1-2 On wara nasî cemyawnoyemînhîrî pen xîkîtho,

tîîm waipuche emyawnonhîrî tak nahsîyasî yîmxîkîthîrî.

Rikomo me ka exitaw yîmxîkîthîrî anarî komo yaw makî ka nasî n̂examro npor̂mamnorî me mak ha ka.

Yînantomarî komo me marha nasî.

Ero wa nasî tîîm pen yemyawnonho yahsîn̂e me cehsomu rma ha re.

Tpor̂mamche tak,

yîîm nukuknomatho cimn̂ipu,

ero wicakî exitaw ewrutoponhîrî tpor̂mamnon̂e komo yawhra tak nasî.

3 Ero wa xa marha tîxatken̂e kîwyam hara.

Rikomo wara makî ka tîxatken̂e pahxa.

Ero wa ka kexitaw so roowo pono ro ponaro makî ka tîxatken̂e.

4 Taa,

Kristu mohtopo me exitaw tak Tumumuru tak n̂en̂epekn̂e Kaan oona roowo pona.

Noro tak n̂ewruyakn̂e wooxam ropotainonho.

Moises penî nmewretho yaw rorono me rma n̂ewruyakn̂e.

5 Ero wa Kristu n̂ewruyakn̂e kepemachome so tak.

Twaihkaxmu me ka tîxatken̂e okwe kpanatanmetopo yewetîtorî poyero.

Kristu tko kepemetken̂e so Kaan xîkrî me kiitome so takî.

6 Taa,

Kaan xîkrî me awexirî ke so tak Tumumuru Yekatî tak n̂en̂epekn̂e Kaan aropotaka so.

Noro tak nîmtapowasî Kaan yakro kropotaw so rma.

Apa,

apa,

kesî yîwya.

Ero wa nîmtapowasî kropotaw so.

7 Ero ke Kaan yanton me mak exihra tak maxe.

Kaan xîkrî me xa tak maxe okre Kristu yakrono me awexirî ke so.

Ero ke Kaan yemyawno yahsîn̂e me tak maxe hara yîmxîkrî me awexirî ke so okre.

Ero wa maxe.

8 Taa,

pahxa Kaan ponarora ro makî ka mîxatken̂e okwe.

Ero yimaw Kaan pînî ro me cehsom komo yanton me mak mîxatken̂e okwe.

9 Ero warahra tak maxe oroto.

Kaan ponarono me tak maxe okre.

Kaan xa matko nas aponarono komo me.

Ero ke ahce kacho akariton̂e pîn komo pona awetow xe so mat hara kica,

awakir̂waman̂e pîn pona ha kica?

Ero yipu yanton me awexi xe so katî mat hara?

10 Kaamo tî mukuknometu.

Kir̂wan mîn kaamo,

mîîketu tî.

Kicicitho mîn hara kaamo,

mîîketu marha tî.

Ero wa xa marha tî mukuknometu nuun̂i hara,

cimn̂ipu komo marha.

Ero wa kexitaw so tawake tî nai Kaan kpoko so,

kan̂e me tî matu kopi.

11 Ahce wa tak na mehtîketu amn̂e kopi?

Ketkurekn̂e mak okwe Karasia pono komo panatanmekrî poko,

ka xehra ro mak was okwe.

12 On wara marha wîîkes awya so oyakno komo,

pahxa achew so ka oyexitaw awarai me so rma kecir̂akn̂e.

Ero ke amyamro makîrha tak ehcoko owara hara.

Oyemetanmekîra mîxatken̂e pahxa ha kapu.

13 Ero yimaw Kristu ya kakir̂wamacho wekatîmyakn̂e awya so kar̂pera oyexirî ke thakwa.

Awero ro so rma wîxakn̂e kar̂pera.

Ero wa wîxakn̂e yihcirî me ka omokuche acheka so.

14 Oyesemetanmetopo rma re meenatken̂e,

kar̂pera oyehtopo.

Wara rma Owî yîwîrîyakara ro mak mîxatken̂e.

Entara ro mak cexpore nasî Pawru mtapotarî,

kahra mîxatken̂e.

Tawake xa matko mîxatken̂e opoko.

Ancu poko eserepoketawno wa mîxatken̂e opoko.

Kristu Xesus poko tawakem wara rma mîîxatken̂e opoko.

Ero wa mîxatken̂e opoko okre.

15 Owakre xe ro mak mîxatken̂e.

Awewthîrî komo meero mîmohkacerî ha re oyewru me ciisom me.

Ero wa mehcerî ha re ero wa kewru ecirpetaw ketaw ha re.

Ero wa mîxatken̂e opoko.

Ero ke ahce kacho ahwora tak mat hara opoko oroto?

16 Aaxatî pîn kommo wara katî ow meen̂at hara yaarono ekatîmrî ke awya so?

17 Aaxatî komo wa mak nîmtapowaxe awown̂e komo.

Awakîretopo pîn komo poko makî tko nîmtapowaxe kica.

Tînpanatanmekrî me awow xe so mak naxe okwe.

Tpoko so rma ceserepokaxmu me mak awexi xe so naxe ham okwe.

18 Ceserepokapore rma nasî kir̂wan poko mak ha tko.

Miya roro ceserepokapore nasî ero yipu poko iito oyexitaw achew so,

mooxe oyexitaw marha.

19 Omxîkrî komo warai mak amyamro okwe.

Anocwan komo warai ow hara.

Pahxa ka kerewakn̂e Kaan xîkrî me awewrutopo komo poko.

Oroto kerewasî xa hara awewrutopo komo poko xa hara.

Kristu warai me xa tak awexi xe so wasî.

20 Keserepokesî apoko so.

Achew so oyexi xe cma re was oroto.

Awakro so xa tak omtapota xe wasî anarme tak ha.

Ero wa oyexi xe wasî.

21 Taa,

on wara wîîkes awya so,

Moises penî nmewretho ponarono mak amna,

mîîkexe.

Kpanatanmetopo komo yentara ma matu,

noro penî nmewretho ha?

22 On wara tî xatken̂e Abraaw pen mumuru komo Kaan Karitan wero.

Asakî tî xatken̂e noro mumuru komo.

Anarî tî xakn̂e yipici yanton xîkrî.

Anarî tî xakn̂e hara yipici ro xîkrî tak,

anton pîn xîkrî ha.

23 Yupun yanme makî tî nîmxîkwatken̂e noro yantonî reha.

Ero warahra reha n̂ewruyakn̂e anarî hara.

Kaanî mtapotacho yaw roro tak n̂ewruyakn̂e anton pîn ropotakan ha.

Ero wa tî n̂ewruyakn̂e Abraaw pen xîkrî komo.

24 Kpanatanmetopo me rma tko nasî n̂examro yehtoponho.

Kaanî mtapotacho wara rma xatken̂e.

Asakî nasî Kaanî mtapotacho kir̂wan̂he kiitopo komo pokono.

Sinai Yîpîn meretwo ka kekn̂e,

Kir̂wan̂he kiir̂axe so amn̂e omtapotarî yewetîtîkache mak awya so,

kekn̂e ha ka ero yimaw.

Ero ke ero wa kachonho ponarono komo naxe Aka pen wara rma.

Anto me thakwa naxe okwe.

25 Ero wara rma Sinai Yîpîn nosohcetu Arabia pono komo oroto,

Aka me nosohcetu.

Taa,

Sinai yîpîn po Kaan n̂entamexpekn̂e kpanatanmetopo,

ero ponaro rma naxe okwe Xerusaren pono komo.

Tanmenkera antomaxapu wa mak naxe okwe.

Ero wa naxe Xerusaren pono komo oroto,

yîmxîkrî warai komo marha.

26 Anarî nas hara Xerusaren hara,

kah yawno ha.

Knocwan komo wara rma nas ero reha.

Kanme ro so mak Kaan cewehcaxe ero pono komo reha.

27 Ero yipu poko rma kesî Kaan Karitan.

On wara kesî,

Ahwotakî amoro ewrunu ro.

Okre,

okre,

kasko amoro yîmxîtanî ro.

Mepamyasî ro mak amn̂e amoro reha ewrunu ro.

Ciin̂oyem yopo ro mak mepamyasî amoro,

kesî Kaan Karitan.

28 Ero ke Isake wara rma taxe,

oyakno komo.

Kaanî mtapotacho yaw roro rma n̂ewruyakn̂e noro Abraaw xîkrî me.

Ero wa xa marha taxe kîwyam hara.

Kaan xîkrî me taxe Noro mtapotachonho yaw roro rma hara.

29 On wara marha tî xatken̂e Abraaw pen mumuru komo,

yupun yanme ewruxapu me mak xakn̂e anarî.

Kaan Yekatî yanme ewruxapu pen tî noro nîwîrîyakekn̂e.

Ero wa xa marha naxe Kaan xîkrî pîn komo oroto.

Kaan xîkrî komo xera naxe okwe.

30 Ahce wa tko nîîke hara Kaan Karitan n̂examro poko?

On wara kesî,

Ai Abraaw,

apici yanton en̂epeko yîmrerî yakro rma.

Awemyawnonhîrî yahsîra ro mak wa nasî noro amn̂e awantonî mrerî ha.

Awanton pînî mrerî makî reha nahsîtîkesî awemyawnonhîrî,

kesî Kaan Karitan.

31 Ero ke noro yanton xîkrî warai pîn kîwyam oyakno komo.

Anton pîn xîkrî warai xa matko kîwyam.

Ero warai kîwyam.