhokano ciri xe marha tî matu anarî kom hara.
Anarî ro mtapotarî yaro amtapota xe so marha tî matu anarî komo xa hara.
Ero yipu yentamexpo xe marha tî matu anarî komo xa hara.
Kaanî mtapotarî yekatîm xe marha tî matu anarî komo xa hara.
Ero wa tî matu awesenmekîche so.
Kir̂wan̂he rma maxe ero wa ketaw.
Takîhso mak kacoko awentan̂e komo yakîhrechome mak.
27 Ero ke anarî ro mtapotarî yaro amtapowataw so 2 mak amtapotacoko,
3 mak anarimaw.
Etpona re mak ekatîmcoko.
Anarî ciicoko ero wa amtapotarî komo yentamexpon̂e me,
centaxmu me tak ehtome.
28 Entamexpon̂e exihra exitaw anarî ro mtapotarî yaro ekatîmra ro mak ehcoko Kaan mîn yaw.
Aropotaw so mak ero wa kacoko,
Kaan yakro marha ero wa amtapotacoko hara.
29 Kaanî mtapotarî yekatîm xe exitaw so weronomano rin̂e komo,
2 mak kacowpe,
3 mak anarimaw.
Anarî komo tak ciicoko yîmtapotarî komo poko cesehtînosom me.
30 On wara marha na matu anarimaw weronomano rin̂e mtapotarî yencetaw rma awya so tîn̂ekatîmrî tak na nîhtînoya anarî hara.
Kaan yanme rma na nîhtînoya.
Ero wa exitaw n̂ekatîmpe tak noro mak hara.
Nîtîtmampe tak yihcirî me tîmtapotaxmunhîrî.
31 Kaanî mtapotarî ekatîmcoko yiixe awexitaw so ahnoro rma.
Cewn̂e so makî tko ekatîmcoko akîhreno ritopo,
ahworeno ritopo marha.
Ero wa xa ekatîmcoko.
32 Expora awexitaw so weronomano ri xe awexitaw so,
cexpore rma ka ehcoko,
erekamra n̂he ka.
Ekatîmtopo me exitaw mak wekatîmyasî,
kacoko mak.
33 Wara hak kamexpon̂e pînî ro mak Mîk Kaan kîwya so.
Takîhso tîmtapotaxmu me kiin̂e mak Mîk Kaan.
Ero wara rma nîhtînoyaxe Kaan xîkrî komo miyan komo rma.
34 Taa,
on wara cexpore nasî wooxam kom hara.
Kaan mîn yaw cexitaw so wooxam komo,
tîtken̂e mak cexpore nasî.
Ciin̂o yewetîn̂e me mak naxe n̂examro.
Ero ke yîmtapotara n̂ehcowpe Kaan mîn yaw.
Ero poko rma wa kesî Mosese pen nmewretho.
Aan̂o yewetîn̂e me ehcoko,
kesî wooxam komo ya.
35 Aaci komo,
ahce na poko entatîka xe awexitaw so aan̂o komo ya mak kapore nasî amîn komo yaw mak ha.
Poxumra nasî Kaan mîn yaw wooxam komo mtapotacho.
36 Ahce wa katî mesehtînoyat ha amyamro Korintu pono komo?
Amyamro xa katî mihciyatken̂e Kaanî mtapotarî yekatîmtopo awya so?
Pîra ro makî.
Amyamro makî katî mîxatken̂e Kaanî mtapotarî yentan̂e me.
Entara ma xatken̂e anarî komo awya so?
37 Weronomano rin̂e ow ha,
nîîke na iitono,
Kaan Yekatî npanatanmekîtho ow ha,
nîîke marha na.
Ero wa kan̂e exitaw iito on wara marha kape noro,
Kporin komo ya kpanatanmetopo komo xa tan Pawru nmewretho,
kape.
38 Ero wa kacho poko camkî exitaw apoyino,
ero wara rma n̂expe.
39 Taa,
ero wa mak wîîkes awya so oyakno komo ero poko.
Kaanî mtapotarî yekatîmn̂e me oyexi xe xa was okre,
kacoko Kaan ya.
Ero wa awehtopo komo ponaro xe cexpore nasî.
Anarî komo tko tîmtapota xe na natu anarî ro mtapotarî yaro.
Ero warai exitaw achew so kasko rma kyam,
kacoko mak yîwya,
anwekîra ro mak ehcoko.
Nîmtapotacowpe rma.
40 Ahce poko so na awexitaw so Kaan mîn yaw takîhso mak ehcoko ero poko.
Etpona re marha kacoko.
Ero wa ehcoko.