Taa,

kesekatîmyasî rma tan.

Iito rma ka wîxakn̂e pahkî Sirisia po ha ka.

14 cimn̂ipu wîxakn̂e iito.

Ero yinhîrî tak kîwcekn̂e xa hara Xerusaren pona xa hara.

Banabe yakro amna cekn̂e iina.

Citu marha waar̂akn̂e.

2 Kaan yanme rma wa kîwcekn̂e iina oyesekatîmtome iitono komo ya.

On wara wîîkekn̂e yîwya so,

On wara kacho yekatîmn̂e ow ha,

Xesus ya kakir̂wamacho wekatîmyasî Xenciu komo ya,

wîîkekn̂e.

Anarî komo ya makî ka kesekatîmyakn̂e,

enîno rin̂e warai komo ya mak.

Ahce wa na omtapotarî n̂encet ha?

wîîkekn̂e ha kapu.

Kaanî mtapotarî pîn wara na n̂encetu on̂ekatîmrî.

Ero wa ekatîmra ehcoko,

ketu na,

wîîkekn̂e.

Ero wa karî komo pona cewyaro ka kesekatîmyakn̂e yîwya so mak.

3 Kir̂wan̂he xa matko oyencetken̂e.

Citu meero kir̂wan̂he n̂een̂atken̂e ham.

Kreku rma mîk Citu.

Noro yipu poko rma kahra xatken̂e,

Tanpikapore men nasî awakrono Citu,

kahra xatken̂e.

4 Twerî wîxakn̂e kakno warai komo exirî ke iito.

Kakno warai komo rma re mîkyam xatken̂e.

En̂epa me mohxapu komo mak mîkyam kica.

On wara tî ketken̂e n̂examro,

On wara tî ketu Pawru komo,

Kristu Xesus pona mak encoko awakir̂wamachome so Noro ya,

ketu makî tî.

Ero ke entaxi kaika yîmtapotarî komo yanweso,

ketken̂e tî.

Kimin̂e komo wara xatken̂e okwe.

5 Ero wa kan̂e komo yewetîra ro mak xakn̂e amna.

Cewn̂e ora cik mak ewetîra amna xakn̂e.

Ewehcataw ketaw ha re amna ya yaarono yentara takî re mehcerî okwe,

Xesus ya kakir̂wamacho yentara.

Entan̂e me roro awexi xe so xakn̂e amna.

6 Taa,

ero wa oyencetken̂e Xerusaren pono komo,

enîno rin̂e warai komo.

Enîno rin̂e wara ehtopo komo ponarono pînî rma tko ow.

Kaan marha kir̂wan̂he kenîhra nasî kir̂wan̂he kesenpotopo yanme mak.

Ero wa xatken̂e enîno rin̂e warai komo.

On wara xa matko ekatîmko ha ke,

kahra xatken̂e owya.

7-9 On wara mak ketken̂e owya,

Petru reha Kaan n̂iir̂akn̂e ekatîmn̂e me Xutew komo ya.

Amoro reha awir̂akn̂e hara ekatîmn̂e me Xenciu komo ya haram,

ketken̂e owya.

Yaaro rma ketken̂e ero wara.

Xesus nahsîyatken̂e Xutew komo Petru mtapotarî yanme.

Ero wa xa marha Xenciu komo reha Xesus nahsîyatken̂e omtapotarî yanme hara.

Ero wa Xesus pona enîn̂e me ciino n̂iir̂akn̂e Kaan.

Ero ke oyamorî tak nahsîyatken̂e,

Banabe yamorî marha.

Ciaku,

Sepas,

Xuaw,

ero wa xatken̂e amna yamorî yahsîn̂e.

Enîno rin̂e warai komo mîkyam amna yamorî nahsîyatken̂e.

Taa,

amyamro mîîcet ham Xenciu komo yaka Xesus yekatîmso.

Amna reha cesî Xutew komo yaka Noro yekatîmso,

ketken̂e amna ya.

10 On wara mak ketken̂e owya opanatanmetopo wara,

Cesemetanmesom komo ponaro mak awexi xe so cma re nas amna,

wakretopo komo ponaro ha,

ketken̂e owya.

Noro yipu komo ponarono rma ow.

Wakre xe rma wîxakn̂e.

Ero wa mak amna n̂esencekn̂e Xerusaren pono komo yakro.

11 Taa,

ero yinhîrî tak Anciokia po wîxakn̂e hara.

Iito oyexitaw Petru tak mokyakn̂e iina.

Kicicme tko noro n̂esenpekn̂e okwe iina tmokuche.

Ero ke wîîkekn̂e yîwya ro xa,

Kir̂wan̂he esenpora mas okwe,

wîîkekn̂e.

12 On wara xakn̂e Petru,

yihcirî me ka tmokuche iina n̂eseresmekn̂e Xenciu komo yakro.

Amn̂e tak anarî komo mokyatken̂e hara Xerusaren pono komo.

Ciaku yanme mohxapu tî mîkyam xatken̂e.

N̂examro mokuche tak Petru n̂etowye hara okwe.

Xenciu komo yakro eseresmara tak xakn̂e.

Owîrîyaketu men kopi mohxapu komo Xenciu komo yakro oyeseresmarî yeen̂ataw,

kekn̂e Petru tîhnaw.

13 Yaarono mera ehtopo mîn xakn̂e ero wa ehtopo okwe.

Ahnoro Xutew komo tak ero wa xatken̂e noro yakro rma.

Eseresmara marha tak xatken̂e n̂examro hara Xenciu komo yakro.

Banabe meero ero wa xakn̂e okwe.

14 Ero wa ehtopo komo ween̂akn̂e.

Kristu ya kakir̂wamacho yaw rorohra ehtopo komo ween̂akn̂e.

Ero ke Petru ya tak wîîkekn̂e.

Iitono komo n̂entarî me rma wîîkekn̂e,

Oyakno Petru,

ahce kacho ero wa mai okwe?

Xutew me ewruxapu rma re amoro.

Xenciu wara rma takî tko mesenpoi kokon̂oro Xenciu komo yakro aweseresmarî ke.

Xutew ro pîn warahra reha mesenpoi.

Ero ke ahce kacho anarme n̂examro panatanmekn̂e wara tak mai hara?

Xutew komo wara mak ehcoko,

kan̂e wara mas okwe Xenciu komo ya,

wîîkekn̂e yîwya.

15-16 On wara marha wîîkekn̂e yîwya,

Xutew me ewruxapu thakwa kîwyam.

Xenciutho mîkyam kica kicicitho ha,

kacho pînî ro mak kîwyam.

On wara kacho ponaro taxe,

Xesus Kristu pona een̂ataw mak awya so kir̂wan me awen̂atu so Kaan.

Ero wa awenîra so nasî Moises pen nmewretho yewehcataw mak awya so,

kacho ponaro taxe.

Ero ke Xesus Kristu pona ceen̂atken̂e kir̂wan me kentome so.

Moises penî nmewretho yewetîtopo yanme kir̂wan me kenîhra ro mak nai Kaan ham,

tîtketken̂e.

Ero ke Noro pona ceen̂atken̂e,

wîîkekn̂e Petru ya.

17 Ero ke on wara tak wîîkes awya so,

Kristu pona enîrî ke mak kîwya so kirwan me keenatu so Kaan.

Wara rma ahce wa tatu kicicitho pokono me rma kexitaw so Kristu pona enîn̂e rma?

Kicicme kiin̂e Mîk ham Kristu,

tîtket ha ma re?

Pîra ro mak okwe.

18 On wara wîxakn̂e,

kicicme oyehtoponho kr̂a wahsîpînkekn̂e.

Ero ke ero wara exihra ro mak cexpore nasî,

wîîkekn̂e ahce wa so na kicicme kehtopo poko.

Wara rma,

Ero wara rma tko cexpore nasî,

ketaw na owya,

Kaan yanwekn̂e rma noro ham,

kacho me rma was hara okwe.

19 On warai ow,

waixapu mak ow ha.

Moises pen nmewretho yewetîra oyexirî poyero ka kwaihyakn̂e.

Ewetîtîkara wîxakn̂e okwe.

Ero ke waixapu wara rma tak wasî ero poko hara.

Ero wara wasî pakaxapu wara oyehtome hara Kaan ponarono me tak.

20 Kristu yakro rma kwaihyakn̂e tpanaxkem pona woxapu me.

Kar̂pe rma tko wasî.

Ow pîn ha tko tan wasî kar̂pe.

Kristu xa nasî kar̂pe oropotaw.

Ero ke opun yaw rma ka oyexitaw Kaan Mumuru pona enîn̂e me mak tak wasî okaritotome roro yîwya.

Ooxatî xa Mîk Kristu.

Oyanme etwaikaxapu rma Noro.

Ero ke Noro pona ween̂asî.

21 Kwakren̂e ro Mîkî Kaan okre.

Ero ke oyakîrwamekn̂e epethîmra ro mak.

Ero ke pohnî me ciri xera wasî yînmîthîrî owya.

Kir̂wan̂he kexitaw so ketaw ha re Moises pen nmewretho pona entopo yanme mak tohnaw waihîrî ha re okwe Kristu.

Ero wa nasî.