Kaan Yekatî Mokyasî Kropotaka So Xesus Pona Enîrî Ke Mak Kîwya So
3
On wara marha wîîkes awya so,
Karasia pono komo ya,
wara mak cesehtînosom amyamro kopi.
Eremkaxapu warai mak amyamro.
Onoke mîk ha aweremkan̂enhîrî komo okwe yaarono yewetîra awehtome so okwe?
Camkîra cma re ka mencetken̂e Xesus Kristu yamowotoponho.
2 On wara marha ka xe was awya so,
ahce wa awexirî ke so Kaan Yekatî tak mokyakn̂e aropotaka so?
Moises pen nmewretho yewetîrî ke makî katî awya so mokyakn̂e?
Xesus pona mak cenpore nasî,
kacho yentarî ke xa katî awya so mokyakn̂e aropotaka so?
Ahce wa xa mîîketu ero poko?
Ekatîmcoko ka owya.
3 Kristu yehtopo pona enîche mak awya so Kaan Yekatî mokyakn̂e aropotaka so.
Ero ke Noro tak xakn̂e awakir̂waman̂e komo me.
Ero ke ahce kacho awanme ro so mak tak awetakir̂wamatîkacho mîhtînoyat hara okwe?
Wara mak mesehtînoyatu kopi.
4 On wara mîxatken̂e Xesus pona enîn̂enhîrî,
awemetanmekyatken̂e so ro makî ka apoyino komo.
Tohnaw ro mak na ero wa awemetanmetoponhîrî komo mînîmyatken̂e okwe?
Pîra rma tko owya.
Tohnawno pîn me rma wîhtînoyasî ero yipu yînîmtopo awya so.
5 On wara marha wîîkes awya so,
Kaan xîkrî komo mokyaxe anarimaw so acheka so.
Kar̂pe Kaan Yekatî yehtopo n̂enpexe awya so.
Cirihnî n̂iir̂axe awero ro so emapona.
Ahce wa cexirî ke so ero yipu n̂iir̂at ha?
Moises pen nmewretho yewetîrî ke mak katî ero yipu n̂iir̂atu awya so?
Pîra ro mak.
Xesus pokono yentarî ke mak ero yipu n̂iir̂axe,
Noro pona enîrî ke mak ha.
Ero wa cexirî ke so mak cirihnî n̂iir̂axe.
Abraaw Pen Nakir̂wamekn̂e Kaan Tpona Enîrî Ke Mak Yîwya
6 Ero wa xa marha xakn̂e Abraaw pen hara.
Kaan pona tî n̂een̂akn̂e.
Ero ke kir̂wan me tî noro pen n̂een̂akn̂e Kaan.
7 Ero ke Kaan pona enîn̂e me kexitaw so Abraaw pen xîkrî me taxe.
Ero wa taxe.
8 Pahxa rma tî Kaan nîhtînoyakn̂e mîk hak rowon pono komo yakir̂wamacho.
On wara tî kekn̂e,
Opona enîn̂e komo wakir̂wames amn̂e,
kekn̂e.
Ero ke ero wa kakir̂wamacho n̂ekatîmyakn̂e Kaan Abraaw pen ya.
On wara tî kekn̂e yîwya,
Mîk hak rowon pono komo tak wakir̂wames amn̂e apoyero rma,
kekn̂e tî yîwya.
9 Ero wa tî xakn̂e Abraaw pen,
Kaan pona tî n̂een̂akn̂e.
Ero ke noro pen nakronomekn̂e Kaan.
Ero ke Kaan pona enîche xa marha kîwya so kakronomexe so tak kîwyam hara.
Ero wa kakronomexe so Kaan.
10 Ero warahra reha taxe Moises pen nmewretho ponaro mak kexitaw so.
Ero ponaro mak kexitaw so tîwîrîmaxmu me xa matko taxe okwe.
Ero poko rma kesî Kaan Karitan.
On wara kesî,
Apanatanmetopo komo men tan Moises nmewretho.
Ero ke ahnoro rma cewetîtîkapore nasî yîmton me ro mak.
Ewetîtîkara rma awexitaw so tîwîrîmaxmu me thakwa maxe okwe,
kes ha.
11 On wara marha kesî Kaan Karitan,
Kaan pona mak n̂een̂axe kir̂wan komo kar̂pe roro cehtome so,
kesî.
Ero ke kir̂wan me kenîhra so nai Kaan ham okwe Moises pen nmewretho yewetîtopo yanme mak kîwya so.
12 On wara kahra nasî Moises pen nmewretho,
Kaan pona mak encoko kir̂wan̂he awitome so yîwya,
kahra ro mak nasî.
On wara xa matko kesî,
On men ewetîcoko apanatanmetopo komo waipîn me awehtome so,
kesî mak.
13 Kaan nîwîrîmarî me tîxatken̂e okwe Moises pen nmewretho yewetîra kexirî ke so.
Kristu rma tko kepemetken̂e so Kaan nîwîrîmarî mera tak kehtome so hara.
Noro rma n̂ecir̂akn̂e Kaan nîwîrîmarî me kepemachome so hara.
On wara kesî Kaan Karitan,
Kaan nîwîrîmarî me naxe okwe weewe pona exewnuxapu pen komo,
weewe pona woxapu pen komo marha,
kesî.
Ero ke Kaan nîwîrîmarî me xakn̂e Kristu rma weewe pona woxapu me cexirî ke.
14 Ero wa xakn̂e Kristu Kaan nakronomarî me marha tak awitome so Xenciu komo rma.
Pahxa kakir̂wamacho komo n̂ekatîmyakn̂e Kaan Abraaw pen ya,
ero yaw roro awiri xe so xakn̂e.
Kaan Yekatî marha tak nîmyasî kîwya so tîmtapotachonhîrî yaw roro.
Xesus Kristu yakrono me kexirî ke so ero wa kwakrexe so Kaan,
Noro pona enîn̂e me kexirî ke so mak ha.
Kemîknopîra Ro Mak Xakn̂e Kaan, Kakir̂wamexe So Amn̂e, Kacho Poko
15 On wara natu tooto komo,
tîmtapotachonhîrî komo poko hara,
on wara na nîîke anarimaw tpoyino ya,
on men wîmyas amn̂e awya,
epethîmra ro mak,
kwakresî mak,
nîîke na.
Yaaro xa na nîîke yîwya.
Ero yinhîrî ahce wa tak na nîîke hara yîwya?
Epethîrî pona makî tko wîmyas awya,
nîîke katî,
Kwakresî mak,
kan̂enho ha?
Pîra ro mak,
ero wa kahra ro mak naxe tooto komo rma.
16 Taa,
onoke xa n̂etahcakn̂e Kaan tînwakrerî me ha?
Abraaw pen n̂etahcakn̂e,
noro pen yepamtho marha.
Onok poko wa kekn̂e,
Awepamthîrî,
kacho?
Awepamthîrî komo,
kahra tî xakn̂e yakeno poko.
Awepamthîrî,
kekn̂e makî tî cewn̂an poko mak.
Kristu poko mak kekn̂e yîwya,
Awepamthîrî,
kacho ha.
17 Taa,
Kir̂wan̂he men ciino wiir̂as amn̂e,
kan̂enho xa Mîk Kaan.
Ero wa kan̂enhîrî anarî me tak kekn̂e hara 430 ro yicimn̂ipuntache.
Kpanatanmetopo tak n̂ekatîmyakn̂e ero yimaw anarî men hara.
N̂esemîknoyakn̂e mak katî Kaan awya so?
Pîra ro mak.
Esemîknopîra ro mak xakn̂e.
Kakronomexe so amn̂e,
kachonho poko.
Tohnawno me cirihra ro mak xakn̂e ero poko tîmtapotachonhîrî.
18 Moises pen nmewretho yewetîn̂e komo exitaw Kaan nakir̂wamarî me towso tak nasî yîmtapotachonhîrî,
Kakronomexe so amn̂e,
kachonho.
Yaaro xa matko tî kekn̂e Abraaw ya towîhnî me ro mak okre.
Rikomo Panatanmekn̂e Wa Mak Xakn̂e Moises Pen Nmewretho
19 Ero ke ahce kacho Kaan n̂ekatîmyakn̂e hara kpanatanmetopo Moises pen ya awya so?
Tanwekn̂e me kehtopo komo yîhtînomexpo xe makî tî xakn̂e Kaan kîwya so.
Ero ke mak kpanatanmetopo n̂entamexpekn̂e.
Abraaw pen yepamtho mohtopo pona rorono makî ka mîn xakn̂e.
Miyan komo yakir̂waman̂e me nas amn̂e,
kacho Mîk xakn̂e tmohsom.
Noro mokrî pona rorono mak mîn xakn̂e kpanatanmetopo,
Moises penî nmewretho.
On wara kacho tî Kaan n̂ekatîmyakn̂e noro pen ya,
yîwya ro xa kahra tî xakn̂e.
Ancu komo makî tî ka n̂ekatîmyakn̂e,
n̂examro takî tî n̂ekatîmyakn̂e Moises pen ya.
Noro pen makîrha takî tî xakn̂e ero yekatîmn̂e me Ixaw Yana komo ya hara.
Ero wa Kaan n̂ekatîmyakn̂e kpanatanmetopo.
20 On wara tîhtînoyasî tooto mtapotarî yekatîmn̂e exitaw.
Asakî nai,
tîmtapotaxmu nai,
eyukn̂e hara.
Cewn̂an makî tko Mîk Kaan ha.
21 Ero ke ahce wa tak nai Kaanî mtapotachonho hara,
Akir̂wamano wiir̂as amn̂e,
kachonho?
N̂esemîknoyakn̂e mak katî Kaan ero wa kacho poko ha?
Pîra ro mak.
Esemîknopîra ro mak xakn̂e.
Kakir̂wama xe so rma tî xakn̂e.
Kakir̂wamara tko nasî kpanatanmetopo reha kîkariton̂e pîn me exirî ke thakwa.
Kîkariton̂e me exitaw ketaw ha re kpanatanmetopo kir̂wan̂he takî re cehcerî ero yewetîn̂e komo.
22 Kicicitho me thakwa naxe tooto komo ahnoro,
kesî Kaan Karitan.
Ero wa kesî kpoko so Kaanî mtapotacho yaw roro tak kakir̂wamachome so ahnoro.
Xesus Kristu pona enîche awya so kir̂wan me tak kiir̂axe so,
kesî Kaan kîwya so.
Ero ke ero wa kachonho yaw roro tak kakir̂wamexe so.
23 Xesus pona encoko,
kacho esentara ka exitaw wacantoxapu wara ka tîxatken̂e kpanatanmetopo ke.
Pahxan pen komo yakir̂waman̂e thakwa ka exihra xakn̂e okwe.
Amn̂e mak Xesus mokyakn̂e.
Ero ke ahrika,
awakir̂waman̂e komo ka mokope.
Noro pona tak meen̂axe amn̂e,
kan̂e wara ka xakn̂e Kaan.
24 Rikomo panatanmekn̂e wa makî ka xakn̂e Moises pen nmewretho.
On wara kan̂e wara xakn̂e,
Kicicme thakwa mai ham,
on yewetîra mas okwe,
kan̂e wara.
Ero ke Kristu pona tak ceen̂atken̂e kir̂wan me kentome so tak Kaan ya.
25 Taa,
Kristu pona enîrî ke tak kîwya so rikomo panatanmekn̂e yawhra tak taxe.
26 Kaan xîkrî me tak maxe amyamro ahnoro Xesus Kristu pona enîrî ke mak awya so.
27 On wara marha maxe Kristu yakrono me emicixapu kom ha,
Noro rma mamruyaxe aponon komo wara.
28 Cewn̂an me tak maxe Kristu yakrono me awexirî ke so.
Ero ke etîme re tak kwakrexe so Kaan.
Xutew reha amoro okre.
Amoro reha Kreku makî reha kica,
kan̂e pîn me nasî Kaan kîwya so.
Awanme ro cetapickaxmu reha amoro okre.
Tooto yanton makî reha amoro hara kica,
kan̂e pîn me marha nasî.
Kîîrî reha amoro okre,
woosîtho makî reha amoro kica,
kan̂e pîn me marha nasî Kaan kîwya so.
Noro re me mak wa taxe Kristu yakrono me re kexirî ke so.
29 On wara marha maxe Kristu yakrono me awexirî ke so tak,
Abraaw yepamtho me tak maxe okre.
Taa,
noro yepamtho me awexirî ke so tak,
Kir̂wan̂he men kiir̂axe so,
kesî marha Kaan awya so hara.
Abraaw ya kekn̂e ero wa kacho yaw roro rma kesî.
Ero wa kesî kîwya so.