Kaan Tak Wewehcas Okre Yiixe Oyexirî Ke Mak, Kan̂e Me Cexpore Nasî
5
Taa,
on wara wîîkes hara awya so,
on wara tî xatken̂e pahxa,
kanmenkera kantoman̂e komo thakwa cewehcatken̂e.
Kowyatken̂e so tko Kristu.
Ero ke kn̂ewetîrî pîn me tak nasî kantoman̂enhîrî komo okre.
Ero ke ero yipu yewetîn̂e me xa hara exihra ro mak tak ehcoko.
2 Ero wa wîîkes ow,
Pawru rma.
On wara marha wîîkes awya so,
awetanpikapetaw so Kristu nowtho pîn wara rma tak maxe okwe.
Ero wa wîîkes awya so.
3 On wara marha wîîkes awya so,
awetanpikapetaw so Moises penî nmewretho rma mewehcaxe,
poi mak hatko.
Ero ke ero yewetîn̂e me awexi xe awexitaw so ahnoro rma thakwa cewetîtîkapore nasî watohnî me ro mak.
4 On wara kan̂e me mat ham,
Moises pen nmewretho wewehcasî kir̂wan me tak oyehtome,
kan̂e me.
Ero wa kan̂e me awexirî ke so Kristu ponarono pîn me tak maxe okwe.
Epîrkaxapu wara tak maxe okwe,
Kaan ya awakronomachonhîrî komo ponarono mera tak maxe okwe.
Ero wa tak maxe okwe.
5 On wara xa matko taxe Kaan xîkrî komo,
Kaan Yekatî ponaro xa taxe.
Ero ke on wara tîtkexe,
Kaan xa oyakir̂wamesî Xesus pona enîrî ke mak owya,
tîtkexe.
Ero wa tîtkexe.
6 Taa,
Xesus Kristu yakrono ro me tak taxe.
Ero ke on wara kahra nasî Kaan kîwya so,
Tawake wasî apoko so etanpikaxapu me awexitaw so mak,
kahra nasî.
Tawake was apoko so etanpikan me awexitaw so mak,
kahra marha nasî kîwya so.
Xesus pona enîn̂e me awexitaw so mak tawake was apoko so,
kesî makî reha Kaan.
Etîxatî me marha taxe Xesus pona enîn̂e me kexitaw so.
Ero wa taxe.
7 Taa,
kir̂wan̂he cma re ka mîxatken̂e.
Ero warahra tak maxe okwe.
Onoke tak awahwoketken̂e so hara yaarono yewetîn̂e pîn me awesehtînotome so tak okwe?
8 Awan̂ikn̂enhîrî komo yanmera ro mak tak ero wara mesehtînoyaxe okwe.
9 On wara nasî puruma wahrututpamnotopo,
wahra mak cesmesî puruma cheka.
Ero yipu ke rma tak wahrututpamtîkesî puruma ahnoro.
10 On wara wîîkesî apoko so,
anato yîhtînopîra ro mak naxe n̂examro amn̂e,
wîîkesî.
Onok warai na mîk anarme apanatanmekn̂e komo,
noro tak men Kaan panaresî amn̂e,
wîîkesî marha.
Kporin komo rma ero wa cesehtînosom me oriyasî.
11 Yaaro tan wîîkes oyakno komo,
Etanpikapocoko men,
kan̂e me oyexitaw ketaw ha re oyemetanmekîra naxe ooxatî pîn komo.
Tpanaxkem po Xesus waihtoponho yekatîmrî poyero yîrwomra naxe ero wa kan̂e me oyexitaw ketaw ha re.
12 On wara exi xe wasî awerepokan̂e komo,
miya xe xa cetwîrîmaxmu me exi xe so wasî.
13 Oyakno komo,
yîmhokaxapu wara awehtome so wa awahsîyatken̂e so Kaan.
Ero ke ero wara rma ehcoko.
On wara kahra tko ehcoko,
Oyanme ro cehsom mak ow ha,
ero ke kesewakresî mak okre,
kahra ro mak ehcoko kica.
Apoyino komo akronomacoko xa matko yiixe so awexirî ke so okre.
14 On wara kesî Moises penî nmewretho.
Amîtwono xe esko etîxe rma masî ero wa xa marha,
kesî.
Mîn hak poko kpanatanmekyaxe so Moises penî nmewretho.
Kîmîtwono komo xe kexitaw so tko ewetîtîkan̂e me taxe ahnoro rma.
Ero wa taxe etîxe kexitaw so.
15 Ceseskaxmu wa tko tî matu amyamro okwe.
Ero wara rma awexitaw so amîtwono komo yirihtîkan̂e me tak na matu exihra cehso ro okwe.
Ero wa maxe okwe.
Kaan Yekatî Yewetîn̂e Me Kexitaw So Kicicitho Xe Kehtoponhîrî Komo Yewetîra Tak Taxe
16 Ero ke on wara wîîkes awya so,
Kaan Yekatî mak ewetîcoko.
Noro yewehcataw roro awya so kicicitho xe awehtoponhîrî yewetîra tak maxe okre.
17 Kaan Yekatî yewetî xera taxe okwe kicicitho xe kehtoponhîrî komo yewehcataw kîwya so.
Ero wa kehtoponhîrî komo yewetî xera marha taxe Kaan Yekatî yewehcataw hara kîwya so.
Cetar̂maxmu wa nasî kicicitho xe kehtoponhîrî komo Kaan Yekatî yakro.
Ero wa n̂etar̂mesî kropotaw so kir̂wan̂he kexirî komo yarohra thakwa okwe.
Ero wa thakwa taxe kir̂wan̂he kexi xatî rma.
18 Kaan Yekatî yewetîn̂e me awexitaw so Moises pen nmewretho men ewetîcoko,
kahra tak nasî Kaan awya so.
19 On wara naxe kicicitho xe cehtoponhîrî yewetîn̂e kom ha.
Ero yipu komo rma wa meen̂axe.
On wara naxe,
cipici yai ro cehsom me naxe,
ciin̂o yai ro cehsom me marha naxe wooxam kom hara.
Mîk hak pokono me mak naxe okwe.
Kicicitho pokono me naxe,
tweeno pîn me marha naxe kica.
20 Ciixaputho pokono me,
eremkano rin̂e me,
etîxatî pîn me,
etîmtaka ceseseyusom me,
ewyomano rin̂e me,
ceseisom me,
anarmen poko kpanatanmetopo ponarono me,
21 Tîyopono komo poko tpohnîmsom me,
waihkano rin̂e me,
twenîmsom me,
wara ro mak kan̂e me,
ero warai me naxe kica cehtoponhîrî yewetîn̂e komo reha.
Miya rma nasî kicicme noro yipu komo yehtopo kica.
Kaan maywen mera ro mak naxe okwe ero wa cehsom komo,
wîîkekn̂e pahxa awya so.
Ero wa wîîkesî xa hara awya so.
22 On wara taxe Kaan Yekatî yewetîn̂e me kexitaw so reha,
cepetaxmu wa tak taxe okre Noro yanme.
On wara nasî Noro yanme kepetacho,
etîxatî me taxe,
tahwore taxe,
ahwokan me taxe,
kemetanmekn̂e komo yînîmn̂e me taxe,
wakreno rin̂e me taxe,
akronomano rin̂e me taxe,
emîknono rin̂e pîn me taxe,
23 yamoro cetîrwonmesom me taxe,
wara ro mak kan̂e pîn me taxe.
Ero wara taxe Kaan Yekatî yewetîn̂e me kexitaw so.
Ero wa so exihra ehcoko kica,
kahra ro mak nasî kpanatanmetopo komo kîwya so.
24 Xesus Kristu yakrono me kexitaw so amowoxapu warai me marha tak nasî kicicitho xa kehtoponhîrî komo.
Mîn hak poko cepohkaxmu me nasî ero wa kehtoponhîrî komo,
kicicitho poko cexi xatî me marha kica.
Ero wa kehtoponhîrî komo tak nasî amowoxapu wara kr̂a.
25 Kaan Yekatî rma waipîn me kiir̂atken̂e so,
ero ke Noro yewetîn̂e me roro cehcerî.
26 On wara tko kahra ro mak cehcerî,
Ow xa ha n̂e ro kir̂wan,
kahra.
Kakno komo tîrwonmekyaxe kica ero wa ketaw kîwya so.
Kyopono komo xatî pîn me exihra marha cehcerî.
Ero wa cehcerî.